RÚV-Heiðar: það er ljótt að stela

Heiðar Örn Sig­urfinns­son vara­f­rétta­stjóri RÚV sagði fyrr á þessu ári að það væri ,,ljótt að stela." Tilefnið var að Samherji hafði án heimildar notað myndefni frá RÚV til að bera af sér upplognar sakir Efstaleitis.

Heiðar Örn tekur við starfi fréttastjóra um áramótin. Sitjandi fréttastjóri, Rakel Þorbergsdóttir, hættir til að geta betur sinnt vinkonum sínum norðan heiða og sunnan.

Lögreglurannsókn stendur yfir á símastuldi í þágu RÚV og fréttamenn yfirheyrðir.

Ef Heiðari Erni finnst ljótt að nota útsent efni í heimildarleysi vakar spurning hvaða orð hann noti um þann gjörning að stela síma frá manni í öndunarvél.

Grafarþögn er á Efstaleiti um símastuldinn frá Páli skipstjóra. Samt eru aðalheimildarmenn um stuldinn innanbúðar og hafa gefið skýrslu til lögreglu, annað tveggja sem vitni eða grunaðir.

Heiðar er sennilega í kjallaranum á Efstaleiti með orðabók á hnjánum. Hann leitar að samheitum lýsingarorðs sem byrjar á l.

Gréta og Kylie Jenner

Gréta Thunberg er með 13 milljónir fylgjendur á samfélagsmiðlinum Instagram. Gréta fóðrar fylgjendur sína með hamfaratrú og fordæmir neysluhyggju.

Annar ungur áhrifavaldur, Kylie Jenner, er með 279 milljónir fylgjendur á Instagram. Kylie kennir ungmennum neyslu, munað og bruðl.

Sjónvarpsmaðurinn Bill Maher gerði samanburð á Grétu og Kylie sem er upplýsandi um ungmennin sem fylgja þeim.

„Hér er stutt samantekt: Bla, bla, bla“

Heiður RÚV og glæpurinn gegn Páli skipstjóra

Aðalsteinn Kjartansson hætti fyrirvaralaust á RÚV föstudaginn 30. apríl síðast liðinn. Aðalsteinn var hægri hönd Helga Seljan í Namibíumálinu gegn Samherja sem hófst með Kveiks-þætti þeirra félaga fyrir tveim árum.

Þegar Aðalsteinn hætti var RÚV, fréttaskýringaþátturinn Kveikur sérstaklega, í sárum. Tveim vikum áður hafði Helga Seljan verið synjað um endurupptöku á úrskurði siðanefndar RÚV um að Helgi hefði brotið alvarlega gegn siðareglum. Aðalsteinn sýndi ekki mikla hollustu að yfirgefa sökkvandi skip. En annað bjó að baki. RÚV hafði fundið leið til að rétta hlut sinn eftir niðurlægingu siðadómsins. Aðgerðin fól í sér lögbrot.

Aðalsteinn gefur loðin svör í viðtali daginn sem hann hættir, talar um ,,persónulegar ástæður" og segist á leiðinni í frí. En strax síðdegis sama dag er Aðalsteinn sagður kominn á ritstjórn Stundarinnar sem gefur út sérstaka tilkynningu. Bráðnauðsynlegt þótti að vistaskiptin yrðu gerð opinber fyrir helgina.

Á Stundinni vinnur Aðalsteinn með stolin gögn úr síma Páls Steingrímssonar skipstjóra Samherja. Tveim vikum síðar fellur sprengjan: Stundin afhjúpar skæruliðadeild Samherja.

Grein Aðalsteins, og framhaldsfréttir í Kjarnanum og RÚV, tryggðu Helga Seljan, Aðalsteini og RÚV fjölmiðlasigur í Samherjamálinu. Norðlenska útgerðin lyppaðist niður og baðst afsökunar.

En það er einn hængur á. Fjölmiðlasigurinn fékkst með glæpsamlegu athæfi, gagnaþjófnaði. RÚV sýndi ásetning og einbeittan brotavilja í þjófnaði sem var fyrirfram skipulagður og beindist að sjúklingi er enga björg gat sér veitt.

Síma Páls skipstjóra var stolið aðfaranótt 4. maí, fjórum dögum eftir að Aðalsteinn skipti skyndilega um starfsstöð, af RÚV yfir á Stundina. RÚV vissi um glæpinn áður en hann var framinn. Aðalsteinn varð að hætta á föstudegi því eftir helgina átti að stela síma Páls skipstjóra á meðan hann lá ósjálfbjarga á sjúkrahúsi. Það hefði vakið grunsemdir ef Aðalsteinn hefði vistaskipti til að vinna með gögnin eftir fullframinn glæp. RÚV-arar héldu sig hafa leikið snilldarleik með því að selflytja Aðalstein yfir á Stundina kortéri fyrir skipulagðan símaþjófnað. Skyndiflutningur á fréttamanni að vinna með gögn sem enn er ekki búið að stela staðfestir á hinn bóginn aðild RÚV að þjófnaði. Dýr er æran á Efstaleiti. 

RÚV var með siðadóm á bakinu, gat sig illa hrært. Helgi Seljan var í veikindaleyfi að leika fórnarlamb. Aðalsteinn er gerður út af örkinni á Efstaleiti, fer yfir á Stundina þar sem Ingibjörg Dögg systir hans og Jón Trausti mágur eru fyrir á fleti, sem eigendur og ritstjórar. Lokaður hópur örfárra einstaklinga vélaði um í kyrrþey. Ekkert mátti fréttast fyrr en afhjúpun byggð á þjófnaði yrði tilbúin til birtingar. Uppreist æru RÚV fékkst aðeins með niðurlægingu Samherja.

RÚV vissi að til stæði að fremja glæp og Stundin er meðsek. Opin spurning er hvort starfsmenn RÚV skipulögðu sjálfir glæpinn eða létu aðra um verknaðinn. Lögreglurannsókn sem stendur yfir gæti varpað ljósi á málsatvik.

Einu sinni afhjúpuðu fjölmiðlar afbrot. Á Efstaleiti stunda menn glæpi og kalla það fjölmiðlun.

Herða, slaka og útskúfa - veirupólitík

Hægrimenn eru heldur á því að slaka á sóttvörnum, en vinstrimenn krefjast yfirleitt harðari aðgerða gegn farsótt. Frá vinstri hljóma raddir um að útskúfa óbólusetta frá samfélaginu. Til hægri er fremur það sjónarmið að bólusetning skuli valkvæð.

Svo er það fagleg nálgun sem Þórólfur sótti stendur fyrir. Þar sem ríkisvaldið eitt, en ekki fyrirtæki eða einstaklingar, getur kveðið farsóttina í kútinn er faglega ráðgjöfin yfirleitt að beita stjórntækjum ríkisvaldsins og setja hömlur til að hindra útbreiðslu.

Þórólfur sótti reynir hverju sinni að fara mildustu leiðina að hefta veirusmit og samfélagið í leiðinni.

Sóttvarnir eru líkt og lýðræðið ekki spurning um bestu lausnina heldur skástu. Í pólitískri umræðu, bæði til hægri og vinstri, er aftur uppi krafan bestu lausnina. Hún er bara ekki til. Ekki frekar en í mannlífinu almennt.

 

Svandís komin með minnisblað

Skáldskapur í Afganistan og Glasgow

Vestræn ríki vildu trúa blekkingunni um að leppstjórn þeirra í Afganistan réði yfir margfalt fleiri hersveitum en raun var á. Ógrynni fjár var veitt í draugaherinn.

Leiðtogar vestrænna ríkja vilja trúa að loftslag sé manngert. Haldin er stór alþjóðleg ráðstefna i Glasgow að ákveða hvert hitastig jarðar eigi að vera 2050. Milljörðum ofan á milljarða er eytt í draugafræðin.

500 vísindamenn birta yfirlýsingu um að ekkert tilefni sé til að óttast manngerða hamfarahlýnun. En skáldskapur selur betur en rauntölur og veruleikinn. Bæði í Afganistan og Glasgow.

Skálduðu upp fjölda hermanna

Lögreglurannsókn á RÚV

Starfsmenn fréttadeildar RÚV hafa verið kallaðir i yfirheyrslu lögreglu vegna rannsóknar á einum anga Namibíumálsins. Skyndileg ákvörðun um að Rakel Þorbergsdóttir hætti sem fréttastjóri er tekin þegar stutt er í að niðurstaða lögreglu verði heyrinkunn.

Lögreglurannsóknin á RÚV beinist að mögulegri aðild starfsmanna fréttadeildar að stuldi á síma Páls Steingrímssonar skipstjóra Samherja. Gögn úr síma Páls notaði RÚV óspart til að ófrægja Samherja. Lögmaður Samherja kærði stuldinn til lögreglu í sumar. Rannsókn hófst að loknum sumarleyfum.

Stefán Eiríksson útvarpsstjóri var áður lögreglustjóri og þekkir til glæparannsókna. Hann undirbýr RÚV að svara til saka fyrir tapað Namibíumál, sem fréttadeildin segir ekkert frá, og niðurstöðu úr lögreglurannsókn á símaþjófnaðinum.

 

Rakel hættir hjá RÚV

Play er EES og alþjóðvæðingin

Alþjóðavæðing Íslands hefst með EES-samningnum 1994. Með þeim samningi gáfu Íslendingar frá sér drjúgan skerf af fullveldinu, til góðs og ills.

Margir vinstrimenn og kratískir hægrimenn, Samfylking og Viðreisn, vildu ganga lengra og afhenda Brussel algjört forræði yfir íslenskum málum, með inngöngu í Evrópusambandið.

Flugfélagið Play er skilgetið afkvæmi EES-samningsins. Forseti ASÍ segir félagið ,,hættulegt íslensku launafólki."

Einu sinni studdi ASÍ aðild Íslands að ESB.

Hver er stefnan núna?

 

Play er stórhættulegt fyrirtæki segir Drífa

Múslímar kljúfa ESB - Pútín hjálpar

Múslímar frá Írak eru í þúsundavís á landamærum Póllands, Lettlands og Litháen annars vegar og hins vegar Hvíta-Rússlands. Þeir vilja komast til Vestur-Evrópu i betri lífsgæði.

Pólland kærir sig ekki um múslíma og hefur lent upp á kant við Evrópusambandið, sem vill að Pólverjar og önnur aðildarríki í Austur-Evrópu taki sinn skerf að múslímum.

Ágangur múslíma á ESB-ríki í austri eykur klofninginn í Brussel-bandalaginu.

En hvað eru múslímar frá Írak að þvælast í gegnum Hvíta-Rússland og Pólland á leið sinni til Vestur-Evrópu?

Jú, segir Telegraph, hér er Pútín Rússlandsforseti að verki og bandamaður hans, Alexander Lukashenko í Hvíta-Rússlandi.

ESB seilist til áhrifa í bakgarði Rússa, Úkraínu, og ybbir sig við Hvít-Rússa. Pútín notar á móti múslíma sem mennsk vopn á þandar taugar Brussel-bandalagsins.

Kaldrifjað? Já, en kallast öðru nafni stórveldapólitík. 

Pólverjar stöðva fjölda flóttamanna við landamæri

Öfgaréttvísi

Opinbera ákæru á ekki að gefa út nema meiri líkur en minni séu á sakfellingu. Í máli Jóns Baldvins, s.k. ,,rassstrokumáli", eru meiri líkur en minni á misbeitingu ákæruvaldsins. Sem, vel að merkja, er stjórnað af konu.

Saksóknari í málinu, Dröfn Kærnested, segir ,,óvana­legt að sýknað sé í kyn­ferðis­brota­mál­um þar sem sjón­ar­vott­ur er til staðar." 

Eina óhlutdræga vitnið í málinu, Hugrún Auður Jónsdóttir, sá ekkert kynferðisbrot. Ef ekkert brot ber ekki að ákæra. Einfaldara getur það ekki verið.

Nema, auðvitað, í heimi öfgaréttvísinnar. Þar jafngildir ásökun sekt samkvæmt ákæruvaldinu. 

Ríkissaksóknari, Sigríður J. Friðjónsdóttir, skuldar þjóðinni skýringu á þeirri afskræmingu réttvísinnar sem er ,,rassstrokumálið."

Jón Baldvin sýknaður

Hagsæld, óánægja og fjöldi stjórnmálaflokka

Hagsældartíminn eftir hrun hófst 2011/2012. Við fórum að tala um svokallað hrun. Með hagsæld vex óánægja. Sumir óttast að verða eftirbátar þegar aðrir græða á daginn og grilla á kvöldin.

Stjórnmálaflokkar stofnaðir á veltiárunum eftir hrun eru m.a. Dögun, Píratar, Viðreisn, Flokkur fólksins og Sósíalistaflokkurinn. (Miðflokkurinn ekki talinn með enda klofningur úr Framsókn.)

Nú þegar Dögun hættir starfsemi má hafa það til marks um að hagsældinni sé brátt lokið og óánægjan dvíni.

Dögun formlega slitið