Veður-Grýlan og manngæskuheimska

Fréttin segir frá tilraunum vestrænna stjórnvalda til að fela skort á hlýnun áratuginn eftir aldamót. Byggt er á umfjöllun Daily Mail frá 2013. Síðan eru liðin tíu ár. Er hlýnun vandamál?

Nei, við búum að nákvæmum mælingum á hitastigi jarðar frá 1979 þegar gervihnettir voru teknir í notkun við að mæla hitastig andrúmsloftsins. Niðurstöður birtast mánaðarlega. Samkvæmt yfirliti hefur hiti jarðar hækkað um 0,13 C á áratug s.l. rúm 40 ár. Það þýðir hækkun um eina gráðu á öld, 100 árum.

Eru það hamfarir? Nei, það var hlýrra á miðöldum en það er í dag. Grænlandsjökull upplýsir. Veðurtímabil sem kallast litla ísöld stóð yfir frá um 1300 til 1900. Ef ekki hefði hlýnað værum við enn á litlu ísöldinni.

Allt eru þetta staðreyndir, sannanlegar og kallast þekking. Hvers vegna í veröldinni er talað um hamfarahlýnun? Einfalda skýringin er að frá í kringum 1980 verða til ný trúarbrögð sem ákalla Veður-Grýlu. Hún býr til manngert verður, samkvæmt skurðgoðadýrkendum.

Manngæskuheimskir blóta Veður-Grýlu með því að fórna hagkvæmasta eldsneyti sem völ er á, bensín og dísil. Heimsbyggðin verður fátækari, ekki síst þjóðir Afríku sem fá ekki aðgang að ódýrasta orkugjafanum. Veður-Grýlu verður að blóta. Þjáning og trú haldast í hendur hjá öfgasöfnuðum.

Nú hefur þýska ríkisstjórnin ákveðið að manngert veður gæti kostað Þýskaland billjón evra fyrir 2050, samkvæmt viðtengdri frétt.

Borgaraleg útgáfa í Þýskaland, Die Welt, segir útreikningana að baki hreint bull og kallar efnahagsmálaráðherra landsins, græningjann Robert Habeck, katastrófu.

Allir með eitthvað á milli eyrnanna vita að veður er breytilegt. Trúarsöfnuðurinn kallar allt veður loftslagsbreytingar. Loftslag, samkvæmt vísindum, er veðurfarsbreyting yfir langan tíma, 30 ár og lengur. Að tala um loftslagsbreytingar frá ári til árs er merkingarleysa. Það er ekki loftslagsbreyting þegar styttir upp að kveldi rigningardags.

Síðasta ísöld, þegar stór hluti jarðar var hulinn jöklum, gaf eftir fyrir 11 þúsund árum. Á jarðsögulegum tíma er það í gær, - jörðin ku vera um 4,5 milljarða ára gömul.

Veður er ekki manngert, heldur náttúrufyrirbæri. Menn kunna enn svo lítil skil á veðurkerfum jarðar að spár um veður, sem mark er á takandi, eru ekki gerðar nema 5 til 7 daga fram í tímann. En svo stíga fíflin á stokk og segja það verði hlýrra eftir 30 ár.

Trúarhiti og heimska er hættulegasti persónuleikinn. Fólk haldið þeirri röskun gerir öðrum illt í nafni mannúðar.

 

Gæti kostað Þjóðverja næstum billjón evra

Hraðferð hópmorðs, byltingin 1917

Alþingi efnir til ,,hraðferðar" þingsályktunar um að hungursneyð í Úkraínu fyrir 90 árum sé skilgreind sem hópmorð. Ábyrgur fyrir hópmorðinu er ekki Rússi heldur Georgíumaðurinn Jósef Stalín.

Stalín fullframdi byltinguna 1917 þegar kommúnistar náðu völdum í Rússlandi og settu saman Sovétríkin fimm árum síðar - með Úkraínu innanborðs.

Hópmorðið kennt við Holodomor er bein afleiðing af vinstrimennskunni sem í tísku var fyrir einni öld.

Samyrkjubúskapur með ríkistilskipun er upphaf hungursneyðarinnar. Blekkingar og innræting fylgdu. Alexander Wat segir í Öldinni minni: sveltandi bændum af samyrkjubúi var smalað í kvikmyndasal þar sem sýnd var ræma af veisluborði sem svignaði undan kræsingum. Nær hungurmorða bændum var talin trú um að þetta væri veruleikinn en ekki sá sem þeir börðu augum utandyra.

Arftakar kommúnisma, sem eiga fulltrúa á alþingi Íslendinga, ættu að nota tækifærið, líta um öxl, draga lærdóma og játa gamlar syndir.

Vinstrimenn samtímans horfast ekki í augu við fortíð sína. Þeir eru uppteknir að gera jörðina að alþjóðavæddu samyrkjubúi. Innrætingin í dag gengur út á að verði miðstýrðum áætlunarbúskap ekki hrint i framkvæmd muni mannkyn deyja út af völdum loftslagsbreytinga. 

Ef þingheimur ætlar að álykta um eitt og stakt hópmorð vinstrimanna fyrr á tíð yrði það eins og að fjöldamorðingi játi umferðalagabrot. Aukaatriði er blásið upp til að fela aðalatriðið.

Viðurkenni Holodomor sem hópmorð

Finnur Þór, síðasta hálmstráið í Namibíumálinu

Síðasta hálmstrá RÚV og Heimildarinnar (Stundin/Kjarninn) í Namibíumálinu er Finnur Þór Vilhjálmsson saksóknari og bróðir Inga Freys blaðamanns Heimildarinnar. Finnur Þór heldur málinu enn opnu af hálfu embættis  héraðssaksóknara þótt undirstöður brotni ein af annarri.

Finnur Þór er þekktur fyrir ,,rannsóknir" langt fram yfir síðasta söludag. Hann hélt systkinum kenndum við Sjólaskip í óvissu í rúm 12 ár áður en málið var fellt niður. Á meðan skrifaði Ingi Freyr bróðir hans fréttir sem héldu fram sekt systkinanna. Þau voru saklaus. Samvinna bræðranna, saksóknarans og blaðamannsins, var tekin til rannsóknar af ríkissaksóknara. Þeirri rannsókn var hætt án skýringa. 

Sjólaskipaaðferðinni er beitt í Namibíumálinu. Hér raunar skaffaði Ingi Freyr bróður sínum málsgögnin, sem eru þó heldur rýr í roðinu. Jóhannesarguðspjall síðara er vegið og léttvægt fundið, bæði á Aftenposten Innsikt og í Namibíu. Norðmenn báðust afsökunar og Namibíumenn nota ekki vitnisburð uppljóstrarans.

Fyrir fjórum mánuðum sagði yfirmaður Finns Þórs, Ólafur Þór Hauksson héraðssaksóknari, að Namibíurannsókninni væri svo gott sem lokið. Í byrjun árs tilkynnti Skatturinn ­niðurstöðu á ítarlegri úttekt á rekstri Samherja og tengdra félaga árin 2012-2018. Ekkert saknæmt fannst. 

Skatturinn fór með veigamesta þátt Namibíumálsins. Kjarni málsins er ásaökun Jóhannesar Stefánssonar uppljóstrara um að Samherji hafi stundað stórfelldar mútur í Namibíu til að tryggja sér kvóta í hrossamakríl. Skatturinn hefði fundið ummerki um mútugjafirnar í bókhaldinu. Eins og menn vita eru mútur ekki frádráttarbærar til skatts. Ekkert saknæmt fannst.

Til að halda málinu gangandi lék Finnur Þór biðleik, þegar hann varð þess áskynja að Skatturinn sæi ekkert athugavert við bókhald Samherja.

Finnur Þór skrifaði, sem sagt, bréf til Namibíu stuttu áður en yfirmaður hans tilkynnti að skammt væri í lok rannsóknar. Bréfið er dagsett 17. október s.l. haust, þ.e. þremur árum eftir að rannsókn hófst. Bréfið ber með sér að lítið sem ekkert hafi gerst í rannsókninni í heil þrjú ár. Embættið lagðist í dvala á meðan RSK-miðlar úthrópuðu Samherja fyrir að stunda mútur. Vinstrimenn á alþingi tóku undir. Fjölmiðlaspillingin tekur á sig ýmsar myndir.

Tilfallandi athugasemd fjallaði um bréf Finns Þórs til Namibíu og sagði m.a.

Finnur Þór óskar eftir upplýsingum, sem stórundarlegt er að hann viti ekki nú þegar, t.d. um verðið á hrossamakríl á namibískum fiskmarkaði frá árinu 2012. 

Íslenski saksóknarinn er í veiðiferð að fiska í gruggugu vatni. Hann spyr opinna spurninga um hvort namibísk yfirvöld hafi fundið eitthvað sem gæti hjálpað til við rannsóknina hér heima. Það skýtur skökku við þar sem fram kemur í bréfinu að Finnur Þór hafi fundað með Namibíumönnum í tvo heila daga í Haag í Hollandi síðast liðinn maí auk fjarfunda. Ekkert bitastætt hefur komið fram á þeim fundum, en áfram skal dorgað í von um að eitthvað komi á krókinn.

Í bréfinu kemur fram að saksóknari hefur sent töluvert af gögnum frá Íslandi til Namibíu. Þá var fundur í Reykjavík í júní í sumar þar sem upplýsingar voru veittar. Í því ljósi er kúnstugt að yfirstandandi réttarhöld í Namibíu snúast eingöngu um skattskil en ekki mútur. Ályktunin sem má draga er að samanlögð gögn í Namibíu og á Íslandi sýna ekki fram á neinar mútugjafir.

Samantekið lítur málið þannig út að Finnur Þór skrifar bréf til Namibíu um það leyti sem hann fréttir að skattrannsókn á Samherja sé að ljúka án þess að nokkuð saknæmt finnist. Bréfið er þannig skrifað að engin von er til þess að Namibíumenn svari því nema eftir dúk og disk, - en líklega aldrei. Finnur Þór er kominn með afsökun að halda málinu opnu næstu árin, segist bíða eftir upplýsingum sem aldrei koma.

Aftenposten Innsikt baðst afsökunar á að hafa birt ásakanir Jóhannesar Stefánssonar um mútur Samherja til namibískra embættis- og stjórnmálamanna. Skatturinn hefur fínkembt bókhald Samherja en ekki fundið nein ummerki um óeðlilegar greiðslur í Namibíu. En Finnur Þór, liðsmaður RSK-miðla hjá embætti héraðssaksóknara, þverskallast við að loka málinu sem jafnvel yfirmaður hans segir að sé gott sem dautt hross.

Finnur Þór er síðasta hálmstráið í stórfelldu samkrulli opinbers embættismanns og fjölmiðla að ,,taka niður" eyfirskt útgerðafélag. Þórður Snær ritstjóri, yfirmaður Inga Freys bróður saksóknara, kennir svona hegðun við ,,spillingarmentalítet". Til er einfaldara orð: spilling.

 

 

 

RÚV eftir afsökun Aftenposten

Aftenposten Innsikt baðst afsökunar að hafa birt ásakanir Jóhannesar Stefánssonar uppljóstrara í garð Samherja um mútugjafir í Namibíu. Danski blaðamaðurinn Lasse Skytt skrifaði norræna útgáfu af Kveiksþætti RÚV frá 12. nóvember 2019.

Skytt er lausablaðamaður og seldi Aftenposten Innsikt samantektina. Eftir að hún birtist í febrúarútgáfu tímaritsins fékk ritstjórinn ábendingar um að fréttin héldi ekki máli þar sem aðeins einn væri til frásagnar, - Jóhannes Stefánsson.

Tine Skarland ritstjóri Aftenposten Innsikt ákvað að hefja rannsókn á samantekt Skytt þar sem ekki virtist allt með felldu. Skytt er beðinn að benda á fleiri heimildir en Jóhannes Stefánsson sem staðfesta að Samherji hafi greitt namibískum stjórnmála- og embættismönnum mútur í skiptum fyrir kvóta. Þessar heimildir gætu verið dómsskjöl, vitnisburður annarra eða tölvupóstar þar sem lagt er á ráðin. 

En Skytt, sem tók ítarlegt viðtal við Jóhannes, gat ekki lagt fram eina einustu heimild sem styður frásögn uppljóstrarans. Enga. Samt stendur dómsmál yfir í Namibíu. En þar er óvart Samherji brotaþoli en ekki gerandi. Tilfallandi athugasemd fjallaði um dómsmálið þar syðra og sagði

Samherji einfaldlega keypti kvóta af Fishcor og greiddi fyrir samkvæmt gildandi lögum og reglum. Samherji er brotaþoli, útgerðin var blekkt af namibískum embættismanni, undirmanni Esau.

Skytt gat sem sagt ekki stutt ásakanir Jóhannesar gögnum. Hvað gera bændur þá? Ef um er að ræða fagmenn sem bera virðingu fyrir sjálfum sér og starfinu biðjast þeir afsökunar á að hafa hlaupið á sig og birt sem fréttir tilhæfulausar ásakanir.

Tine Skarland ritstjóri Aftenposten Innsikt bað lesendur sína afsökunar með ítarlegum pistli þar sem beðist er velvirðingar á að verkferlar útgáfunnar hafi brugðist. Í yfirlýsingu Aftenposten Innsikt segir m.a.

Greinin hafði að geyma fjölda staðhæfinga og ekki kom nægilega vel fram að umræddar staðhæfingarnar væru einhliða frásögn uppljóstrarans Jóhannesar Stefánssonar af málsatvikum.

Afsökun Aftenposten Innsikt er ítarleg og án fyrirvara. Beðist er afsökunar á lélegri blaðamennsku með einhliða frásögn. Fjölmiðill sem flytur staðhæfingar einnar heimildar, Jóhannesar í þessu tilviki, verður að gera grein fyrir trúverðugleika heimildarinnar. Það var ekki gert. Ástæðan liggur í augum uppi. Jóhannes er afar ótrúverðug heimild. 

Ferill Jóhannesar sýnir ógæfumann. Eftir að hann komst í sviðsljósið gerði hann sjálfan sig að fórnarlambi og bjó til villtar samsæriskenningar.

Berast nú böndin að RÚV. Var gerð innanhússrannsókn á vinnu Helga Seljan og Aðalsteins Kjartanssonar sem gerðu Kveiksþáttinn er sýndur var í nóvember 2019? Næg ástæða er til að þýfga Helga um gögn, þar sem hann er með brotasögu. Helgi skáldaði skýrslu í fyrri atlögu sinni að Samherja, sem kallast Seðlabankamálið. Vann RÚV heimavinnuna sína og gekk úr skugga um að ásakanir Jóhannesar uppljóstrara héldu máli?

Svarið er nei. Helgi, Aðalsteinn og ritstjóri Kveiks, Þóra Arnórsdóttir, fengu að leika lausum hala og stunda málafylgju en ekki blaðamennsku. Þríeykið bjó ekki við neitt aðhald eða eftirlit. Þegar tækifæri gafst til, tveim árum eftir Kveiksþáttinn, að komast yfir síma Páls Steingrímssonar skipstjóra hjá Samherja með byrlun og þjófnaði stóð ekki á siðlausum fréttamönnum á Glæpaleiti. 

Helgi, Aðalsteinn og Þóra eru ekki lengur starfsmenn RÚV. Það breytir ekki að ríkisfjölmiðillinn verður að gera hreint fyrir sínum dyrum og útskýra hvernig það gerðist að fréttamannaklíka komst upp með vinnubrögð sem eiga ekkert skylt við blaðamennsku og fréttaflutning.

 

Namibíumálið: búið til á Ísland, jarðað í Noregi

Namibíumálið er með fæðingardag, 12. nóvember 2019. Kveiksþáttur RÚV var sýndur þann dag. Kynntur var til sögunnar Jóhannes uppljóstrari Stefánsson, eina heimildin fyrir meintum mútugjöfum Samherja til namibískra embættis- og stjórnmálamanna.

Jarðaför Namibíumálsins fór fram í Noregi 1. mars 2023. Þann dag birtist afsökun norska stórblaðsins Aftenposetn Innsikt. Lykilsetningin er eftirfarandi:

Aftenposten Innsikt hefur enga stoð fyrir þeirri fullyrðingu að Jóhannes Stefánsson hafi komið fram „fyrir hönd“ Samherja í mútumáli til manna í Namibíu né að samningur um eitthvað slíkt hafi verið gerður á milli Samherja og namibískra aðila. Um er að ræða ásakanir Jóhannesar Stefánssonar

Jóhannes Stefánsson er eina heimildin um að Samherji hafi stundað mútur í Namibíu. Allt Namibíumálið byggir á einum manni sem, frómt sagt, er ekki trúverðug heimild. Í blaðamannskólum er kennt að einnar heimildar fréttir beri að varast og því meira sem fréttamálið er stærra.

Þegar heimildin er hatursfullur eiturlyfjafíkill og stórtækur vændiskaupandi, sem hringir í fólk og hótar limlestingum og lífláti, þarf ekki að kunna blaðamennsku til að átta sig á að ekki er um að ræða góðan pappír.

Afsökun Aftenpostin Innsikt 1. mars kemur í kjölfar forsíðugreinar tímaritsins í febrúar. Danskur blaðamaður, Lasse Skytt, skrifaði þar norræna útgáfu af Kveiksþætti RÚV frá 2019. Skytt fékk nýjustu uppfærsluna frá Jóhannesi. Þegar búið er að fara yfir fréttina af ritstjórn Aftenposten Innsikt er niðurstaðan afgerandi. 

,,engin stoð" er fyrir fullyrðingu Jóhannesar Stefánssonar.

Hvers vegna birti RÚV, í félagi með Kjarnanum og Stundinni (nú Heimildinni) staðlausa stafi Jóhannesar uppljóstrara? Jú, RÚV og fylgimiðlar stunda ekki blaðamennsku heldur málafylgju. RÚV ætlaði að ,,taka niður" Samherja og nota til þess ásakanir Jóhannesar.

Namibíumálið er önnur atlaga RÚV að Samherja. Sú fyrri, Seðlabankamálið, hófst 2012. Þá var eina heimildin fölsuð gögn sem Helgi Seljan veifaði framan í myndavélar RÚV um leið og hann ásakaði Samherja um stórfelld brot á þágildandi gjaldeyrislögum. Ítarleg rannsókn og dómsmál leiddu í ljós sakleysi Samherja og óvönduð vinnubrögð RÚV. 

RÚV og fylgimiðlar eru í pólitísku bandalagi með vinstriflokkunum í herförinni gegn Samherja, bæði í Seðlabankamálinu og Namibíumálinu.

Þeir sem fylgjast með pólitískri umræðu hafa tekið eftir að stjórnmálamenn eru steinhættir að tala um Namibíumálið. Svo dæmi sé tekið hefur nýr formaður Samfylkingar ekki sagt eitt aukatekið orð um málið. Ekkert, núll, nada.

Logi Einarsson forveri Kristrúnar lét gamminn geisa á sínum tíma, fékk jafnvel eiginkonuna, héraðsdómara, í lið með sér til að skrifa dóm í þágu fréttamanns RÚV og Heimildarinnar, Aðalsteins Kjartanssonar. Þeim dómi var hnekkt í landsrétti. Ekki löngu síðar hætti Logi sem formaður. Logi og frú reiddu hátt til höggs. Er höggið geigaði varð formaðurinn að taka pokann sinn. 

Málafylgja, sem sagt, og gagnkvæmir hagsmunir. RÚV sér um að búa mál í hendur vinstriflokkunum, sem aftur tryggja að RÚV fái peninga á fjárlögum.

Þórður Snær ritstjóri Heimildarinnar útskýrir spillinguna með þessum orðum: 

Þess í stað er samfélagið okkar gegnsýrt af spillingarmentalíteti, þar sem reglan um „greiða gegn greiða“ gildir. Aðgangur að tækifærum, upplýsingum og peningum annarra byggist á því að þú standir inni í tjaldinu og pissir út, frekar en að standa utan við það og pissa inn.

RÚV, samkvæmt greiningu ritstjórans, situr í ríkistjaldinu miðju og hótar að míga á allt og alla fái stofnunin ekki sinn skerf af skattfé almennings. Sjálfur er ritstjórinn á kafi í spillingunni. RÚV niðurgreiðir laun hans á Heimildinni með því að hafa hann á föstum verktakasamningi.

Þórður Snær kvartar undan að blaðamenn skipti ekki lengur máli. Ástæðan er að meintir blaðamenn stunda ekki blaðamennsku heldur hafa málafylgju að lifibrauði annars vegar og hins vegar taka þátt í pólitík.

Málafylgjan skeytir hvorki um heiður né skömm, enn síður um lög og reglur. Fimm blaðamenn RÚV og Heimildarinnar eru sakborningar í refsimáli. Siðlaus og glæpsamleg málafylgja er eitt, blaðamennska er annað.

 

 

 

Biðst Blaðamannafélagið afsökunar?

Blaðamannafélag Íslands dreifði sömu umfjöllun um Namibíumálið og Innsikt/Aftenposten, sem hefur beðist afsökunar á að hafa birt óvandaða frétt danska blaðamannsins Lasse Skytt. Blaðamenn af RÚV og Heimildinni (Stundin og Kjarninn) keyptu þjónustu Skytt sem skrifaði greinar í erlendar útgáfur gagngert til að þær yrðu þýddar á íslensku.

Tilgangurinn var að bæta vígstöðu íslensku blaðamannanna sem eru sakborningar í lögreglurannsókn á byrlun, gagnastuldi, stafrænu kynferðisofbeldi og broti á friðhelgi.

Netútgáfa Blaðamannafélags Íslands, press.is, birti umfjöllun um grein Skytt í dönsku útgáfunni Jorunalisten. Líkt og í Innsikt/Aftenposten er Þórður Snær Júlíusson ritstjóri Heimildarinnar, áður Kjarnans, í stóru hlutverki. Eins og í Innsikt/Aftenposten skáldar Þórður Snær ofsóknir á hendur sér og öðrum blaðamönnum. Eftir ritstjóranum er haft

Hann [Þórður Snær} og þrír aðrir blaðamenn fengu skyndiheimsókn í Reykjavík frá hópi lögreglumanna. Þeim var ekið til Akureyrar, sjávarbyggðar á Norðurlandi þar sem Samherji er með höfuðstöðvar.

Íslenskum blaðamönnum var ekki smalað í bíl og þeim ekið norður yfir heiðar. Þetta er haugalygi. Þórður Snær ásamt þrem öðrum blaðamönnum var gert að mæta í skýrslutöku hjá lögreglu í Reykjavík 14. febrúar í fyrra. Þeir lögðu á flótta og létu ekki sjá sig í boðaða yfirheyrslu fyrr en í ágúst og september. Tímann á milli notuðu þeir til að eyðileggja gögn sem bendluðu blaðamennina við byrlun Páls skipstjóra, stuldi á síma hans og broti á friðhelgi.

Netútgáfa Blaðamannafélagsins endurbirtir ekki lygafrásögnina um nauðungarflutninga blaðamanna norður í land. Netútgáfa BÍ segir aftur þetta í endursögninni:

Samherjamálið er rifjað upp, og sú ákvörðun lögreglustjórans á Norðurlandi eystra að hefja sakamálarannsókn gegn fjórum blaðamönnum í tengslum við fréttaflutning af einum anga Samherjamálsins.

Þetta er sama efnisgrein og birtist í Innsikt/Aftenposten og ritstjórinn biðst afsökunar á, sbr.  

yf­ir­heyrsla ís­lenskra blaðamanna hjá lög­regl­unni á Norður­landi eystra hafi „ekki tengst um­fjöll­un þess­ara blaðamanna um um­rætt mál [þ.e. Namibíumálið] og kem­ur þannig mál­inu ekki við“

Hér liggur kýrskýrt fyrir að Þórður Snær og félagar hans sakborningarnir fá útlendan blaðamann til að halda því fram á erlendum vettvangi að lögreglan sé útsendari Samherja. 

Hvorki í Journalisten né í Innsikt/Aftenposten er nafn Páls skipstjóra Steingrímssonar nefnt á nafn. En Páli var byrlað, síma hans stolið og brotið var á friðhelgi hans. Af þeirri ástæðu eru blaðamennirnir sakborningar í glæparannsókn. Ekki vegna skrifa þeirra um Samherja.

Nú þegar fagmenn sem kunna blaðamennsku, ritstjórn Innsikt/Aftenposten, hafa beðist afsökunar ætlar Blaðamannafélag Íslands ekki að gera það sama?

Já, vel á minnst. Höfundur greinarinnar í netútgáfu Blaðamannafélags Íslands heitir Auðunn Arnórsson. Hann er bróðir Þóru Arnórsdóttur sem er sakborningur líkt og Þórður Snær. 

 

 

Biðjast afsökunar á rangfærslum um Samherjamálið

Aftenposten biðst afsökunar á RSK-miðlum

Innsikt, tímarit norska stórblaðsins Aftenposten, biðst afsökunar á lélegri blaðamennsku og fjölmörgum staðreyndavillum í fréttagrein sem skrifuð var í þágu íslenskra blaðamann RSK-miðla (RÚV, Stundarinnar og Kjarnans - nú Heimildin).

RSK-miðlar fengu danskan blaðamann, Lasse Skytt, sem einnig auglýsir sig sem almannatengil, til að skrifa fréttasamantekt um Namibíumálið og rannsókn lögreglu á aðild blaðamanna að byrlun Páls Steingrímssonar skipstjóra Samherja. Skytt fékk greinina birta í febrúarútgáfu Innsikt.

Skytt skrifaði styttri útgáfu af greininni og fékk hana birta í dönsku fagriti blaðamanna. Tilfallandi athugasemd fjallaði um vinnubrögð RSK-miðla við að kaupa sér frægð í útlöndum á fölskum forsendum.

Í marsútgáfu Innsikt er löng afsökunarbeiðni þar sem raktar eru margar villur og rangtúlkanir í grein Skytt. Íslensku blaðamennirnir útveguðu Skytt aðgang að Jóhannesi Stefánssyni, svokölluðum uppljóstrara. Jóhannes talar aðeins við þá blaðamenn sem gleypa frásögn hans hráa og fjalla ekki um hve vafasöm heimild uppljóstrarinn er.

Í afsökunarbeiðni Innsikt er tekið fram að útgáfan hafi ekki séð neinar trúverðugar heimildir um að Jóhannes hafi fyrir hönd Samherja mútað embættismönnum í Namibíu. ,,Það hefði átt að koma fram í greininni," segir Innsikt, ,,að Jóhannes er einn til frásagnar um að hafa stundað mútur."

Skytt hafði ekki samband við Samherja þegar hann undirbjó greinina. Enda var Skytt í vinnu hjá RSK-miðlum til að ófrægja Samherja. Aldrei stóð til sjónarmið annarra en RSK-miðla kæmust á framfæri. Afsökunarbeiðni Innsikt segir: ,,Verkferlar hjá okkur brugðust. Grunnatriði blaðamennsku er að ásakanir séu bornar undir þá sem þær beinast að. Það var ekki gert í þessu tilviki."

Innsikt biðst einnig afsökunar á að í grein Skytt séu yfirheyrslur lögreglu yfir blaðamönnum tengd Namibíumálinu. Umfjöllun um skýrslutöku lögreglu af blaðamönnum átti ekki heima í umfjöllun um Namibíumálið, segir í yfirlýsingu Innsikt. Blaðamennirnir eiga aðild að byrlun, gagnastuldi og brot á friðhelgi. Það er sjálfstætt mál kennt við Pál skipstjóra.  

Í Noregi eru grunnatriði blaðamennsku virt. Á Íslandi er enginn munur á almannatengslum og blaðamennsku. RÚV, Stundin og Kjarninn (nú Heimildin) stunda málflutning, ekki fréttaflutning.

Það verður í minnum haft að Aftenposten biðst afsökunar á íslenskri blaðamennsku.

   

Hreinsanir Stefáns, þögnin um Þóru

Þrír þungavigtarmenn á RÚV hverfa af vettvangi í takt við framvindu lögreglurannsóknar á aðild fréttamanna að byrlun Páls skipstjóra Steingrímssonar, stuldi á síma og broti á friðhelgi hans og Örnu McClure lögfræðings. Samanlagður starfsaldur blaðamannanna þriggja er yfir 60 ár.

Útvarpsstjórinn, Stefán Eiríksson, er fyrrum lögreglustjóri, þekkir starfsháttu laganna varða og býr að tengslum innan löggæslunnar. Hann fórnar ekki þrautreyndum starfsmönnum nema af brýnni nauðsyn.

Brotið var á Páli skipstjóra 3. maí 2021. Fyrsta yfirheyrslan yfir sakborningi fór fram 5. október þá um haustið. Í sama mánuði ákvað Stefán að Rakel Þorbergsdóttir fréttarstjóri skyldi láta af störfum eftir 22 ára starf. Ákvörðunin var tilkynnt 9. nóvember. Ekki var hægt að auglýsa stöðu fréttastjóra þar sem útvarpsstjóri vissi ekki hve margir starfsmenn voru til rannsóknar lögreglu. Rakel var lofað lausamennsku við þáttagerð, en fátt er að frétta af þeirri sporslu.

Næstur á dagskrá var Helgi Seljan. Ákvörðun um brotthvarf hans var tekin um haustið en ekki tilkynnt fyrr en á nýju ári. Á vefsvæði starfsmanna RÚV sagði fréttamaðurinn m.a. að skilnaði

Hlust­endum og á­horf­endum er eng­inn greiði gerður með því að sitja undir kurt­eis­is­hjali við skoð­anir þess og heims­­mynd öllum stund­um. Þannig hefur það ekki verið og má ekki verða.

Allan starfsferil sinn hjá RÚV, sem spannaði 16 ár, var Helgi ötull að búa til ,,heimsmynd" sem aðeins var laustengd veruleikanum. Fyrst ýkjur, síðan fölsun og loks glæpur. Allt þegar þrennt er.

Stefán útvarpsstjóri kvaddi Helga með þessum orðum:

Hvað Helga Seljan varðar sérstaklega þá er það sigur fyrir íslenska þjóð og blaðamennsku að þessi öflugi blaðamaður haldi áfram sínum störfum.

Ef útvarpsstjóri tryði eigin orðum hefði Helgi ekki verið látinn fara. Oflofið er hluti starfslokasamnings og má skilja sem hæðni.

Mánuði eftir að tilkynnt var um starfslok Helga var upplýst um sakborninga í lögreglurannsókninni. Þóra Arnórsdóttir ritstjóri Kveiks er þar á meðal. Samt sat Þóra kyrr í sinni stöðu í eitt ár. En svo breyttist eitthvað.

Þóra tilkynnti sjálf, líkt og Helgi, að hún væri hætt 6. febrúar síðast liðinn eftir 25 ára starf á ríkisfjölmiðlinum. Hún fær sæti í skemmtiþætti Gísla Marteins til að kveðja og talar um álag vegna ,,áreitis." Samt þekkir hún ekkert annað í aldarfjórðung. Áreitið fer líklega vaxandi og er af öðrum toga en hjá heiðarlegum blaðamanni.

Ólíkt þegar Helgi axlaði sín skinn stígur Stefán útvarpsstjóri ekki fram og mærir tapaðan starfskraft. Þóra er þó yfirmaður á RÚV og með lengri starfsaldur. Ísköld þögn fylgir fyrrum forsetaframbjóðanda úr útvarpshúsinu og upp í Landsvirkjun. Þar tekur einn einn forstöðumaður ríkisstofnunar  við flóttamanni sem annar opinber embættismaður þvær hendur sínar af. Hversu margir Kveiks-þættir Þóru fjölluðu um spillingu?

Vísbendingu um ástæðu flóttans má finna hjá almannatengli í líki blaðamanns sem vinnur fyrir sakborningana. Tilfallandi athugasemd fjallaði um störf Lasse Skytt í þágu grunaðra blaðamanna. Skytt sér um að skrifa fréttagreinar í erlenda miðla um ofsóttu blaðamennina á Íslandi. Fréttirnar eru þýddir í miðla sakborninga hér á landi til að afla samúðar.

Í framhaldi af tilfallandi athugasemd átti Skytt í samskiptum við erlendan starfsfélaga og ræðir þar sína vinnu í sakamálinu íslenska. Hann skrifar um rannsókn lögreglu ,,ifølge mine kilder er politisagen med journalisterne netop blevet forsinket."  Sá danski segir sem sagt að samkvæmt sínum heimildum hafi rannsókn lögreglu skyndilega seinkað. Heimildamenn Skytt eru vitanlega íslensku blaðamennirnir, vinnuveitendur hans.

Tölvupóstur Skytt er aðeins tíu daga gamall. Lögreglan var um það bil að ljúka rannsókn í janúar/febrúar en þá verður stefnubreyting, fleiri atriði krefjast rannsóknar. Sakborningar verða þess áskynja og Stefán útvarpsstjóri einnig. Þóra hættir á RÚV í lóðbeinu framhaldi.

Það sem gerðist er eftirfarandi. Lögreglan fékk vísbendingar, og í framhaldi gögn, um að samskipti blaðamanna við byrlara Páls hafi byrjað nokkru áður en tilræðinu var hrint í framkvæmd 3. maí 2021. Áður beindist lögreglurannsóknin fyrst og fremst að atburðarásinni eftir byrlunina og hvernig blaðamenn fóru með einkagögn Páls skipstjóra.

Athyglin beinist að tölvupóstum sem fóru á milli eins eða fleiri blaðamanna annars vegar og hins vegar byrlarans. Blaðamennirnir töldu sig hafa eytt öllum tölvupóstum. Þeir tóku m.a. síma byrlarans traustataki, fyrir milligöngu Láru V. Júlíusdóttur lögmanns, til að ganga úr skugga um að tölvupóstum yrði eytt.

Tölvupóstar sem fjalla um glæp sem enn er ekki framinn gefa til kynna meðsekt blaðamanna að atlögu að lífi og heilsu Páls skipstjóra.

Tvær ritstjórnir íslenskra fjölmiðla, RÚV og Heimildarinnar, búa að upplýsingum frá fyrstu hendi um aðild blaðamanna að alvarlegum glæp. Báðir fjölmiðlar eru þöglir sem gröfin. Það samrýmist ekki ,,heimsmynd" RÚV og Heimildarinnar, svo notað sé orðfæri Helga Seljan, að afhjúpa afbrot í eigin ranni. Sakborningar nota vina- og kunningjatengsl við blaðamenn á öðrum fjölmiðlum og fá þá til liðs við samsæri þagnarinnar.  

Almenningur má alls ekki fá vitneskju um að blaðamenn stunda glæpi til að afla frétta. Fjölmiðlakerfi þagnarinnar er ekki rekið í þágu almannahagsmuna heldur fárra innvígðra með óhreint mjöl í pokahorninu.   

 

 

Bloggari skrifar fréttir

Ef ekki væri fyrir tilfallandi bloggara segði fátt af byrlun Páls skipstjóra, stuldi á síma og aðför að einkalífi hans. Margverðlaunaðir blaðamenn koma við sögu, fyrst sem gerendur en síðar sem þöggunaryfirvald fjölmiðla. Þrír fréttamenn RÚV urðu að taka pokann sinn og Stundin og Kjarninn að sameinast.

Fyrsta bloggfréttin um Pál skipstjóra var skrifuð 2. nóvember 2021. Ellefu dögum síðar birtist önnur færsla þar sem farið var yfir málið, eins og það stóð þá um haustið. Síðan er fjallað um sakamálið eftir efnum og ástæðum, á meðan fjölmiðlar keppast við að þegja.

Þórður Snær ritstjóra Kjarnans, nú Heimildarinnar, var allt annað en sáttur við að bloggari segði fréttir sem verðlaunablaðamann vildu ekki að birtust. Þórður Snær skrifar leiðara 18. nóvember 2021 með fyrirsögninni ,,Glæpir í höfði Páls Vilhjálmssonar." Gefum ritstjóranum orðið:

Stað­reyndir eru ekki teygj­an­legt hug­tak. Það má ein­fald­­lega ekki segja hvað sem er, um hvern sem er, hvar sem bara vegna þess að ein­hver raðar röngum álykt­unum saman í fjar­stæðu­kennda atburða­rás. Nauð­syn­legt er að finna stað­hæf­ingum sínum stað í raun­veru­leik­an­um.
Þar eiga stað­hæf­ingar Páls Vil­hjálms­sonar engan sama­stað.

Þetta skrifar Þórður Snær 18. nóvember 2021. Þrem mánuðum síðar, þann 14. febrúar 2022, er upplýst að fjórir blaðamenn hafi stöðu sakbornings í lögreglurannsókn á byrlun Páls skipstjóra, stuldi á síma hans og broti á friðhelgi einkalífs. Þórður Snær er á meðal sakborninga.

Margur blaðamaðurinn hefur fengið verðlaun fyrir minna en að sjá þrjá mánuði fram í tímann. Þórður Snær fær taugaáfall þegar hann sér handverk sem kemur margfalt betur heim við staðreyndir en íslensk verðlaunablaðamennska. Eina úrræði ritstjórans er að stefna bloggara, - fyrir að skrifa fréttir.

Sannleikurinn er sá að blaðamenn RÚV og Heimildarinnar (áður Stundarinnar og Kjarnans) iðkuðu glæpi og kölluðu blaðamennsku. Aðför blaðamanna að lífi, heilsu og einkalífi Páls skipstjóra er sú ljótasta í íslenskri fjölmiðlasögu.

Á meðan fjölmiðlar þögðu skrifaði bloggari fréttir sem eiga erindi til almennings. Tilraun Þórðar Snæs verðlaunablaðamanns til þöggunar mun mistakast.

 

Páll hafi ritað ummæli í góðri trú

Ný gögn í byrlunarmáli Páls skipstjóra

Í lögreglurannsókn á aðild blaðamanna að byrlun Páls skipstjóra Steingrímssonar vorið 2021 eru væntanleg ný gögn sem gerbreyta stöðu málsins. Hingað til hefur rannsókn lögreglunnar beinst að aðkomu blaðamanna að málinu eftir að skipstjóranum var byrlað. Nýr vitnisburður, og gögn sem styðja þá frásögn, sýna fram á að blaðamennirnir hafi tekið þátt í að skipuleggja byrlunina, verið með í ráðum þegar í upphafi.

Tölvupóstar sem staðfesta aðild blaðamanna að undirbúningi tilræðisins eru ekki lengur til. Þeim var eytt. Lögreglan freistar þess að fá afrit af tölvupóstunum frá erlendu tæknifyrirtæki sem hýsir vefþjóna er tölvupóstarnir fóru um. 

Kona nákomin Páli skipstjóra byrlaði honum 3. maí 2021 á Akureyri. Líkur eru á að það hafi verið seinni tilraun til byrlunar. Sú fyrri var helgina á undan. Þá helgi gisti skipstjórinn í Reykjavík eftir að hafa komið heim úr róðri. Byrlunin mistókst þar sem Páll afþakkaði drykkinn sem innihélt eitrið.

Á föstudegi fyrir þessa helgi var tilkynnt að Aðalsteinn Kjartansson fréttamaður á RÚV flytti sig um set á Stundina, sem systir hans, Ingibjörg Dögg, ritstýrir. Næsti yfirmaður Aðalsteins á RÚV var Þóra Arnórsdóttir. Sjaldgæft er að starfsmaður á opinberri stofnun skipti um vinnustað án fyrirvara, ráði sig í nýtt starf sama dag og hann hættir. En það bráðlá á að Aðalsteinn færi yfir á Stundina til að vinna úr stolnum gögnum er kæmu á RÚV. Það átti bara eftir að byrla skipstjóranum og stela síma hans þegar Aðalsteinn flutti blaðamennsku sína af RÚV yfir á Stundina.

Ef rétt er að tilraunin til að eitra fyrir Páli skipstjóra um helgina hafi mistekist er líklegt að töluverð samskipti hafi verið á milli blaðamanna og konunnar sem byrlaði. Ný áætlun hefur verið sett saman. Ef einhver þessara samskipta eru til á texta, t.d. í tölvupóstum, er líklegt að sú sönnun haldi fyrir dómi. Annars er um að ræða kringumstæðurök fyrir aðild blaðamanna að skipulagningu tilræðisins auk vitnisburðar. Kringumstæðurökin eru sterk, tölvupóstur gerir málið naglfast.

Páll var meðvitundarlaus 4. til 6. maí og var fluttur rænulaus frá Akureyri á gjörgæslu í Reykjavík. Á þeim tíma var síma hans stolið og hann afritaður. Til að afrita símann þurfti áður að kaupa nýjan síma - sem undirstrikar að unnið var samkvæmt skipulagi. Eftir stuld og afritun var símanum skilað á sjúkrabeð Páls. Skipulagið gerði ráð fyrir að skipstjórinn væri grunlaus um að sími hans hafi verið afritaður.

Er skipstjórinn komst til meðvitundar vöknuðu með honum grunsemdir að einhver hefði átt við símtækið á meðan hann var á gjörgæslu. Reynt hafði verið að komast inn á samfélagsmiðla sem hann notar og inn í heimabanka hans með símtækinu. Hann kærði málið til lögreglu 14. maí.

Blaðamennirnir birtu fyrstu fréttir úr síma Páls 21. maí. Aðalsteinn skrifaði í Stundina en Þórður Snær Júlíusson og Arnar Þór Ingólfsson í Kjarnann. Fréttir beggja fjölmiðla birtust samtímis morguninn 21. maí. Aftur eru augljós merki um miðlægt skipulag. Engin frétt birtist á RÚV. Miðstöð samsærisins var á Efstaleiti. Þar var unnið úr gögnunum og fréttir útbúnar í Stundina og Kjarnann, sem nú hafa sameinast í einn miðil, Heimildina.

Verkskiptingin milli RÚV annars vegar og hins vegar Kjarnans og Stundarinnar gekk út á að RÚV kæmi í kjölfarið og endursegði fréttirnar en þó fyrst og fremst krefðist viðbragða stjórnmálamanna og annarra. Með síbylju fréttaflutnings var Pál skipstjóra gerður að sérstakri deild í Samherja, þar sem hann starfar við sjómennsku. Ímynduð deild RSK-miðla (RÚV, Stundin og Kjarninn) fékk heitið skæruliðadeildin. En skipstjórinn var engin deild. Hann aftur gagnrýndi RSK-miðla og varð fyrir það skotmark blaðamannanna.

Staðsetningarbúnaður í síma Páls uppfærðist ekki þar sem skipstjórinn slökkti á símanum eftir að hann varð þess áskynja að einhverjir höfðu tekið hann ófrjálsri hendi. Blaðamennirnir, á hinn bóginn, töldu óhætt að birta frétt rúmum tveim vikum eftir þjófnaðinn enda almenna reglan að upplýsingar um staðsetningu símatækja eyðast innan hálfs mánaðar. En það gerist aðeins ef símtækið er í notkun.

Staðsetningarbúnaður í síma Páls sýnir símtækið á Efstaleiti þann tíma sem skipstjórinn var á gjörgæslu. Aðeins steinsnar er frá Landspítalanum yfir á Efstaleiti þar sem RÚV er til húsa. Smitrakningarforrit, sem einnig var í símanum, geymir upplýsingar um þau símtæki sem voru nálæg er sími Páls var afritaður. Fleiri en einn blaðamaður höndlaði með stolna símann.

Lögreglan fékk hlerunarheimildir eftir að Páll kærði. Lögreglan með skrár yfir símtöl á milli gerandanna dagana fyrir tilræðið. Fái lögreglan tölvupósta sem fóru á milli aðila dagana fyrir tilræðið er komin borðleggjandi sönnun fyrir þátttöku blaðamanna í atlögu að lífi og heilsu skipstjórans.

Áður en nýju gögnin komu til álita stóð til að ákæra blaðamennina fyrir brot á friðhelgi og stafrænt kynferðisofbeldi. Blaðamennirnir sendu á milli sín og e.t.v. til annarra persónulegt efni skipstjórans. Fram hefur komið að þeir hótuðu honum frekari meingjörðum ef hann drægi ekki tilbaka kæruna frá 14. maí 2021.

Verði sýnt fram á að blaðamennirnir eigi aðild að tilræðinu sjálfu þyngjast sakargiftir.

Blaðamennirnir hafa ekki gert opinberlega grein fyrir sinni aðild. Þeir aftur stefna fyrir dómstóla þeim sem fjalla um málið, eins og tilfallandi bloggara.