Vg flaskar á fullveldinu

Fullveldið er kjarnaatriði í pólitískir meðvitund dæmigerðs kjósanda Vinstrihreyfingarinnar græns framboðs. Þegar flokkurinn stendur ekki klár á meginmálum er hætt við að margur stuðningsmaðurinn leiti annað.

Umsókn Samfylkingar um aðild að Evrópusambandinu og kaup Magma á HS Orku eru hvorttveggja fullveldismál. Vg svaf á verðinum þegar þessi mál fengu framgang og það sést á slöku fylgi flokksins í skoðanakönnun.

Vg þarf að gyrða sig í brók ef ekki á illa að fara.

Sjálfstæðisflokkurinn með mest fylgi

Arion kætist með Jóni Ásgeiri

Bakhjarl Jóns Ásgeirs á Íslandi er Arion banki sem leyfir Baugsfjölskyldunni að stýra Högum. Jón Ásgeir notar veltufé Haga til að halda uppi fjölmiðlaveldi sínu í 365 miðlum. Arion hlýtur að kætast þegar Jón Ásgeir sannar hversu snjall fjármálamaður hann er og duglegur að tryggja sinn hag.

Slitastjórn Glitnis endasendist heimsenda á milli að sækja illa fengið fé Jóns Ásgeirs á meðan Arion meðhöndlar Jón Ásgeir sem viðskiptavin í úrvalsflokki.

Viðskiptavinir Arion banka hljóta að velta fyrir sér samfélagsvitund bankans.

585.648 bresk pund kyrrsett

Baugur keypti opinbera umræðu

Jón Ásgeir Baugsstjóri keypti opinbera umræðu. Ekki nóg það heldur reyndi hann að breiða yfir nafn og númer gagngert til að blekkja almenning. Hann keypti Fréttablaðið árið 2002 í skálkaskjóli lögfræðings og Gunnars Smára Egilssonar ritstjóra.

Þegar Gunnar Smári birti ásakanir vorið 2003  um að Davíð Oddsson hafi sigað lögreglunni á Baug birti hann slitrur úr fundargerðum Baugs til að gera fréttina trúverðugri. Almenningur fékk ekki að vita fyrr en löngu seinna að Baugur ætti Fréttablaðið.

Blaðamenn sem ganga í þjónustu Baugs stunda ekki blaðamennsku heldur eru þeir almannatenglar. Þegar þeir í ofanálag leyna almenningi hverjir borga brúsann stunda þeir svikráð gegn almannahagsmunum.

Aldrei verið neitt launungarmál

Viðskiptavæðing samfélagsins

Útrásin sneri á hvolf gömlum sannindum um að atvinnulíf eigi að þjóna samfélagi. Áróður auðmanna og meðhlaupara þeirra var að setja verðmiða á alla hluti og braska síðan til að skrúfa verðið upp. Ríkisstjórnir voru myndaðar utanum þessa hugsun, sbr. samstjórn Sjálfstæðisflokksins og Samfylkingar 2007 sem var nefnd Baugsstjórnin. Meirihlutasamstarf sprakk ef staðið var gegn viðskiptavæðingunni. Björn Ingi Hrafnsson borgarfulltrúi Framsóknarflokksins sleit samstarfi við Sjálfstæðisflokkinn haustið 2007 þegar borgarfulltrúar Sjálfstæðisflokksins neituðu að févæða orkuauðlindir borgarinnar með samstarfi við Hannes Smára, Jón Ásgeir og kumpána í Geysir Green.

Viðskiptavæðing er góður bísness auðmanna. Eyjan segir frá hugdettu sem Þór Sigfússon forstjóri Sjóvá fékk um að breikka Suðurlandsveg og fá tekjur af notkun vegarins. Í viðskiptamódelum er alltaf gert ráð fyrir hagnaði til einkarekstursins. Þegar auðmenn komast í samkrull með hinu opinbera er feitan gölt að flá.

Samfélagið framar viðskiptalífi ætti að vera kennisetning eftirhrunsins.

Prófessor í þvættingi

Prófessorar sem tala um málefni utan síns sérsviðs eru faglegir ómerkingar. Þórólfur Matthíasson prófessor í viðskipta- og hagfræðideild Háskólans er fjarri góðu faglegu gamni um leið og hann hættir sér út fyrir akademíuna, hvort heldur að hann sé álitsgjafi um Icesave eða EES.

Tilbúnar forsendur um afleiðingar af fyrirhuguðum breytingum á reglum Evrópusambandsins um ábyrgðarsjóði geta gefið hvaða niðurstöðu sem er - einmitt af því að forsendurnar eru tilbúnar.

Þórólfur þarf að svara grundvallarspurningum um heppilega stærð myntsvæða og hvaða forsendur myntsvæði þurfi að uppfylla til að teljast á vetur setjandi áður en hann gífuryrðist um að Íslandi geti ekki haldið uppi eigin mynt.

Þórólfur hafið í frammi ýmis skringileg viðhorf í Icesave-deilunni sem flest gengu út á að Ísland ætti að borga möglunarlaust ítrustu kröfur Breta og Hollendinga annars færi illa fyrir okkur. Við bognuðum hvorki né brotnuðum og erum hér enn að hlusta á prófessor í þvættingi.

Gerir ómögulegt að vera í EES

Markaðsbrestir og hlutverk ríkisvaldsins

Hrunið var einn allsherjar markaðsbrestur. Ef til væri hugmyndafræðilegur valkostur við einkaframtak og markaðsbúskap væri búið að ríkisvæða nærfellt allan atvinnurekstur hér á landi. Vinstriflokkarnir sem sitja stjórnarráðið boða ekki endurhæfingu atvinnulífsins heldur treysta á viðurkennd borgaraleg úrræði.

Þegar heilbrigðisráðherra fær rökstuddan grun um markaðsmisnotkun í lyfjageiranum er það vitanlega skylda hans að kanna hvort lyfjaverslun á vegum ríkisins geti leiðrétt markaðinn. Einstök inngrip í atvinnulífið er ekki upphafið að sósíalisma eins og sumar pissudúkkur virðast halda.

Það stendur upp á  talsmenn frjálsrar verslunar og markaðslausna að gera grein fyrir ástæðum hrunsins og útleggja nýtt jafnvægi milli einkareksturs og ríkisrekstur og e.t.v. annars rekstrarforms.

Pissudúkkurnar haldi í sér á meðan.

Samfylkingin bitlingavæðir

Samfylkingin ræður kúlulánamann sem umboðsmann skuldara en gengur framhjá forstöðumanni Ráðgjafastofu heimilanna en sú stofnun verður lögð niður þegar umboðsmaðurinn tekur til starfa. Án tillits til jafnréttismála er þessi niðurstaða fáránleg. Sé haft í huga að gengið er framhjá vel hæfri konu til að ráða vanhæfan karl verður málið kaldrifjað misrétti.

Samfylkingin er gegnsósa tækifærismennsku. Sumir kynnu að ætla að jafnréttismál væru Samfylkingunni mikilvægari en svo að þeim mætti fórna í bitlingavæðingu. En svo er ekki.

 

 

Ætlar að krefjast rökstuðnings

Nýlendustefna ESB gegn Íslandi og Færeyjum

Ísland á margra sameiginlegra hagsmuna að gæta með Grænlandi, Færeyjum og Noregi. Hagsmunir Íslands og Evrópusambandsins eru aftur á móti í mörgum tilfellum ósamrýmanlegir. Evrópusambandið lítur á NV-Atlantshafið sem auðlindasvæði á líkan hátt og Evrópuþjóðir litu til skamms tíma á Afríku.

Nýlenduhugarfarið í Brussel kemur fram í yfirgangi gagnvart smáþjóðum.

Eina vörn smáþjóðanna er að standa saman utan Evrópusambandsins.

Vilja viðskiptabann á Ísland og Færeyjar

Samfylkingarafsökun Björgólfs

Björgólfsfeðgar áttu Landsbankann og að auki margvísleg ítök í viðskiptalífi hér heima og erlendis. Feðgarnir voru nógu umsvifamiklir til að móta eigin viðskiptakúltúr. Björgólfur eldri var hokinn reynslu þegar hann keypti Landsbankann. Hafskipsmálið ætti að vera lexía mönnum með eðlilega dómgreind.

Björgólfsfeðgar stigu ekki varlega til jarðar í sínum viðskiptum. Þeir voru undir sömu sökina seldir og hinir auðmennirnir sem í tæpan áratug fóru ránshendi um íslenskt samfélag.

Björgólfur reynir að klína hrunmenningunni á Sjálfstæðisflokkinn og Framsóknarflokkinn með því að skrifa einkavæðingu bankanna á þeirra reikning. Málflutningurinn sýnir hvaða mann Björgólfur geymir; honum varð ekki bumbult af því að njóta einkavæðingar bankanna og fékk meira að segja lánað hjá Búnaðarbankanum til að kaupa Landsbankann.

 

Gagnrýnir einkavæðinguna

Aðildarsinni með viðvörun til Íslands

Efnahagsleg rök nægja hvergi nærri til að sannfæra þjóðir um að ganga í Evrópusambandið allra síst ef viðkomandi þjóðir munu greiða með sér í sambandið eins og verður í tilfelli Íslands. Uffe Ellemann-Jensen kann og veit margt um Evrópusambandið og hefur tilfinningu fyrir íslenskum þankagangi.

Fyrrum utanríkisráðherra Danmerkur tæki aðild Íslands fagnandi en sér öll tormerki á því að þjóðin sé tilbúinn að meðtaka boðskapinn frá Brussel.

Á kurteisan hátt bendir danski Íslandsvinurinn okkur á að ræða málið betur.

Segir of snemmt að fara í ESB