Hatursglæpur Samtakanna 78: fölsk kæra rannsökuð?

Samtökin 78 tilkynntu um hatursglæp 26. september síðast liðinn. Útlendur maður á ráðstefnu samtakanna varð fyrir líkamsárás í miðborginni, að sögn. Í frétt RÚV er haft eftir Daníel E. Arnarssyni framkvæmdastjóra Samtakanna að maðurinn hafi borið merki hinsegin fólks og samtökin ,,geri ráð fyrir að árásin hafi verið hatursglæpur." 

Strax var grunsamleg áherslan á hatursglæp. Hvernig gátu Samtökin 78 vitað um hugarfar að baki meintu afbroti? Hitt er augljóst að Samtökin 78 notuðu tilefnið til allherjarútkalls í fjöl- og samfélagsmiðlum um að Ísland væri lífshættulegt hinsegin fólki. Tilfallandi bloggaði:

Á alþingi voru öryggismál félagsmanna Samtakanna 78 rædd og fordæmt að þeir geti ekki um frjálst höfuð strokið í íslenska haturssamfélaginu. Ráðherra kvaðst ,,svolítið hræddur" um líf og limi. Allt þetta vegna atviks sem enn er á huldu hvernig bar að og með hvaða afleiðingum. Enginn er grunaður;  málið er á frumstigi rannsóknar. En ekki skortir stórkarlalegar yfirlýsingar, m.a. frá forsætisráðherra, sem gerir sér far um að ala á ótta og öryggisleysi og ásaka almenning um ofstæki.

Rannsókn lögreglu hófst þegar eftir tilkynninguna. Meintur brotaþoli fór úr landi hálfum öðrum sólarhing eftir atvikið, að sögn með tannskemmdir, og hefur ekkert til hans spurst. Eftir stendur tilkynning um alvarlegan glæp.

Grímur Grímsson yfirlögregluþjónn sagði rúmum tveim vikum eftir meintan atburð að ,,mjög óvanalegt" væri að líkamsárás af þessum toga væri ekki upplýst. Í viðtengdri frétt mbl.is, rúmum tveim mánuðum eftir atvikið, er málið enn óupplýst.

Líkur standa til þess að meintur hatursglæpur verði aldrei upplýstur. Einfaldlega af þeirri ástæðu að engin líkamsárás átti sér stað. Tilfallandi tilgáta er að útlendi ráðstefnugesturinn hafi orðið fyrir slysi, e.t.v. vegna rafhjóls, og það hafi í meðförum Samtakanna 78 orðið að hatursglæp.

Stóra spurningin er hvort rangar sakargiftir verði rannsakaðar. Eða hvort málið verði fellt niður.

Lögreglan leitar enn að árásarmönnum

Hamas-öskur í Háskóla Íslands

Háskóli Íslands fóstrar öfgar og leyfir að aðsúgur sé gerður að ráðherrum í háskólabyggingum. Tvær stofnanir Hí stóðu að hátíðarfundi. Skipuleggjendur gerðu ekkert til að koma í veg fyrir aðför að utanríkisráðherra. Aftur fékk Katrín forsætis viðvörun um að mæta ekki.

Samkvæmt útgefinni dagskrá átti Katrín að flytja opnunarávarp og taka þátt í pallborðsumræðum. Forsætisráðherra fékk veður af hvað var í vændum og mætti ekki.

Uppákomuna í gær ber að skoða í ljósi nýlegrar yfirlýsingar þriðjungs akademískra starfsmanna HÍ. Tilfallandi bloggaði

Einir 315 starfsmenn Háskóla Íslands, um þriðjungur akademíska starfsliðsins, skrifa undir yfirlýsingu sem gæti verið saman á sellufundi Hamas. Ísrael er kennt við nýlendustefnu, þjóðarmorð og stríðsglæpi. Ekki eitt orð um fjöldamorðin 7. október. Norðurslóðadeild Hamas starfar af krafti í Háskóla Íslands. Á meðan hryðjuverkasamtökin eiga slíka bakhjarla vítt og breitt á vesturlöndum er engin hætta á öðru en að þau láti áfram til sín taka og leggi á ráðin um frekari fjöldamorð.

Aðdáendur Hamas í HÍ sjá í gegnum fingur sér að íslamistar nauðgi konum í gíslingu og drepi börn á brjósti. En þegar dropi af palestínsku blóði spillist í sjálfsvörn Ísraels gengur allt af göflunum. 

Deila gyðinga og araba er í grunninn nauðaeinföld. Á meðan arabar viðurkenna ekki tilvist Ísraelsríkis varir stríðsástandið. Arabar fá víðtækan stuðning i menningarheimi múslíma og vinstrimanna á vesturlöndum við kröfuna um að Ísrael skuli afmáð af landakortinu. 

Eini maðurinn sem í gær gekk hnarreistur frá öfgahælinu vestur á melum er Bjarni Benediktsson utanríkisráðherra. Bjarni sagði að viðskilnaði ,,Al­mennt finnst mér bara gott að fólk tali sam­an og öskri ekki á hvert annað." Hamas-öskur er frummennska án siðmenningar.

 

Bjarni: „Ráðstefnan var yfirtekin af mótmælendum“

RÚV ritskoðar í þágu Sigríðar Daggar Airbnb-drottningar

Viðtengd frétt mbl.is er með eftirfarandi fyrirsögn: ,,Sjálfsagt að breyta reglugerð um Airbnb ef þarf." Vísir er með sama fréttamálið. Fyrsta setningin er svohljóðandi: ,,Fjármálaráðherra segir að rétta þurfi samkeppnisstöðu AirBnB..."

Bæði Moggi og Vísir telja Airbnb stóra atriðið í fréttinni, sem fjallar um svindl og lögleysu í skammtímaleigu til ferðamanna. RÚV tekur öðruvísi á fréttinni. Airbnb kemur ekki fyrir í fyrirsögn og heldur ekki í inngangi. Í ítarlegri frétt RÚV kemur Airbnb aðeins einu sinni fyrir, í síðustu setningu fréttarinnar.

Ritstjórnir Mogga og Vísis telja báðar að Airbnb sé aðalmálið í fréttinni, og setja það í fyrirsögn og inngang. RÚV á hinn bóginn grefur Airbnb neðst í sinni frétt, þegar flestir eru hættir að lesa.

Skýringin á stórundarlegu fréttamati RÚV er að á Efstaleiti starfar sjálf Airbnb-drottningin Sigríður Dögg Auðunsdóttir. Hún er fréttamaður RÚV og að auki formaður Blaðamannafélags Íslands.

Sigríður Dögg stundaði víðtæka Airbnb útleigu á íbúðum og herbergjum til ferðamanna. Útleigan á Suðurgötu 8 í miðbæ Reykjavíkur líktist meira rekstri gistiheimilis en aukabúgrein fréttamanns. Starfsemin var ólögleg og enginn skattur greiddur af rekstrinum. Þegar upp komst fékk Sigríður Dögg sérmeðferð hjá skattrannsóknastjóra, fékk sekt en slapp við ákæru. Sigríður Dögg neitar að tjá sig þegar hún er spurð.

Stefán útvarpsstjóri játar fyrir stjórn RÚV að hafa rætt við Sigríði Dögg um skattamálin en ekkert meira sé að frétta. Ekki skal ræða skattsvikin frekar. Fréttamenn RÚV hlýða og ritskoða fréttir að ráði útvarpsstjóra. Airbnb skal helst ekki nefna í fréttum RÚV. Það gæti komið kusk á hvítflibba útvarpsstjóra og blettur á mussu Sigríðar Daggar.

Sigríði Dögg er umhugað að fólk borgi skatta. Henni er sérlega annt um að heilbrigðiskerfið sé vel fjármagnað. Árið 2014 skrifaði hún grein í Vísi og sagði: ,,Ég styð læknana. Ég vil að við borgum samkeppnishæf laun hér á landi." Í vor var Sigríður Dögg aftur á ferðinni í fjölmiðlum og kvartaði sáran undan lélegri heilbrigðisþjónustu.

En á milli 2014 og 2023 rak Sigríður Dögg umfangsmikla útleigu á Airbnb og borgaði ekki skatta lögum samkvæmt. Fréttamaður RÚV og formaður Blaðamannafélags Íslands krefst heilbrigðisþjónustu sem fjármögnuð er með skattfé en sjálf svíkst Sigríður Dögg um að greiða skatta. Stefán útvarpsstjóri og fréttastofa RÚV láta athæfið gott heita og eru meðvirk.

Svona framkoma ríkisfjölmiðils yrði hvergi liðin í vestrænu lýðræðisríki. En RÚV ræður ferðinni í opinberri umræðu á Íslandi. Allt sem minnir á lögbrot RÚV og fréttamanna skal ritskoðað.

 

Sjálfsagt að breyta reglugerð um Airbnb ef þarf

Stefán birtir ekki fundargerð RÚV: vantraust á fréttastofu

Stefán Eiríksson útvarpsstjóri tilkynnti á Bylgjunni 1. nóvember síðast liðinn að hann hygðist hætta er skipunartími hans rennur út eftir hálft annað ár. Sjaldgæft er að forstöðumenn ríkisstofnana gefi út slíka yfirlýsingu með löngum fyrirvara. Bæði stofnu og forstöðumann setur niður. Starfsemin verður ómarkvissari og langtímaáætlanir marklausar ef enginn veit hver stendur í brúnni næstu árin.

Stefán tilkynnti fyrirhugað brotthvarf viku eftir stjórnarfund RÚV 25. október. Fundartímar stjórnar RÚV lúta föstu skipulagi, eru á fjórða miðvikudegi hvers mánaðar. Ekki hefur enn birst fundargerð af októberfundinum á vef RÚV. Óvanalegt er að fundargerðir stjórnar RÚV séu óbirtar sjö vikum eftir fund. Fundurinn þar á undan, 27. september, var sérstakur. Vantrausti var lýst á fréttastofu RÚV. 

Tilfallandi gerði fundargerðina frá 27. september að umtalsefni og sagði

Stefán varð fyrir álitshnekki á stjórnarfundi RÚV 27. september síðast liðinn. Tvö mál, sem útvarpsstjóri setti ekki á dagskrá, voru tekin fyrir undir dagskrárliðnum ,,önnur mál."

Fyrra málið, skattsvik Sigríðar Daggar fréttamanns, hefur tilfallandi bloggað um. Útvarpsstjóri reyndi að þagga málið niður, vildi ekki hafa það á dagskrá fundarins. Ónafngreindur stjórnarmaður tók mál Sigríðar Daggar upp að eigin frumkvæði.

Seinna málið, sem útvarpsstjóri setti ekki á dagskrá, er lögbrot fréttamanna RÚV sem mynduðu einkalóð á leyfis viðkomandi. Tilefnið var frétt um blóðmerarhald. Stefán hafði ekki fyrir því að kynna sér málið, segir í fundargerð.

Í báðum tilvikum er neyðarlegt fyrir útvarpsstjóra að svara fyrir alvarleg mál á fréttastofu RÚV undir liðnum ,,önnur mál." Ef Stefán væri með puttann á púlsinum hefði hann sjálfur sett málin á dagskrá, t.d. undir liðnum ,,minnispunktar útvarpsstjóra." En útvarpsstjóri er æ meira úti á þekju í umræðunni.

Til að ekkert færi á milli mála að traust á útvarpsstjóra færi ört þverrandi lét varaformaður stjórnar RÚV, Ingvar Smári Birgisson (ISB) bóka eftirfarandi í fundargerðina:

ISB árétti mikilvægi þess að fréttastofa starfi í samræmi við lög og virði friðhelgi borgaranna í hvívetna.

Eiturpillunni er beint að fréttastofu RÚV sem er bendluð við alvarlega glæpi, byrlun Páls skipstjóra Steingrímssonar og stuldi á síma hans.

Getur verið að fundargerðin frá októberfundinum sé ofurviðkvæm og þess vegna ekki birt? Hún gæti varpað ljósi á tilkynningu Stefáns viku síður um að hann hygðist hætta störfum á Efstaleiti. Stefán er aðeins útvarpsstjóri að nafninu til eftir tilkynningu um starfslok.

 

Skipbrot vinstrikennslu: ólæsir nemendur

Grunnskóli sem kennir ekki börnum að lesa er ónýtur. Formaður KÍ mun aldrei viðurkenna staðreyndina enda ber hann aðra hagsmuni fyrir brjósti en barna og foreldra.

Pisa-könnunin sýnir Ísland í ruslflokki er kemur að lestri. Um helmingur 15 ára drengja (47%) getur ekki lesið sér til gagns, þriðjungur stúlkna (32%) er í sömu stöðu. Í þúsundavís býr grunnskólinn til einstaklinga sem eru ósjálfbjarga að afla sér þekkingar með lestri. Ef grunnskólinn væri einkafyrirtæki yrðu allir stjórnendur reknir og helmingur starfsmanna færi sömu leið. En grunnskólinn er ekki einkafyrirtæki heldur samfélagsverkefni. Stjórnendum og kennurum eru settar skorður úreltrar hugmyndafræði.

Ástæðan fyrir grunnskólaeymdinni er skipbrot kennslufræði vinstrimanna sem leggur meira upp úr félagspólitísku uppeldi en menntun. Vinstrikennslan tekur upp á arma sína ýmiskonar sérvisku á hverjum tíma, s.s. kynja- og loftslagsmál og fjölbreytileika, á kostnað grunnfærni í lestri, skrift og reikningi. Sérviskan á greiða leið inn í skólakerfið, enda meira og minna í höndum vinstrimanna og hefur lengi verið.

Félagspólitíska kennslufræðin, vinstrikennslan, hélt innreið sína í skólakerfið á síðasta fimmtungi 20. aldar. Markmiðin voru virðingarverð, að skólinn félagsmótaði ungmenni í þágu samfélags sem einsetti sér jafnræði, jafnrétti og lýðræði. Íslenskt samfélag var tiltölulega einsleitt á þeim tíma sem vinstrikennslan varð ráðandi.

Ekki aðeins breyttist samfélagið heldur einnig vinstripólitík. Fram undir síðustu aldamót var vinstripólitík samofin verkalýðsbaráttu um efnahagslegan og félagslegan jöfnuð. Eftir aldamót ræður ferðinni viðrinispólitík t.d. alþjóðahyggja, ESB-ást, kynjakölt og loftslagsfirra.

Samfélagið er með allt öðrum brag en fyrir síðustu aldamót. Einsleitnin er farin og kemur ekki aftur. Skólakerfið er óbreytt og ónýtt fyrir þær aðstæður sem uppi eru í samtímanum.

Ólöf Sig­ur­björg Sig­urðardótt­ir kennari og skólastjóri til 30 ára lýsir grunnskólanum með þessum orðum:

Það er eitt­hvað sem of oft er ósagt að mjög víða í kennslu­stund­um er ástandið grafal­var­legt, mikið aga­leysi og mik­il upp­lausn. Það eru ör­fá­ir nem­end­ur sem líður mjög illa og illa geng­ur að ná til, þeir trufla mikið og ár­ang­ur­inn eft­ir því. Bæði hjá þeim og hinum sem ekki ná að sinna nám­inu á meðan.

Ólöf Sigurbjörg lýsir ástandi skólamála þar sem nemendum er þurfa sérúrræði er blandað saman við nemendur sem í standi eru til að öðlast menntun. Samkvæmt kreddum vinstrikennslunnar skal öllum hrært saman. Allir tapa. Nemendur sem þurfa aðra umgjörð en allur þorri ungmenna fær hana ekki ekki og venjulegir nemendur fá ekki sómasamlega kennslu. Verkefni kennara verður ekki kennsla heldur bráðaviðbrögð við upplausnarástandi.

Svarið við ófremdarástandinu er að skólinn aðgreini og láti lönd og leið úreltar hugmyndir um félagsmótun. Félagspólitísk markmið eiga að fara í ruslið en grunnfærni í öndvegi. Börn sem ekki eru í stakk búin að glíma við námsefnið fái sérúrræði en hin menntun en ekki samverustundir með sérvisku á námsskrá.

Vinstrimenn, sem enn eru ráðandi í skólakerfinu, munu ekki viðurkenna að samfélagið sem þeir hafa óskað sér síðustu 30 ár, og kenna við fjölmenningu, þýðir aðgreindan skóla. Fjölmenning er andstæða einsleitni. Í meintu fjölmenningarsamfélagi koma börnin misvel undirbúin frá foreldrahúsum að takast á við lærdóm, svo sem  að lesa, skrifa og reikna. Af þeirri staðreynd leiðir að einn og sami skólinn hentar ekki öllum. Það þarf að aðgreina.

Grunnskólinn heldur áfram að útskrifa ósjálfbjarga nemendur á meðan ekkert er að gert.

   

 

 

 

Virðist einhverra hluta vegna ekki hafa skilað sér

Úkraína tapar, segir Stoltenberg

Búið ykkur undir slæmar fréttir frá Úkraínu, segir Stoltenberg framkvæmdastjóri Nató. Úkraína gefur eftir á nær allri víglinunni sem er um 1000 km löng. Það hallar á Úkraínu í mannafla. Skotfæraskortur stórskotaliðs gerir vart við sig, en stríðið er einkum háð með þungavopnum. 

Tvennt annað gerir Úkraínumönnum sérstaklega erfitt fyrir. Í fyrsta lagi þverr stuðningur frá vestrinu. Vopn, vistir og fjármagn renna ekki í jafn stríðum straumi til Garðaríkis og fyrstu mánuði stríðsins, sem verður tveggja ára í febrúar. Í öðru lagi er vaxandi óeining í Kænugarði. Selenskí forseti er gagnrýndur opinberalega, t.d. af Klitskó, borgarstjóra höfuðborgarinnar. Salusní yfirhershöfðingi er sagður í viðræðum við Rússa um friðarsamninga án aðkomu forsetans.

Ofmælt væri að segja Úkraínuher að hruni kominn. Þótt fréttir séu af liðhlaupi eru þær ekki af umfangi er gefur tilefni til að halda að uppgjöf sé yfirvofandi. Þrátt fyrir erfiða stöðu og skort á hergögnum er ekki annað að sjá en Úkraínuher sé enn vel bardagahæfur.

Á hinn bóginn. Ef baklandið gefur eftir, stjórnkerfið í Kænugarði, bitnar það fyrr en síðar á framlínuhermönnum. Öll opinber kerfi, hvort heldur efnahagskerfi eða varnarmál, þola óstjórn og óreiðu að einhverju marki. Fjárveitingar frá Bandaríkjunum og Vestur-Evrópu halda innviðum Úkraínu gangandi og flestir fá sneið af kökunni. Viðtengd frétt gefur vísbendingu um að fjárstreymið, sem þegar hefur minnkað, verði enn minna á næstunni. Það gæti riðið baggamuninn. Eldmóð hugsjóna þarf á vígvellinum en heimavígstöðvarnar ganga fyrir fjármagni.

Þrýst er á Úkraínustjórn að fá Rússa að samningaborðinu til að bjarga því sem bjargað verður. Í erfiðri stöðu, að ekki sé sagt vonlausri, líktust samningar meira uppgjafaskilmálum fremur en friðarsamkomulagi. Hvað ef Pútín Rússlandsforseti sé áhugalaus um samninga? spyr þýska útgáfan Die Welt. Rússar telja sig á sigurbraut. Fjölmiðlar í Bjarmalandi birta greinar um eftirmála uppgjafar Garðaríkis.

Slæmu fréttirnar, sem Stoltenberg Nató-stjóri boðar, gætu verið upphafið að endalokum Úkraínustríðsins. Að lokum enda öll stríð með friði. En sum ríki er áttu sér tilvist fyrir stríð lifa ekki af friðinn.

 

 

Stuðningur við Úkraínu gæti þurrkast út

Ósannað að maðurinn valdi hlýnun jarðar

Tilgátan að losun mannsins á koltvísýringi, CO2, valdi hlýnun jarðar er ósönnuð. Væri tilgátan sönnuð þyrfti enga Grétu Thunberg til að reka áróður. Um 1800 vísindamenn og sérfræðingar skrifa undir yfirlýsingu um að engin loftslagsvá vofi yfir. Ef það væru svo að manngerð hlýnun væri sönnuð færi starfsferill þessara 1800 vísindamanna og sérfræðinga beint í ruslið. Tveir Nóbelsverðlaunahafar eru í hópnum. 

Richard Lindzen, einn þeirra er skrifa undir yfirlýsinguna, segir enga hamfarahlýnun. Heimurinn hefur hlýnað um eina gráðu frá lokum litlu ísaldar, um 1900. Það eru ekki hamfarir heldur eðlileg þróun.

Annar sem skrifar undir er Ian Plimer. Á einni glæru (3:20) í nýlegum fyrirlestri útskýrir Plimer hvers vegna tilgátan um manngerða hlýnun er út í bláinn, fær aldrei staðist.

97 prósent af öllum koltvísýringi í andrúmsloftinu er náttúrulegur. Aðeins 3 prósent er manngerður. Þessi þrjú prósent geta ekki stjórnað hitafari jarðkringlunnar nema menn trúa í leiðinni að 97 prósentin, þau náttúrulegu, hafi ekki áhrif. Áróðurinn fyrir loftslagsvá tekur ekki mið af náttúrulegum ferlum, einblínir á útblástur af mannavöldum, sem er sáralítill af heildinni, eða 3 prósent.

Koltvísýringur í andrúmslofti jarðar mælist um 400 ppm. Einingin ppm stendur fyrir hlutfall af milljón (parts per million). Yfirfært í prósentur er 400 ppm 0,04 prósent. Dæmi eru um margfalt hærra hlutfall koltvísýrings löngu fyrir daga mannlífs á jörðinni. 

Ef koltvísýringur, CO2, tvöfaldaðist í andrúmsloftinu, úr 400 ppm í 800 ppm, myndu gróðurhúsaáhrifin aðeins aukast um 1%, segir loftslagsvísindamaðurinn William Happer. Meðalhiti jarðarinnar gæti hækkað um 0,75 gráður. Ef eitthvað yrði það til bóta fyrir líf jarðarbúa. Í jarðsögunni hafa yfir 9000, níu þúsund, ppm af CO2 mælst í andrúmslofti.

Vísindi eru, eða eiga að vera, þekking sem hægt er að sannreyna. Trúarbrögð eru aftur ósannanleg, menn verða að trúa án sannanlegrar þekkingar. Loftslagsvá er trúarkredda án vísindalegrar undirstöðu.

 

 

Forseti COP28 sagður afneita hlýnun jarðar

Hamingjuskipti Miðflokks og Vinstri grænna, þögul umpólun

Á einu ári stekkur Miðflokkurinn úr 3,4 prósent fylgi í þjóðarpúlsi Gallup í 9,4 prósent. Miðflokkurinn mælist þriðji stærsti flokkurinn, á eftir Samfylkingu og Sjálfstæðisflokki.

Um mitt ár skrifaði tilfallandi:

Fylgið í ár fer ekki upp og niður heldur er tröppugangurinn jafn upp á við. [...] Vöxtur Miðflokksins, ekki mikill en samt vel mælanlegur og stöðugur, gæti orðið að stærri frétt þegar líður á árið.

Hvað skýrir framgang Miðflokksins? Ekki er það að fjölmiðlar hampi flokknum. Þvert á móti leggja þeir sig í líma við að segja sem minnst af fylgisaukningunni. Ekki heldur er flokknum strokið meðhárs á samfélagsmiðlum.

Miðflokkurinn fær stuðning þögla hópsins í samfélaginu sem lætur ekki upphlaupsmálin glepja sig. Þeir þöglu sjá í formanni Miðflokksins, Sigmundi Davíð, málsvara er lætur ekki hávaðafólkið segja sér fyrir verkum. Eitt lítið nýlegt dæmi er að Sigmundur Davíð tók upp hanskann fyrir löngu látinn mann sem góða fólkið vill steypa af stalli.

Samfylkingin fer með himinskautum í skoðanakönnunum síðustu misserin. Mælist stærstur flokka, er nú með rúm 28 prósenta fylgi. Togkraftur kratanna lætur Sjálfstæðisflokkinn ekki ósnortinn sem gerist sósíaldemókrataískur. Þegar við bætist að forystuskipti eru yfirvofandi í móðurflokknum er líklegt að hægrimenn, einkum þeir íhaldssömu, leiti á mið Miðflokksins. 

Miðflokkurinn er sumpart það á hægri ás stjórnmálanna sem Vinstri grænir eru á vinstri ásum. Flokkarnir tveir, hvor á sínum vængnum, reyna fyrir sér með ítrustu samþykktu málefni hægrimanna annars vegar og hins vegar vinstrimanna. Hvorugur flokkurinn er öfgaflokkur, þótt oft sé það uppnefni á vörum andstæðinganna. Ekki heldur eru þeir harðlínuflokkar. En það má kenna ítrustu málefni, þau er þykja stofuhæf, við flokkana tvo. 

Svo dæmi sé tekið. Vinstri grænir taka undir kynja-költið, að kynin séu fleiri en tvö og hægt sé að fæðast í röngum líkama. Miðflokkurinn er öndverður og talar fyrir sjónarmiðum heilbrigðar skynsemi. Til samanburðar reyna bæði Samfylking og Sjálfstæðisflokkur að leiða kynja-költið hjá sér, vilja ekki stuða umburðalyndið gagnvart and-raunsæi. Hvorugur stóru flokkanna þorir að styggja kjósendahópa og bjóða upp á moðsuðu og afslátt frá meginreglum. Miðflokkur og Vinstri grænir eru skeleggari. Sama gildir um annað hitamál, kennt við loftslag. Köld skynsemi Miðflokksins gegn trúarkreddum Vinstri grænna. Hálfvelgjan markar afstöðu stóru flokkanna.

Ólík vegferð Vinstri grænna og Miðflokksins á lendum skoðanakannana árið 2023 er vísbending um það sem koma skal kosningaveturinn 2024-2025. Miðflokkurinn hefur meira en tvöfaldað fylgið sitt, sem fyrr segir. Vinstri grænir eru við fimm prósentin, aldrei mælst minni.

Íslensk stjórnmálaviðmið þokast til hægri, hægt en örugglega. Tilfallandi íhaldsmenn kvarta ekki undan þeirri þróun.

Samfylkingin hlyti flest atkvæði

Kynvitund nýbura

Í nýju tölvukerfi fyrir breskar ljósmæður að skrá nýbura er ekki gert ráð fyrir kyni, sveinbarni eða meybarni, heldur kynvitund, ,,gender identity". Telegraph upplýsir.

Lifandi nýburi er með meðvitund, annars væri barnið andvana fætt. Meðvitund og líkami eru samstofna. Ef annað vantar er ekkert líf. Barnslega einfalt að skilja. Sumir fullorðnir eru að vísu úti að aka í þessum málum sem öðrum.   

 

Sumir segja að barn geti fæðst af röngu kyni. En sé það hægt fylgir sjálfkrafa möguleikinn að fæðast með ranga meðvitund. Hvers vegna heldur enginn fram að stundum sé líkaminn réttur en meðvitundin röng? Hér er á ferðinni skekkja er bíður leiðréttingar. Einstaklingar með ranga meðvitund eiga að fá sinn samastað í litrófi fjölbreytileikans. Annað er mismunun.

 

Tilfellið er, vitanlega, að börn fæðast hvorki í röngum líkama né með ranga meðvitund. Líffræðilega er það ómögulegt. Þótt breytileiki sé á nýburum lifandi fæddum er alltaf þetta tvennt: meðvitund og líkami. Að því marki sem meðvitundin er hlutlæg heilastarfsemi er hún samkynja líkamanum. Sá hluti sem ekki er efnislegur, hugsunin, er kynlaus.

 

Aftur er allt hægt með ímynduninni. Í skapandi leikjum eru börn oft aðrar tegundir en homo sapiens; hlébarðar, gíraffar, slöngur og skordýr. Fullorðnir gera sér að leik að verða oggulitlir í glensinu. ,,Og ef ég væri orðinn lítil fluga ... ég eflaust gæti kitlað nefið þitt," er enn raulað af alþýðu manna.

 

Hvað er þetta með kynvitund nýbura í Bretlandi? Jú, samkvæmt áreiðanlegum heimildum úr innsta hring innvígðra,  urðu þau leiðu mistök í landi Darwins að kyn og tegund víxluðust í nýja forritinu. Ljósmæður, eftir að villan verður leiðrétt, skrá nýbura eftir tegundarvitund, ,,species identity". Þetta er rökrétt afleiðing þegar ímyndunin leikur lausum hala í raunheimi.

 

Foreldrar verða spurðir, enda nýburi ómálga. Er barnið þitt hæna, slanga, fluga, ljón, hestur, hundur eða köttur? Kannski risaeðla?

Vanskil eru ekki mannréttindi

Óreiðufólk í fjármálum gerir lán skilvísra dýrari en ella. Lífeyrissjóður sem lánar vanskilafólki gengur á eigur sjóðsfélaga, þeirra sem eiga sjóðinn og treysta á hann til framfærslu.

Ekkert samhengi er á milli óreiðufólks í fjármálum annars vegar og hins vegar launatekna og eigna. Efnalitlir geta verið óskilvísir jafnt sem þeir efnameiri.

Þeir sem einu sinni standa ekki í skilum eru líklegir til að falla aftur í sömu gryfju, að greiða ekki skuldir sínar.

Það liggur í augum uppi að skilja þarf sauðina frá höfrunum. Lánastofnanir, hvort heldur bankar eða lífeyrissjóðir, verða að vita hverjum er treystandi og hverjum ekki. Það er engin sanngirni að skilvísir fái sömu meðferð og skuldseigir.

Að því sögðu er vitanlega krafa að meðferðin á fjármálasögu fólks sé málefnaleg.

Telja Creditinfo hafa farið á svig við leyfi