Orsakir hrunsins...

...má rekja til landnáms. Ef norrænir menn hefðu aðeins horft til suðurs og austurs á áttundu og níundu öld væru Færeyjar ekki byggðar sjóveikum Norðmönnum og Ísland ekki fundist fyrr en löngu seinna af Hollendingum, Spánverjum eða Bretum.

Aðeins bláeygum mönnum norrænum dytti í hug að hægt væri að gera hér samfélag. Evrópumenn nær meginlandinu myndu í besta falli gera Ísland að verstöð.

Og fái Samfylkingin ráðið verður leiðréttur sögulegur misskilningur um að Ísland geti fóstrað samfélag. Í Evrópusambandinu verðum við reiknuð niður í meðaltal álfunnar og eftir það nennum við ekki búsetunni á Fróni enda fæst meira fyrir ESB-styrkinn sé hann leystur út á suðlægari slóðum.

 

Ríkisniðurgreidd ESB-umræða

Samtök iðnaðarins hafa um árabil staðið fyrir umræðu um Evrópusambandið á forsendum aðildarsinna. Upplýsinga- og kynningarstarf Samtaka iðnaðarins er fjármagnað með iðnaðarmálagjaldi sem Mannréttindadómstóll hefur dæmt ólögmætt.

Samtök iðnaðarins hyggjast fá bætt gjaldið með beinu framlagi úr ríkissjóði.

Engin sátt verður um það að Samtök iðnaðarins fái framlag úr ríkissjóði til að stunda áróður fyrir ESB-aðild nema sambærilegir fjármunir verði látnir renna til þeirra sem standa fyrir kynningu á fullveldissjónarmiðum í Evrópuumræðunni.

Iðnaðarmálagjald andstætt félagafrelsi

Siðferði snýst ekki um reglur

Bjarni Benediktsson formaður Sjálfstæðisflokksins ver styrkjakónginn Guðlaug Þór Þórðarson þingmann flokksins með þeim orðum að reglur hafi ekki verið brotnar. Ef þessi mælikvarði yrði notaður við uppgjör við hrunið myndu þeir sleppa sem síst skyldi.

Á útrásartímum misstu sumir sig í fjármálaæði. Hversdagslegt fólk tók á sig skuldabyrðar sem það stendur ekki undir. Það braut engar reglur en verður samt sem áður að horfast í augu við afleiðingar gjörða sinna.

Stjórnmálamenn sem misfóru með það traust sem almenningur sýnir þeim eiga að taka afleiðingunum. Þeir sem sýndu sig auðkeypta og tróðu vasana fulla af útrásarfé eiga ekki að sitja áfram eins og ekkert hafi í skorist.

Það kraumar undir og stjórnmálaflokkar og forysta þeirra, einkum Sjálfstæðisflokks og Samfylkingar, verða að kannast við alvöru málsins. Stjórnmálaflokkar eru ríkisrekin félagasamtök. Almenningur líður ekki að stjórnmálaflokkar telji sig hafna yfir almennt siðferði.

Ábyrgð stjórnmálaflokka

Stjórnmálaflokkar starfa í þágu almennings. Með þeim rökum fá flokkarnir hundruð milljóna króna árlega af skattfé almennings. Alþingismenn eru trúnaðarmenn flokkanna og almennings.

Þegar trúnaðarmenn verða uppvísir að athæfi sem ekki samrýmist skyldum þeirra, t.d. að þiggja fáránlegar fjárhæðir af bönkum í styrkir, eiga þeir að víkja.

Hrunið varð af margvíslegum ástæðum. Ein var vegna andvaraleysis trúnaðarmanna almennings og meðhlauparahegðun þingmanna sem áttu að standa vaktina fyrir almenning.

Krafan er að stjórnmálaflokkar axli ábyrgð og losi sig við trúnaðarmenn sem ekki standa undir nafni. 

ESB-hugarfar í stað útrásar

Háskóli Íslands efnir til umræðu um hrunið og framtíðina. Á fyrsta fundi talar Guðmundur Hálfdánarson prófessor í sagnfræði sem er iðulega er boðinn og búinn að útskýra kosti þess að Ísland gangi Evrópusambandinu á hönd.

Guðmundur Hálfdánarson og málflutningur aðildarsinna er reddingarorðræða þar sem aðild að ESB á að koma í stað þess sem við töpuðum með hruni útrásarinnar.

Háskóli Íslands klappaði útrásarsteininn þegar það gaf í aðra hönd. Betliferðir til banka eru nú um stundir tilgangslausar en í Brussel glóir í gull. 

Hrunið og skýrslan krufin í HÍ

Prófkjör efldu áhrif auðmanna

Peningastyrkir auðmanna til þingmanna eins og Steinunnar Valdísar og Guðlaugs Þórs voru til að gera þau auðsveip hagsmunum stórfyrirtækja. Prófkjör stóru flokkanna, Samfylkingar og Sjálfstæðisflokks, eru fremur vettvangur fyrir sölu á pólitískri sannfæringu en umræðu um landsins gagn og nauðsynjar.

Galopin prófkjör eru almennar forkosningar þar sem auglýsingafé ræður verulega um árangur. Þingmenn og þingmannsefni sem fá styrki frá auðmönnum verða háð slíkum framlögum og haga sér í samræmi við það, eins og dæmin sanna.

Á síðustu árum hefur Framsóknarflokkurinn horfið frá prófkjörum og fært val á frambjóðendum til flokksmanna. Prófkjör eru brátt liðin tíð.

Steinunn Valdís staðfestir útrásarspillingu Samfylkingar

Samfylkingin var á spena auðmanna, einkum Jóns Ásgeirs Baugsstjóra, og tók inn styrki á nokkrum kennitölum til að fela slóðina. Steinunn Valdís Óskarsdóttir styrkjadrottning Samfylkingarinnar veit sem er að flokkurinn getur ekki knúið hana til afsagnar vegna þess að flokkurinn er upp fyrir haus í útrásarspillingu.

Í Sjónvarpsfréttum kvöldsins segist Steinunn Valdís ætla að sitja keik á þingi nema flokkurinn segi annað.

Kosturinn við þrásetu Steinunnar Valdísar er að hún auglýsir hversu óforbetranlegur stjórnmálaflokkur Samfylkingin er.

 

Samfylking og Samtök atvinnulífs samstíga

Samtök atvinnulífsins vilja 5 prósent hagvöxt, Samfylkingin sömuleiðis. Samtök atvinnulífsins vilja auknar lántökur hins opinbera til að draga gjaldþrota rekstur að landi og Samfylkingin er til þann leiðangur.

Samtök atvinnulífsins hafa engan áhuga á uppgjöri við hrunið og hyggst ekki draga neina lærdóma af öfgum útrásarinnar og strútfuglapólitík hentar Samfylkingunni ágætlega.

Samtök atvinnulífsins er hrungóss og rökrétt að Samfylkingin sjái um hina  pólitísku málsvörn.

 

Vilja stefna að 3,5% hagvexti

Flokksmútur, Gulli, Björn og Baugur

Guðlaugur Þór Þórðarson þingmaður Sjálfstæðisflokksins bjó til bix í kringum Orkuveitu Reykjavíkur þar sem hann var stjórnarformaður. Bixið gekk út á að hleypa útrásarauðmönnum í almannaeigur OR. Í staðinn áttu útrásarauðmenn að fjármagna Sjálfstæðisflokkinn. Með því að stjórna fjármögnun Sjálfstæðisflokksins ætlaði Guðlaugur Þór jafnframt að skipa þar til sætis.

Upp komst um strákinn Tuma og flokkurinn varð að endurgreiða illa fengið fé úr bixi Gulla.

AMX vekur athygli á öðrum þætti í stjórnmálastarfi Guðlaugs Þórs. Hann tók að sér herför gegn Birni Bjarnasyni dómsmálaráðherra sem var auðmönnum, einkum Baugi, óþægur ljár í þúfu. Fyrir kosningarnar 2007 fékk Guðlaugur Þór 25 milljónir króna til að fella Björn í prófkjöri Sjálfstæðisflokksins.

Guðlaugur Þór ætti að íhuga önnur störf en þau sem eiga í orði kveðnu að vera í þágu almennings.

 

Vinir spillingar smyrja gangverk glæpamanna

Jón Gunnarsson þingmaður Sjálfstæðisflokksins á vingott við spillinguna þegar hann spillingarjafnar Jóni Ásgeir Baugsstjóra og Björgólfi Thor og kemst að þeirri niðurstöðu að þar sem Jón Ásgeir fær að halda Högum er rétt að alþingi samþykki lög til að auðvelda Björgólfi Thor gróðabrall með gagnaver.

Hrannar Arnarson aðstoðarmaður Jóhönnu Sigurðardóttur forsætisráðherra sagði að saman væri hvaðan gott kæmi þegar Björgólfur Thor kom með peninga í gagnaver. Svona tala bestu vinir spillingarinnar.

Finnur Sveinbjörnsson fráfarandi bankastjóri Arion er góðkunningi spillingarinnar þegar hann afhendir Jóni Ásgeiri Haga og Ólafi Ólafs Samskip.