Kristrúnu hótað 6% fylgi

Kristrún formaður Samfylkingar sagði opin landamæri ekki samrýmanleg velferðarkerfi. Háværustu vinstrimennirnir hóta formanninum 6 prósent fylgi í næstu kosningum.

Logi forveri Kristrúnar segir í viðtengdri frétt að ekki sé um að ræða stefnubreytingu, heldur nýr ,,veruleiki" er kalli á ,,nýja nálgun." Fyrir þremur árum  fordæmdi Logi danska jafnaðarmenn fyrir að sömu hugsun og Kristrún lét í ljós. Ný nálgun er ,,Logorð" yfir tækifærismennsku.

En það er þetta með fylgið. Undir forystu Kristrúnar hefur fylgi Samfylkingar meira en tvöfaldast, var um tíu prósent en hallar sér í 25 prósent. Engin skýring er á auknu fylgi, nema Kristrún sjálf. Fylgi Samfylkingar er persónufylgi Kristrúnar. Enn á eftir að leysa það út í kosningum. En þetta er mælt fylgi, fjórðungur atkvæða eða þar um bil. Það hefur vægi.

Vinstrimenn hafa frá hruni stundað flokkapopúlisma. Leikurinn gengur út á að háværustu vinstrimennirnir gefa á hverjum tíma einum vinstriflokki atkvæði sitt í umræðunni. Vegur og vegsemd Vinstri grænna, Samfylkingar, Pírata og áður Bjartrar framtíðar ræðst af hvernig þeir háværustu beita sér hverju sinni. Ruðningsáhrif þeirra öskrandi eru töluverð, þeir leggja undir sig umræðuna í félagsmiðlum. Gunnar Smári reynir sitt ítrasta að koma Sósíalistaflokki sínum á kortið í samkvæmisleiknum en ekki haft erindi sem erfiði. Viðreisn fær stundum inni hjá flokkapopúlistum til vinstri og ná tveggja stafa fylgismælingu.

Háværustu vinstrimennirnir eru dæmigert eins máls fólk. Eitt mál hverju sinni yfirgnæfir allt annað. Himinn og jörð farast ef málefnið nær ekki fram að ganga. Nú er innflutningur á Palestínuaröbum stórasta verkefnið. Með öllum ráðum skal menning og mannlíf á Íslandi gert verra með innflutningi á fólki sem hvorugt virðir. 

Kristrún á þrjá kosti í stöðunni. Í fyrsta lagi að láta gott heita, horfa úr fjarlægð á þjarkið um það hvort ummæli hennar marki stefnubreytingu eða ekki. Í öðru lagi draga í land og segja ofmælt að Samfylking sé hlynnt skynsamlegri stefnu í málefnum útlendinga. Þriðji kostur er taka af skarið og lýsa afgerandi yfir að útlendingamálin séu ólestri og þurfi að stokka upp.

Tilfallandi veðjar á að Kristrún taki þriðja kostinn. Hún er komin með pólitískt kapítal til að taka slaginn. Fyrsti kosturinn er hálfvelgja, annar kosturinn uppgjöf. Stjórnmálamaður í efstu deild þolir tapaðar atkvæðaprósentur. Hik og uppgjöf í málefnaumræðu fara aftur með trúverðugleikann. Kristrún gæti orðið útbrenndur Logi.

Sigri formaður Samfylkingar hælisumræðuna gæti það markað þau þáttaskil að viðræðuhæfa vinstrið skilur sig frá fáráðlingavinstrinu. Löngu tímabært sextán árum eftir hrun.

 

Logi sammála Kristrúnu um útlendingamálin

Leynisamstarf RÚV og Heimildarinnar

Leynilegt samstarf RÚV og Heimildarinnar, áður Stundin og Kjarninn, vekur spurningar um starfshætti fjölmiðla sem jafnan krefjast gagnsæis af öðrum og allt sé upp á borðum. Gögn sem rötuðu inn á fréttadeild RÚV voru ekki notuð af ríkisfjölmiðlinum. Fréttirnar fóru til birtingar í Stundinni og Kjarnanum.

Gögnin fengust úr stolnum síma Páls skipstjóra Steingrímssonar. Páli var byrlað 3. maí 2021 af þáverandi eiginkonu sinni sem stal síma hans á meðan hann lá á gjörgæslu á Landspítalanum í Fossvoginum. Konan, sem glímir við geðræna vanheilsu, rölti með símann yfir Bústaðarveg og afhenti starfsmanni RÚV á Efstaleiti. Í lögregluskýrslu er haft eftir konunni að kvenkyns fréttamaður hafi tekið við símanum. Tvær koma helst til greina, Rakel Þorbergsdóttir þáverandi fréttastjóri og kunningi konunnar frá Akureyri og Þóra Arnórsdóttir sem þá ritstýrði Kveik. 

Vitað er að stolni síminn komst í hendur Þóru, þótt Rakel hafi e.t.v. verið fyrsti viðtakandi. Þóra hafði keypt Samsung síma nokkru áður gagngert til að afrita síma skipstjórans. Hún var reglulega í sambandi við veiku konuna eftir að lögreglurannsókn hófst sumarið 2021. Þann 24. ágúst var Þóra samtals átta sinnum í símasamskiptum við konuna. Samkvæmt lögregluskýrslu ráðleggur Þóra í sms-skilaboðum til veiku konuna að hún skuli ,,breyta ÖLLUM lykilorðum alls staðar." Þóra er sakborningur í byrlunar- og símastuldsmálinu, eins og nærri má geta. Hún frumbirti enga frétt úr stolna símanum.

Gögnin sem konan færði RÚV 4. maí 2021 urðu uppistaða í fréttum Kjarnans og Stundarinnar þann 21. maí þegar miðlarnir tveir birtu samtímis fréttir um meinta skæruliðadeild Samherja. Blaðamennirnir skráðir fyrir fréttunum tveim eru Þórður Snær Júlíusson, Arnar Þór Ingólfsson og Aðalsteinn Kjartansson, allir núna á Heimildinni.

Þremenningarnir eru sakborningar líkt og Þóra. Þeir hafa aldrei gert grein fyrir hvers vegna þeir létu gott heita að fá heildsölufréttir af RÚV og birta sem eigið höfundarverk. Blaðamennirnir þrír fengu verðlaun Blaðamannafélagsins fyrir fréttir sem urðu til á RÚV, sem jafnframt útvegaði myndskreytingar; skjáskot úr síma skipstjórans.

Þórður Snær mun áhugasamur um að verða þingmaður Samfylkingar. Stefán útvarpsstjóri ku einnig velta fyrir sér framboði. DV fjallar um stjórnmáladrauma tvímenninganna í samhengi við leynilegt samstarf RÚV og Heimildarinnar og segir:

þessir tveir fjölmiðlamenn eiga fátt annað sameiginlegt en að miðlar þeirra hafa haft leynilegt samstarf um ýmis mál sem ekki hvað síst tengjast aðför að tilteknum fyrirtækjum þar sem málefni Samherja rísa hæst. Samstarf þetta vekur sífellt meiri furðu.

Þórður Snær er ritstjóri Heimildarinnar og Stefán stýrir RÚV. Það er í þeirra höndum að upplýsa almenning um hvað gerðist á bakvið tjöldin vorið 2021. Baktjaldamakkið varðar lögbrot, byrlun og þjófnaður koma við sögu í aðdraganda, en einnig samsæri um að blekkja almenning. Fréttirnar sem Stundin og Kjarninn birtu samtímis snemma morguns 21. maí 2021 eru báðar RÚV-fréttir.

Leyndarhyggja fer fjölmiðlum illa. Almenning tekur að gruna sitthvað misjafnt á ritstjórnum fjölmiðla sem starfa eins og Heimildin og RÚV.

.

Innflutt ofbeldi Palestínuaraba

Hnífabardagi í Fossvogi var innflutt ofbeldi frá Palestínu. Páll Magnússon fyrrverandi þingmaður gefur hrollvekjandi lýsingu á öðrum manninum, sem er raðafbrotamaður og gerir grín að landamæravörslu á Keflavíkurflugvelli. Manninum er ítrekað vísað úr landi en kemur alltaf aftur í gegnum opin landamæri.

Hér á landi er hópur Íslendinga sem stundar innflutning á Palestínuaröbum, jafnvel með mútugjöfum í Egyptalandi, sem á landamæri að Gasa. Hópurinn er herskár, líkt og fyrirmyndin, Hamas, og með sterk tök á fjölmiðlum, einkum RÚV.

Í Danmörku fyrir 30 árum var uppi viðlíka umsátursástand vegna Palestínuaraba. Yfirvöld létu undan óreiðufólkinu og samþykktu sérlög að taka á móti 321 Palestínuaraba. Árið 2020 svaraði danska útlendingaráðuneytið fyrirspurn á þinginu um hvernig sérvöldu Palestínuaröbum hefði reitt af í dönsku samfélagi. Útkoman er hryggileg.

Af 321 Palestínuaraba í Danmörku voru eftir 270 árið 2019. Einir 204, já tveir þriðju, höfðu komist í kast við lögin, þar af 71 með fangelsisdóm á bakinu. 

Múslímar eru síður löghlýðnir í Danmörku, og almennt á vesturlöndum, en heimamenn, eins og tilfallandi hefur drepið á. En samkvæmt dönsku samantektinni eru Palestínuarabar sýnu verstir þegar kemur að afbrotum. Það er engin hemja að sjö af hverjum tíu Palestínuaröbum sem fengu hæli í Danmörku séu afbrotamenn. En tölur danska útlendingaráðuneytisins sýna það svart á hvítu. 

Þeir Íslendingar sem keppast við að fá sem flesta Palestínuaraba hingað til lands mæla fagurt en hyggja flátt. Palestínu-Íslendingarnir vilja þjóðinni illt, gera Ísland verra samfélag. 

Báðir stungumennirnir palestínskir flóttamenn

Þórður Snær varpar sök á Þóru og Helga Seljan

Málsvörn sakborninga í byrlunar- og símastuldsmálinu er efni í tveggja síðna leiðara Þórðar Snæs ritstjóra á Heimildinni. Fimm blaðamenn eru sakborningar, allir nema einn á Heimildinni. Kjarninn í máli Þórðar Snæs er að lögreglan hafi engar sannanir um aðild blaðamanna Heimildarinnar (áður Stundin og Kjarninn) að byrlun Páls skipstjóra Steingrímssonar.

Þórður Snær hefur ekki öll gögn lögreglu undir höndum, aðeins þau sem lögreglan hefur veitt sakborningum og brotaþolum aðgang að. Af því leiðir eru fullyrðingar ritstjórans ómarktækar. Í leiðinni eru þær upplýsandi um vegferðina sem Þórður Snær á fyrir höndum í dómskerfinu.

Tilfallandi hefur séð töluvert af gögnum lögreglu, þau sem eru í umferð. Nokkur munur er á þeim gögnum og framburði Þórðar Snæs í leiðara Heimildarinnar.

Þórður Snær viðurkennir að mögulega hafi lög verið brotin þegar blaðamenn fengu efni sem birtist samtímis í Stundinni og Kjarnanum 21. maí 2021 og eru úr síma skipstjórans. Þórður Snær skrifar

Í umfjölluninni var tiltekið að gögnin hefðu borist frá þriðja aðila og blaðamenn því engin lög brotið. Blaðamenn mega ekki, samkvæmt lögum, upplýsa um heimildarmenn sína.

Hver gæti þessi þriðji aðili verið? Aðeins tveir koma til greina. Þriðji aðilinn gæti verið þáverandi eiginkona Páls skipstjóra, sem er andlega veik. Hún hefur játað að hafa byrlað eiginmanni sínum og stolið síma hans. Sé þriðji aðilinn veika konan þurfum við að trúa að konan hafi farið á tvo óskylda fjölmiðla, Stundina og Kjarnann, og látið þeim í té sama innihaldið úr síma skipstjórans og séð til þess að blaðamenn skrifuðu upp úr símanum sambærilegar fréttir. Þá hafi veika konan skipulagt að fjölmiðlarnir skyldu birta efnið samtímis þann 21. maí. Andlega veik kona væri sem sagt jafnoki tveggja ritstjórna. Tilfallandi hefur ekki stórt álit á andlegu atgervi RSK-blaðamanna. En þessi saga er heldur ótrúverðug.

Seinni möguleikinn er að þriðji aðilinn sé starfsfólk RÚV. Í leiðaranum nefnir Þórður Snær Þóru Arnórsdóttur ritstjóra Kveiks á RÚV í framhjáhlaupi. Hún er sakborningur líkt og hann sjálfur. Þóra og RÚV frumbirtu enga frétt úr síma skipstjórans. Þóra fékk réttarstöðu sakbornings um leið og ritstjóri Heimildarinnar, um miðjan febrúar 2022. Þóra hélt stöðu sinni hjá RÚV þrátt fyrir að vera grunuð um glæp. Stefán Eiríksson útvarpsstjóri og Heiðar Örn Sigurfinnsson fréttastjóri gáfu út sérstaka traustsyfirlýsingu 20. febrúar 2022 og sögðu m.a.

Einn þáttur í þessu sjálfstæði fjölmiðla er að þeir geti tekið við slíkum upplýsingum í trúnaði án þess að þurfa að gera grein fyrir hvaðan eða frá hverjum þær stafi [...] jafnvel þótt um sé t.d. að ræða einkagögn sem fjölmiðlum eru fengin.

Þarna játa Stefán og Heiðar Örn, fyrir hönd Þóru, að hún hafi tekið við einkagögnum. En sjálf birti Þóra enga frumfrétt á RÚV. Stundin og Kjarninn sáu um birtingu. Hér bendir allt til skipulags. Þóra fær síma skipstjórans og afritar. Þáverandi samstarfsmaður Þóru er Helgi Seljan, sem nú er á Heimildinni eftir óvænt starfslok á Efstaleiti í ársbyrjun 2022. Greinarnar tvær í Stundinni og Kjarnanum eru með sömu höfundareinkennum, ,,skæruliðadeild" kemur fyrir í báðum fyrirsögnum. Tilviljun? Nei, varla.

RÚV vélaði með afritun. Frumgerð fréttanna í Stundinni og Kjarnanum varð til á Efstaleiti. Spurningar sem lagðar voru fyrir Þórð Snæ í lögregluyfirheyrslu gefa sterka vísbendingu um að lögreglan viti verkaskiptinguna á milli fjölmiðlanna þriggja, RÚV, Stundarinnar og Kjarnans, RSK-miðla. Þórður er m.a. spurður hver ráði birtingu á efni í útgáfunni þar sem hann er ritstjóri.

Þrem dögum áður en Páli skipstjóra var byrlað skipti Aðalsteinn Kjartansson blaðamaður um starf. Fyrir hádegi 30. apríl 2021 var hann samstarfsmaður Þóru og Helga á RÚV en eftir hádegi sama dag er hann orðinn blaðamaður á Stundinni. Ekki þó hættur ,,rannsóknablaðamennsku", eins og hann sagði rogginn á Vísi. Aðalsteinn er skráður höfundur skæruliðafréttarinnar í Stundinni 21. maí 2021. Tilviljun? Nei, varla.

Tilfallandi hefur fylgst með íslenskum fjölmiðlum í bráðum hálfa öld. Engin dæmi eru um að blaðamaður hafi skipt um vinnustað í hádegishléi. Kaupin gerast ekki þannig á blaðamannaeyrinni. Fyrir byrlun og stuld var búið að ákveða verkaskipti milli RÚV annars vegar og hins vegar Stundarinnar og Kjarnans. Það þurfti að stilla upp liðinu. 

Skipulag sem sagt.

Stefán útvarpsstjóri hélt verndarhendi yfir Þóru þótt hún yrði sakborningur í febrúar 2022. En ári seinna, í janúar 2023, kemur annað hljóð í strokkinn. Lögregla sendi Stefáni fyrirspurn um Samsung-síma með númerið 680 2140 og spurði hver keypti þann síma og hvenær. Þetta er símtækið sem notað var til að afrita síma skipstjórans. Eftir undanbrögð varð Stefán útvarpsstjóri að viðurkenna að Þóra hefði keypt símann fyrir Kveik í apríl 2021. Páli var byrlað í maí. Dagar Þóru á RÚV voru taldir. Snubbótt fréttatilkynning RÚV segir 6. febrúar 2023 að Þóra sé hætt. Tilviljun? Nei, varla.

Í leiðaranum í Heimildinni segir Þórður Snær ekkert um Helga Seljan og fátt um Þóru. Skipulagið gekk út á að Þóra og/eða Helgi Seljan yrðu ,,heimildarmenn" fyrir fréttum Stundarinnar og Kjarnans. Þegar í febrúar 2022 sá lögreglan í gegnum þennan málatilbúnað. Í greinargerð lögreglu segir 

Í þessu máli er engin þörf á að fjalla um heimild fjölmiðlamanna til að vernda heimildarmenn sína. Lögreglan veit hver heimildarmaðurinn er. Heimildarmaðurinn er X.

X er þáverandi eiginkona Páls skipstjóra. Þórður Snær vill meina að heimildarmenn séu Helgi Seljan og/eða Þóra Arnórsdóttir á RÚV, þar sem veika konan fór með síma skipstjórans á Efstaleiti. Blaðamaðurinn Þórður Snær vill gera aðra blaðamenn að heimildarmönnum í veikri von að þeir njóti friðhelgi. Ritstjórinn áttar sig ekki á að í leiðinni sakbendir hann á Þóru og Helga. Gögn málsins og kringumstæður útiloka að ,,þriðji aðilinn" geti verið einhver annar en starfsmaður RÚV. 

,,Blaðamenn mega ekki tjá sig um uppruna gagna sem þeir hafa undir höndum samkvæmt ákvæðum laga sem fjalla um vernd heimildarmanna," skrifar Þórður Snær í leiðaranum.

Lögin sem Þórður Snær vísar til, Lög um vernd uppljóstrara, voru ekki sett til að blaðamenn mættu níðast á andlega veiku fólki. Ekki heldur heimila lögin stuld á einkagögnum. Þá er ekki ákvæði um að byrlun sé lögmæt aðferð til að komast yfir gögn. Enn síður leyfa lögin að blaðamenn séu heimildarmenn annarra blaðamanna og njóti þar með friðhelgi í refsimálum.

Leiðari Þórðar Snæs í Heimildinni gefur til kynna að hann undirbúi að Þóra Arnórsdóttir og/eða Helgi Seljan taki stærsta skellinn þegar dómskerfið tekur til við að vinna úr byrlunar- og símastuldsmálinu. Leiðarinn fer nærri að nafngreina þau sem ,,þriðja aðilann."

Þórður Snær kann hvorki heiðarlega blaðamennsku né lögfræði. Ef hann kynni faglega blaðamennsku og væri löghlýðinn borgari hefði hann ekki stöðu sakbornings.

Rangar sakargiftir fjölmiðla

Ein ástæða fyrir drætti á sakamálarannsóknum eru rangar sakargiftir fjölmiðla. Tvö stór sakamál, Seðlabankamálið og Namibíumálið, eru búin til á fréttastofu RÚV. Í fyrra tilvikinu var gjaldeyriseftirliti Seðlabankans att á foraðið en embætti héraðssaksóknara í því seinna.

Í báðum tilfellum keyrði RÚV af stað herferð með tilstyrk frá öðrum fjölmiðlum, Heimildinni og forverum, og þingmönnum vinstriflokkanna að gera ásakanir trúverðugar. Meginstofnanir í samfélaginu, Seðlabankinn og embætti héraðssaksóknara, létu undan þrýstingi að hefja sakamálarannsókn á grunni falskra ásakana, rangra sakargifta.

Það liggur fyrir játning Helga Seljan fréttamanns RÚV að hann falsaði gögnin sem voru tilefni til ásakana um gjaldeyrismisferli Samherja. Í Namibíumálinu er ógæfumaður gerður að heiðarlegum uppljóstrara af RÚV.

Ef Jóhannes Stefánsson væri grandvar maður sem hefði orðið vitni að rangindum, mútugjöfum, hefði hann farið rakleiðis til yfirvalda, lögreglu og ákæruvalds, með sinn vitnisburð og gögn. En hann fór til Kristins Hrafnssonar á Wikileaks og Helga Seljan á RÚV. Jóhannes hafði aldrei áhuga á réttlæti heldur viðskiptum. Kristinn Hrafnsson á aðgang að digrum sjóðum Wikileaks.

Úr varð fjölmiðlaherferð með engri efnislegri innistæðu, annarri en græðgi og siðleysi uppljóstrara og blaðamanna. Héraðssaksóknari fylgi í humátt á eftir enda fékk hann 200 milljónir króna í sérstaka fjárveitingu frá alþingi til að elta uppspuna drykkjumanns og tveggja akívista. Til að kóróna fáránleikann eru tveir bræður í aukahlutverkum, annar blaðamaður Heimildarinnar en hinn saksóknari hjá embætti héraðssaksóknara. Einn skáldar fréttir annar sakir. Sjoppuliðið er eins fjarri réttarríkinu og Huddersfield úrvalsdeildinni. 

Hvers vegna eru rangar sakargiftir RÚV í Seðlabankamálinu og Namibíumálinu ekki rannsakaðar? Enginn ber fram þá kröfu í fjölmiðlum, ekki heldur í pólitískri umræðu og sakamálayfirvöld halda að sér höndum.

Rangar sakargiftir fjölmiðla eru stóralvarlegt mál. Siðlausir fjölmiðlamenn vaða inn í hús og heimili með fölsk gögn og hugaróra sem átyllu. Fyrst hirða þeir æru og mannorð af saklausu fólki í beinni útsendingu; síðan er opinberum aðilum sigað á mann og annan. Engir eftirmálar af hálfu hins opinbera sem á að vernda borgarana fyrir óréttlæti. Meira að segja sumum í stjórn RÚV er ofboðið og láta bóka í fundargerð:

mikilvægi þess að fréttastofa starfi í samræmi við lög og virði friðhelgi borgaranna í hvívetna.

Eftirlitslausir fjölmiðlar án aðhalds færast allir í aukana, valdeflast í ósvífnum vinnubrögðum og telja sig hafna yfir lög og rétt. Seðlabankamálið hófst 2012 og Namibíumálið 2019. RÚV komst upp með gagnafölsun og siðleysi og vatt sér þegar í næsta verkefni, byrlunar- og símastuldsmálið er hófst vorið 2021.

Er enginn ábyrgur fullorðinn á vaktinni?  

 

Tímamörk á sakamálarannsóknum

Afbrotasaga RÚV í þrem þáttum: fals, fyllibytta og byrlun

Seðlabankamálið, Namibíumálið og byrlunar- og símastuldsmálið eru afbrotasaga RÚV í tólf ár. 

1. Seðlabankamálið hófst 27. mars 2012 með húsrannsókn hjá Samherja að morgni og Kastljósþætti á RÚV um kvöldið. RÚV plottaði með gjaldeyriseftirliti Seðlabanka Íslands í málinu. Byggt var á skýrslu sem var skáldskapur. Kvöldið fyrir húsrannsókn skrifaði Helgi Seljan hluta fréttarinnar í samráði við starfsmann Seðlabankans. Tölvupóstar milli Helga og starfsmanns bankans sýna samsæri tveggja ríkisstofnana gegn atvinnufyrirtæki. Samherji var sýknaður fyrir dómi. Saklaust fólk mátti sitja undir ásökunum um lögbrot í áravís. Í gær var sagt frá kröfu Þorsteins Más um miskabætur, 12 árum eftir að málið hófst. Þeir loga lengi eldarnir sem RÚV kveikir. Ríkisfjölmiðillinn hefur aldrei beðist afsökunar.

2. Namibíumálið hefst með Kveiksþætti á RÚV þann 12. nóvember 2019. Uppljóstrarinn Jóhannes Stefánsson stígur fram í boði RÚV. Mútugjafir Samherja til namibískra embættismanna er ásökunin. Sakamálarannsókn á Íslandi og í Namibíu í rúm 4 ár hefur engu skilað. Í Namibíu stendur yfir dómsmál þar sem Samherji er ekki nefndur a nafn - nema sem brotaþoli. Mútumálið stendur og fellur með Jóhannesi uppljóstrara. Hann er ekki trúverðug heimild. Í dómsmálinu í Namibíu er vitnisburður hans ekki notaður. Í viðtengdri frétt er sagt frá fimm manna teymi héraðssaksóknara sem dvaldi í Namibíu í tíu daga nýverið við ,,skýrslutökur af vitnum." Atburðirnir þar sem Jóhannes kemur við sögu sem starfsmaður Samherja gerast 2012-2016, fyrir átta til tólf árum. Skýrslutökur núna þjóna engum tilgangi, eru yfirvarp til að fresta óhjákvæmilegum málalokum. 

3. Byrlunar- og símastuldsmálið verður til 3. maí 2021 þegar Páli Steingrímssyni skipstjóra hjá Samherja er byrlað, síma hans stolið og gögn tekin ófrjálsri hendi með afritun. Þáverandi eiginkona Páls skipstjóra sá um verknaðinn að undirlagi RÚV í samvinnu við Stundina og Kjarnann, sem nú heita Heimildin. Konan stríðir við alvarleg andleg veikindi. Símtækið sem notað var til að afrita síma skipstjórans var keypt í apríl, fyrir byrlun og stuld. Blaðamenn vissu með fyrirvara að skipstjórinn yrði gerður óvígur, sími hans tekinn traustataki og afhentur fjölmiðlum. Fimm blaðamenn eru sakborningar lögreglurannsókn. Brotaþolar eru tveir, Páll skipstjóri og Arna McClure fyrrum lögfræðingur Samherja.

RÚV-málin þrjú sýna stigmögnun óhæfuverka á tólf ára tímabili. Fyrst ósvífin og ólögleg vinnubrögð þar sem gögn eru fölsuð. Síðan er ógæfumaður gerður að trúverðugri heimild um mútur í framandi landi. Loks taka starfsmenn RÚV lögin í sínar hendur, misnota alvarlega veika konu, og eiga aðild að tvöföldum glæp, byrlun og stuldi.

RÚV axlar aldrei ábyrgð. Frétt í gær segir frá tillögu um endalok RÚV í núverandi mynd. Löngu tímabær aðgerð. Glæpaleiti ohf. er samfélagsleg meinsemd.  

Fimm manns í tíu daga í Namibíu

Íslenski hælisiðnaðurinn: mútur og alþjóðlegir glæpir

Tveir Palestínuarabar með íslenska búsetu voru handteknir í Slóveníu í tilraun til að smygla sjö hælisleitendum, fimm Sýr­lend­ing­um og tveim Egypt­um. Líklegur áfangastaður var Ísland með opin landamæri og aðgerðasinna sem taka lögin í sinar hendur. Stjórnvöld sjá í gegnum fingur sér af ótta við fjölmiðlafólk á bandi aðgerðasinna.

Palestínuarabarnir tveir höfðu íslensk vegabréf, segir í frétt slóvenska fjölmiðilsins, og kröfðust alþjóðlegrar verndar. Arabískir afbrotamenn í útlöndum nota íslensk vegabréf sem skálkaskjól.

Í gær var sagt frá mútugjöfum íslenska hælisiðnaðarins. Nú er það alþjóðleg glæpastarfsemi manna sem veifa íslenskum vegabréfum og flytja araba hingað, sennilega í nafni fjölskyldusameiningar. Allir arabar eru ein stór fjölskylda, segir í stefnuskrá Hamas.

Hvað hefur þjóðin gert til að verðskulda jafn ömurleg stjórnvöld og við sitjum uppi með í málefnum útlendinga?

Palestínumenn búsettir hér handteknir í Slóveníu

Íslenskar mútugjafir í Egyptalandi

Íslenskir aðgerðasinnar múta embættismönnum í Egyptalandi til að kaupa sérvalda Palestínuaraba yfir landamærin við Gasa. Í viðtali á mbl.is viðurkenna aðgerðasinnar að bera fé á embættismenn:

það kost­ar í kring­um 5000 doll­ara fyr­ir ein­stak­ling að koma í gegn­um landa­mær­in með flutn­ingi

Fimm þúsund dollarar eru tæpar 700 þúsund krónur. Hér er ekki um að ræða greiðslu fyrir skjöl og flutninga heldur er verið að bera fé á opinbera starfsmenn er sjá um landamæragæslu á milli Egyptalands og Gasa. Það er lögbrot samkvæmt íslenskum lögum að múta. Morgunblaðið, eini fjölmiðillin sem fjallar um málið, segir:

Mútugreiðslur hér á landi sem annars staðar eru bannaðar með lögum og Ísland hefur einnig alþjóðlegar skuldbindingar hvað það varðar. Viðurlög eru sektir eða allt að fimm ára fangelsi. Það gæti því komið aðgerðasinnunum illa, því lögin eru afdráttarlaus, óháð því hvort einhverjum þyki málstaðurinn góður eða slæmur.

Mútugjafir Íslendinga í Egyptalandi eru fullframdar, játning liggur fyrir. Það hlýtur að hafa afleiðingar. Varla eru lög um bann við að bera fé á fólk upp á punt.

Á alþingi segir Guðmund­ur Ingi Guðbrands­son félagsmálaráðherra að ekki standi til að íslensk stjórnvöld reiði af hendi mútufé í Egyptalandi. Morgunblaðið er eini fréttamiðillinn sem segir tíðindin.

Stéttafélög hafa gefið í samskot til að kaupa ólöglega fyrirgreiðslu í þróunarríki, þar sem opinberir starfsmenn freistast að brjóta lög fyrir reiðufé. Efling gaf eina milljón. Er það hlutverk íslenskra stéttafélaga að grafa undan lögum og siðferði í fátæku Afríkuríki? 

Sumir íslenskir fjölmiðlar, t.d. Heimildin og RÚV, búa yfir sérhæfðri þekkingu um mútugreiðslur, sem kunnugt er. Má búast við raðfréttum sem upplýsa um íslenskar mútur í Egyptalandi? Verður gerð krafa um að embætti héraðssaksóknara láti málið til sína taka, efni til rannsóknar? Geta spilltar íslenskar forréttindakonur valsað um þróunarríki og mútað fátæklingum til að fá sínu framgengt, óháð lögum og reglum?

Íslensk stjórnvöld myndu ekki greiða mútur

Namibíu-dómarinn í héraðsdómi Reykjavíkur

Finnur Þór Vilhjálmsson var til skamms tíma saksóknari hjá embætti héraðssaksóknara. Frá nóvember 2019 fór Finnur Þór með saksókn í Namibíu-málinu, ásakanir Jóhannesar Stefánssonar uppljóstrara, Heimildarinnar og RÚV um mútugjafir Samherja í Afríkuríkinu. Meðal þeirra blaðamanna sem báru fram ásakanir um mútur er bróðir Finns Þórs, Ingi Freyr Vilhjálmsson. Finnur Þór varð dómari við héraðsdóm Reykjavíkur í september á liðnu ári.

Einn angi Namibíu-málsins er byrlunar- og símastuldsmálið. Sömu fjölmiðlar og ásökuðu Samherja um mútur eru tengdir byrlun Páls skipstjóra Steingrímssonar og stuldi á síma hans. Fimm blaðamenn eru sakborningar í lögreglurannsókn.

Páll er skipstjóri hjá Samherja og hafði borið blak af vinnuveitanda sínum í opinberri umræðu. Gögnin úr síma skipstjórans notuðu RÚV og Heimildin (áður Stundin og Kjarninn) til að sýna skipstjórann sem foringja í skæruliðadeild Samherja. Deildin er hugarfóstur blaðamanna. Fréttir um skæruliðadeild urðu margar og fóru víða. Fréttir um byrlun og símastuld að undirlagi fjölmiðla eru fáar og fara hljótt.

Með byrlunar- og símastuldsmálinu er Finnur Þór enn flæktari í Namibíu-málið og anga þess. Bróðir hans, blaðamaðurinn Ingi Freyr, er með stöðu sakbornings í byrlunar- og símastuldsmálinu. Finnur Þór hætti sem saksóknari eftir að bróðir hans fékk stöðu sakbornings. Saksóknarinn varð dómari.

Tilfallandi bloggari hefur skrifað um Namibíu-málið og byrlunar-og símastuldsmálið. Blaðamaður á Heimildinni, áður Stundinni og þar áður RÚV, Aðalsteinn Kjartansson, hefur stefnt tilfallandi fyrir héraðsdóm Reykjavíkur. Aðalsteinn krefst ritskoðunar og vill 2 milljónir króna í bætur og fá greiddan málskostnað. Stefnan er tilraun til kælingar. Bloggari skrifar um mál sem blaðamenn vilja að liggi í þagnargildi. Á bakvið Aðalstein er útgáfa, Heimildin. Peningamenn halda útgáfunni á floti með fjárframlögum. Þá fær Heimildin tugi milljóna króna í styrk frá ríkinu ár hvert.

Í viðtengdri frétt er fjallað um mögulegt vanhæfi landsréttardómara. Spurt er hvort vanhæfi eins dómara við landsrétt ,,smitist" á aðra dómara. Sé það tilfellið þarf að huga að sóttvörnum á kaffistofu héraðsdóms Reykjavíkur. Einkum þegar dómstólinn er virkjaður til að kæfa óþægilega umræðu um störf blaðamanna.

Hvenær „smitast“ vanhæfi yfir á aðra dómara?

Pútín, Bill, Nató og smávegis Hillary

Nýorðinn forseti hitti Pútín starfsfélaga sinn Bill Clinton Bandaríkjaforseta um aldamótin. Clinton var á sínum síðasta spretti í embætti og þaulvanur en sá rússneski nýgræðingur. Pútín spurði Clinton í hádegisverði í Kreml hvort Rússland gæti orðið Nató-ríki.

Tja, jú, því ekki, sagði Clinton. Síðan leið dagurinn. Undir kvöldverði vék Clinton að málinu á ný og sagði, eftir að hafa ráðfært sig við sitt fólk, væri ekki raunhæft að Rússland yrði Nató-ríki.

Frásögnin hér að ofan hefst á 30. mín í viðtali Tucker Carlson við Pútín. Líklega fer Pútín rétt með. Clinton er enn lifandi og gæti leiðrétt Rússlandsforseta, sem yrði neyðarlegt fyrir Kremlarbónda.

Það eitt að forsetar Bandaríkjanna og Rússlands ræddu þann möguleika um aldamótin að Rússland yrði aðili að Nató sýnir að tíu árum eftir lok kalda stríðsins voru forsendur friðsamlegra samskipta andskota sem höfðu verið svarnir óvinir allar götur frá falli Þriðja ríkisins fyrir miðbik síðustu aldar. Um aldamótin var kommúnisminn kominn á ruslahaug sögunnar. Engin hugmyndafræðilegur valkostur var við vestrænt markaðshagkerfi. Til hvers óvinátta? Hvers vegna ekki samstarf?

Úkraínustríðið hófst 2022, Pútín myndi segir 2014, vegna áætlana um að Úkraína yrði Nató-ríki. Rússar telja óvinveitt hernaðarbandalag á þröskuldi sínum ógna öryggishagsmunum Rússlands. Frá Úkraínu er dagleið á skriðdreka til Moskvu.

Engin ein ástæða er fyrir glötuðu tækifæri til friðsamlegra samskipta Rússlands og vesturveldanna, Nató. Um aldamótin var ríkjandi sú hugsun að vestrið, sem sigraði kalda stríðið, ætti inn sín sigurlaun. Hugmyndin um vestrænt forræði í heimsmálum var útbreidd. 

Vestrænir leiðtogar eru miður sín að Tucker Carlson taki viðtal við Pútín. Eiginkona Bill, sjálf forsetaframbjóðandi 2016 á móti Trump, Hillary Clinton, segir Carlson nytsaman fáráðling. Sterk orð þyrfti ekki að viðhafa ef Pútín væri í jaðarhlutverki heimsmálanna. 

Pútín Rússlandsforseti er svo hættulegur andstæðingur að vestrið krefst þöggunar. Í annan stað gengur Rússagrýlan frá kalda stríðinu í endurnýjun lífdaga. Rússar eru sagðir áhugasamir að leggja undir sig Vestur-Evrópu. Jafnvel þótt vilji væri til í Kreml að sækja fram til Ermasunds eru ekki nokkrar einustu líkur á að hernaðarlegt bolmang sé fyrir hendi. Her Rússa á fullt í fangi að stríða við Úkraínuher.

Í Úkraínu er ekki í húfi framtíð hins frjálsa heims, líkt og af er látið. Aftur er í húfi ímyndin um vestrænan óskeikulleika. Stöðumat vestrænna leiðtoga eftir kalda stríðið var að heimurinn ætti þann eina kost apa eftir vestrænum gildum og háttum. Það mat reyndist rangt, sást þegar í Íraksstríðinu 2003. Tuttugu ára sneypuför til Afganistan, sem lauk í ágúst 2021, staðfesti að vestræn umbreyting á heiminum með vopnavaldi er ekki vinnandi vegur.

Betur að Rússland hefði orðið Nató-ríki um aldamótin. Pútín og félagar eiga það sem vestrinu sárlega skortir. Kallast raunsæi.