Egill Helga gargar á Joe Rogan, ekki Guðna forseta

Egill Helga spjallstjóri er hættur á Spotify vegna Joe Rogan starfsbróður Egils, sem talar við fólk er pólitíski rétttrúnaðurinn hefur sett út af sakramentinu. Glæpur Rogan er ,,að fá til sín í viðtal smitsjúkdómalækni sem mótmælt hefur bólusetningum barna gegn veirunni." 

Atli Harðarson prófessor víkur að tískunni sem Egill fylgir og skrifar á Facebook um ,,gargvæðingu hugarfarsins":

Ýmist eru yfirvöld sögð skyldug til að setja strangari reglur um sóttvarnir eða talin sek um stórfelld brot á mannréttindum ef grímuskylda er framlengd um nokkrar vikur. Kóvid er bæði sagt ógn af verstu gerð og algerlega meinlaust kvef.

Það er hluti af gargvæðingu hugarfarsins að telja nær hvaðeina annað hvort í himnalagi eða fyrir neðan allar hellur. Sannleikurinn um þau efni sem ég nefndi er samt of beggja blands til þess að réttlæta nein gífuryrði.

 

Egill Helga gargar á Joe Rogan, sem fær til sín gesti með ólík sjónarmið, en lætur vera að garga á Guðna forseta sem fylgdi ekki sóttvarnarreglum þegar hann bauð í teiti. Sumir eru yfir það hafnir að fylgja reglunum. Sauðsvartur almúginn á að hlýða. Góða fólkið, handhafar rétttrúnaðarins, er með undanþágu.

 

Pólitíski rétttrúnaðurinn vildi ekki kannast við uppruna veirunnar til að valda ekki alþjóðlegum rétttrúnaði tjóni. 

 

Garg góða fólksins er dygðaskraut. 

Segist bera ábyrgð á misskilningi um grímuskyldu

Hiti, vit og vitleysa

„Ísland er hluti af Norðurslóðum þar sem hitinn hlýnar tvisvar til fimm sinnum hraðar en annars staðar í heiminum,“ sagði Halla Hrund Logadóttir orkumálastjóri.

Ofanritað er inngangur í Fréttablaðinu að frétt með fyrirsögninni Ekki líft á jörðinni ef ekki verður breytt um stefnu. Sama útgáfa sagði fyrir skemmstu að landnám Íslands væri eitt fyrsta umhverfislysið.

Hiti er mældur í gráðum. Lofthiti hækkar, lækkar eða stendur í stað. Fyrir 3000 árum, já þrjú þúsund, snöggkólnaði á Íslandi. Breiðamerkurjökull ruddist yfir skóg með sverari trjástofnum en hafa síðan vaxið hér á landi.

Fornveðurfar gefur upplýsingar um snöggar hitasveiflur á ,,ótrúlega skömmum tíma, eða einungis 3-50 árum," segir Árný Erla Sveinbjörnsdóttir sérfræðingur í fornveðurfari.

Á landnámstíma var 1,5 gráðu C hlýrra á Íslandi en í dag. 

Það er engin loftslagsvá, og allra síst manngerð, segir William Happer loftslagssérfræðingur.

Annar sérfræðingur, Judith Curry, segir náttúrulega ferla skýra hitabreytingar jarðar.

Fyrir bráðum áratug afhjúpaði blaðamaðurinn Donna Laframboise að loftslagsskýrslur Sameinuðu þjóðanna væru skrifaðar af fólki sem ekki kunni vísindi og vitnuðu í námsritgerðir, fréttatilkynningar og annað óvísindalegt til að keyra heim þá fyrirframgefnu niðurstöðu að maðurinn stjórni loftslaginu en ekki náttúran.

Svo koma til sögunnar snillingar sem tala um að ,,hiti hlýnar". Þeir fá fyrirsagnirnar hjá forheimskandi fjölmiðlum. 

Pútín sigrar án innrásar

Í Úkraínudeilunni sigrar Pútin þótt ekki komi til innrásar. Bandaríkin, Nató þar með, gefa Úkraínu upp á bátinn án þess að skoti sé hleypt af. Stjórnin í Kænugarði biðst undan ,,stigmögnun átaka," það skaði efnahagslíf landsins.

Yfirlýsing Biden forseta um að aðeins fáeinir bandarískir hermenn verði sendir til Austur-Evrópu, en ekki Úkraínu, samhliða sem vesturlönd kalla heim sendiráðsfólk sitt í Kænugarði, er ótvíræð staðfesting á sigri Pútín og Rússa.

Stríðsþreyta Bandaríkjanna er merkjanleg. Þeir lögðu á flótta frá múslímskum skæruliðum í Afganistan sl. sumar. Fyrir tíu árum gáfust þeir upp á Írak og Sýrlandi um miðjan síðasta áratug. Nú er Úkraína yfirgefin.

Útþensla í Úkraínu var sameiginlegt verkefni Bandaríkjanna og Evrópusambandsins. Brexit fyrir sex árum hjó fótinn undan samstöðu stóru Evrópuríkjanna. ESB er í stórvandræðum að ráða við stjórnvöld í Póllandi og Ungverjalandi sem annt er um fullveldið, en eru ESB-ríki.

Hugmyndafræðin um vestræna yfirtöku landa fyrir botni Miðjarðarhafs og frekari útþenslu í Austur-Evrópu er, í fáum orðum sagt, kominn yfir síðasta söludag.

Mistökin, sem gerð voru eftir lok kalda stríðsins, koma æ betur í ljós. Hroki og yfirgangur Bandaríkjanna og ESB gagnvart Rússlandi á tíunda áratug síðustu aldar, þegar Jeltsín var við völd, kom í bakið á þeim eftir valdatöku Pútín um aldamótin. Síðan eru 20 ár. Menn læra seint og illa.

Rússar ættu að vera bandamenn vestrænna ríkja en ekki andstæðingar. Ef Úkraínudeilan leysist friðsamlega, enn er ekki hægt að slá neinu föstu um það, er kannski komin forsenda fyrir varanlegri skipan öryggismála í Austur-Evrópu. Það má byggja frið á þeim grunni.

 

Mun senda „lítinn hóp hermanna“ til Austur-Evrópu

Reynir afhjúpar sjálfan sig

Stolin gögn úr tölvu Reynis Traustasonar ritstjóra Mannlífs myndu varpa ljósi á samskipti við auðmenn. Reynir er vanur að vera ýmist vinur eða óvinur auðmanna. Hann kallar sig blaðamann en starfar eins og almannatengill. Mest fyrir sjálfan sig en gerist vikapiltur annarra þegar harðnar á dalnum.

Fræg er upptakan af samtali Reynis við blaðamann sinn, Jón Bjarka Magnússon, þar sem Reynir segist skrifa fréttir eða þegja þær eftir því hvaða auðmaður á hönk upp í bakið á honum hverju sinni. 

Fjölmiðlar hljóta að birta stolin gögn frá Reyni sem fara í umferð. Fjölmiðlar eins og RÚV, Stundin og Kjarninn telja sjálfsagt að nýta illa fengin gögn, jafnvel hafa hönd í bagga við öflun þeirra, sbr. mál Páls skipstjóra Steingrímssonar. Stolin gögn frá Reyni eru samkvæmt þessu viðmiði fréttir.

Reynir spilar sig hetju í trausti þess að almenningur trúi að meint innbrot sé ekki sviðsett. Prófsteinn er hvort stolnu gögnin komast í umferð. Meintir óvildarmenn Reynis hljóta að nýta sér upplýsingarnar, annars væri innbrotið tilgangslaust. Ef engar upplýsingar dúkka upp er ritstjórinn í öngstræti. Trúverðugleiki innbrotsins er í hættu.

Hafi innbrotið verið framið af óvildarmönnum ritstjórans hljóta fréttir af Reyni ritstjóra og samskiptum hans við auðmenn að birtast í fjölmiðlum næstu daga. Annars gæti aumingja Reynir lent í þeirri stöðu að dreifa óhróðri um sjálfan sig. Til að halda stöðu sinni sem trúverðugur þolandi innbrots.

Þriðji möguleikinn er að lögreglan upplýsi málið og hvatir er liggja að baki. Furður og stórmerki gætu komið á daginn.

 

Hafi fengið tugi milljóna fyrir níðskrif um Róbert

Meðvirkir fjölmiðlar spyrja ekki um glæp

Aðalsteinn Kjartansson blaðamaður hætti skyndilega á RÚV föstudaginn 30. apríl sl. Sama dag tilkynnti Stundin að Aðalsteinn væri mættur til leiks. Þetta er 4 dögum áður en eitrað var fyrir Páli skipstjóra. Hvers vegna spyr enginn Aðalstein um þessi snöggu vistaskipti?

Aðalsteinn á Stundinni og Þórður Snær á Kjarnanum birtu fréttir upp úr stolnum síma Páls skipstjóra sama morguninn, þann 21. maí. Hvers vegna spyr enginn Aðalstein og Þórð Snæ um þessa samræmdu tímasetningu? Stundin og Kjarninn eiga að heita sjálfstæðir fjölmiðlar og fá út á það ríkisstyrk. Augljóst er að einhver þriðji aðili stýrir báðum miðlunum. Miðstýringin er svo ítarleg og nákvæm að daginn fyrir birtingu stolnu gagnanna hringdu félagarnir, Aðalsteinn og Þórður Snær, með tíu mín. millibili í Pál skipstjóra. Hvers vegna eru þeir félagar ekki þýfgaðir um þessi atriði?

Þórður Snær, sem er eigandi og ritstjóri Kjarnans, segir allt í lagi að fjölmiðlar hagnist á glæpum. Hvers vegna er hann ekki spurður út í fullyrðinguna? Telja blaða- og fréttamenn sig hafa rétt að stuðla að glæpum og hafa ábata af þeim? Hvað segir formaður Blaðamannafélagsins?

Vitað er að Helgi Seljan kærði nafngreindan mann til lögreglunnar fyrir að elta sig. Maðurinn var úti á rúmsjó, á togara, þegar hann átti að vera elta fréttamanninn. Hvers vegna er Helgi Seljan ekki spurður um niðurstöðu lögreglurannsóknarinnar? 

Páley Borgþórsdóttir lögreglustjóri á Norðurlandi eystra staðfesti lögreglurannsókn á eitrun og gagnastuldi frá Páli skipstjóra þann 19. nóvember. Heil glás af fréttamönnum hættir á RÚV í haust. Hvers vegna spyrja fjölmiðlar ekki Stefán útvarpsstjóra og RÚV-ara á flótta um samhengið þarna á milli?

Hvers vegna er ekki spurt um ársgamla falsfrétt RÚV sem nafngreinir 3 Íslendinga og segir þá ákærða í Namibíu? Enginn Íslendingur og engin íslensk fyrirtæki voru ákærð. En RÚV lætur falsfréttina standa. Eru falsfréttir réttlættar í siðareglum RÚV?

Svarið við spurningunum hér að ofan er að fjölmiðlar eru meðvirkir. Þrír fjölmiðlar RÚV, Kjarninn og Stundin tengjast alvarlegum glæp. Vinir og kunningjar á öðrum fjölmiðlum þegja í meðvirkri samstöðu.

Í þessari viku var stórt fréttamál, á RÚV og víðar, að skipstjóri Herjólfs endurnýjaði ekki réttindi sín í tæka tíð og sigldi einhverjar ferðir til og frá landi réttindalaus. Ítarlegar fréttir voru sagðar af málinu og menn kallaðir í þriðju gráðu yfirheyrslu fréttamanna vegna atviksins.

Þegar miklu alvarlegra mál, eitrun og stuldur, kemur upp skríður samanlögð blaðamannastétt landsins undir stein og þykist ekkert vita, skilja eða heyra. Það er aumur tilfallandi bloggari sem heldur málinu lifandi. Þetta er fáheyrð frammistaða fjölmiðla heillar þjóðar.

Almenningur hlýtur að spyrja sig til hvers er að halda uppi fjölmiðlum sem skipulega hylma yfir glæpi og siðleysi blaðamanna. Varðmenn almannahags liggja út í móa í fósturstellingum og sjúga þumalinn. Blaðamannastéttin í heild sinni er brandari. 

Ísland: spilltustu fjölmiðlar í Evrópu

Á Íslandi eru spilltustu fjölmiðlar í Evrópu, jafnvel þótt víðar væri leitað. Ritstjóri Kjarnans, Þórður Snær, býr að vitneskju um spillinguna og hefur af henni ábata. En hann notar smjörklípu til að draga athyglina frá ósómanum.

Þórður Snær situr á upplýsingum um eitrun og gagnastuld frá Páli skipstjóra Steingrímssyni. Ritstjórinn viðurkennir vitneskju um glæpinn. Hlutverk blaðamanna er að upplýsa. En ekki í blaðamannaheimi Þórðar Snæs. Þar er hlutverk blaðamannsins að hylma yfir og gott betur; sýna brotaþola sem geranda og hvítþvo illræðismenn. 

Þrír fjölmiðlar RÚV, Kjarninn og Stundin eiga aðild að glæpnum, ýmist sem skipuleggjendur eða þjófsnautar. Fjölmiðlarnir þrír stunduðu samræmdar aðgerðir er fólu í sér eitrun, gagnastuld og birtingu á stolnum gögnum. Það liggur fyrir og þarf ekki lögreglurannsókn til. Lögreglurannsókn mun aftur sakbenda á einstaklinga er áttu í hlut. Þar verða blaðamenn afhjúpaðir sem afbrotamenn. Allt er þetta vitað. Á Glæpaleiti standa yfir meiri mannabreytingar en í háa herrans tíð. Stormur er í aðsigi.

Í stað þess að upplýsa almenning um alvarlega glæpi og spillingu reiðir Þórður Snær fram smjörklípu frá Pírötum. Ísland er spillt, segir Þórður Snær, af því að Páll skipstjóri og samstarfsfélagi hans hjá Samherja báru blak af fyrirtækinu. Samherji, vel að merkja, hefur ekki verið ákærður fyrir eitt eða neitt, hvorki hér eða í Namibíu. Ritstjóri Kjarnans sér flísina í auga Páls skipstjóra en ekki bjálkann í eigin auga.

Þórður Snær er gangandi auglýsing fyrir ósvífnustu gerð blaðamanna. Þeirra sem telja almenningi trú um að hvítt sé svart og svart hvítt. Eintök eins og Þórður Snær munu alltaf finnast. Verra er að meira og minna öll blaðamannastéttin þegir með Dodda.

Spilling fjölmiðla vex og dafnar en það heyrist hvorki hósti né stuna. Jú, afsakið, alþingi Íslendinga samþykkti ríkisstyrki til spilltustu fjölmiðla Evrópu. Það er álíka og ríkið skaffaði innbrotsþjófum verkfæri.

Þegar lögreglurannsókn á máli Páls skipstjóra lýkur loksins, loksins eiga samanlagðir fjölmiðlar landsins almenningi ýmsu ósvarað. Fjölmiðlar sem starfa í þágu lögbrjóta í röðum blaðamanna eru ekki á vetur setjandi. Enn síður á fjárlög. 

Vestræn vangá

Hvorki Bandaríkin né Evrópusambandið ætla að verja landamæri Úkraínu, komi til innrásar Rússa. Þýskaland er lykilríki í evrópskri afstöðu. Á þýsku er orð sem lýsir skilningi á stöðu Rússlands andspænis útþenslu Nató eftir lok kalda stríðsins fyrir 30 árum.

,,Russlandverstehen" er orðið, stundum er notað ,,Putin-verstehen". Bæði vísa orðin til Þjóðverja í valdastöðum sem telja Rússa hafa lögmæta ástæðu til að óttast útþenslu Nató síðustu áratugi. Borgarstjórinn í Kænugarði segir Rússlandsskilning svik við Úkraínu. Hver lítur sínum augum á silfrið. 

Eftir að forseti Úkraínu, hliðhollur Rússum, Viktor Janúkóvíts, var hrakinn frá völdum 2014 stóð til að gera landið að Nató-ríki. Þar með væru nær öll landamæraríki Rússlands í vestri í hernaðarbandalagi gegn Rússum. Margur leiðtoginn í þeirri stöðu myndi örvænta um hag sinn og þjóðarinnar af minna tilefni.

Útþensla Nató í Austur-Evrópu hélst í hendur við tilraunir vesturveldanna, með Nató sem verkfæri, að umbreyta miðausturlöndum, þ.e. Írak, Sýrlandi og Líbýu, í ríki með vestrænar leppstjórnir. Hugmyndafræðileg forskrift var bók Francis Fukuyama, Endalok sögunnar. Kenningin var að eftir kalda stríðið yrði heimsbyggðin öll mótuð að vestrænum hætti. Kenningin reyndist röng, sást síðast í sumar í Afganistan þegar bandaríska stórveldið yfirgaf fjallalandið með rófuna á milli lappann eftir 20 ára stríð.

Vestræn vangá, svo notað sé diplómatískt orðalag er hæfir ástandinu, er að halda að vestræn stjórnmálamenning sé útflutningsvara sem biðröð er eftir í þjóðríkjum er ekki njóta hennar. Svo er ekki, eins og dæmin sanna. Hin hliðin á myntinni er sú að ekki er pólitískur vilji á vesturlöndum til að heyja stríð á hugmyndafræðilegum forsendum um vestræna yfirburði. Trump fékk kjör til forseta út á þessa innsýn í amerísku þjóðarsálina. Biden gaf Afganistan upp á bátinn af sömu ástæðu.

Úkraína þarf að finna leið til að lifa með landafræðinni. Líkt og Finnland gerði eftir vetrarstríðið fyrir 80 árum. Önnur lexía er frá Kastró er lærði sambúð við Bandaríkin eftir Kúbudeiluna fyrir 60 árum. Öryggishagsmunir eru stórveldum mikilvægir.

Vestræn vangá síðustu tveggja áratuga er smátt og smátt að fjara út. Raunsæi er betri leiðavísir í alþjóðamálum en hugmyndafræði um vestræna yfirburði.

 

Bandaríkjamenn kalla sitt fólk heim frá Úkraínu

Vinstrimenn, veiran og sannleikurinn

Vinstrimenn vildu harðari sóttvarnir en hægrimenn. Vinstrimenn töluðu fyrir samfélagslokunum, veiruvegabréfum og óttastjórnun. Hægrimenn voru varkárari og trúðu ekki eins og nýju neti öllu sem kom frá svokölluðum sérfræðingum sem gátu ekki vitað það sem ekki er þekkt - hvernig farsótt leikur nútímasamfélag.

Nýsjálenska leiðin var fyrirmynd vinstrimanna. Þrátt fyrir meiri og víðtækari lokanir þar syðra en á byggðum bólum er enn allt í tjóni. Gunnar Smári og sósíalistar ákölluðu nýsjálensku leiðina eins og hálfguð. Aðrir vinstrimenn fylgdu í humátt á eftir.

Vinstrimenn eru í sífelldri leit að einum sannleika. Vísindalegur sósíalismi hét það fyrrum, loftslagsbreytingar á seinni tíð. Þegar Kínaveiran skall á þjónuðu vinstrimenn eðli sínu. Þeir töldu einn heilagan sannleik blasa við. Sá sannleikur hlyti að vera með stimpli sérfræðinga og í höndum stóra bróður, ríkisins. Hægrimenn vita aftur að í samfélagsmálum er ekki spurt um sannleikann með ákveðnum greini. Samfélag manna snýst um málamiðlanir, ekki sannleikann. 

Farsóttin mun sitja lengi í vitund fólks. Pólitísku afleiðingarnar verða m.a. þær að vinstrimenn sitja uppi með Svarta-Pétur ríkisforræðis, sérfræðingaveldis og óttastjórnunar. Hægrimenn koma töluvert betur undan farsótt. Eðlilega, þeir eru skynsamari.

Sjá glitta í endalok faraldursins í Evrópu

Úkraína er Afganistan Evrópu

Stjórnin sem situr í Kiev og á að heita ríkisstjórn Úkraínu er í raun leppstjórn vesturveldanna. Án stuðnings frá Washington, Brussel, París og Berlín gæti Kiev-stjórnin ekki haldið velli.

Í austurhéruðum Úkraínu, Donbass-svæðinu, fara rússneskumælandi uppreisnarmenn með völdin.

Sitjandi ríkisstjórn í Kiev komst til valda eftir byltingu 2014 gegn þáverandi forseta Viktor Janúkóvíts sem flúði til Rússlands. Byltingin var studd af ESB og Bandaríkjunum. Í framhaldi tóku Rússar Krímskaga er hafði tilheyrt Úkraínu frá sjöunda áratug síðustu aldar þegar Krúsjeff þáverandi sovétleiðtogi ,,gaf" skagann sem fyrrum tilheyrði Rússlandi.

Utanríkisráðherra Breta óttast að sitjandi leppstjórn verði vikið frá völdum og önnur, hliðholl Rússum, komi í staðinn. 

Í Kiev verður alltaf leppstjórn. Úkraína er þjóðríki sem stendur ekki undir eigin þyngd.

Þýski aðmírállinn Kay-Achim Schönbach segir upphátt það sem margir hugsa. Deila vesturveldanna og Rússa um Úkraínu er um keisarans skegg. Í stað þess að etja kappi við Rússa ættu vestræn ríki að gera Pútín að bandamanni.

Hvað Úkraínu varðar þýðir það sameiginleg leppstjórn vesturveldanna og Rússa. Góð hugmynd.

 

Bretar segja Pútín ætla að koma á leppstjórn

Misheppnað makaval og freistnivandi þolanda

Trúum þolendum er viðkvæðið í ofbeldisbrotum í nánum samböndum þar sem sjaldnast eru fleiri en tveir til frásagnar. Í viðtengdri frétt segir af meintum þolanda sem laug fölskum sökum á fyrrum ástmann. Sem sagt: trúum lyginni.

Þegar fólk efnir til náinna sambanda tekur það áhættu. Í húfi er lífshamingjan og hún er ekki allra að höndla. Ofbeldi og lygar eru algengari í ástarsamböndum en meðal vina og kunningja. Í parsambandi er meira undir en í öðru félagslegu samneyti. Einkalíf tveggja er samtvinnað. Þegar í sundur raknar fylgir sársauki, oft lygar og stundum ofbeldi. Engin leið er að sjá fyrir hvort samband lukkast. Sum ævintýri eru til farsældar en önnur enda út í mýri. 

Fólk hefur val. Fæstir eru knúnir í ástarsamband nema af eigin hvatalífi.  Makavali fylgir áhætta. Einstaklingur sem velur rangt ber ábyrgð á þeim kosti sem tekinn var, að efna til náins sambands sem steytti á skeri. Viðkomandi gerði mistök, valdi rangt. Ríkistryggðir makar, staðlaðir og gæðavottaðir, eru ekki til nema í skáldsögum.

Þolendaumræðan tekur ekki mið á mannlífinu eins og það er. Tilgangurinn er að slá pólitískar keilur. Látið er eins og ríkisvaldið beri ábyrgð á vali frjálsra einstaklinga. Rökrétt afleiðing umræðunnar er að taka makaval úr höndum einstaklinganna. Þeir séu of illa gerðir til að rata í parsamband sér að skaðlausu. 

Ríkistryggðir makar eru kannski framtíðin. Opin spurning er hvað verður um þá sem sleppa í gegnum eftirlitið en reynast engu að síður gallaðir. Hver hefur þörf fyrir ónýtan maka?

Dæmd í fangelsi fyrir rangar sakargiftir