Hæfileikar sem æskilegt er að flýi land

Fífldjörf áhættusækni, bókhaldsbrellukunnátta, viðskiptasiðleysi og taumlaus græðgi eru meðal þeirra hæfileika sem gjarnan mættu verða landflótta. Þegar einstaklingar með þessa eiginleika fara úr landi er það landhreinsun.

Þeir sem leita fyrir sér í útlöndum þessi misserin eru þó flestir venjulegir Íslendingar sem hafa orðið fyrir barðinu á fjárglæfrum útrásarinnar. Ef eitthvað er að marka fyrri reynslu mun þorri landsmanna skila sér heim fyrr heldur en seinna.

Og líklega sitjum við uppi með þá sem helst ættu að fara.

Óttast íslenskan spekileka

Ísland sendir röng skilaboð

Mistökin sem verið er að gera með því að lappa upp á ónýtan Icesave-samning eru óðum að koma í ljós. Ísland er talið ætla að koma sér undan að greiða ríkisskuldir sem er alls ekki til að dreifa. Deilan snýst um að hvernig eigi að mæta gjaldþroti einkabanka og hvar ábyrgðin á regluverki ESB liggur.

Ríkisstjórnin ber ábyrgð á ónýtum samningi og ætti að segja af sér þegar Alþingi hafnar samningnum. Sjálfstæðisflokkurinn lét ríkisstjórnina plata sig inn á fyrirvaraumræðuna til að dreifa ábyrgðinni á klúðri sem liggur alfarið og eingöngu hjá stjórn Jóhönnu Sigurðardóttur.

Með því að prjóna fyrirvara við samninginn er fallist á þau meginsjónarmið að Ísland beri ábyrgð á gölluðu regluverki ESB. Það fær ekki staðist.

Handvömm ríkisstjórnarinnar og hræðsluáróður um að himinn og jörð farist ef ekki verður gengið að kröfum Breta og Hollendinga má ekki verða til að Ísland gefi frá sér réttmætar varnir í deilunni um Icesave-reikningana.

Framsóknarflokkurinn hefur staðið vaktina og tími kominn til að Sjálfstæðisflokkurinn hysji upp um sig brækurnar. Liðið í forystu Sjálfstæðisflokksins er kannski ekki tilbúið í slaginn og verður því að skipta út veikustu hlekkjunum.

Fleiri fari að dæmi Íslands

Hvenær varð hrunið óhjákvæmilegt?

Í útrásinni urðu til orð og hugtök sem, eins og almennt gildir um þesslegs, áttu að lýsa veruleikanum. Eitt var ,,dautt eigið fé" fyrirtækis sem þýddi á máli útrásar að það mætti skuldsetja fyrirtækið meira. Annað var ,,fjárfestingargeta" sem var yfirlýsing um að búið væri að tryggja aðgang að lánsfé - án tillits til þess hvort viðkomandi væri borgunarmaður fyrir lánunum.

Í dag hljómar útrásarorðræðan eins og hvert annað bull. Fyrir fáum misserum þótt hún góð latína þorra manna. Hvers vegna? Jú, vegna þess að orðin og hugtökin voru bökkuð upp með auði og valdi útrásarmannanna.

Stjórnmálin hefðu átt að vera sá vettvangur sem greindi stöðu mála, hafði eftirlit með þróun og ýtti á eftir því að stjórnkerfið gripi í taumana áður en út í ógöngur væri komið.

Milljón króna spurningin er þessi: Hvenær óx útrásin stjórnmálunum yfir höfuð? Hvenær varð ekki aftur snúið? 

Án EES hefði ekkert hrun orðið

Ísland var vanþróuð hjálenda fram á miðja síðustu öld og hér var ríkisvætt fjármálakerfi fram undir lok aldarinnar. Í landinu var ekki til fjármálamenning sem þroskast hefur frá miðöldum í Evrópu. Þegar Íslendingar gerðu tvennt í einu, einkavæddu fjármálakerfið og gerðu EES-samninga sem m.a. leyfðu aðgang að evrópsku sparifé, varð til eitruð blanda fyrir áhættusækna drengi í teinóttum jakkafötum.

Þetta er stutta útgáfan af hruninu. Við vorum ekki tilbúin undir EES á tíunda áratug síðustu aldar og við verðum ekki tilbúin fyrir Evrópusambandið fyrr en í lok þessarar aldar.

Telegraph: Ekkert venjulegt hrun

Bretar útkljá deiluna um Icesave-fyrirvara

Það verður í höndum Breta að kveða upp úr um það hvort fyrirvarar Alþingis á ríkisábyrgð vegna Icesave-reikninga halda eða ekki. Ef Bretar fella sig við fyrirvarana eru Sigmundur Davíð og Framsóknarflokkurinn með pálmann í höndunum en Bjarni Benediktsson og Sjálfstæðisflokkurinn sitja uppi með Svarta-Pétur.

Lítið aukaatriði í málinu er að ef Bretar fallast á breytingarnar bjarga þeir ríkisstjórn Íslands frá falli. Össur Skarphéðinsson og Björgvin G. Sigurðsson eru félagar í breska Verkamannaflokknum. Ætli það hjálpi til?

Þýðingarlaus sýndarmennska

Er Brúnka Kristjáns Þórs Icesave eða Sjálftæðisflokkurinn?

Leiðtogi sjálfsstæðismanna á landsbyggðinni, Kristján Þór Júlíusson, skrifar torrætt blogg í morgun þar sem sagt er frá dæmisögu Bakkabræðra um kúnna Brúnku sem var þeim kær. Bræðurnir ofvernduðu Brúnku og sliguðu hana með grjóti.

Þjóðfélagsumræðan undafarna daga býður upp á andstæðar túlkanir á bloggi Kristjáns Þórs. Í fyrsta lagi að ekki sé ástæða til að ofvernda ríkissjóð með því að hafna Icesave-frumvarpinu. Í öðru lagi að formaður Sjálfstæðisflokksins sé að ofvernda flokkinn með því að aðstoða ríkisstjórnina við að koma Icesave-frumvarpinu í gegnum þingið.

Þjóðin með fyrirvara á Alþingi

Eftir er að koma í ljós hvort þeir fyrirvarar sem nætursamkomulag í fjárlaganefnd séu glassúr á ónýtan samning eða haldgóð vörn gegn helstu göllum Icesave-samningsins. Afgreiðsla fjárlaganefndar er aðeins fyrsta lotan, breytt frumvarpið á eftir að fara í almenna umræðu um leið og Alþingi ræðir það.

Tilurð samningsins og leynimakk stjórnvalda gefur full tilefni til að tortryggja samkomulag fjárlaganefndar, sem vel að merkja er án þátttöku Framsóknarflokksins.

Það hefur verið efnt til þingkosninga af minna tilefni en Icesave-frumvarpinu.

Samkomulag í fjárlaganefnd

Samstaða um þjóðargjaldþrot, nei takk

Ríkisstjórnin beitir öllum brögðum til að lemja saman samstöðu um Icesave-samninginn. Þegar rennur upp fyrir ráðherrum að á Alþingi eru menn og konur sem líta ekki á hlutverk sitt að svíkja umbjóðendur sína verður kannski hægt að koma þeim í skilning um að samninginn þarf að fella. Spurningin er aðeins hvort gengið verði hreint til verks og frumvarpið fellt eða hvort samningnum verði hafnað með stífum fyrirvörum.

Örvænting stjórnarliða stafar af heimatilbúnum vanda vinstriflokkanna sem hafa alið á hræðslu og talað kjarkinn úr þjóðinni. Ríkisstjórn í stríði við þegna sína á sér ekki viðreisnar von.

Unnið að breytingum fyrirvara

Lögregluríki Steingríms J.

Ríkisstjórninni leiðist lýðræði og finnst það til trafala þegar samþykkja á mál sem vitað er að þjóðin er á móti, eins og aðild að Evrópusambandinu og Icesave-samninginn. Hótanir sem berast úr herbúðum stjórnarinnar um ákærur um landráð vegna leka úr þingnefnd verður að skoða í ljósi heitstrenginga um að þessi ríkisstjórn ætli sér að sitja lengi enn.

Eftir að landráðabrigslin ná flugi mun ríkisstjórnin beita framkvæmdavaldinu til að hafa uppi á lögbrjótum, t.d. með hlerunum og öðrum persónunjósnum.

Vinstriflokkarnir búa að mannskap sem bæði kann og getur svívirt lýðræðislegar leikreglur. Árni Þór Sigurðsson þingmaður og liðþjálfi Steingríms lærði sín fræði í Moskvu á sínum tíma og hefur sýnt sig viljugt verkfæri til skítverka.

Lýðræðissinnar í öllum flokkum verða að sameinast um að koma ríkisstjórninni frá völdum áður en það verður um seinan.

Skaðar hagsmuni Íslands

Skilaboð frá útlöndum: Stjórnin þarf að falla

Í útlöndum skilja menn stjórnarkreppur. Í lýðræðisríki er stjórnarkreppa merki um að tekist sé á um erfið verkefni. Ábyrgðaraðili Icesve-samningsins hér á landi er ríkisstjórn Íslands. Til að forða þjóðinni frá þessum ósanngjarna samningi verður að fella samninginn á Alþingi og stjórnin þarf að falla með. Það eru skýr skilaboð til útlanda um að samningurinn sé óviðunandi og jafnframt að á Íslandi sé virkt lýðræði.

Ef ríkisstjórnin kemst upp með sinn hráskinnaleik, að búa til málamyndarfyrirvara, veikist traust á íslenska stjórnkerfinu enn frekar og er af litlu að taka. Í útlöndum væri það skilið sem pólitísk útfærsla á Icesave-reikningum og útrásarhyggjunni. Stjórnin heldur völdum en gefur útlendingum langt nef.

Samfylkingin, og í seinni tíð Vg, eru flokkar ríkulega útbúnir útlendingaþjónkun. Þeim ætti ekki að vera að vanbúnaði að fylgja ráðleggingum að utan um að stjórnin þurfi að víkja til að hægt sé að semja upp á nýtt.