Einn hælisleitandi, hálfur ættbálkur fylgir

RÚV, auðvitað, slær upp þeirri frétt að palestínskur hælisleitandi bíði í ofvæni eftir að fá fjölskylduna sína hingað til lands, á kostnað íslenskra skattborgara, auðvitað.

Af mynd af hælisleitandanum Naji Asar að dæma er hann á fertugsaldri. Hann gæti átt konu og kannski eitt til tvö börn, skyldi ætla. En nei, hér ekki ekki verið að tala um vestræna kjarnafjölskyldu. Gefum RÚV orðið:

Fjölskylda Naji sem hefur fengið alþjóðlega vernd hér á landi telur 8 manns, 5 fullorðna og 3 börn. Naji sótti um fjölskyldusameiningu fyrir 13 aðra fjölskyldumeðlimi fyrir rúmlega ári síðan og fékk vilyrði í október.

Einn hælisleitandi kemur til Íslands. Í nafni fjölskylduverndar koma 21, já tuttugu og einn, í viðbót. Þetta er ekki fjölskyldusameining heldur ættarmót.

Síðan hvenær er það stefna íslenskra stjórnvalda að hleypa hálfum og heilum ættbálkum inn í landið, sem í ofanálag hafa framandi siði er illa eða alls ekki semja sig að vestrænum samfélögum?

Samkvæmt tölfræði Útlendingastofnunar eru Palestínumenn þriðji stærsti hópurinn sem sækir um hælisvist á Íslandi. Ef hverjum hælisleitanda frá Palestínu fylgja heilu og hálfu ættirnar er um að ræða áhlaup til að skipta um þjóð í landinu. Hefur íslenskur almenningur verið spurður um þessa þjóðfélagstilraun?

 

Vinstrimenn gegn hinsegin hátíð, styðja feðraveldi

Júróvisjón er alþjóðleg hinsegin hátíð og hefur lengi verið. Enginn hommi með sjálfsvirðingu lætur ógert að hafa skoðun bestu söngvunum ár hvert. Vinstrimenn á Íslandi mótmæla að íslenskur sönghópur stígi á sviðið næsta ár. Ástæðan er stríð Hamas við Ísrael.

Hams stjórnar Gasa-ströndinni, gerðu þaðan árás 7. október á Ísrael, drápu um 1400 almenna borgara í fjöldamorðum og tóku á þriðja hundrað gísla, þar á meðal konur og börn. Ísraelsher gerði innrás í Gasa til að frelsa gísla og uppræta hryðjuverkasamtökin.

Mótmælin gegn þátttöku Íslands í Júróvisjón á næsta ári eru til stuðnings Hamas. Vinstrimenn telja ótækt að Ísland deili sama sviði og Ísrael.

Samkynhneigðir, og aðrir sem kalla sig hinsegin, geta um frjálst höfuð strokið í Ísrael. Annað gildir um Gasa-ströndina undir ráðstjórn Hamas. ,,Orðið á götunni er að ekki eru nógu mörg háhýsi í Gasa uppistandandi til Hamas geti lengur drepið homma með því að fleygja þeim fram af efstu hæð," segir Douglas Murray, sjálfur samkynhneigður. Hann bætir við: ,,það er ekki hægt hægt að vera hinsegin og styðja Hamas. Þú verður að velja."

Murray segir í framhaldi ýmislegt um vinstrimenn sem þykjast hlynntir mannréttindum en styðja herskáa íslamista eins og Hamas. Fæst er prenthæft. Í viðtali Chris Williamson við Murray bar einnig á góma femínista er krefjast frjálsra fóstureyðinga en styðja Hamas. Í Gasa eru fóstureyðingar bannaðar. Palestínskar konur fara til Ísrael vilji þær þungunarrof.

Hamas er íslamskt feðraveldi. Almennt gildir í trúarmenningu múslíma að konan er undirsett karlinum. Múslímaríki skrifa ekki upp á mannréttindayfirlýsingu Sameinuðu þjóðanna. Mannréttindaskrá múslímaríkja, Kaíró-yfirlýsingin, segir skýrt og ótvírætt að eiginmaðurinn sé ábyrgur fyrir heimili og fjölskyldu (gr. 6 b). 

Vestræn mannréttindi og hugmyndafræði Hamas eru andstæður. Vinstrimenn sem styðja Hamas eru í mótsögn við sjálfa sig, standi þeir á annað borð með mannréttindum. Ef tvöfalt siðferði væri stjórnmálaflokkur héti fyrirbærið Vinstriflokkurinn. 

 

Óeðlilegt ef Rúv hlustar ekki á ákallið

Sauðaskýring Þorsteins

Hrútskýring er þegar karl talar niður til konu. Sauðaskýring er hjálpræði karls sem hleypur undir pilsfald kynferðis þegar honum verður á í messunni.

Þorsteinn V. Einarsson kynjafræðingur sigaði netlýð, fylgjendum sínum, á konu, starfsmann Bónuss, sem tók ekki bók kynjafræðingsins í sölu hjá verslunarkeðjunni.

Nú segist Þorsteinn sorrí og skrifar

Þótt ég beiti mér mark­visst femín­ískt og tali um karllægt yf­ir­læti, til­kall og skaðlega karl­mennsku þá er ég í grunn­inn karlremba. [...] Þá á ég það til að kallakall­ast yfir mig og jafn­vel valta yfir fólk.

Kynjafræðingurinn fer býsna nærri að kalla femínista tillitslausa yfirgangsseggi sem eiga til að springa úr frekju. Hinum þræðinum viðurkennir Þorsteinn að kynjaorðfærið sem honum er tamt sé aðeins skálkaskjól.

Orðavaðallinn, ,,beiti mér markvisst femínískt", er játning að sigla undir fölsku flaggi. Vera eitt en þykjast annað. Þorsteinn afhjúpaði sig með ljótu athæfi, hvatti fylgjendur sína að ofsækja saklausa konu. Bítur svo höfuðið af skömminni með tilkynningu um að hann geti ekki hamið karlinn í sjálfum sér. Fæstir karlar skipuleggja stafrænar ofsóknir gegn fólki. Netníðingar eru fámennur hópur af báðum kynjum, ekki þekktur af mannúð og hófstillingu.

Sauður er geltur hrútur. Kynjageldingurinn Þorsteinn má vita að yfirgangur og ótukt veltur ekki á líffræði heldur dómgreind og siðferðisvitund.

Þorsteinn biður starfsmann Bónuss afsökunar

Úkraína gerir Rússland að stórveldi

Eftir kalda stríðið var Rússland afgangurinn af Sovétríkjunum. Alþjóðleg hugmyndafræði, kommúnismi (þýskur uppruni), fjötraði rússnesku þjóðarsálina. Lofaði í staðinn nýrri manngerð, sósíalíska öreiganum, er skyldi frelsa heiminn frá kapítalisma. Ævintýrið endaði út í mýri eins og aðskiljanlegir ismar gera jafnan.

Fyrsta áratuginn eftir fall Sovétríkjanna var Rússland leiksoppur vestrænu stórveldanna og auðmanna er deildu á milli sín ríkiseigum. Eftir aldamót batnaði efnahagsástandið og upplausnin hjaðnaði. En Rússland, sem hafði litið á sig sem stórveldi allt frá 19. öld og jafnvel fyrr, var hvorki fugl né fiskur. Bandaríski öldungadeildarþingmaðurinn John McCain sagði að Rússland væri stór bensínstöð er þættist þjóðríki. Obama Bandaríkjaforseti var rausnarlegri, sagði árið 2014 Rússland héraðsveldi í Austur-Evrópu.

Úkraínudeilan var að taka á sig mynd þegar Obama skilgreindi fyrrum stórveldi sem héraðsveldi. Innlimun Rússa á Krímskaga var nýafstaðin og efnahagsþvinganir af hálfu vesturveldanna á dagskrá. Stefna vesturvelda var að beita efnahagsmætti sínum annars vegar og hins vegar byggja upp hernaðarmátt Úkraínu. Landið sem víkingar kölluðu Garðaríki skyldi verða hluti af Nató samkvæmt yfirlýsingu á leiðtogafundi Nató í Búkarest, Rúmeníu, þegar árið 2009. Úkraína var verkfærið til að beygja Rússland undir vestrænan vilja. Kreml yrði útibú Washington og Brussel.

Á meðan Úkraínudeilan gerjaðist gerðu Rússar sig gildandi við hlið Assad Sýrlandsforseta, sem Bandaríkin vildu steypa af stóli með aðstoð uppreisnarmanna. Þar prufukeyrðu Rússar herþotur, herfræði í landhernaði og stórskotalið. Lærðu nóg til að trúa að þeir ættu raunhæfa sigurmöguleika á gresjum Garðaríkis. 

Þegar Rússar gerðu innrás í Úkraínu í febrúar 2022 var vestræna handritið að Rússar lytu í lægra haldi fyrir úkraínskum baráttuvilja og Nató-vopnum. Ekki gekk það eftir. Tæpum tveim árum síðar riðar Garðaríki til falls. 

Sannfæring Rússa er að þeir stríði gegn Bandaríkjunum, Evrópusambandinu og Nató, sem beita Úkraínu fyrir vagn sinn. Ef Rússland væri héraðsríki í Austur-Evrópu, líkt og Obama sagði 2014, væri sléttustríðið löngu tapað og Selenskí Úkraínuforseti búinn að hertaka Moskvu með Nató-vopnum.

En núna, í desember 2023, standa Rússar með pálmann í höndunum. Kannski er full mikið sagt að endataflið sé eitt eftir. En það stappar nærri. Afar ólíklegt er að stríðsgæfan brosi á ný til vesturs. Pútín er sigurviss á blaðamannafundi fyrir þremur dögum. Skilaboð rússneskra diplómata í kjölfarið er að friðarsamningar séu ekki á dagskrá, aðeins skilyrðislaus uppgjöf stjórnar Selenskí í Kænugarði.

Sumarsókn Úkraínuhers rann út í sandinn og verður ekki endurtekin. Austurrískur ofursti, Markús Reisner, fjallar um stríðið og á vestrænum forsendum enda kenndi hann bardagafúsum Úkraínumönnum. Í liðinni viku birti Reisner útskýringu á ósigrinum. Flestir sem reglulega fylgjast með lásu skriftina á veggnum þegar í júlí. Úkraínuher átti sinn sprett í desember og janúar í fyrra og vann tilbaka land af Rússum sem voru liðfáir, með um 200 þúsund manna her. Rússar spýttu í lófana og eru núna með 600 þúsund manna herlið. Sumarsóknin sem hófst i júní komst hvorki lönd né strönd. En vestrið er fyrst núna að játa þann kalda veruleika.   

Teikn eru um að Rússland komi út úr stríðinu sem stórveldi. Rússland tekur sér stórveldastöðu með Kína sem bakhjarl. Að auki njóta Rússar velgengni á alþjóðvettvangi, sbr. Brics-samstarfið. Vesturveldin hafa ekki sama forræðið í heimsmálum og þau höfðu árin eftir kalda stríðið.

Rússneski herinn verður sá öflugasti í Evrópu, hertur í þriggja ára stríði (gefið að sléttustríðinu ljúki á næsta ár). Evrópusambandið kemur undan Úkraínustríðinu sem vanmáttug hjálenda Bandaríkjanna í hernaðarlegu tilliti. Meiri líkur en minni eru að einangrunarhyggju vaxi fiskur um hrygg vestan hafs. Staða Vestur-Evrópu yrði enn veikari. Evrópusambandið verður að finna leið að lifa með sterku Rússlandi.

Bandaríkin eru með framtíð Úkraínu í hendi sér, auk Rússa. Selenskí fór bónleiður til búðar vestur um haf fyrr í desember og fær ekki sama stuðning og áður. Vaxandi taugaveiklun er í Washington vegna forsetakosninganna næsta haust. Biden forseti sækist eftir endurnýjuðu umboði. Hann vill ekki tapa Úkraínu í miðri kosningabaráttu. Betra að semja í vetur, ekki seinna en í vor. Hinn kosturinn, að halda lífinu í Úkraínu fram yfir kosningarnar í nóvember, er þó líklegri. Þvinguð atburðarás vígvallarins gæti skipt sköpum. Úkraínski herinn gæti snúist gegn eigin stjórnvöldum. Mannfallið er skelfilegt. Til að fylla upp í skörðin sækir lögreglan í Garðaríki heim næturklúbba og þvingar gesti í herþjónustu.   

Að öllum líkindum verður það fyrsta verkefni næsta Bandaríkjaforseta, sem tekur við völdum í janúar 2025, að semja við Rússland um eftirmál Úkraínustríðsins. Stórveldi hittir þar fyrir annað stórveldi. Ekki er það samkvæmt handritinu um að Úkraína yrði verkfæri til að berja Rússa til hlýðni. En það handrit var byggt á óskhyggju og draumhygli um vestræna yfirburði.

Úrslit Úkraínustríðsins móta alþjóðastjórnmál um langa hríð. Sérstaka gerð af heimsku þarf til að trúa að Ísland ætti að binda trúss sitt við þann aðila sem mestu tapar, á eftir Úkraínu. En það er vitanlega Evrópusambandið.

 

 

 

Bjóða Úkraínu að hefja viðræður um aðild að ESB

Harry prins, Páll skipstjóri og ímyndarkrísa Sigríðar Daggar

Breskir götublaðamenn hleruðu síma Harry prins og beittu öðrum ólöglegum aðferðum til að afla gagna í fréttir. Íslenskir götublaðamenn, kenndir við RSK-miðla, gengu skrefinu lengra og afrituðu síma Páls skipstjóra Steingrímssonar í heilu lagi. Sími Páls var fenginn með byrlun og þjófnaði.

Mál prinsins Harry og Páls skipstjóra eru keimlík. Bæði málin snúa að blaðamönnum og fjölmiðlum sem virða hvorki siðareglur né lög. Brotaviljinn er einbeittur í báðum tilvikum. Framferði íslensku götublaðamannanna er sýnu ógeðfelldara en þeirra bresku. 

Blaðamenn RÚV, Stundarinnar og Kjarnans, RSK-miðla,  misnotuðu andlega veika þáverandi eiginkonu skipstjórans til óhæfuverka, byrla og stela. Eftir að lögreglurannsókn hófst neituðu blaðamenn að mæta til skýrslutöku og töfðu rannsókn málsins um hálft ár. Tímann notuðu þeir til að fela slóðina, eyðileggja gögn sem tengdu þá við glæpinn. 

Í tilefni af dómi, sem féll Harry prins í vil, væri eðlilegt að íslenskir fjölmiðlar gerðu samanburð á málunum tveim. Rík ástæða er til að kafa djúpt í ímyndarkreppu íslenskra fjölmiðla. En það verður ekki gert. Blaðamenn stunda samtryggingu og ræða ekki spillingu, siðleysi og lögbrot innan eigin raða.

Aftur þykjast blaðamenn og fjölmiðlar þess umkomnir að fjalla um vanda annarra stofnana. Er lögreglan í ímyndarkrísu? spyr RÚV. Fréttamaðurinn sem tjáir sig er enginn annar en sjálfur formaður Blaðamannafélags Íslands, Sigríður Dögg Auðunsdóttir.

Skattsvikarinn mætir í settið með refsivöndinn á lofti og segir til syndanna. Engin ímyndarkrísa hjá Sigríði Dögg og RÚV. Byrlun, stuldur og skattsvik eru slíkt smáræði að ekki tekur að nefna á nafn.

Stjórn RÚV og Stefán: siðareglur og sakborningar

Stjórnarmaður RÚV spurði Stefán Eiríksson útvarpsstjóra um fjölda kvartana vegna brota fréttamanna á siðareglum. Fyrirspurnin var lögð fram á fundi stjórnar RÚV fyrir tveim vikum, samkvæmt fundargerð.

Stefán útvarpsstjóri kaus að skilja fyrirspurnina þannig að hún tæki til árabilsins 2016 til 2021. Sérkennilegt að taka ekki árin 2022-2023 með í reikninginn. Enn undalegra er að Stefán var ekki spurður um hvort og þá hve margir fréttamenn RÚV hafi stöðu vitnis eða sakbornings í lögreglurannsókn.

Brot á siðareglum er ekki vel gott. Að fréttamenn komi við sögu í glæparannsókn er stóralvarlegt mál.

Tilfallandi getur aðstoðað stjórn RÚV og útvarpsstjóra með þessar upplýsingar. Eftirtaldir fréttamenn RÚV á árabilinu 2016-2023 hafa ýmist stöðu vitnis eða sakbornings í lögreglurannsókn á byrlun og gagnastuldi:

Aðalsteinn Kjartansson

Helgi Seljan

Rakel Þorbergsdóttir

Þóra Arnórsdóttir

Þá er verktaki á RÚV, Þórður Snær Júlíusson, ritstjóri Heimildarinnar með stöðu sakbornings í sama máli. Þórður Snær er fastur álitsgjafi hjá RÚV um efnahagsmál og viðskipti.

Byrlunar- og símastuldsmálið varð tveggja ára í vor. Lögreglurannsókn hófst sumarið 2021. Í október sama ár fóru fyrstu yfirheyrslur fram. Um miðjan febrúar 2022 var upplýst að Aðalsteinn, Þóra og Þórður Snær væru sakborningar.

Hvað gerði Stefán útvarpsstjóri eftir að upplýst var að stjórnandi á RÚV, Þóra var ritstjóri Kveiks, væri með stöðu sakbornings? Jú, hann og Heiðar Örn Sigurfinnsson fréttastjóri sendu frá sér yfirlýsingu, sem efnislega sagði að Þóra væri saklaus.

Í byrlunar- og símastuldsmálinu var ljóst í upphafi að RÚV var aðgerðamiðstöðin. Á Efstaleiti var atlagan gegn Páli skipstjóra Steingrímssyni skipulögð. Sími skipstjórans var afritaður á Efstaleiti. Á RÚV voru fréttir skrifaðar til birtingar á Stundinni og Kjarnanum, sem nú heita Heimildin. RÚV frumbirti enga frétt úr síma skipstjórans, út á það gekk aðgerðaáætlunin. Ekki skyldi grunur falla á RÚV.

Í yfirlýsingu Stefáns og Heiðars Arnar er sagt að Þóra hafi aðeins tekið við ,,upplýsingum í trúnaði." Ef Stefán og Heiðar Örn hefðu kannað málið innanhúss, eins og starfsskylda þeirra kveður á um, hefðu þeir rekið augun í að Þóra keypti Samsung síma í apríl 2021, stuttu áður en Páli skipstjóra var byrlað. Síminn var notaður til að afrita síma skipstjórans.

Í janúar í ár hafði lögreglan samband við Stefán og spurði um Samsung símann sem keyptur var í apríl 2021. Eftir að hafa reynt að snúa sig út úr málinu viðurkenndi Stefán að Þóra hefði keypt símann.

Sendu Stefán og Heiðar Örn frá sér tilkynningu sem leiðrétti rangan framburð þeirra í yfirlýsingunni frá febrúar 2022, þegar þeir sögðu Þóru saklausa af öðru en að taka við gögnum? Nei, Stefán og Heiðar Örn þögðu þunnu hljóði.

Þóra var í framhaldi selflutt frá Glæpaleiti á Háaleiti til Landsvirkjunar, nánast í skjóli nætur. Af hálfu RÚV birtist aðeins snubbótt frétt um að ritstjóri Kveiks væri ekki lengur Þóra.

Á meðan lögreglurannsókn stóð yfir á aðild fréttamanna RÚV að alvarlegum glæp dundaði Stefán útvarpsstjóri sér við að skrifa siðareglur. Hann kynnti nýjar siðareglur fyrir stjórn RÚV á fundi 30. mars 2022. Í fundargerð er talað fjálglega um ,,samfélagslega ábyrgð" og að fréttamenn og starfsmenn RÚV, útvarpsstjóri meðtalinn, hagi ,,störfum sínum þannig að samræmist almennum og eðlilegum siðferðilegum viðmiðum."

Strax í október 2021, þegar fyrstu lögregluyfirheyrslur hófust, mátti Stefáni og Heiðari Erni vera ljóst að lykilstarfsmenn fréttastofu RÚV voru sterklega bendlaðir við alvarleg afbrot. Þeim bar skylda til að upplýsa, svo fljótt sem auðið væri, bæði stjórn RÚV og almenning, um hver aðkoma RÚV væri að byrlun og gagnastuldi.

En Stefán og Heiðar Örn gengu í lið með sakborningum og brutu þar með gegn ákvæðum siðareglna um ,,samfélagslega ábyrgð." Þeir höguðu störfum sínum ekki ,,þannig að samræmist almennum og eðlilegum siðferðilegum viðmiðum."

Það stendur upp á stjórn RÚV að taka málin föstum tökum. Fyrirspurnir um brot fréttamanna á siðareglum eru hjóm eitt í samanburði við yfirhylmingu Stefáns útvarpsstjóra og Heiðars Arnar fréttastjóra. Báðir máttu vita að lögbrot voru framin en hvorugur hreyfði legg eða lið til að upplýsa svívirðilegt athæfi í húsakynnum RÚV. Þvert á móti: Stefán og Heiðar Örn fylktu liði með grunuðum um glæp.

 

 

Múslímar og innflutningur glæpa

Ráðuneyti útlendinga í Danmörku heldur tölfræði um uppruna þeirra sem komast í kast við lögin og fá dóma. Samkvæmt tölfræðinni eru múslímar 2,5 til 3,5 sinnum líklegri til að stunda glæpi en Meðal-Daninn. Um tölfræðilega staðreynd þarf ekki að deila.

Margsannað er múslímar aðlagast seint og illa vestrænum samfélögum, sem veita þeim viðtöku. Trúarmenning múslíma er í meginatriðum önnur en vestræn veraldarhyggja með kristnar rætur. Jafnrétti kynjanna er íslam framandi hugmynd, svo dæmi sé tekið.

Önnur og þriðja kynslóð múslíma í Danmörku eru enn við sama heygarðshornið og fyrsta kynslóðin og bætir heldur í. Í skýrslu danskra yfirvalda heitir það:

Glæpatíðni afkomenda flóttamanna frá múslímalöndum [MENAPT-lönd] er enn hærri en hjá fyrstu kynslóðinni.

Ekki aðeins eru múslímar hneigaðari til glæpa mann fram af manni. Ofbeldisglæpir framdir af múslímum eru hlutfallslega fjórum sinnum algengari en hjá öðrum þjóðfélagshópum. Allt ber að sama brunni. Múslímar eiga kynslóðavís í erfiðleikum að falla í vestræna kramið.

Á heimastjórnarsvæði Hamas, á Gasa-ströndinni, er stríðsástand, eins og alkunna er. Þá eru fréttir um að mörg hundruð þúsund Afganir séu á faraldsfæti vegna ákvarðana Tyrklands, Íran og Pakistan að vísa landflótta Afgönum til síns heima. Ófrið og upplausn notar flóttamannaiðnaðurinn, sem eru skipulögð glæpasamtök að stórum hluta, til að koma skjólstæðingum sínum á vestræna velferðarjötu.

Fyrr en varir munu tugir ef ekki hundruð múslíma knýja dyra á Fróni. Útlendingamál eru hér í varanlegum lamasessi. Engin pólitísk samstaða er um málaflokkinn. Fólki er veitt dvalarleyfi með nánast engum takmörkunum og án eftirlits. Dvalarleyfin fá sjálfvirka endurnýjun þegar þau renna út. Engin viðmið eru til um hve mörgum skuli veita landvist. Þetta er uppskrift að félagslegum hamförum.

Áður en það er um seinan ættu íslenskir pólitíkusar að kynna sér dönsku tölfræðina. Ein leið til að eyðileggja samfélag er innflutningur á glæpum. Við ættum ekki að velja þá leið.  

 

Lyklaborðspólitík frá Þórdísi K. til Bjarna Ben

Sem utanríkisráðherra fór Þórdís K. langt með að slíta stjórnmálasambandi við Rússland. Hún lokaði sendiráði Íslands í Moskvu vegna Úkraínustríðsins og krafðist að rússneska sendiráðið á Íslandi drægi úr starfsemi sinni. Lyklaborðspólitík af þessu tæi er vanhugsuð og þjónar ekki íslenskum hagsmunum, hvorki í bráð né lengd.

Þrýst er á Bjarna Benediktsson utanríkisráðherra að fylgja fordæmi Þórdísar K. úr Úkraínustríðinu og slíta stjórnmálasambandi við Ísrael vegna stríðsins við Hamas hryðjuverkasamtökin, sem eiga sér marga fylgismenn hér á landi.

Hávaðahópurinn spyr: má ekki snúa Rússahatri upp í gyðingahatur?

Það þarf aðeins lyklaborð.

Örútgáfa af vanda Bjarna stendur upp á Stefán útvarpsstjóra. Stefán stóð galvaskur í stafni Rússahatursins fyrir hálfu öðru ári og krafðist slaufunar á framlagi Bjarmalands til Júróvisjón. Nú er skorað á Stebba að stökkva á vagn gyðingahatara.

Ekki þarf annað en lyklaborð.

Rússafóbían sameinaði kaldastríðshægrið og vinstrimenn. Fjöldamorð Hamas 7. október, og innrás Ísraela í Gasa í framhaldinu, klauf bandalagið. Hægrimenn flestir styðja tilvist Ísraelsríkis en vinstrimenn vilja það feigt - eins og Hamas.

Til að slá rétt á lyklaborðið þarf meira en fingur.

 

Slæm hugmynd að slíta stjórnmálasambandi

Stefán og stjórn RÚV deila: fundargerð umskrifuð

Deilur eru á milli stjórnar RÚV og Stefáns Eiríkssonar útvarpsstjóra, þótt ekki fari þær hátt í fjölmiðlum. Vegna ágreiningsins dróst að birta fundargerð októberfundar stjórnar en þar var tekin ákvörðun um að endurskrifa fundargerð næsta fundar á undan, sem haldinn var í september.

Tilfallandi auglýsti eftir fundargerðinni í síðustu viku. Loksins í gær um hádegisbil, sex vikum eftir fundinn, var októberfundargerðin birt á vef RÚV.

Sex dögum eftir stjórnarfundinn 25. október sagði Stefán útvarpsstjóri upp störfum hjá RÚV með 18 mánaða fyrirvara, í beinni útsendingu á Bylgjunni. Tilfallandi setti tilkynningu Stefáns um starfslok í samhengi. Fréttastofa RÚV og Stefán höfðu fengið á sig vantraust stjórnar á septemberfundinum. Titringurinn á þeim fundi leiddi til umritunar á fundargerð.

Núna þegar fundargerðin frá 25. október liggur fyrir hægt að lesa á milli línanna. Í fyrsta lið kemur fram að breyta skuli texta síðustu fundargerðar, frá 27. september. Dæmalaust er fundargerð stjórnarinnar sé endurskrifuð. Í októberfundargerðinni segir um fundargerðina frá septemberfundinum:

Gerðar voru breytingar á dagskrárliðnum önnur mál og var fundargerðin samþykkt í kjölfarið. Umræður voru um fyrirkomulag fundargerða.

Ekki kemur fram hvaða atriðum fundargerðar frá 27. september var breytt en þau varða dagskrárliðinn önnur mál. Undir þeim lið var fréttastofa RÚV tekin til bæna á septemberfundinum og útvarpsstjóri í leiðinni.

Verulega skarst í odda milli Stefáns útvarpsstjóra og stjórnarmanna á októberfundinum. Nógu mikið gekk á til að Stefán mætti sex dögum síðar á Bylgjuna og tilkynnti að hann myndi ekki sækja um er skipunartími hans rennur út eftir hálft annað ár.

Staðan á fundinum 25. október var sú að mánuði áður hafði varaformaður stjórnar RÚV, Ingvar Smári Birgisson (ISB), lýst yfir vantrausti á fréttastofu RÚV með þessari bókun:

ISB árétti mikilvægi þess að fréttastofa starfi í samræmi við lög og virði friðhelgi borgaranna í hvívetna.

Stefán er yfirmaður fréttastofu líkt og annarra deilda RÚV. Vantraustið beinist öðrum þræði að útvarpsstjóra. Hann hefur ekki stjórn á pólitískum aktívistum sem þjóna sinni lund á fréttastofu og kalla sig fréttamenn. Ekki hefur framganga fréttastofu batnað síðan. Fréttaljósmyndari RÚV var staðinn að tilraun til húsbrots á hamfarasvæðinu í Grindavík; Bjarni Benediktsson utanríkisráðherra gagnrýndi fréttastofuna fyrir að mylja undir öfgasjónarmið. 

Á fundinum 25. október vonaðist Stefán til fá stuðningsyfirlýsingu eftir leiðindin sem hann sat undir á septemberfundinum. Stefán fékk ekki stuðning stjórnar. Í framhaldi fór hann í fússi á Bylgjuna og tilkynnti starfslok.

Oft er það áhugaverðast sem ekki stendur í fundargerðum. Þriðji dagskrárliður stjórnarfundar RÚV þann 25. október er svohljóðandi:

3. Kynning sviða - fréttastofa RÚV
Heiðar Örn Sigurfinnsson fréttastjóri kynnti starfsemi fréttastofu.

Fréttastofa RÚV er bendluð við alvarlega glæpi, byrlun og gagnastuld. Fréttamaður RÚV og formaður Blaðamannafélags Íslands er uppvís að skattsvikum. Nóg að ræða við Heiðar Örn fréttastjóra, eða svo skyldi ætla.

En hvað haldið þið að segi í fundargerðinni um kynningu á fréttastofu og málefnum hennar? Ekkert. Ekki einu sinni að umræða hafi farið fram. Eins og fundargerðin stendur var Heiðar Örn ekki þýfgaður um eitt einasta atriði er varðar fréttastofuna. Sama fréttastofa fékk á sig vantraust með sérstakri bókun á fundinum þar á undan. Er trúlegt að engin umræða hafi farið fram? Eða er logið með þögninni?

Sérkennilegur húmor svífur yfir vötnum á Glæpaleiti. Undir dagskrárliðnum Minnispunktar útvarpsstjóra segir Stefán að dagskrárgerðarmenn og fréttamenn RÚV hafi setið málstofu þar sem ,,nánar var rýnt í lýðræðishlutverk RÚV."

Lýðræðishlutverk? Glæpir og yfirhylming þeirra af hálfu ríkisfjölmiðils grafa undan lýðræðinu og réttarríkinu. Í gömlum texta segir að með lögum skuli landið byggja ... . Seinni hlutinn, sem hvorki Stefán né fréttastofa RÚV skilja, er eftirfarandi: en eigi með ólögum eyða. RÚV fer fram með ólögum og yfirgangi og hefur lengi gert. Það er kjarni málsins.

 

 

Tölvupóstar BBC og glæpir RÚV

BBC fékk viðtal við Díönu prinsessu fyrir 28 árum á fölskum forsendum. RÚV fékk persónuleg gögn Páls skipstjóra Steingrímssonar fyrir rúmum tveimur árum með glæp. BBC er gagnrýnt fyrir að birta ekki tölvupósta. RÚV er ekki gagnrýnt fyrir aðild að byrlun og gagnastuldi.

Skipstjóranum var byrlað 3. maí 2021. Þáverandi eiginkona hans, alvarlega andlega veik, var í síma- og tölvupóstsamskiptum við einn eða fleiri blaðamenn RÚV, Stundarinnar og Heimildarinnar, RSK-miðla áður en hún byrlaði og stal. Eftir að lögreglurannsókn hófst sameinuðust Stundin og Kjarninn í nýja útgáfu, Heimildina.

Símanum var stolið á meðan Páll skipstjóra lá meðvitundarlaus á gjörgæslu. Síminn var afritaður á Efstaleiti, höfuðstöðvum RÚV, og skilað á sjúkrabeð skipstjórans. Skipulagið gekk út á að skipstjórann grunaði ekki að sími hans hafði verið afritaður.

Þann 21. maí birtu Stundin og Kjarninn samtímis fréttir úr símanum. Fréttaskrifin voru samræmd á RÚV sem var aðgerðamiðstöð afbrotanna. ,,Skæruliðadeild" kom fyrir í báðum fyrirsögnum. Orðið er skáldskapur blaðamanna. RÚV birti enga frumfrétt úr síma Páls skipstjóra. Fréttirnar sem birtust í Stundinni og Kjarnanum voru á hinn bóginn skrifaðar á Efstaleiti, líklega af Helga Seljan í samráði við Þóru Arnórsdóttur. Tilgangurinn var að kalla fram fordæmingu í fjöl- og samfélagsmiðlum. RÚV þóttist alsaklaust en kom í kjölfarið, sem þriðji fjölmiðillinn ótengdur Stundinni og Kjarnanum, og krafði stjórnmálamenn svara um skáldskap sem búinn var til á Efstaleiti - að Samherji ræki skæruliðadeild er skipstjórinn væri í forsvari fyrir. 

Fyrir byrlun keypti Þóra Arnórsdóttir á RÚV síma af gerðinni Samsung, sama tegund og sími skipstjórans. RÚV tryggði sér símanúmerið 680 2140. Númer skipstjórans er 680 214X - aðeins munar síðasta tölustaf. Síminn var notaður til að afrita síma skipstjórans en einnig í til samskipta við fyrrum eiginkonu skipstjórans. Þá var síminn einnig verkfæri til að komast inn á samfélagsmiðla skipstjórans og inn á bankareikning hans.

Eftir að lögreglurannsókn hófst, sumarið 2021, gengu blaðamenn skipulega í að eyðileggja sönnunargögn. Lögfræðistofa Láru V. Júlíusdóttur, sem var skilnaðarlögfræðingur konunnar, var vettvangurinn þar sem blaðamenn fengu aðgang að símkortum eiginkonu Páls skipstjóra, hún notaði tvo síma. Símkortin voru með upplýsingum sem blaðamenn vildu eyða.

Þann 3. október 2021, tveim dögum áður en andlega veik eiginkona skipstjórans fór í fyrstu yfirheyrslu hjá lögreglunni sendi hún eftirfarandi tölvupóst til Láru V. Júlíusdóttur:

Sæl Lára.
Ég gef hér með Þóru Arnórsdóttur og Aðalsteini Kjartanssyni umboð til að ná í símkortin mín til þín ef þau óska eftir því að fá þau í hendur ásamt öðru efni sem þú kannt að hafa frá mér

Aðalsteinn er blaðamaður á Stundinni, nú Heimildinni. Annar viðtakandi tölvupóstsins var Ingi Freyr Vilhjálmsson samstarfsmaður Aðalsteins. Báðir eru sakborningar. 

Tölvupóstar frá RÚV voru sendir í aðdraganda byrlunar og þjófnaðar. Þeim gögnum hefur verið eytt. Lögreglan er í sambandi við Google og Facebook um að fá skeytasendingar milli blaðamanna og fyrrum eiginkonu skipstjórans. Fáist þau gögn sést svart á hvítu hvernig skipulagi RSk-miðla var háttað vorið 2021.

Í febrúar næstkomandi eru tvö ár síðan blaðamenn RSK-miðla fengu stöðu sakborninga í lögreglurannsókn á byrlun og gagnastuldi. Ekki er ósennilegt að ákærur verði birtar öðru hvoru megin við tveggja ára afmælið. 

Dómari skipar BBC að birta tölvupósta tengda Bashir