Googlemarxismi

Tölvukeyrt algrím veit hver við erum sem neytendur og þátttakendur í stafrænu samfélagi. Stafræna sporið sem hvert og eitt okkar skilur eftir sig á alnetinu gerir stóra bróður auðvelt með að flokka og skilgreina einstaklinga út í hörgul.

Á 19. öld sá Karl Marx fyrir sér samfélag þar sem fólk ynni eftir getu og fengi laun eftir þörfum. Á stafrænni öld alnetsins er tæknilegur möguleiki að hrinda hugsjón Marx í framkvæmd.

Nú þegar er komin fram pólitík sem réttlætir Googlemarxisma. Formaður BSRB: ,,Ég hafna því alfarið að við ættum að lifa eftir þeirri hugmyndafræði að hver sé sinnar gæfu smiður."

Hugmyndin að fólk ráði sinni vegferð í lífinu og beri ábyrgð á afleiðingum athafna sinna (nú, eða athafnaleysi) er snar þáttur í einstaklingsfrelsi, eins og hefð er að skilja það.  

Googlemarxismi reiknar út hvað við getum, skilgreinir þarfir okkar og býr til sniðmát fyrir líf okkar. Lífið verður einfalt, skipulagt, fátækt af merkingu, án áhættu, gleðisnautt og leiðinlega langt. 

Samfylking í skugga Trump - og Framsóknar

Samfylkingarfélagar höfðu meiri áhuga á falli Trump i Bandaríkjunum en landsfundi flokksins um helgina. Logi formaður reyndi að gera flokkinn áhugaverðan með samanburði við Framsókn, sem er 7 prósent flokkur. 

Helstu tíðindi landsfundarins eru að Heiða Björg felldi Helgu Völu í formannskjöri með þeim rökum að vera ekki athyglissjúk.

Þá gerði Logi formaður láta Íslendinga að sérstöku áhersluatriði. Þar reyndi Logi að lesa Samfylkinguna inn í kjör Biden í Bandaríkjunum sem sigraði með dauðum atkvæðum. Bókstaflega.

„Viljum bara það sem virkar“

Thunberg til liðs við Biden

Þegar neyðin er stærst er hjálpin næst. Gréta Thunberg, sem leysti loftslagsmál jarðarinnar, verður vitanlega fremst vísindamanna Biden-stjórnarinnar.

Fyrir utan að vera sérfræðingur í loftslagsmálum, kann Thunberg lausn á kynþáttavandanum og hristir fram úr erminni úrræði er duga á Kínaveiruna.

Barnavísindin til liðs við Biden. Tvisvar verður gamall maður barn.

Biden vill vísindamenn í kórónuveiruteymið sitt

Síðustu dagar lýðræðisins

Þegar Trump fékk kjör sem forseti 2016 runnu upp síðustu dagar lýðræðisins, var viðkvæðið. Í þrjú ár reyndu frjálslyndir vinstrimenn og fjölmiðlar að telja alþjóð trú um að í raun væri Pútín rússneski sigurvegari kosninganna.

Ef Biden nær kjöri 2020 skyldi ætla að endurreisn lýðræðisins væri efst á dagskrá. Að hér væri kominn maður fólksins, maður sátta og fyrirgefningar, hófsemi og réttlætis.

Biden er lægsti samnefnari sem Trump-andstæðingar gátu fundið með möguleika á ná kjöri sem forseti. Sigur Biden verður sá minnsti mögulegi og tortryggður með ásökunum um kosningasvindl.

Sverji Biden embættiseið í janúar verður hann elsti maðurinn í allri sögu Bandaríkjanna til að verða nýkjörinn forseti.

Eftir Trump verður enginn andstæðingur til að sameinast gegn. Hvað gera bændur þá? Nú, vitanlega það sem rétttrúaðir gera alltaf þegar þeirra er himnaríkið. Þeir byrja að fljúgast á innbyrðis. Lægsti samnefnarinn á öldrunarlyfjum mun eiga fullt í fangi með að skakka leikinn.

Fyrsta krefjandi verkefni nýkjörins forseta verður þó á alþjóðavettvangi. Kínverjar, Pútín í Rússlandi, Erdogan í Tyrklandi og Brussel-söfnuðurinn munu hver í sínu lagi freista þess að bæta vígstöðuna eftir rússíbanareið Trump-áranna. Ef skilaboðin frá Washington verða óskýr og veik eykst ófriðurinn.

Í kjallara Hvíta hússins gæti leynst uppskrift að endurreisn lýðræðisins. En maður þarf að vera sæmilega lyfjaður til að veðja á það. Síðustu dagar lýðræðisins er öruggara veðmál 2020 en það var 2016.

 

„Þetta er tíminn til að græða“

Fjölmiðlar ákveða forseta

,,Nú hafa frétta­veit­ur lýst því yfir að Joe Biden muni standa uppi sem sig­ur­veg­ari kosn­ing­anna."

Sniðugt að fjölmiðlar ákveði hver skuli vera forseti Bandaríkjanna.

Eigum við ekki að láta íslenska fjölmiðla ákveða næstu ríkisstjórn hér á Fróni?

Sparar helling og fólk veit hvort eð er ekki hvað því er fyrir bestu. Fjölmiðlar, aftur á móti, bera viskuna í þverpokum og kunna skil á góðu og illu, réttu og röngu. Voldugt bandarískt tímarit kaus árið 1936 mann ársins sérstakan fulltrúa góðmennskunnar í heiminum. 

Hvað gerist næst?

Hundaflautupólitík, Heiða Björg og Helga Vala

,,Heiða segir ekki gott að hafa athyglissjúkan varaformann," sagði í fyrirsögn á vinstriútgáfunni Mannlíf þegar flokksmenn Samfylkingar gerðu upp hug sinn til framboðs Helgu Völu gegn Heiðu Björgu í stól varaformanns.

Hundaflautupólitík er það kallað þegar skilaboð eru send, nú oftast á samfélagsmiðlum, sem vekja hugrenningatengsl milli stjórnmálamanns og miður geðþekkra eiginleika. Hundaflautupólitík er fínstillt Gróa á Leiti. Skilaboð sem ekki er hægt að svara án þess að játa á sig sök.

Athyglissýki er lifibrauð stjórnmálamanna. Önnur sýki er það ekki - eða ætti ekki að vera það.

„Bjartir tímar fram undan“

ESB-lýðræði og Biden-lýðræði

Evrópusambandið endurtekur kosningar ef ekki fæst ,,rétt" niðurstaða í þeim fyrstu. Þetta er alkunn staðreynd, sem Írland fékk að kenna á. Bandaríska útgáfan af ESB-lýðræði hljóðar upp á að búa til atkvæði, þ.e. kosningasvindl, til að fá ,,rétta" niðurstöðu.

Joe Biden forsetaefni Demókrata gortaði sig af því fyrir kosningar að flokkur sinn ætti harðsnúnasta skipulagið til að falsa atkvæði í sögu Bandaríkjanna.

Lýðræðisútgáfur ESB og Biden eiga það sammerkt að sjálfskipaðir valdahópar telja lýðinn ekki eiga að skipta sér af hverjir stjórna.

Að kenna útgáfur ESB og Biden við lýðræði er að segja að svart sé hvítt.

 

 

„Ætlum að vinna þennan slag“

Trump-Ísland

Af íslenskum fjölmiðlum að dæma eru forsetakosningarnar í Bandaríkjunum innanríkismál á Íslandi. Ekki það að fjölmiðlar víða um heim fylgist ekki náið með talningu atkvæða en hér á Fróni er borið í bakkafullan lækninn.

Trump er helsta skýringin á elsku íslenskra fjölmiðla á bandarískum stjórnmálum. Allur þorri fjölmiðlanna hér heima telur sitjandi forseta rót alls ills í heiminum og taka þar með sömu afstöðu og frjálslyndir fjölmiðlar í Bandaríkjunum sjálfum.

Nú er það ekki svo að pólitísk álitamál á Íslandi séu þau sömu og Bandaríkjunum. Landið í vestri er heimsveldi, Ísland er örríki.

Möguleg skýring á fyrirferð Trump í íslenskri umræðu er að pólitíska kerfið á Ísland er enn í leit að jafnvægi eftir hrunið þegar glókollur sigraði 2016. Einhverjir óttuðust að Trump-pólitík héldi innreið sína í örríkið.

En aldrei var hætta á því. Trump-Ísland er ímyndun vinstrimanna og fjölmiðla.

 

Hvar stöndum við núna?

Vinna er líka lærdómur

Íslensk ungmenni vinna löngum með námi, bæði á sumrin og yfir skólaveturinn. Á vinnumarkaði lærir ungt fólk hvernig kaupin gerast á eyrinni og fær veganesti er kemur til góða að skólagöngu lokinni.

Hliðaráhrif af vinnu með skólagöngu er að námstími íslenskra ungmenna er heldur lengri en það sem tíðkast í nágrannaríkjum.

Á hinn bóginn er algengara í útlöndum en hér heima að námsmenn útskrifist beint á atvinnuleysisskrá.

72% segjast verða að vinna með námi

19 þingmenn: drepum fóstur - sem flest

19 þingmenn vinstriflokka á alþingi Íslendinga vilja hefja innflutning á þunguðum konum til fóstureyðinga. Já, þið lásuð rétt: Til­laga til þings­álykt­un­ar um aðgengi ein­stak­linga sem ferðast til Íslands að þung­un­ar­rofi.

Inga Sæland er skrifuð fyrir snjallri ádrepu i Morgunblaðið um málefnið. Þar segir m.a.:

Nú vilja þess­ir þing­menn, og lík­lega flest­ir flokks­fé­laga þeirra á þingi, að Ísland verði eins kon­ar fríríki fóst­ur­eyðinga í Evr­ópu. Að ís­lenska heil­brigðis­kerfið, sem berst nú þegar í bökk­um vegna álags og fjár­skorts, taki að sér að eyða ófull­b­urða börn­um allt til loka 22. viku meðgöngu fyr­ir fólk sem vill kom­ast fram hjá lög­um í eig­in heimalandi.

Ástæða er að halda til haga nöfnum þessara þingmanna vinstriflokkanna sem sýna sig gjörsneydda dómgreind og mannúð. Þeir eru: 

Rósa Björk Brynjólfsdóttir, Oddný G. Harðardóttir, Helga Vala Helgadóttir, Þorgerður K. Gunnarsdóttir, Ágúst Ólafur Ágústsson, Albertína Friðbjörg Elíasdóttir, Þorbjörg Sigríður Gunnlaugsdóttir, Andrés Ingi Jónsson, Björn Leví Gunnarsson, Jón Steindór Valdimarsson, Halldóra Mogensen, Þórhildur Sunna Ævarsdóttir, Hanna Katrín Friðriksson, Guðmundur Andri Thorsson, Ólafur Þór Gunnarsson, Helgi Hrafn Gunnarsson, Steinunn Þóra Árnadóttir, Logi Einarsson, Guðjón S. Brjánsson.