Píratar eru Björt framtíð, 2. útg.

Björt framtíð varð til á síðasta kjörtímabili, þegar Jóhönnustjórnin var komin að fótum fram. Björt framtíð var ekki með skoðun á einu eða neinu en stóð sem valkostur við starfandi stjórnmálaflokka.

Píratar tóku við Bjartri framtíð á þessu kjörtímabili sem valkostur. Eins og Björt framtíð eru Píratar ekki með neina skoðun á málefnum samtímans, nema kannski höfundaréttarmálum. Þeir vísa öllum málum í þjóðaratkvæðagreiðslu, sem er aðferð til að afsaka skoðanaleysi.

Ómöguleiki íslenskra stjórnmála (takk Bjarni B., þú átt þetta hugtak) felst í þeirri þversögn að Íslendingar eru ofaldir á efnahagslegri velmegun (hagvöxtur, ekkert atvinnuleysi) en enginn starfandi stjórnmálaflokka reynist fær um að klæða velmegunina í pólitískan búning. Af þeirri ástæðu tekst Pírötum að klæðast nýju fötum keisarans og þykjast albúnir í nekt sinni að verða pólitískt afl.

Stjórnmálaflokkurinn sem sigrar baráttuna um eftirhrunsfrásögnina er með pálmann í höndunum. En það er þrautin þyngri að setja saman pólitíska frásögn um ísland eftirhrunsins. Á meðan taka sviðið skoðanalausir jaðarhópar eins og Píratar.

Píratar í stórsókn

Athugasemdir

[Helga Kristjánsdóttir, 2.5.2015 kl. 11:23]

  Hér nægir að segja sammála,frásögn þín er hrífndi.

[Árni Gunnarsson, 2.5.2015 kl. 12:28]

Og hér nægir að benda lesendum á afleiðingar þess að festa átrúnað á stjónmálaflokka og Votta Jehóva.