Stjórnin fórnar vinsælustu ráðherrunum

Utanþingsráðherrarnir mælast vinsælastir með almennings og þeim á að fórna samkvæmt síðustu fréttum. Gangi það eftir undirstrikar Jóhönnustjórnin veikleika sína því það er ódýrasta leiðin sem stjórnin velur með því að skáka af borðinu Gylfa og Rögnu. Hvorugt þeirra er stjórnmálamenn og eiga því ekkert bakland.

Ófriðarbálið innan ríkisstjórnarinnar skíðlogar sem fyrr. Í Sjónvarpsfréttum í kvöld hjólaði utanríkisráðherra í starfsbróður sinn í ráðuneyti landbúnaðar fyrir að spara gjaldeyri með því að hækka tolla á evrókjúllum.

Spaugstofan fær úr nógu að moða á nýjum baugsvettvangi.

Gylfi og Ragna hætta í stjórn

Hálf ríkisstjórn með ESB og Össur hlær

Samfylkingarhluti ríkisstjórnarinnar undirbýr aðlögun Íslands að Evrópusambandinu á meðan ráðherrar Vg láta sér fátt um finnast. Formaður Vg segir opinberlega að það sé ekki stefna ríkisstjórnarinnar að ganga í Evrópusambandið. Fyrir alþingi liggur þingsályktun um að draga umsókn Íslands tilbaka.

Össur Skarphéðinsson utanríkisráðherra segist hlæja að tillögunni en vill ólmur fá hana á dagskrá sem fyrst. Náinn samverkamaður Össurar, Mörður Árnason, setti þá hugmynd á flot um helgina að best væri að fá tillöguna um að hætta ESB-ferlinu sem fyrst til umræðu.

Össur og Mörður hugsa sér að fáist hraðmeðferð á tillögunni verði enn og aftur hægt að stilla Vg upp við vegg og segja valið standa um umsóknina og líf ríkisstjórnarinnar. Við þá hótun digni hnjáliðir þingmanna Vg.

Ef tillagan yrði felld og aðlögunarferlið héldi áfram myndi samt sem áður aðeins hálf ríkisstjórnin standa að baki þar sem flokkssamþykktir Vg eru skýrar og ótvíræðar og í fullu samræmi við vilja flokksmanna.

Össur glottir enn enda vanastur því að hafa ekki stórt föruneyti. 

 

Falinn milljarður Baugsfeðga

Baugsfeðgar eiga reiðufé upp á 1,2 milljarða króna eða lánstraust fyrir sömu fjárhæð hjá öðrum en Arion banka sem efnir til lokauppgjörs við næst dýrustu feðga Íslandssögunnar. Tuskubúðirnar þrjár sem Jón Ásgeir fær úr Högum eiga að kosta 1,2 milljarða og bankastjóri Arion segir feðgana verða að greiða með reiðufé.

Landsbankinn á erfitt með að losna við feðgana af sínum spena enda hafa þeir talið ríkisbankanum trú um að Jón Ásgeir sé sérstaklega snjall rekstrarmaður á sviði fjölmiðlunar. Viðskiptamódel Jóns Ásgeirs eftir hrun er að Hagar hafa keypt auglýsingar sem halda uppi 365-miðlum og afgangurinn kemur frá Landsbankanum.

Þegar það liggur fyrir að feðgarnir eiga meira en milljarð króna væri ekki athugandi fyrir Landsbankann að rukka þá um ógreiddar skuldir. Eða tryggir bandalag Jóns Ásgeirs og Samfylkingarinnar áframhaldandi fjáraustur ríkisbankans í hít feðganna?  Kannski lánar Landsbankinn Jóni Ásgeiri fyrir tuskubúðunum?

Þarf að greiða með peningum

Lífeyrissjóðir í nýspillingu

Lífeyrissjóðir geta ekki yfirtekið smásöluverslun undir formerkjum endurreisnar atvinnulífsins. Engin endurreisn felst í því að endurlífga ónýtan rekstur sem ætti að fara á hausinn. Það heitir nýspilling þegar almannafé lífeyrissjóða er dælt í rekstur sem á að fara í þrot.

Á smásölumarkaði er nógir um hituna og safnaðist Húsasmiðjan til feðra sinna yrðu margir til að fylla eyðuna á augabragði.

Lífeyrissjóðir gætu átt heima sem fjárfestar í mikilvægum samgöngufyrirtækjum, t.d. Flugleiðum, með þeim rökum að almannfé eigi veita í að styrkja innviði samfélagins.

Enginn friður verður um smásölurekstur lífeyrissjóða.

Ályktun á misskilningi byggð

Ljósanóttin hans Árna bæjó

Þegar Árni bæjarstjóri Sigfússon í Reykjanesbæ var spurður um stöðu bæjarfélagsins svaraði hann; 'komdu á Ljósanótt og vittu hvort ekki sé allt í lagi.' Óraunveruleikablærinn á tilsvörum bæjarstjórans rímar við veruleikafirrta stöðu bæjarsjóðs. Það er kanadískur braskari sem er með fjárhagslega afkomu Reykjanesbæjar í hendi sér.

Ross Beaty eigandi skúffufyrirtækisins Magma sem í orði kveðnu á HS-Orku eftir að Árni bæjarstjóri seldi hlutinn, fyrst Geysi Green og síðan Magma. Í síðustu viku kvaðst Beaty ekki hafa áhuga að selja fyrirhugaðri álbræðslu í Helguvík orku. En álfabrikkan sú á að bjarga efnahag Reykjanesbæjar, samkvæmt Árna.

Engin furða að Árni hugsi hlýlega til Ljósanætur næstu helgi - framundan er myrkur.

Óvissa um eignina

EES-samningurinn og aðlögun Íslands að ESB

Aðildarsinnar eru óðum að viðurkenna að ferlið sem Ísland er í vegna umsóknarinnar er aðlögun en ekki viðræður. Egill Jóhannesson forstjóri Brimborgar breytti umræðunni með afbragðs samantekt sem ekki verður véfengd. Viðbrögð aðildarsinna eru að vísa til þess að við séum í sífelldri aðlögun vegna Evrópska efnahagssvæðisins, þ.e. EES-samningsins, og því ætti litlu að breyta þótt við aðlögumst aðeins meira. Hér er ólíku saman að jafna, svo ekki sé fastar að orði kveðið.

EES-samningurinn gerir ráð fyrir að lög og gerðir tiltekinna málefnasviða Evrópusambandsins gangi fram í þeim ríkjum sem aðilar eru að EES-samningnum. Mikilvægustu undantekningarnar frá þessari aðlögun eru landbúnaður og sjávarútvegur.

Aðlögunarferli Íslands gagnvart Evrópusambandinu er ekki almenn, eins og EES-samningurinn, heldur sértæk þar sem framkvæmdastjórn ESB gerir beina kröfu til Íslands að tilteknar breytingar verði gerðar á stjórnsýslunni, lög og reglum. Sértækar breytingar af þessu tagi er bein íhlutun í íslensk innanríkismál.

Alþingi hefur ekki veitt ríkisstjórninni heimild til að leggja í víðtækar breytingar á íslenska stjórnkerfinu vegna mögulegrar aðildar. Veikt umboð sem ríkisstjórnin hefur leyfir ekki annað en að umsóknin verði dregin tilbaka, núna þegar ljóst er orðið hvernig í pottinn er búið.

Stjórnmálakerfið neitar að siðvæðast

Á útrásartíma gerspilltist stjórnmálakerfið með því að auðmenn keyptu stjórnmálamenn í prófkjörum og stjórnmálaflokka fyrir kosningar. Glæpir sitjandi stjórnmálamanna eru ekki nema að hluta upplýstir en hrunið hefði ekki orðið nema fyrir stuðning stjórnmálakerfisins við brask auðmanna.

Stjórnmálaflokkarnir fá hálfan milljarð á ári úr ríkissjóði sem bætist ofan á launakostnað þingmanna og rekstrargjöld þingsins vegna þeirra. Þessir fjármunir eiga að nægja flokkunum til að stunda stjórnmál.

Ótækt er að leyfa nafnlaus framlög til stjórnmálakerfisins, hvort heldur frá fyrirtækjum eða einstaklingum.

Þegar fjórflokkurinn neitar að gerbreyta fyrirkomulagi sem er á fjárstuðningi við stjórnmálamenn og flokka blasir við einbeittur brotavilji. Þjóðinni er gefið langt nef.

Gagnrýna afgreiðslu allsherjarnefndar

Þór Saari misskilur

Ísland er ekki í óskuldbindandi viðræðum við Evrópusambandið um mögulega aðild. Evrópusambandið býður ekki upp á slíkar viðræður og hefur ekki gert síðan Finnland, Svíþjóð og Austurríki gengu í sambandið 1995 - en Noregur hafnaði. Ef þá stækkun undirbjó ESB stækkun í austur og gerbreytti inntökuskilyrðum. Til að gera Austur-Evrópuríki hæf til að ganga í sambandið varð að aðlaga þau, stjórnsýsluna sérstaklega, að kröfum sambandsins.

Ísland er aðlögunarferli án þess að þing eða þjóð hafa samþykkt að fara í slíkt ferli. Umboðsleysi ríkisstjórnarinnar er algjört.

Þór Saari getur ekki kallað núverandi ferli viðræður. Hann er alloft greindur til að misskilja af vangá og verður vonandi áfram nógu hugrakkur til að kalla hlutina réttum nöfnum.

Styður ekki stöðvun viðræðna

Reykjanesbær gjaldþrota

Ríkissósíalismi Sjálfstæðisflokksins í Reykjanesbæ skilar rökréttri niðurstöðu sem er gjaldþrot bæjarsjóðs. Skynsamir rekstrarmenn hefðu nýtt sér góðærið á tímum útrásar til að greiða niður skuldir og safna í sjóði. Ríkissósíalisma fylgja hins vegar draumórar um að með tilskipunum að ofan sé hægt að byggja upp atvinnulíf.

Þegar opinber afskipti dugðu ekki til greip bæjarstjórinn, Árni Þór Sigfússon, til þess bragðs að gera bandalag við braskara. Eins og alþjóð veit, en bæjarstjórinn suður með sjó er grunlaus um, eru braskarar í essinu sínu þegar þeir komast í opinbera sjóði. Gæslumenn opinberra sjóða eru einatt hégómlegir stjórnmálamenn braskarar vefja um fingur sér.

Eftir skemmdarverk ríkissósíalismans ætti Árni Þór að segja af sér sem fulltrúi almennings í bæjarstjórn Reykjanesbæjar. Hann gæti í félagi við bróður sinn Þór, fyrrum forstjóra Sjóvá, skrifað bók um freistingar stjórnmálamanna og eðlisfar braskara. 

Rukkaður um 1,8 milljarða

Samfylking getur boðið sættir

Ríkisstjórn Jóhönnu Sigurðardóttur gæti setið út kjörtímabilið og fengið tækifæri til að ná sögulegum árangri við að árangri andspænis gríðarlegum erfiðleikum. Forsenda fyrir framhaldslífi ríkisstjórnarinnar er að langstærsta ágreiningsmál síðari tíma stjórnmála hér á landi, umsóknin um aðild að Evrópusambandinu, verði leyst.

Samfylkingin er í lykilstöðu þar sem flokkurinn er ábyrgur fyrri því að umsóknin var send. Samfylkingin gæti sýnt reisn og ábyrga afstöðu til landsmála með því að kannast við að umsóknin hefur ratað í óvæntar ógöngur. Annars vegar krefst Evrópusambandið aðlögunarferlis sem erfitt er að mæta þegar lagt var upp með óskuldbindandi viðræður og hins vegar er deginum ljósara að þjóðin er fráhverf aðild að Evrópusambandinu.

Forysta Samfylkingar gæti hafði sig upp yfir argaþras dægurmálanna og sýnt af sér stjórnvisku sem gæti gefið ríkisstjórninni endurnýjaðan þrótt með því að breyta í þágu þjóðar og styðja þingsályktun um að draga tilbaka umsóknina um aðild að Evrópusambandinu. 

Sögulegt tækifæri bíður Samfylkingar.