Hreinsanir Stefáns, þögnin um Þóru

Þrír þungavigtarmenn á RÚV hverfa af vettvangi í takt við framvindu lögreglurannsóknar á aðild fréttamanna að byrlun Páls skipstjóra Steingrímssonar, stuldi á síma og broti á friðhelgi hans og Örnu McClure lögfræðings. Samanlagður starfsaldur blaðamannanna þriggja er yfir 60 ár.

Útvarpsstjórinn, Stefán Eiríksson, er fyrrum lögreglustjóri, þekkir starfsháttu laganna varða og býr að tengslum innan löggæslunnar. Hann fórnar ekki þrautreyndum starfsmönnum nema af brýnni nauðsyn.

Brotið var á Páli skipstjóra 3. maí 2021. Fyrsta yfirheyrslan yfir sakborningi fór fram 5. október þá um haustið. Í sama mánuði ákvað Stefán að Rakel Þorbergsdóttir fréttarstjóri skyldi láta af störfum eftir 22 ára starf. Ákvörðunin var tilkynnt 9. nóvember. Ekki var hægt að auglýsa stöðu fréttastjóra þar sem útvarpsstjóri vissi ekki hve margir starfsmenn voru til rannsóknar lögreglu. Rakel var lofað lausamennsku við þáttagerð, en fátt er að frétta af þeirri sporslu.

Næstur á dagskrá var Helgi Seljan. Ákvörðun um brotthvarf hans var tekin um haustið en ekki tilkynnt fyrr en á nýju ári. Á vefsvæði starfsmanna RÚV sagði fréttamaðurinn m.a. að skilnaði

Hlust­endum og á­horf­endum er eng­inn greiði gerður með því að sitja undir kurt­eis­is­hjali við skoð­anir þess og heims­­mynd öllum stund­um. Þannig hefur það ekki verið og má ekki verða.

Allan starfsferil sinn hjá RÚV, sem spannaði 16 ár, var Helgi ötull að búa til ,,heimsmynd" sem aðeins var laustengd veruleikanum. Fyrst ýkjur, síðan fölsun og loks glæpur. Allt þegar þrennt er.

Stefán útvarpsstjóri kvaddi Helga með þessum orðum:

Hvað Helga Seljan varðar sérstaklega þá er það sigur fyrir íslenska þjóð og blaðamennsku að þessi öflugi blaðamaður haldi áfram sínum störfum.

Ef útvarpsstjóri tryði eigin orðum hefði Helgi ekki verið látinn fara. Oflofið er hluti starfslokasamnings og má skilja sem hæðni.

Mánuði eftir að tilkynnt var um starfslok Helga var upplýst um sakborninga í lögreglurannsókninni. Þóra Arnórsdóttir ritstjóri Kveiks er þar á meðal. Samt sat Þóra kyrr í sinni stöðu í eitt ár. En svo breyttist eitthvað.

Þóra tilkynnti sjálf, líkt og Helgi, að hún væri hætt 6. febrúar síðast liðinn eftir 25 ára starf á ríkisfjölmiðlinum. Hún fær sæti í skemmtiþætti Gísla Marteins til að kveðja og talar um álag vegna ,,áreitis." Samt þekkir hún ekkert annað í aldarfjórðung. Áreitið fer líklega vaxandi og er af öðrum toga en hjá heiðarlegum blaðamanni.

Ólíkt þegar Helgi axlaði sín skinn stígur Stefán útvarpsstjóri ekki fram og mærir tapaðan starfskraft. Þóra er þó yfirmaður á RÚV og með lengri starfsaldur. Ísköld þögn fylgir fyrrum forsetaframbjóðanda úr útvarpshúsinu og upp í Landsvirkjun. Þar tekur einn einn forstöðumaður ríkisstofnunar  við flóttamanni sem annar opinber embættismaður þvær hendur sínar af. Hversu margir Kveiks-þættir Þóru fjölluðu um spillingu?

Vísbendingu um ástæðu flóttans má finna hjá almannatengli í líki blaðamanns sem vinnur fyrir sakborningana. Tilfallandi athugasemd fjallaði um störf Lasse Skytt í þágu grunaðra blaðamanna. Skytt sér um að skrifa fréttagreinar í erlenda miðla um ofsóttu blaðamennina á Íslandi. Fréttirnar eru þýddir í miðla sakborninga hér á landi til að afla samúðar.

Í framhaldi af tilfallandi athugasemd átti Skytt í samskiptum við erlendan starfsfélaga og ræðir þar sína vinnu í sakamálinu íslenska. Hann skrifar um rannsókn lögreglu ,,ifølge mine kilder er politisagen med journalisterne netop blevet forsinket."  Sá danski segir sem sagt að samkvæmt sínum heimildum hafi rannsókn lögreglu skyndilega seinkað. Heimildamenn Skytt eru vitanlega íslensku blaðamennirnir, vinnuveitendur hans.

Tölvupóstur Skytt er aðeins tíu daga gamall. Lögreglan var um það bil að ljúka rannsókn í janúar/febrúar en þá verður stefnubreyting, fleiri atriði krefjast rannsóknar. Sakborningar verða þess áskynja og Stefán útvarpsstjóri einnig. Þóra hættir á RÚV í lóðbeinu framhaldi.

Það sem gerðist er eftirfarandi. Lögreglan fékk vísbendingar, og í framhaldi gögn, um að samskipti blaðamanna við byrlara Páls hafi byrjað nokkru áður en tilræðinu var hrint í framkvæmd 3. maí 2021. Áður beindist lögreglurannsóknin fyrst og fremst að atburðarásinni eftir byrlunina og hvernig blaðamenn fóru með einkagögn Páls skipstjóra.

Athyglin beinist að tölvupóstum sem fóru á milli eins eða fleiri blaðamanna annars vegar og hins vegar byrlarans. Blaðamennirnir töldu sig hafa eytt öllum tölvupóstum. Þeir tóku m.a. síma byrlarans traustataki, fyrir milligöngu Láru V. Júlíusdóttur lögmanns, til að ganga úr skugga um að tölvupóstum yrði eytt.

Tölvupóstar sem fjalla um glæp sem enn er ekki framinn gefa til kynna meðsekt blaðamanna að atlögu að lífi og heilsu Páls skipstjóra.

Tvær ritstjórnir íslenskra fjölmiðla, RÚV og Heimildarinnar, búa að upplýsingum frá fyrstu hendi um aðild blaðamanna að alvarlegum glæp. Báðir fjölmiðlar eru þöglir sem gröfin. Það samrýmist ekki ,,heimsmynd" RÚV og Heimildarinnar, svo notað sé orðfæri Helga Seljan, að afhjúpa afbrot í eigin ranni. Sakborningar nota vina- og kunningjatengsl við blaðamenn á öðrum fjölmiðlum og fá þá til liðs við samsæri þagnarinnar.  

Almenningur má alls ekki fá vitneskju um að blaðamenn stunda glæpi til að afla frétta. Fjölmiðlakerfi þagnarinnar er ekki rekið í þágu almannahagsmuna heldur fárra innvígðra með óhreint mjöl í pokahorninu.   

 

 

Bloggari skrifar fréttir

Ef ekki væri fyrir tilfallandi bloggara segði fátt af byrlun Páls skipstjóra, stuldi á síma og aðför að einkalífi hans. Margverðlaunaðir blaðamenn koma við sögu, fyrst sem gerendur en síðar sem þöggunaryfirvald fjölmiðla. Þrír fréttamenn RÚV urðu að taka pokann sinn og Stundin og Kjarninn að sameinast.

Fyrsta bloggfréttin um Pál skipstjóra var skrifuð 2. nóvember 2021. Ellefu dögum síðar birtist önnur færsla þar sem farið var yfir málið, eins og það stóð þá um haustið. Síðan er fjallað um sakamálið eftir efnum og ástæðum, á meðan fjölmiðlar keppast við að þegja.

Þórður Snær ritstjóra Kjarnans, nú Heimildarinnar, var allt annað en sáttur við að bloggari segði fréttir sem verðlaunablaðamann vildu ekki að birtust. Þórður Snær skrifar leiðara 18. nóvember 2021 með fyrirsögninni ,,Glæpir í höfði Páls Vilhjálmssonar." Gefum ritstjóranum orðið:

Stað­reyndir eru ekki teygj­an­legt hug­tak. Það má ein­fald­­lega ekki segja hvað sem er, um hvern sem er, hvar sem bara vegna þess að ein­hver raðar röngum álykt­unum saman í fjar­stæðu­kennda atburða­rás. Nauð­syn­legt er að finna stað­hæf­ingum sínum stað í raun­veru­leik­an­um.
Þar eiga stað­hæf­ingar Páls Vil­hjálms­sonar engan sama­stað.

Þetta skrifar Þórður Snær 18. nóvember 2021. Þrem mánuðum síðar, þann 14. febrúar 2022, er upplýst að fjórir blaðamenn hafi stöðu sakbornings í lögreglurannsókn á byrlun Páls skipstjóra, stuldi á síma hans og broti á friðhelgi einkalífs. Þórður Snær er á meðal sakborninga.

Margur blaðamaðurinn hefur fengið verðlaun fyrir minna en að sjá þrjá mánuði fram í tímann. Þórður Snær fær taugaáfall þegar hann sér handverk sem kemur margfalt betur heim við staðreyndir en íslensk verðlaunablaðamennska. Eina úrræði ritstjórans er að stefna bloggara, - fyrir að skrifa fréttir.

Sannleikurinn er sá að blaðamenn RÚV og Heimildarinnar (áður Stundarinnar og Kjarnans) iðkuðu glæpi og kölluðu blaðamennsku. Aðför blaðamanna að lífi, heilsu og einkalífi Páls skipstjóra er sú ljótasta í íslenskri fjölmiðlasögu.

Á meðan fjölmiðlar þögðu skrifaði bloggari fréttir sem eiga erindi til almennings. Tilraun Þórðar Snæs verðlaunablaðamanns til þöggunar mun mistakast.

 

Páll hafi ritað ummæli í góðri trú

Ný gögn í byrlunarmáli Páls skipstjóra

Í lögreglurannsókn á aðild blaðamanna að byrlun Páls skipstjóra Steingrímssonar vorið 2021 eru væntanleg ný gögn sem gerbreyta stöðu málsins. Hingað til hefur rannsókn lögreglunnar beinst að aðkomu blaðamanna að málinu eftir að skipstjóranum var byrlað. Nýr vitnisburður, og gögn sem styðja þá frásögn, sýna fram á að blaðamennirnir hafi tekið þátt í að skipuleggja byrlunina, verið með í ráðum þegar í upphafi.

Tölvupóstar sem staðfesta aðild blaðamanna að undirbúningi tilræðisins eru ekki lengur til. Þeim var eytt. Lögreglan freistar þess að fá afrit af tölvupóstunum frá erlendu tæknifyrirtæki sem hýsir vefþjóna er tölvupóstarnir fóru um. 

Kona nákomin Páli skipstjóra byrlaði honum 3. maí 2021 á Akureyri. Líkur eru á að það hafi verið seinni tilraun til byrlunar. Sú fyrri var helgina á undan. Þá helgi gisti skipstjórinn í Reykjavík eftir að hafa komið heim úr róðri. Byrlunin mistókst þar sem Páll afþakkaði drykkinn sem innihélt eitrið.

Á föstudegi fyrir þessa helgi var tilkynnt að Aðalsteinn Kjartansson fréttamaður á RÚV flytti sig um set á Stundina, sem systir hans, Ingibjörg Dögg, ritstýrir. Næsti yfirmaður Aðalsteins á RÚV var Þóra Arnórsdóttir. Sjaldgæft er að starfsmaður á opinberri stofnun skipti um vinnustað án fyrirvara, ráði sig í nýtt starf sama dag og hann hættir. En það bráðlá á að Aðalsteinn færi yfir á Stundina til að vinna úr stolnum gögnum er kæmu á RÚV. Það átti bara eftir að byrla skipstjóranum og stela síma hans þegar Aðalsteinn flutti blaðamennsku sína af RÚV yfir á Stundina.

Ef rétt er að tilraunin til að eitra fyrir Páli skipstjóra um helgina hafi mistekist er líklegt að töluverð samskipti hafi verið á milli blaðamanna og konunnar sem byrlaði. Ný áætlun hefur verið sett saman. Ef einhver þessara samskipta eru til á texta, t.d. í tölvupóstum, er líklegt að sú sönnun haldi fyrir dómi. Annars er um að ræða kringumstæðurök fyrir aðild blaðamanna að skipulagningu tilræðisins auk vitnisburðar. Kringumstæðurökin eru sterk, tölvupóstur gerir málið naglfast.

Páll var meðvitundarlaus 4. til 6. maí og var fluttur rænulaus frá Akureyri á gjörgæslu í Reykjavík. Á þeim tíma var síma hans stolið og hann afritaður. Til að afrita símann þurfti áður að kaupa nýjan síma - sem undirstrikar að unnið var samkvæmt skipulagi. Eftir stuld og afritun var símanum skilað á sjúkrabeð Páls. Skipulagið gerði ráð fyrir að skipstjórinn væri grunlaus um að sími hans hafi verið afritaður.

Er skipstjórinn komst til meðvitundar vöknuðu með honum grunsemdir að einhver hefði átt við símtækið á meðan hann var á gjörgæslu. Reynt hafði verið að komast inn á samfélagsmiðla sem hann notar og inn í heimabanka hans með símtækinu. Hann kærði málið til lögreglu 14. maí.

Blaðamennirnir birtu fyrstu fréttir úr síma Páls 21. maí. Aðalsteinn skrifaði í Stundina en Þórður Snær Júlíusson og Arnar Þór Ingólfsson í Kjarnann. Fréttir beggja fjölmiðla birtust samtímis morguninn 21. maí. Aftur eru augljós merki um miðlægt skipulag. Engin frétt birtist á RÚV. Miðstöð samsærisins var á Efstaleiti. Þar var unnið úr gögnunum og fréttir útbúnar í Stundina og Kjarnann, sem nú hafa sameinast í einn miðil, Heimildina.

Verkskiptingin milli RÚV annars vegar og hins vegar Kjarnans og Stundarinnar gekk út á að RÚV kæmi í kjölfarið og endursegði fréttirnar en þó fyrst og fremst krefðist viðbragða stjórnmálamanna og annarra. Með síbylju fréttaflutnings var Pál skipstjóra gerður að sérstakri deild í Samherja, þar sem hann starfar við sjómennsku. Ímynduð deild RSK-miðla (RÚV, Stundin og Kjarninn) fékk heitið skæruliðadeildin. En skipstjórinn var engin deild. Hann aftur gagnrýndi RSK-miðla og varð fyrir það skotmark blaðamannanna.

Staðsetningarbúnaður í síma Páls uppfærðist ekki þar sem skipstjórinn slökkti á símanum eftir að hann varð þess áskynja að einhverjir höfðu tekið hann ófrjálsri hendi. Blaðamennirnir, á hinn bóginn, töldu óhætt að birta frétt rúmum tveim vikum eftir þjófnaðinn enda almenna reglan að upplýsingar um staðsetningu símatækja eyðast innan hálfs mánaðar. En það gerist aðeins ef símtækið er í notkun.

Staðsetningarbúnaður í síma Páls sýnir símtækið á Efstaleiti þann tíma sem skipstjórinn var á gjörgæslu. Aðeins steinsnar er frá Landspítalanum yfir á Efstaleiti þar sem RÚV er til húsa. Smitrakningarforrit, sem einnig var í símanum, geymir upplýsingar um þau símtæki sem voru nálæg er sími Páls var afritaður. Fleiri en einn blaðamaður höndlaði með stolna símann.

Lögreglan fékk hlerunarheimildir eftir að Páll kærði. Lögreglan með skrár yfir símtöl á milli gerandanna dagana fyrir tilræðið. Fái lögreglan tölvupósta sem fóru á milli aðila dagana fyrir tilræðið er komin borðleggjandi sönnun fyrir þátttöku blaðamanna í atlögu að lífi og heilsu skipstjórans.

Áður en nýju gögnin komu til álita stóð til að ákæra blaðamennina fyrir brot á friðhelgi og stafrænt kynferðisofbeldi. Blaðamennirnir sendu á milli sín og e.t.v. til annarra persónulegt efni skipstjórans. Fram hefur komið að þeir hótuðu honum frekari meingjörðum ef hann drægi ekki tilbaka kæruna frá 14. maí 2021.

Verði sýnt fram á að blaðamennirnir eigi aðild að tilræðinu sjálfu þyngjast sakargiftir.

Blaðamennirnir hafa ekki gert opinberlega grein fyrir sinni aðild. Þeir aftur stefna fyrir dómstóla þeim sem fjalla um málið, eins og tilfallandi bloggara.  

Kína tekur forystu í Úkraínu

Í Úkraínustríðinu falla öll vötn til Peking. Macron pantar viðtal hjá Xi Jin­ping forseta Kína og fær áheyrn í byrjun apríl. Í mars sækir Xi Jingping Pútín heim í Moskvu. Macron mun hitta forseta Kína eftir Pútín. Forgangsröð Kínverja er skýr, fyrst Rússar síðan vestrið.

Selenskí forseti Úkraínu vill einnig áheyrn hjá forseta Kína, segir það ,,smik­il­vægt fyr­ir alþjóðaör­yggi." Forsetinn í Kænugarði ímyndar sér að hann spili í efstu deild alþjóðastjórnmála. Hann stýrir utandeildarliði sem keppir i lánsbúningum. Þrjú ríki munu ráða úrslitum Úkraínustríðsins: Bandaríkin, Rússland og Kína. Frakkland og Þýskaland verða með áheyrnaraðild.

Vesturlönd eru logandi hrædd um að Kína útvegi Rússum hergögn, sem gerðu vont ástand verra. Kína er óopinber bakhjarl Rússa. Vestrið óttast að stórveldið í austri stígi fram í formlegu bandalagi með Rússlandi.

Kínverjar léku millileik í liðinni viku. Þeir kynntu friðaráætlun til að ljúka Úkraínustríðinu. Áætlunin gerir ekki ráð fyrir að Rússar skili herteknu landi, sem þegar hefur verið innlimað í rússneska ríkið. Aftur gerir áætlunin ráð fyrir að vesturlönd hætti að moka vopnum á austurvígstöðvarnar. Séð frá vestrænum sjónarhóli er friðaráætlunin löðrungur. Kínverjar telja sig hafa efni á ósvífninni.

Ef vesturlönd væru í sterkri stöðu myndu þau skella hurðinni á Kínverja og hóta efnahags- og viðskiptaþvingunum. En vestrið sér að stríðið í Úkraínu er tapað. Opin spurning er hversu hratt Rússar sækja fram. Stjórnarherinn er ekki í neinum færum að gera annað en tefja rússnesku sóknina. 

Af þeirri ástæðu er hlustað á Xi Jingping og friðartilögur sem taka mið af rússneskum öryggishagsmunum og greiða fyrir innlimun á fimmtungi Úkraínu í Rússland.

Umræðan á vesturlöndum er að breytast. Til skamms tíma hét það að brátt sneri stjórnarherinn í Kænugarði vörn í sókn og ynni tilbaka tapað landssvæði. Ekki lengur. 

Breska útgáfan Telegraph hamrar jafnt og þétt á þeim boðskap að ekki undir nokkrum kringumstæðum megi leyfa rússneskan sigur á sléttum Garðaríkis. Í leiðara útgáfunnar i gær kvað við annan tón. Vestrið er ekki með áætlun um hvernig skuli ljúka Úkraínustríðinu, Kína tekur frumkvæðið, segir í leiðaranum. Vestrið þarf langtímaáætlun, kvartar leiðarinn.

Langtímaáætlunin var að Úkraína ynni á vígvellinum. Síðan átti að knésetja Rússland. Sú áætlun er farin í vaskinn. Óformlegt bandalag Rússlands og Kína er með frumkvæðið. Vesturlönd eru á undanhaldi.

Líklegt framhald næstu vikur er að vestrænir ráðamenn tala meira um að ljúka verði Úkraínustríðinu en minna um að Pútín megi ekki sigra. Klukkan glymur Kænugarði.

Macron mun heimsækja Kína í apríl

Pútín hefur þegar sigrað

Úkraína er ekki Nató-ríki. Austur-Úkraína, Donbass, auk Suður-Úkraínu og Kherson-hérað hálft í suðvestri eru hluti af Rússlandi.

Úrsúla von der Leyen, forseti framkvæmdastjórnar ESB, segir Pútín hafi „mistekist að ná einu einasta markmiði sínu“. Í reynd er forseti Rússlands þegar búinn að ná helstu markmiðum sínum.

Vestræna áætlunin gekk út á að úkraínski herinn, byggður upp í sjö ár og þjálfaður af Nató-foringjum, skyldi veita Rússaher þá ráðningu að hann hypjaði sig til Moskvu og gerði þar stjórnarbyltingu. Í framhaldi yrði Rússland bútað i sundur með vestrænni reglustiku, líkt og Afríka á 19. öld.

Úrsúla lætur eins og áætlun hafi gengið eftir. Veruleikinn er annar. Úkraína er ónýtt ríki og mun ekki bera sitt barr um langa framtíð. Í friðarsamningum, sem verða á dagskrá, líklega í ár en kannski ekki fyrr en 2024, verða öryggishagsmunir Rússlands virtir, sem þeir voru ekki áður. Úkraína verður stórlega skert og gengur ekki í Nató.

Bandaríkin og ESB eiga vopn og fjármagn en skortir baráttuþrek. Á vígvellinum ræður baráttuþrekið úrslitum að öðru jöfnu. Á sléttum Garðaríkis hallar á Úkraínu í mannafla og vopnum. Engir Nató-hermenn verða sendir á austurvígstöðvarnar. Almenningur á vesturlöndum er afhuga og elíturnar þora ekki blóðfórnum án stuðnings frá kjósendum.

Deilan sem hófst vorið 2008, þegar Bandaríkin buðu Úkraínu Nató-aðild, setti tilvist tveggja ríkja á vogarskálarnar. Annað hvort hlaut Úkraína að beygja sig í duftið eða Rússland. Vesturlönd veðjuðu á að efnahagslegt og pólitískt vald myndi knýja Rússa til uppgjafar án stríðsátaka.

Eftir stjórnarbyltinguna í Kænugarði veturinn 2014 tóku Rússar Krímskaga. Það lá fyrir að Rússar ætluðu ekki að leggja upp laupana. Vesturlönd hefðu betur látið þar við sitja og nálgast Rússland með samningum en ekki hótunum.

Stríð er þeirrar náttúru að það býr til eitt ríki en tortímir öðru. Þar sem vesturlönd höfðu þau tök á Úkraínu að landinu mætti etja á foraðið án áhættu fyrir vestrið var kylfa látin ráða kasti. Úkraína skyldi skapa 1917-ástand í Rússlandi þar sem rússneska þjóðin varpaði af sér oki Pútín og félaga, líkt og þegar keisarastjórninni var steypt fyrir rúmri öld.

Ímynduð atburðarás var byggð á heimskublandinni óskhyggju. Í augum Rússa er Pútín bjargvættur móðurlandsins eftir niðurlægingu Yeltsín-áranna í lok síðustu aldar. Rússland var gjaldþrota, auðmenn með vestrænum stuðningi stálu náttúruauðlindum og ríkiseignum. Pútín skóp stjórnfestu og velmegun í 20 ár áður en hann lét sverfa til stáls í Úkraínu. Engar líkur voru á að rússneska þjóðin sneri baki við bjargvættinum. 

Úkraína væri betur í sveit sett ef friðarsamkomulag frá 2015, kennt við Minsk, hafði verið virt. En það stóð aldrei til. Af hálfu Bandaríkjanna og ESB var Úkraína ekki neitt annað en verkfæri til að brjóta upp Rússland.

Pútín hefur þegar sigrað. Það má bara ekki viðurkenna það. Nema í tilfallandi bloggi. 

Pútín „mistekist að ná einu einasta markmiði“

Sólveig Anna boðar launamisrétti

Sólveig Anna formaður Eflingar kynnir vinnustaðasamninga. Miðlægir samningar stuðla að launajafnrétti. Vinnustaðasamningar taka mið af afkomu einstakra fyrirtækja og eftir atvikum starfsgreina.

Áður hefur formaður Eflingar krafist að launþegar á landsbyggðinni beri minna úr býtum en vinnandi hendur á höfuðborgarsvæðinu. Efling hefur keyrt auglýsingaherferð sem hallmælir nýgerðum kjarasamningum Starfsgreinasambandsins.

Sjái kjarafélög á hverjum vinnustað um kjarasamninga verða verkalýðsfélög í mesta lagi með ráðgjafahlutverk. ASÍ verður óþarft. 

Fyrirtæki eru misjafnlega aflögufær. Veitingamenn lepja dauðann úr skel um þessar mundir en hóteleigendur eru betur staddir. Uppskrift Sólveigar Önnu veit á nær óbreytt laun í veitingageiranum en hærri laun á hótelum.

Vinnustaðasamningar leiða sjálfkrafa til misréttis á vinnumarkaði. Lágmarkslaun verða ólík eftir hvaða atvinnugrein á í hlut og í sumum tilvikum hvaða fyrirtæki er um að ræða.

Ísland er löngum heimsmeistari í launajafnrétti. Sósíalistinn Sólveig Anna vill kollvarpa jafnlaunakerfinu. Sennilega í nafni mannúðar, - eins og sósíalista er háttur þegar þeir hrinda í framkvæmd hugmyndafræðinni.

Meginkosturinn við vinnustaðasamninga er að einstaklingar eins og Sólveig Anna komast ekki lengur í þá aðstöðu að taka þjóðfélagið í gíslingu í þágu pólitískra og persónulegra hagsmuna.

Segir fyrirtæki hafa viljað semja beint við Eflingu

Lúkas, frjálst orð og góðmennskan

Vísir birti tvær hugvekjur í gær. Önnur er um smáhundinn Lúkas en hin er eftir Guðmund Andra Thorsson til varnar frjálsu orði.

Hvarf Lúkasar fyrir 16 árum leiddi til þess að ungur maður var tekinn af lífi í fjöl- og samfélagsmiðlum fyrir að hafa pyntað og drepið seppa. Í raun gerðist það að hundur týndist en með frjálst orð að vopni var saklaus ásakaður og dæmdur eins og hendi væri veifað.

Týndur Lúkas + frjálst orð = stafræn aftaka?

Málið er ekki alveg svona einfalt. Í dæmið vantar sálarlíf þeirra sem höndla með frjálsa orðið.

Löngun til að bjarga heiminum er kannski ekki öllum í blóð borin. En hvötin til að láta gott af sér leiða er sammannleg. Góðmennska er eðlilegt ástand mannsins.

Þegar tækifæri gefst til að gera gott vill allur þorri manna upp á dekk og láta hendur standa fram úr ermum. Ákefðin er því meiri sem andstæður góðs og ills eru skýrari.  

Er saga fer á kreik að málleysingi, smáhundurinn Lúkas, hafi orðið fyrir barðinu á hrotta kveikir það bál í mörgu brjósti sem ekki hefur lengi fengið útrás góðmennskunnar.

Á bálinu fuðrar upp sálargáfan sem margt góðmennið býr ekki að í miklum mæli. Dómgreindin.

Afleiðingin er að saklaus maður er krossfestur. Þegar kurlin koma öll til grafar og málavextir eru upplýstir, hvað gerist þá? Stíga góðmennin fram full iðrunar og eftirsjár? Sjaldnast, þeir góðu eru uppteknir í leit að nýjum tækifærum að sýna góðmennsku í verki.

Góðmennska knúin af heift er einatt illgirni í dularklæðum.

Nató kennir Kína um tap í Úkraínu

,,Ef Kína og Rússland ganga í bandalag skellur á þriðja heimsstyrjöldin," sagði Selenskí forseti í viðtali daginn sem Biden heimsótti Kænugarð.

Athyglisverð orð.

Vesturlönd eru logandi hrædd um að Kína styðji við bakið á Rússlandi í Úkraínustríðinu. ,,Kína gæti unnið stríðið fyrir Pútín," segir dálkahöfundur Telegraph.

Eftir heimsókn til Kænugarðs hélt Biden Bandaríkjaforseti til Póllands og lét hafa eftir sér fyrirsögnina í meðfylgjandi frétt: Nató er aldrei sterkara en einmitt núna.

Ef Nató er svona sterkt og mokar peningum og vopnum til Selenskí í Úkraínu hvaða hjárænulegi ótti er þetta við Kína? 

Hljóð og mynd fara ekki saman.

Tilfellið er að hvorki er Nató sterkt né mun Kína ráða úrslitum í Úkraínu. Rússar gerðu samkomulag við Kína áður en þeir réðust inn í Úkraínu fyrir ári síðan. Kínverjar veittu blessun sína. Þeir vita sem er að markmið Bandaríkjanna, ESB og Nató er að knésetja Rússland. Gengi það eftir yrði Kína næst á matseðlinum vestræna.

Með stuðningi við Rússland kaupir Kína sér tryggingu gegn vestrænum ágangi á vesturlandamærin. Yrði Rússland brotið undir vesturlönd yxi matarlyst sigurvegaranna. Kínverjar vita hverjum klukkan glymur.

Ef á þyrfti að halda myndi Kína senda hermenn til Rússlands, líkt og þeir gerðu í Kóreustríðinu laust eftir miðja síðustu öld. En til þess mun ekki koma. Rússar eru fjórum sinnum fleiri að mannfjölda en Úkraína. Á meðan bræðraþjóðirnar stunda einar mannfórnir mun Rússland sigra fyrr heldur en seinna.

Yfirlýsingar um að Kína ráði úrslitum í Úkraínu eru undirbúningur Selenskí forseta og vestrænna ráðamanna að játa ósigur. Rússar hefðu aldrei sigrað án kínverskra bakhjarla, verður viðkvæðið.

Á vesturlöndum ríkir örvænting. Úkraína átti að verða framhald eftir sigurinn í kalda stríðinu. Þrjátíu árum síðar bætist Garðaríki við misheppnaðar vestrænar tilraunir að búa til þjóðríki í sinni mynd: Írak, Sýrland og Afganistan. 

Raðbrestir dómgreindar eru til marks um djúpstæðan vanda. 

Biden segir NATO aldrei hafa staðið sterkara

Transvíkingur og transkisa

Ég er fæddur í röngum líkama, ætti eiginlega að vera víkingur, segir þýski blaðamaðurinn Henryk M. Broder og mætti með víkingahjálm úr plasti í sjónvarpið. Broder er menningarrýnir, skrifaði fyrir áratug bókina Síðustu dagar Evrópu. Hann heimsótti Ísland og segir í viðtalinu að erfðarannsókn staðfesti hann afkomanda Leifs heppna.

Vestur í Bandaríkjunum er móðir skólabarns orðin transkisa. Hún klæðir í sig í viðeigandi búning og mjálmar að hætti tegundarinnar. Í viðtali segir translæðan að tilefni umskiptanna sé að sýna fram á hvert transfræðin leiða okkur. Forsagan er að karlmaður í skóla, þar sem konan á barn, tók upp á því að klæðast kvenmannsfötum annað veifið og vildi að börn ávörpuðu sig sem konu. Samkvæmt trans og woke er lögmætt að skipta um kyn eftir hugdettu.

Í rökfræði er það kallað niðursöllun í fáránleika, reductio ad absurdum, þegar sýnt er fram á að gefnar forsendur leiði til fáránlegrar niðurstöðu. Transvíkingurinn og translæðan undirstrika að þrjár meginforsendur transfræða eru óverjandi.

1. Kyn er huglægt. 2. Hægt er að fæðast í röngum líkama. 3. Kynin eru fleiri en tvö.

Forsendurnar eru rangar, sannanlega. Í fyrsta lagi er kyn líffræðileg og handföst staðreynd. Í öðru lagi er ekki hægt að fæðast í röngum líkama. Það er líffræðilegur ómöguleiki. Í þriðja lagi eru kynin aðeins tvö, karl- og kvenkyn.

Þótt einhverjir séu sannfærðir um að kyn sé huglægt breytir sú sannfæring ekki hlutlægri staðreynd. Ef einhver trúir sig í röngum líkama getur það einkamál ekki orðið að almennum sannindum. Ranghugmyndir um veruleikann breyta ekki augljósum staðreyndum. Vitundin býr til ímyndun en það breytir ekki veruleikanum utan vitundarinnar. Ef einhver segist af sjöunda kyni þýðir það ekki að kynin séu sjö eða fleiri.

Vitanlega má hver og einn taka þátt í hlutverkaleik, einn eða með öðrum. Það er merkingarlaust barnagaman.

Vandamálin hrannast upp ef hlutverkaleikurinn er þvingaður á samfélagið. Hvers eiga konur að gjalda þegar karlmaður mætir í kvennaklefa í sundlaug með tólin á milli fótanna og segist kona? Fréttin segir frá atvikinu. Karlar geta valsað óáreittir inn í kvennaklefa á reykvískum baðstöðum með það yfirvarp að þeir séu konur. Þegar spyrst út að karlar komist upp með að þykjast konur til að komast inn á sérrými kvenna verður það nýtt af bíræfnum mönnum sem láta almenna siðsemi sér í léttu rúmi liggja.

Geðlæknirinn Engilbert Sigurðsson útskýrir hvernig félagslegur fáránleiki verður til á Íslandi.

Við Íslendingar erum smáþjóð og flest lesum við sömu tvo til þrjá miðlana daglega. Þessu fylgir nokkur hætta á að ör vöxtur verði í sumum greiningum eftir nokkur áberandi viðtöl og umræðu um þau á netmiðlum.

Það er nóg að fáeinir einstaklingar komi fram í fjölmiðlum og segist hafa fæðst með rangan líkama til að fólk láti sér vel líka að hægt sé að fæðast af röngu kyni. En það er ómögulegt, meðvitundin fæðist með líkama og er óaðskiljanlegur hluti hans. Maður gæti allt eins sagst vera af röngum kynþætti. Ranghugmyndir eiga það sameignlegt ímynduninni að þeim eru engin takmörk sett. Til vera í röngum líkama þarf einstaklingurinn að hafa átt val við getnað - og valið vitlaust. Það er aðeins í fantasíuheimi sem hægt er að velja sig frá eigin kyni.

Sumar konur eru með hýjung og breiðar herðar, en þær eru ekki karlar fyrir það. Karlar eru stundum kvenlegir en verða ekki konur af þeirri ástæðu. Ef einhver elur með sér ranghugmyndir um kyn sitt er það úrlausnarefni viðkomandi einstaklings, en ekki vandi samfélagsins. Ef samfélagið er lagað að ranghugmyndum fáeinna er sannleikanum varpað fyrir róða. Samfélag án sanninda ratar í ógöngur, t.d. að manneskja mjálmi, segist læða og heimtar mannréttindi fyrir kattfólk. 

Margir vilja annan líkama en þeir hafa, stæltari, grennri og unglegri. En við eigum aðeins þann skrokk sem við fengum í fæðingu. Víst er hægt að laga og snyrta búsetu vitundarinnar, t.d. með líkamsrækt, megrun, hollu líferni; lýtaaðgerð ef ekki vill betur. Að sama skapi má gera sig meðvitaðan um möguleika og takmarkanir í eigin lífi. Forn-Grikkir sögðu eftirsóknarvert að eiga heilbrigða sál í hraustum líkama.

Í dag heitir það að ,,öll mín vandamál eru öðrum að kenna, ríkið útvegi mér annan skrokk og greiði mér dagpeninga á meðan meðferð stendur." Til að ná árangri stofna áttavilltir samtök og segjast ofsóttir. Það er líka ímyndun, ný könnun sýnir það.

Frekjuhundar í transbúningi ofsækja heilbrigða skynsemi. Það er kjarni málsins. 

Sólveig Anna gegn Katrínu forsætis

Sólveig Anna formaður Eflingar fékk sínu framgengt og nýr sáttasemjari var skipaður til að leysa deilu hennar og SA. Niðurstaðan var sú sama. Sólveig Anna og sósíalistar vilja ófrið hvað sem tautar og raular. Kjaradeilur eru aðeins verkfæri til að skapa úlfúð og óeirðir í samfélaginu. Í andrúmslofti andstyggðar þrífast róttæklingar best.

Sólveig Anna og félagar eru ekki aðeins í stríði við atvinnurekendur. Efling kaupir auglýsingar í fjölmiðlum sem gagnrýna kjarasamninga Starfsgreinasambandsins, segja þá ekki nægja fyrir framfærslu. Fáheyrt er að eitt verkalýðsfélag grafi undan tiltrú á öðru stéttafélagi. Enda er það svo að Alþýðusamband Íslands er lamað. Þingi ASÍ var frestað. Verkalýðshreyfingin er stjórnlaust rekald.

Með allsherjarverkbanni á Eflingu hyggst SA gera tvennt. Í fyrsta lagi slá vopnin úr hendi sósíalista sem nota skæruliðaverkföll til að lama viðkvæmar starfsgreinar s.s. orkuflutninga og taka þar með almannahagsmuni í gíslingu. Í öðru lagi er verkbannið áskorun til almennra félagsmanna Eflingar að láta ekki sósíalista nota sig í stéttastríði.

Stríð Sólveigar Önnu og sósíalista gegn auðvaldinu er háð á tvennum vígstöðvum. Í fyrsta lagi á vinnustöðum þar sem spurt er um hollustu félagsmanna við sósíalisma almennt og formanninn sérstaklega. Í öðru lagi í almannarými, fjölmiðlum og samfélagsmiðlum. Þar er Sólveigu Önnu stillt upp sem kvenkyns Davíð gegn Golíat.

Eftir boðað verkbann flyst kjaradeila sósíalista yfir á vettvang stjórnmálanna. Þar munu öll spjót standa á Katrínu forsætis. Til þess var leikurinn gerður. Sólveig Anna gegn Katrínu. Sú kona sem fær betur heldur embættinu. Hin ekki.

 

Leggja til verkbann á Eflingu