Ofbeldisrök, lögleysa og deig ríkisstjórn

Ríkisábyrgð var ekki á Tryggingasjóði innistæðueigenda og afturvirk lög sem veita slíka ábyrgð eru lögleysa. Ríkisstjórnin vill ólm veðsetja framtíðarkynslóðir Íslendinga enda gafst hún upp á fyrsta degi fyrir ofbeldisrökum Hollendinga og Breta um að við skyldum endurgreiða þeim ríkisábyrgð sem veitt var í taugaveiklun vegna ótta um bankahrun.

Ónýt löggjöf Evrópusambandsins um Tryggingasjóð innistæðueigenda er ekki og getur ekki verið vandamál Íslendinga. Hótanir Breta og Hollendinga um að bregða fæti fyrir hagsmuni Íslands á alþjóðlegum vettvangi eiga ekki að ráða förinni.

Hlálegastar eru hótanir gömlu nýlenduríkjanna um að koma í veg fyrir inngöngu Íslands í Evrópusambandið ef við borgum ekki. Aulaháttur ríkisstjórnar Jóhönnu Sig. er að kippa ekki strax tilbaka umsókn um aðild að Evrópusambandinu. Ísland þarf ríkisstjórn sem stendur í lappirnar. 

Mikil áhætta ríkissjóðs

Steingrímur J. viðurkennir sekt með fjarveru

Steingrímur J. fjármálaráðherra viðurkennir glæpsamlegt skeytingarleysi um almannahag með fjarvist frá boðuðum kynningarfundi um nýtt Icesave-samkomulag við Breta og Hollendinga. Fjármálaráðherra barðist með oddi og egg fyrir samningi sem að eigin sögn var um 150 - 200 milljörðum kr. verri en núverandi samningur.

Steingrímur J. á eftir að biðja þjóðina afsökunar og útskýra fyrir þingheimi hvers vegna hann ætti ekki að fara fyrir landsdóm.

Að sögn embættismanna standa 50 milljarðar kr. eftir af Icesave-skuld sem við þurfum að borga. Fyrirvarar eru þó margir og 3 prósent vextir eru fljótir að telja.

Við eigum að fórna ríkisstjórninni og fá betri samning eftir kosningar. Að öðrum kosti eigum við að láta málið fyrir dómstóla.

Kostnaður 50 milljarðar

Steingrímsspuni drepinn í fæðingu

Hollenski fjármálaráðherrann sýnir íslenskum starfsbróður sínum ekki mikla samúð með því að gefa sigri hrósandi út yfirlýsingu um að fá að fullu bætt skaðann sem íslenskur einkabanki var valdur að í Hollandi.

Sá hollenski er búinn að eyðileggja málatilbúnað Steingríms J. um að nýr skuldaklafi Icesave sé mun hagfelldari en sá sem þjóðin hafnaði á allsherjaratkvæðagreiðslu í mars.

Líkur á að við samþykkjum útgáfu númer tvö af Icesave hafa snarminnkað. 

Greiðslur hefjast í júlí 2016

Lygari til leigu

Steingrímur J. hlýtur að fá Samtök afneitara og Vilhjálm Egilsson ódýrt. Fjármálaráðherra telur sig geta sparað kaup á almannatengslaþjónustu með því að beita afneiturum úr röðum atvinnurekenda fyrir vagn sinn. Í vetur studdi Vilhjálmur Steingrím J. og ríkisstjórnina að hengja um 500 milljarða Iceasave-ábyrgð á almenning. Leiguþý ríkisstjórnarinnar hótuðu öllu illu ef ekki yrði að kröfum Breta og Hollendinga.

Þjóðin hafnaði Icesave í mars og Ísland varð ekki hornkerling í alþjóðahagkerfinu, og fór spádómsgáfa Vilhjálms þar fyrir lítið. Bjarni Benediktsson formaður Sjálfstæðisflokksins tók í hnakkadrambið á formanni afneitara og krafði um afsökunarbeiðni. Derringslegt svar Vilhjálms og samtakanna er að biðjast forláts með þessum fyrirvara

Það verði hins vegar aldrei reiknað út í krónum og aurum hver gróðinn er eða tapið af því að hafa ekki afgreitt málið fyrr.

Vilhjálmur og SA voru klappstýrur útrásar í tæpan áratug. Má ekki biðja um útreikning í krónum og aurum á tapi þjóðarinnar á útrásinni?

Telja nauðsynlegt að leysa Icesave

Tangarsókn ESB gegn Íslandi

Evrópusambandið reynir að einangra Ísland í deilunni um markríkiveiðar. Norðmenn hafa fallist á sjónarmið ESB um að skammta Íslendingum kvótaskít úr hnefa og til stóð að kúga Færeyinga til að taka þátt í aðförinni að íslenskum hagsmunum.

Færeyingar létu ekki kaupa sig til fylgis við Evrópusambandið og sleit Brusselvaldið því viðræðum við Færeyinga um fiskveiðisamning.

Atburðarásin í deilum um makrílveiðar sýna mikilvægi þess að strandríkin við norðanvert Atlantshafi taki höndum saman gegn ofríki Evrópusambandsins. Ennfremur undirstrika deilurnar hversu víðáttuvitlaus umsókn Samfylkingarinnar um aðild að Evrópusambandinu er í raun og veru.

Gerði makrílsamning að skilyrði

Bjarni Ben fattar samtök afneitara

Samtök afneitara (SA) bera formlega nafnið Samtök atvinnulífsins. Þar í forystu er Vilhjálmur Egilsson sem fékk hlutverk sitt frá Jóni Ásgeiri Jóhannessyni í Baugi og Hannes Smárasyni í FL ,,ég-áða-máða". Vilhjálmur og samtök afneitara lærðu nákvæmlega ekkert af hruninu. Áherslan er öll á að sópa glæpaverkum og spillingu útrásarinnar undir teppið til að geta haldið áfram að svíkja og pretta á daginn og grilla á kvöldin.

Vilhjálmur var ásamt aðkeyptu vinnuafli Steingríms J. fjármálaráðherra helsti talsmaður þess að Ísland tæki á sig skuldaklafa Icesave. Þjóðin hafnaði ,,glæsilegum" samningi í þjóðaratkvæði í vetur.

Formenn Sjálfstæðisflokksins hafa löngum verið hallir undir atvinnurekendur. Bjarni Benediktsson virðist skynja að samtök afneitara er ekki sniðugur félagsskapur fyrir stjórnmálaflokk. Bjarni tók af öll tvímæli um að fylgisspekt afneitarana við Icesave væri ófyrirgefanleg.

Sjálfstæðisflokkurinn á sér viðreisnar von ef hann gerir upp við útrásarpakkið af einurð.

Spilavítin þrjú

Íslensku bankarnir voru reknir á forsendum spilavítis þar sem eigendurnir tryggðu sér fyrirfram stærstu vinningana. Á milli bankanna þriggja var í gildi óformlegt samkomulag að komast undan reglum um viðskipti skyldra aðila. Eigendur Glitnis höfðu aðgang að láns hjá Kaupþingi og eigendur þar á bæ að lánsfé Glitnis; Landsbankinn var hluti af þessum undanskotum frá lögum um bankastarfsemi.

Þegar leið að lokum útrásarinnar voru allar fjáruppsprettur tæmdar og þá var komið að skapandi bókhaldi sem hafa verið til umfjöllunar í fjölmiðlum vegna skýrslna sem slitastjórnir hafa fengið í hendur um framferði eigenda bankanna.

Hvernig stendur á því að fyrrum eigendur bankanna fái stuðning frá ríkisbanka eins og Landsbankanum til að stunda viðskipti hér á landi? Er Jón Ásgeir Jóhannesson með sína menn enn að störfum hjá endurreistum Landsbanka að skaf'ann að innan?

 

Störf endurskoðenda rannsökuð

Vinstristjórnin ræður ekki við fylgið sitt

Ríkisstjórn Samfylkingar og Vinstri grænna er með undirstöðu í búsáhaldabyltingunni. Vinstriflokkarnir lögðu til pólitískt eldsneyti í þjóðfélagsólguna eftir hrun og lögðu sig fram um að magna ófriðinn. Þegar teprulega miðaldra mussuliðið mætir núna byltingarbörunum skammast það sín fyrir fólkið sem kom þeim til valda.

- Okkar hús, sungu mótmælendur, og voru ekki par ánægðir með hertöku vinstriflokkana á húsi fólksins.

Samfylking og Vinstri græn brenna í báða enda. 

 

Þing fyrir luktum dyrum vegna óláta

Írar láta evruna róa

Barnfóstrurnar frá Brussel og Berlín eru komnar. Við sitjum í leikgrindinni og getum hringlað með gullin okkar en ákveðum hvorki hvenær ljósin verða slökkt né hvað verður í morgunmat. Á þessa leið skrifar Kevin Myers um endalok írsks sjálfstæðis.

Evran er Írum spennitreyja og fangaverðirnir, barnfóstrurnar, afsakið, frá Brussel og Berlín sjá til þess að þeir geta sig hvergi hrært.

Megan Green bendir Írum á leið út úr vandanum. Hún skrifar í Financial Times að Írar muni hvort eð er fara í gjaldþrot, skuldirnar eru einfaldlega of miklar; raunlaun mun lækka og bankarnir þurfa endurfjármögnun. Lánið frá Evrópusambandinu og Alþjóða gjaldeyrissjóðnum mun engu breyta um þessar staðreyndir - aðeins fresta þeim.

Kosturinn við það að láta evruna róa, segir Green, er að kreppan varir skemur. Eftir stuttan óreiðutíma mun vöxtur taka við sér og Írland komast á sömu braut og Ísland. (Ok, rétt, síðasta setningin kemur ekki frá Green heldur síðuhaldara.)

Milljarðar afskrifaðir, lágir vextir; næsta afsökun takk

Eyðslumestu Íslendingarnir hafa fengið 50 milljarða króna afskrifaðar. Vextir eru fimm prósent. Mánuð eftir mánuð er afgangur af viðskiptum við útlönd, gengið styrkist og verðbólga helst lág. Allar forsendur eru fyrir kröftugri efnahagsstarfsemi.

Ástæðan fyrir því að efnahagskerfið höktir enn og skröltir er að ónýt fyrirtæki starfa enn á markaði í skjóli banka sem er enn útrásarsmitaðir. Ormahreinsun atvinnulífsins er ekki yfirstaðin vegna þess að ríkisvaldið hefur tregðast við að gefa almennar meginlínur um endurreisnina.

Hvorki samtök afneitara, SA, með Vilhjálm baugssmurða í broddi fylkingar né ríkisstjórnin munu kannast við sína ábyrgð á seinkun efnahagsbatans. Vanheilagt bandalag útrásarafganga og ríkisstjórnar Jóhönnu Sig. er komið með næstu afsökun.

Icesave.

27 milljarðar afskrifaðir