Píratar taka völdin fyrir kosningar

Í lýðræðisríkjum eru það kjósendur sem ákveða hverjir skulu fá völdin í hendur. Það er gert í kosningum. Píratar lýsa frati á vilja almennings með því að boða nýja ríkisstjórn kortéri fyrir kosningar.

Stjórnunaraðferð Pírata er þessi: skapa óánægju og óvild í samfélaginu, t.d með fjöldamótmælum og óhroða á samfélagsmiðlum. Sérstakt áhugamál Pírata er illmælgi um land og þjóð. Þessa pólitík hafa Píratar stundað allt kjörtímabilið.

Þegar nær dregur kosningum og almenningar áttar sig á eðli Pírata fellur gengi þeirra í skoðanakönnununum.

Viðbrögð Pírata eru að sniðganga lýðræðið og taka völdin fyrir kosningar. Þannig virkar píratalýðræðið.

Píratar útiloka stjórnarflokkana

Clinton í dópi, Trump í káfi; Róm og Washington

Forsetaframbjóðendur í Bandaríkjunum halda áfram að auka virðingu heimsbyggðarinnar fyrir lýðræðinu í stórveldinu eina og sanna. Báðir frambjóðendur eru afhjúpaðir raðlygarar, þetta eru jú stjórnmálamenn. Annar er þjakaður af kvenfyrirlitningu en hinum er ekki hægt að treysta fyrir tölvupóstum með ríkisleyndarmálum, svona upp á framsóknarvísu.

Róm var heimsveldi sem stóð í þúsund ár og skiptist í tvö tímabil, það fyrra kennt við lýðveldi en hið seinna við keisara. Fyrsti keisarinn, Ágústínus, kjörsonur Júlíusar Sesars, smíðaði stjórnkerfi sem hélt velli jafnvel þótt afbrigðilegir einstaklingar settust í hásætið. Róm brann undir forsæti eins þeirra en Rómarveldi stóðst álagið.

Bandaríkin búa að goðsögninni um að vandaðir menn, ríkisstofnendur, sem upp á þarlenda tungu eru kallaðir founding fathers, hafi í öndverðu lagt þann grunn að stjórnskipun ríkisins að það kiknaði ekki undan gölluðum forsetum.

Í nóvember kjósa Bandaríkjamenn sér meingallaðan forseta. Heimsveldið mun samt sem áður starfa með líkum hætti og síðustu áratugi. Meira þarf til en afbrigðilegar persónur svo að heimsveldi falli.

 

 

 

Sakar Clinton um eiturlyfjanotkun

Tvöfalt staðgenglastríð í Sýrlandi

Staðgenglastríð er þegar stórveldahagsmunir standa að baki staðbundnum átökum. Í Sýrlandi stendur yfir tvöfalt staðgenglasríð. Í fyrsta lagi standa Bandaríkin annars vegar og hins vegar Rússland að baki andstæðum fylkingum.

Í öðru lagi stríðir bandalag súnní-múslíma, þar sem Sádí-Arabía og Tyrkland eru stórveldin, við shíta-múslíma sem Íran og Írak styðja og Assad Sýrlandsforseti tilheyrir.

Til að gera flókna stöðu enn gruggugri eru Kúrdar, sem vilja stofna til eigin ríkis á svæði sem nú tilheyrir Írak, Sýrlandi og Tyrklandi.

Afgangsstærð í fjölþættum átökum eru herskáir múslímar, Ríki íslams og fleiri hópar af líkum toga. Afgangsstærðin fær mestu athyglina enda öll stórveldin sammála um að berjast gegn öfgamúslímum. En oft er það aðeins í orði kveðnu.

Sýrlandsstríðið og sambærileg átök í Írak, Yemen og Líbýu verður viðvarandi viðfangsefni alþjóðastjórnmála næstu árin ef ekki áratugi.

 

„Nýjar hugmyndir“ um frið ræddar

Úkraína, Sýrland og tölvustýrð kjarnorkuvopn

Bandaríkin og Rússland eiga í samskiptavanda. Yfirvegaðir stjórnmálaskýrendur, t.d. Robert E. Hunter sendiherra Bandaríkjanna í Nató 1993-1998, sýna fram á tengsl utanríkistefnu Bandaríkjanna í Úkraínu annars vegar og hins vegar í Sýrlandi  við nýja kalda stríðið milli þeirra og Rússlands.

Fræðimaðurinn Stephen F. Cohen segir stríðsógnir Bandaríkjamanna leiða til þess að Rússar séu komnir á forstig stríðsundirbúnings.

Bandaríkin ásaka Rússa um að skipta sér af bandarískum innanríkismálum, þ.e. yfirstandandi baráttu Clinton og Trump um forsetaembættið, og ætla að senda ,,skilaboð" með einhvers konar netárás.

Þegar samskipti Bandaríkjanna og Rússa eru komin á þetta stig aukast möguleikar á stríði án ásetnings um að hefja það. Kjarnorkuvopn eru tölvustýrð. Þegar pólitískt andrúmsloft er orðið nægilega eitrað af tortryggni gæti komið upp sú staða að betra sé að þrýsta á hnappinn strax fremur en að hætta á að netárás lami vígbúnaðinn. 

Að breyttu breytanda er heimurinn 2016 óþægilega líkur þeim sem var 1914 þegar stórveldin álpuðust út í fyrri heimsstyrjöld.

„Fordæmalausar“ hótanir Bandaríkjanna

RÚV og Sigmundarfréttir Davíðs

RÚV er eini fjölmiðillinn sem sérhæfir sig í fréttum af Sigmundi Davíð. RÚV lagðist í rannsóknavinnu til að gera tölvumál Sigmundar Davíðs tortryggilegt og sótti upplýsingar á grunni upplýsingalaga til að klæða fréttina trúverðugleika.

RÚV tekur Sigmund Davíð fyrir í kjördæminu og kennir honum um lægra fylgi. Sigurður Ingi, sem var frambjóðandi RÚV til formennsku í Framsóknarflokknum ber auðvitað enga ábyrgð á fylgishruni flokksins á landsvísu. Sei, sei nei.

Fréttir RÚV um Sigmund Davíð eru nær allar hálfsannleikur eða útúrsnúningur. Þegar aðrir fjölmiðlar birta fréttir sem ganga í berhögg við ófrægingarherferð RÚV þá þegir Gróa á Efstaleiti.

Þurfti að nota gögn í tölvunni

Brexit eyðileggur EES á tvo vegu

Úrsögn Breta úr Evrópusambandinu eyðileggur ESS-samstarfið á tvennan hátt. Í fyrsta lagi verður til samningur milli Breta og ESB sem mun skapa fordæmi um tvíhliða samninga milli sambandsins og Evrópuríkja sem standa utan þess og eru ekki á leiðinni inn.

Í öðru lagi verður EES-samstarfið, eftir samning Breta við ESB, að hornkerlingu í skrifstofum ESB í Brussel. Bretland er til muna stærri samstarfsaðili ESB en smáríkin Ísland, Noregur og Lichtenstein sem mynda EES með Evrópusambandinu.

EES-samstarfið var upphaflega sett saman til að undirbúna Norðurlönd fyrir aðild að Evrópusambandinu. Eftir að Svíþjóð og Finnland urðu ESB-ríki 1995 og útséð var um að Ísland og Noregur yrðu aðilar var aðeins spurning um tíma hvenær EES-samstarfið yrði úrelt.

Brexit og ákvörðun Breta að ganga ekki í EES-samstarfið dæmir þetta samstarf úr leik. Aðeins á eftir að ákveða síðasta söludag EES-samstarfsins. Sá dagur rennur upp eftir að Bretar semja við Evrópusambandið. Það tekur líklega eitt til þrjú ár.

Brexit tækifæri fyrir Ísland og Noreg

Samfylkingin svindlar í smáu sem stóru

Samfylking heldur úti netútgáfu í áskrift. Trú sinni köllun, að gera Ísland að hjálendu ESB, er áskriftarverðið í evrum.

Áskrift að Herðubreið kostar 1,8 evrur. Út á þessar evrur ætlar Samfylkingin að rukka 290 krónur. Rétt gengi á 1,8 evrum er á hinn bóginn 227 krónur.

Evran hríðfellur undanfarið fyrir sterkri krónu. Samfylkingin er engu betri en ómerkileg heildsala sem lætur almenning ekki njóta þess að Ísland er með besta gjaldmiðil í heimi.

Einn turn, sex smáflokkar

Sjálfstæðisflokkurinn er eini turninn í íslenskum stjórnmálum, þótt hann fái aðeins rúman fimmtung atkvæða. Sex smáflokkar standa utan turnsins og mynda lággróður stjórnmálanna.

Af smáflokkunum eru tveir í vexti tveim vikum fyrir kosningar, Vinstri grænir og Björt framtíð. Tveir eru í hnignun, Píratar og Viðreisn. Foringjalaus Framsókn er á einskins manns landi og Samfylking er í útrýmingarhættu.

Valkostur kjósenda verður æ skýrari. Annað hvort styðja þeir stöðugleika og kjósa Sjálfstæðisflokkinn eða að þeir fleygja atkvæði sínu á einhvern smáflokkinn og kjósa óreiðu.

VG og Píratar hnífjöfn

Píratar tapa, Samfylking minnst og Framsókn ekki minni í öld

Píratar missa fylgi og Samfylking mælist minnst þeirra flokka sem eiga fulltrúa á alþingi. Jafnvel Björt framtíð, fyrir skemmstu virtist ætla að falla af þingi, skýtur Samfylkingu ref fyrir rass.

Sjálfstæðisflokkur er nokkru fyrir neðan kosningafylgi sínu, samkvæmt þessari könnun, og Framsóknarflokkur stefnir í sína verstu útkomu í 100 ára sögu flokksins.

Formannsskipti í Framsóknarflokknum kortéri fyrir kosningar var pólitískur afleikur aldarinnar.

Björt framtíð stærri en Samfylkingin

Ísland heilbrigðasta hagkerfi í heimi

Þrjár meginbreytur eru notaðar til að mæla heilbrigði hagkerfa; verðbólga, hagvöxtur og atvinnuleysi.

Tveir þættir eru viðvarandi vandamál í Evrópu, atvinnuleysi og hagvöxtur, en aðeins atvinnuleysi í Bandaríkjunum. Verðhjöðnun er á síðustu árum verulegt vandamál,sem bæði þjakar Evrópu og Bandaríkin.

Ísland er með heilbrigðara hagkerfi en þekkist í víðri veröld. Teflum ekki þeirri stöðu í tvísýnu.

Spáir örlítilli hækkun á verðbólgu