ESB-umsókn Samfylkingar er dýrt spaug

ESB-umsókn Samfylkingarinnar er óvinafangaður sem einn flokkur stendur að ásamt fáeinum kverúlöntum í öðrum flokkum. Þjóðin er alfarið á móti, um 60-70 prósent vilja ekki aðild, og andstaðan er vaxandi. Unnur Brá Konráðsdóttir þingmaður Sjálfstæðisflokksins vinnur þarft verk með þingsályktunartillögu um að draga umsóknina tilbaka.

Á meðan umsóknin er látin standa vinnur hún þjóðinni ógagn. Hér heima ríkir meiri tortryggni milli manna og hópa en annars væri og gagnvart útlöndum erum við kleyfhuga þjóð þar sem stjórnvaldið sækir um félagsskap í trássi við þjóðarvilja.

ESB mun ekki kunna Íslendingum þakkir fyrir að gera hjá sér bjölluat. Síðustu mánuði hafa kurteis skilaboð komið frá Brussel um að ef til vill sé málið ekki nógu rætt á Íslandi til að þjóðin geti staðið að umsókn. Samfylkingin lætur þessi skilaboð sem vind um eyru þjóta.

Kostnaðurinn við umsóknin mun hlaupa á milljörðum króna. Í ofanálag er ferlið í átt að aðild ekki samningaferli heldur aðlögunarferli þar sem væntanlegt aðildarríki tekur jafnt og þétt upp regluverk ESB eftir því sem ferlinu vindur fram. Þjóðaratkvæðagreiðsla í lok ferlisins er markleysa vegna þess að við stöndum þá frammi fyrir orðnum hlut - erum orðin hluti af Evrópusambandinu án þess að hafa nokkru sinni samþykkt það.

Umsókn Samfylkingarinnar um ESB-aðild þarf að draga tilbaka áður en hún veldur meira tjóni.

Umsókn um aðild að Evrópusambandinu verði dregin til baka

Mútuþægni þingmanna

Siðlausir peningar þvælast ekki þingmönnum á alþingi Íslendinga. Samfylkingin ruddi veginn fyrir gagnaverslögum handa Björgólfi Thor Björgólfssyni fyrrum eiganda Landsbankans en Sjálfstæðisflokkurinn studdi. Samfylkingarmaður, Vilhjálmur Þorsteinsson, titlaður fjárfestir, liðkaði fyrir lofaði 500 störfum.

Rökin sem þingmenn nota til að styðja siðlaust auðmannadekrið eru þau að Björgólfur Thor veiti mönnum vinnu.

Þeir þingmenn sem greiddu atkvæði með gagnaversfrumvarpinu ættu kannski að koma sér saman um hvenær land og þjóð eru svívirt nægilega til að þeir standi í lappirnar.

Lára Hanna Einarsdóttir gerði okkur góðan greiða og tók hörmungina saman.

Þjófar í verslunarstétt

Kaupmaður fyrir nokkrum árum fullvissaði trúgjarnan viðskiptavin að hann væri að gera góð kaup með þeim orðum að verðið hefði ekkert breyst hjá sér í tvö ár. Grunlaus viðskiptavinurinn beit á agnið en leiddi ekki hugann að því að krónan hafði styrkt verulega ár nýliðin ár.

Sagan segir okkur tvennt. Það eru þjófar í verslunarstétt sem í skjóli fákunnáttu almennings komast upp með okur. Í öðru lagi að við höfum oftast vel. Við getum leitað annað eða neitað okkur um þá hluti sem eru verðlagðir af þjófum.

Verst er að verjast því þegar margir taka sig saman um að svindla á almenningi. Arion banki tekur t.d. höndum saman við Baugsfjölskylduna að tryggja fákeppni í smásölumarkaði með því að láta þá fjölskyldu sem síst ætti að stunda verslun á Íslandi nær einokunarstöðu. Arion banki getur valið sér það hlutverk að vera þjófsnautur. Við getum hætt að eiga viðskipti við Arion banka.

Styrking mun skila sér í verð

Landsbyggðin leiðir endurreisnina

Hrunið leiddi til Reykjavíkurkreppu enda var útrásin höfuðborgarbóla framar öllu. Atvinnuleysið er meira á Reykjavíkursvæðinu en landsbyggðinni. Á meðan vinnuaflið finnur sér nýjan vettvang til að starfa á er að búast við atvinnuleysi, sem þó nær ekki meðaltali í ESB.

Atvinnuvegir sem eru sterkir á landsbyggðinni s.s. sjávarútvegur og ferðaþjónusta eru leiðandi í endurreisn atvinnulífsins. Landbúnaður er önnur öflug grunnstoð sem bæði fæðir þjóðina og sparar okkur ógrynni gjaldeyris.

Reykjavíkurkreppan mun bíta enn um sinn en mest vestan Ártúnsbrekku.

Atvinnulausum fækkaði í maí

Grín og alvara, olía og vatn

Grínvæðing borgarstjórnar er andóf gegn stjórnmálaflokkum og hvernig þeir starfa. Fábjánatal um ísbirni og tollahlið á Seltjarnarnesi eru sniðug en merkingarlaus umfram það. Gnarr og félagar eru sjálfskipuð hirðfífl sem draga dár að valdinu.

Allir óbrjálaðir sjá að Besti flokkurinn er best geymdur á hliðarlínunni þar sem hann gjammar. Það þurfti oddvita á barmi taugaáfalls, Dag B. Eggertsson, til að setja grínið í ökumannssætið í stjórnmálum borgarinnar.

Hanna Birna á að leyfa Degi og Samfylkingunni að klára málið og gera annað tveggja; leiða fíflaganginn til öndvegis eða hætta að taka mark á hirðfíflunum.

 

Bjóða Hönnu Birnu að taka sæti forseta nýrrar borgarstjórnar

Hrunið eyddi baklandi Samfylkingarinnar

Samfylkingin og útrásin verða til á sama tíma, upp úr aldamótum, og víxlverkun er á milli auðmanna og flokksins. Ingibjörg Sólrún og Össur Skarphéðinsson sórust í fóstbræðralag við Jón Ásgeir Jóhannesson Baugsstjóra og hlaut sambandið eldskírn sína í deilunni um fjölmiðlalögin veturinn 2003-2004.

Menningarlíf flokksinsvar útrásarvætt; Hallgrímur Helgason, stundum kallaður Baugsskáld, var snemma gerður að hirðskrifara flokksins. Hópurinn kenndur við Mál og menningu fór í vasann á öðrum auðmanni, Björgólfi eldri. Samfylkingin fékk Björgólf á landsfund sinn árið 2003.

Tengsl Samfylkingarinnar við atvinnulífið er einkum í gegnum fjármálalífið, kvikmyndagerð og tónlist; greinar sem tengjast 101 Reykjavík.

Samfylkingin er í stríði við grunnatvinnuvegi þjóðarinnar, landbúnað og sjávarútveg. Mentalítet dæmigerðs samfylkingarmanns er rótfast í Kvosinni og hugmynd hans um að komast úr bænum felst í að keyra Keflavíkurveginn upp í flugvél.

Hrunið eyddi baklandi Samfylkingarinnar. Í síðustu könnun Gallup fékk flokkurinn 20 prósent.

Gnarrbyltingin kynnt í nóv. 09

Jón Gnarr kynnti í nóvember á síðasta ári að hann hygðist gerast stjórnmálamaður. Í fréttinni sem fylgir þessu bloggi gerir Jón ráð fyrir að setjast á þing þar sem kaupið freisti - enda ætlar hann sér ekki ýkja mikla viðveru. Nokkrum vikum síðar var stefnan var tekin á borgarstjórnarkosningarnar með alkunnum árangri.

Jón Gnarr verður borgarstjóri í næstu viku með stuðningi Samfylkingarinnar. Borgarstjóri er með hærri laun en þingmaður og stjórnmálaskensarinn hlýtur að kunna að meta það.

Stjórnunarstíll Jóns Gnarr í ráðhúsi Reykjavíkur er sennilega í hönnun hjá handritshöfunum grínsins og verður fróðlegt að sjá hvað kemur út úr því.

Jón Gnarr í framboð

Niðurbrot stjórnmálanna

Stjórnmálakerfi landsins er að leysast upp. Forsætisráðherra leggur fram stjórnarfrumvarp sem ráðherra berst gegn; helmingur ríkisstjórnarinnar berst fyrir aðild að ESB en hinn helmingurinn er á móti; aðalatvinnuvegur landsins er í uppnámi vegna niðurrifsaðgerða stjórnvalda; auðrónar útrásarinnar sitja enn á þingi og þjóðin notar tækifæri sem gefast til að hafna stjórnmálastéttinni.

Örvæntingin sem kemur fram í brigslyrðum manna í milli á þingi er birtingarform upplausnarinnar. Alþingi eins og það er skipað í dag getur ekki nýst þjóðinni til endurreisnar.

Kosningar eru vettvangurinn til að þjóðin velji sér nýja fulltrúa á löggjafarsamkomuna.  

Þurfti að biðjast afsökunar

Færeyingar hafna ESB-aðild

Forræði yfir auðlindum sjávar er meginástæðan fyrir því að Færeyingar telja ekki koma til greina að gerast aðilar að Evrópusambandinu. Ný og ítarleg skýrsla, unnin af alþjóðlegri nefnd, fer ítarlega yfir þá kosti sem Færeyingar standa frammi fyrir í Evrópumálum.

Nefndin mat hvorttveggja möguleika á því að Færeyjar yrðu aðili að ESB í gegnum Danmörku eða sjálfstæður aðili. Hvorugt er talið heppilegt. Niðurstaða nefndarinnar er að tvíhliða samningur við ESB sé farsælasti samskiptaháttur milli aðila. 

Færeyingar, sem eru innan við 50 þúsund, hafa unnið vandaða skýrslu um Evrópumál og m.a. gert skipulega athugun á afstöðu ESB gagnvart smáríkjum og hvort smáríkin geti nálgast ESB sameiginlega.

Manndómsbragur er á Færeyingum í utanríkismálum. Það er annað hér heima. Össur Skarphéðinsson fór þá leið að leggjast undir fávísisfeld með sjálflýsandi ESB-merki, kom undan og sagðist hafa séð ljósið; Ísland ætti að sækja um ESB því það hentaði Samfylkingunni ágætlega.

Skýrslu Færeyinga um ESB má finna hér.

Gnarristar til valda

Krafan um stjórnlagaþing er vegna þess að stjórnmálaflokkarnir, einkum þeir tveir stóru sem byrja á ess, skynja ekki kall tímans um pólitískar hreinsanir þeirra sem stóðu hrunvaktina. Sjálfstæðisflokkur og Samfylking brugðust seint og illa við kröfum um að þeir sem eru löðrandi af útrásarslepju skuli víkja.

Stjórnlagaþing sem kosið yrði til væri kjörinn vettvangur fyrir gnarrista af margvíslegu tagi. Allar líkur eru að gnarrframboð einstaklinga fengi meðbyr hjá þjóð sem vildi sýna stjórnmálastéttinni fyrirlitningu sína.

Í hefðbundnum kosningum, eins og sást fyrir hálfum mánuði, gera gnarrframboð það líka gott. Næsta vetur verður kosið til alþingis þar sem núverandi ríkisstjórn er komin að fótum fram.

Stjórnmálaflokkarnir eiga enn tækifæri að koma skikk á sín hús en það rennur hratt úr stundaglasinu.

Vilja þjóðfund í stað stjórnlagaþingsins