Birgitta hótar að slíta viðræðum

Birgitta Jónsdóttir hótar að slíta smáflokkaviðræðum um ríkisstjórn. Hótun Birgittu er birt á RÚV, sem er ábekingur smáflokkastjórnarinnar allt frá Lækjarbrekkufundum fyrir kosningar.

Birgitta vandist því kjörtímabilið 2009-2013 að hóta Jóhönnustjórn Samfylkingar og Vinstri grænna, sem í reynd var minnihlutastjórn. Út á það fékk Birgitta opinn ferða- og risnureikning hjá stjórnarráðinu auk annarra fríðinda.

Ekki er ljóst á hverju steytti í smáflokkaviðræðunum en að Birgitta hóti opinberlega viðræðuslitum sýnir hverju má búast við fari svo að ríkisstjórn smælingjanna fimm komist á koppinn.

Segir fundinn í dag úrslitafund

Vinstristjórnin býr til kreppu - réttlætir kerfisbreytingar

Smáflokkarnir fimm búa til kreppuástand í því skyni að réttlæta kerfisbreytingar, sem alls ekki voru á dagskrá í umræðunni fyrir kosningar.

Orð Benedikts Jóhannessonar um að ,,þrönga" stöðu ríkisfjármál eru undirbúningur fyrir stórfelldar skattahækkanir til að fjármagna ótilgreindar ,,kerfisbreytingar" sem Katrín Jakobsdóttir formaður Vinstri grænna boðaði í gær - en talaði ekki um í kosningabaráttunni.

Smáflokkastjórnin mun leiða Ísland inn í kreppu. En sú kreppa byrjar í stjórnarráðinu eftir valdatöku vinstrimanna og Viðreisnar.

Staðan tugum milljarða þrengri

Hópstjórnmál vinstriflokkanna og sundurlyndisfjandinn

Vinstrimenn og Viðreisn stofna hópa til að finna samnefnara fimm flokka sem börðust um hylli kjósenda fyrir þrem vikum. Eini samnefnari flokkanna er að andúð þeirra á aðkomu stærsta stjórnmálafls þjóðarinnar að landsstjórninni.

Saga vinstriflokka er saga sundrungar. Kommúnistar klufu sig úr Alþýðuflokknum 1930, sósíalistar 1938; rúmum 20 áður síðar varð til Alþýðubandalag, síðar stofnuðu frjálslyndir og vinstrimenn flokk, þá Þjóðvaki með Jóhönnu Sig. Við aldamót verða til Samfylking og Vinstri grænir og á síðustu tveim kjörtímabilum Píratar og Björt framtíð.

Ef hópstjórnmál vinstriflokkanna og Viðreisnar leiða til ríkisstjórnar taka við hópslagsmál um völd og áhrif í stjórnarráðinu. Við þekkjum það frá síðustu tilraun þeirra til að stjórna landinu. Vinstri grænir klofnuðu, Steingrímur J. hrifsaði ráðherrastól Jóns Bjarnasonar og Ögmundur Jónasson sagði af sér vegna deilna við Jóhönnu Sig. En þá voru flokkarnir aðeins tveir.

 

Þurfa að taka á stóru málunum

Þjóðin kaus ekki kerfisbreytingar - stríð gegn almenningi

Þjóðin kaus ekki kerfisbreytingar í síðustu kosningum. Stærsti stjórnmálaflokkur þjóðarinnar, Sjálfstæðisflokkur, boðaði ekki kerfisbreytingar. Framsóknarflokkurinn ekki heldur og Viðreisn sagði fátt um kerfisbreytingar.

En smáflokkarnir til vinstri, sem töluðu svo þvers og kruss um hvað þeir stæðu fyrir, að þeim tókst hvorki að bjóða fram sameiginlegan lista né sameiginlega málefnaskrá, rotta sig núna saman á næturfundum til að undirbúa uppstokkun á samfélaginu - án þess að hafa til þess nokkuð umboð.

Viðreisn leggur vinstrabandalaginu lið og stuðlar að kerfisbreytingum sem unnið er að í skjóli nætur. Nú verður að safna liði, líkt og kjörtímabilið 2009-2013, og koma í veg fyrir umboðslausar kerfisbreytingar vinstri smáflokkanna.

Ætti ekki að koma á óvart

Hversu mikið ofbeldi þolir Viðreisn?

Vinstri grænir vita af reynslu vinstristjórnar Jóhönnu Sig. að til að metta alla þá svöngu munna sem þeir hafa lofað saðningu frá hinu opinbera verður að snarhækka skatta.

Þingmaður Viðreisnar sagði eftir kosningar að allir skattar, ekki skatthækkanir heldur allir skattar, væru ofbeldi.

Viðreisn er komin í skattalegt ofbeldissamband við vinstriflokkana og sér ekki fyrir endann á harmleiknum. 

VG vill stórfelldar skattahækkanir

Flóttamenn með flugvélum - séríslenskt vandamál

Í ESB-ríkjum er í gildi reglugerð 2001/51/EC sem gerir flugfélög fjárhagslega ábyrg fyrir flóttamönnum sem fá ekki stöðu hælisleitenda. Flugfélög neita þess vegna að flytja farþega frá miðausturlöndum og Afríku sem ekki eru með vegabréfsáritun.

Flugfar frá Afríku og miðausturlöndum kostar 300 til 400 evrur. Þýska útgáfan FAZ segir flóttamenn borga 7000 evrur og meira fyrir að komast í manndrápsfleytur yfir Miðjarðarhaf. Þótt krafist sé að reglugerð Evrópusambandsins, um fjárhagslega ábyrgð flugfélaga á flóttamönnum sé afnumin, eru engar líkur á því að það verði gert.

Evrópusambandið hefur ekki minnsta áhuga á að gera þetta séríslenska vandamál, flóttamenn með flugvélum, að sínu.

Hópur hælisleitenda til landsins í gær

Stjórnarmyndun, andúð og siðleysi

Sjálfstæðisflokkurinn er nær tvöfalt stærri, með 29% fylgi, en næsti stærsti flokkurinn á alþingi, Vinstri grænir, sem eru með 15,9% hlutfall atkvæða í nýafstöðnum kosningum.

Nú reyna fimm flokkar, sem allir fengu atkvæði á ólíkum forsendum, að setja saman ríkisstjórn án aðildar Sjálfstæðisflokksins. Flokkarnir fimm buðu kjósendum upp á fimm ólíkar stefnuskrár sem málefnahópar sjóða saman í einn stjórnarsáttmála.

Í stjórnarsáttmálanum, ef af verður, er ein setning sem allir læsir á pólitík lesa á milli línanna: ríkisstjórn vinstriflokkanna og Viðreisnar er til höfuðs Sjálfstæðisflokknum og kjósendum hans.

Fimm flokka ríkisstjórn til höfuðs tæplega þriðjungi þjóðarinnar fær hvorki meðbyr né velvild. Ekkert málefni, nema andóf gegn Sjálfstæðisflokki, sameinar smáflokkana fimm.

Þegar smáflokkar sameinast gegn þeim stærsta þarf málatilbúnaðurinn að byggja á heilbrigðari hvöt en andúð. Annars er siðleysinu gert hátt undir höfði.

Tuttugu manns í málefnahópunum

Öfgaríkisstjórn vinstrimanna

Fimm flokka ríkisstjórn vinstriflokkanna og Viðreisnar verður með Reykjavíkurslagsíðu á kostnað landsbyggðarinnar. Sérstök áhugamál kennd við 101 Reykjavík, s.s. ESB-umsókn, skattlagning á útgerð, óheftur innflutningur matvæla og stjórnarskrárbreytingar, fá stóraukið vægi. Málefni landsbyggðarinnar verða víkjandi. 

Öfgastjórn vinstrimanna er gagngert sett saman til að halda Sjálfstæðisflokknum frá völdum. Sjálfstæðisflokkurinn er með fyrsta þingmanninn í öllum kjördæmum landsins, sem þýðir að stærsti kjósendahópurinn í hverju kjördæmi styður flokkinn til áhrifa í samfélaginu.

Þeir 5 flokkar sem nú ræða stjórnarmyndun geta með samráði hindrað að tæp 30 prósent þjóðarinnar fái eðlilega aðkomu að landsstjórninni. En aðeins í skamman tíma. Þegar kemur að uppgjöri verður vígstaða vinstriflokkanna gjörtöpuð.

Samþykkja formlegar viðræður

Bandaríkin yfirgefa Evrópu

Síðasti fundur Obama Bandaríkjaforseta og starfsfélaga hans í Rússlandi, Pútín, fór í að hvetja til samninga um Úkraínu. Bandaríkin og Evrópusambandið styðja ríkisstjórnina í Kiev en Rússar uppreisnarmenn í austurhluta landsins.

Obama er forseti á útleið, í janúar tekur Donald Trump við. Nýr hæstráðandi í Washington vill hverfa frá stöðutöku Bandaríkjanna í Austur-Evrópu. Baráttan stendur um hvort Úkraína verði ESB-ríki með Nató-aðild en Rússar segja það ógna öryggishagsmunum sínum. Minsk-samkomulagið í deilunni gerir ráð fyrir að Úkraínu verði skipt upp í sjálfsstjórnarsvæði, sem gefur Rússum færi á að stjórna í reynd austurhluta landsins.

Sérfræðingar í alþjóðamálum, t.d. Robert Kagan, spá einangrunarstefnu Bandaríkjanna í kjölfar sigurs Trump. Í Austur-Evrópu er talað um að Pútín verði vinsælli sökum þess að fjarvera Bandaríkjanna geri Rússland sterkt en Evrópusambandið veikt. Smáríkin við Eystrasalt munu í auknum mæli komast undir rússnesk áhrif.

Evrópusambandið tapar áhrifum sínum í Austur-Evrópu. Efnahagslegur máttur ESB kemur fyrir lítið þegar hernaðarstyrkur Nató er ekki lengur bakhjarl. Bandaríkin greiða 70 prósent af kostnaði Nató og Trump mun skera þau framlög niður.

Angela Merkel kanslari Þýskalands mun eiga fullt í fangi með að tryggja þýska hagsmuni í Mið-Evrópu. Eftir útgöngu Breta úr Evrópusambandinu og einangrunarstefnu Bandaríkjanna er kristaltært að ESB er ekki lengur aflið sem mótar framtíð Evrópu. Öxullinn Berlín-Moskva mun gera það.

Vill verja lýðræðisleg gildi

Vinstristjórn veit á pólitíska kreppu

Eftir hrun varð hér pólitísk kreppa og fyrsta hreina vinstristjórn lýðveldissögunnar leit dagsins ljós. Ríkisstjórn Vinstri grænna og Samfylkingar lagði til atlögu við fullveldið og stjórnskipun landsins, með ESB-umsókn og tilraun til uppstokkunar á stjórnarskrá.

Hvorttveggja mistókst og vinstristjórnin var lömuð helming kjörtímabilsins.

Vinstristjórnin 2009-2013 var afleiðing efnahagshruns. Möguleg vinstristjórn 2016-2017 er afleiðing pólitískrar kreppu vinstrimanna, sem dreifast á 4 flokka, annars vegar og hins vegar lýðskrums sömu flokka sem bjóða sömu sömu lausnir og misheppnaða ríkisstjórn Jóhönnu Sig., þ.e. ESB-umsókn og nýja stjórnarskrá.

5 flokka vinstristjórn, með Viðreisn innanborðs, gæti mögulega sameinast um valdatöku meirihlutans á alþingi. Valdatakan er aðeins fær með því að útiloka sigurvegara nýafstaðinna kosninga, Sjálfstæðisflokkinn. Verði það raunin er skollin á heimatilbúin pólitísk kreppa, sem vinstriflokkarnir búa til en verður um megn að leysa. Nýjar þingkosningar næsta vor er rökrétt afleiðing.

Funda kl. 13 á morgun