Þóra og blómaskraut blaðamanna

Héraðsdómur Norðurlands eystra úrskurðar að Þóra Arnórsdóttir yfirmaður á RÚV eigi að mæta í yfirheyrslu lögreglunnar vegna rannsóknar á byrlun Páls skipstjóra Steingrímssonar og stuldi á síma hans.

Í dómnum segir að  enn ,,hefur engin ákvörðun verið tekin um að hverfa frá þeirri fyrirætlun lögreglu að yfirheyra sóknaraðila [Þóru] í máli þessu sem sakborning." Í framhaldi hafnar dómurinn kröfu lögfræðings Þóru að lögreglan sé vanhæf. Nokkuð skýrt:

sóknaraðili [Þóra] [hefur] ekki sýnt fram á að fyrir hendi séu atvik eða aðstæður sem séu til þess fallnar að draga óhlutdrægni varnaraðila [lögreglunnar], eða einstakra starfsmanna hans, í efa. Verður kröfum sóknaraðila því hafnað.

Lögmaður Þóru byggði kröfu um vanhæfi m.a. á að aðstoðarsaksóknari notaði samlíkingu milli blaðamanna og blómaskreytara þegar hann var spurður um mál Aðalsteins Kjartanssonar blaðamanns á Stundinni, sem líkt og Þóra er grunaður um refsiverða háttsemi.

Meira verður ekki ráðið af framangreindum ummælum, en sú afstaða aðstoðarsaksóknarans, að þeir sem gegna starfi sem gagnrýni getur fylgt, verði að vera reiðubúnir að taka þeirri gagnrýni. Ummælin eru óheppileg af hálfu saksóknara, en ekki til þess fallin að draga megi óhlutdrægni saksóknarans í efa með réttu.

Segir i dómnum. Blaðamenn þola illa gagnrýni og þeir sinna ekki boðun í yfirheyrslu. Blaðamenn eru fljótir að krefja aðra um að axla ábyrgð og víkja ef kusk fellur á mannorðið. En nú eru fjórir blaðamenn með stöðu sakborninga í lögreglurannsókn á alvarlegum glæp. Hvorki axla þeir ábyrgð né stíga til hliðar. 

Í sekum blaðamanni býr kannski blómaskreytari?

Beiðni Þóru hafnað

Úkraína fallbyssufóður Nató

Stríðið í Úkraínu þjónar þeim tilgangi að veikja rússneska herinn, segir Lloyd Austin, varnarmálaráðherra Bandaríkjanna.

Ekki þvælast háleitar hugmyndir um frelsi, mannúð og mildi fyrir þeim bandaríska.

Bandaríkin og Nató vilja að Úkraína fórni lífi þegna sinna og taki á sig eyðileggingu eigna og innviða til að rússneski herinn verði fyrir skaða. Hvað ætli Selenskí forseti og bakhjarlar hans fái í staðinn?

Sumir á vesturlöndum taka annan pól í hæðina. Þýskir menntamenn, listamenn og álitsgjafar skrifuðu kanslara landsins Olaf Scholz opið bréf. Þar er Scholz hvattur til að senda ekki hergögn til Úkraínu. Hergögn valda dauða og tortímingu.

Þýsk mennska. Um bandarísku afstöðuna er best að hafa sem fæst orð. 

Vill sjá rússneska herinn veikjast verulega

Frjálslyndir nýfasistar, les Morgan Brynjar?

Menningarstríðið veldur raunverulegu tjóni. Hávær minnihlutahópur, vel skipulagður og mjög ágengur, kennir sig við frjálslyndi, en hefur ekki snefil af frjálslyndi. Ég hef kallað hópinn nýfasista.

Með öfga-næmni og slaufun reynir þessi hópur að stjórna hvernig við hin högum lífi okkar. Hópurinn birtist sem múgur, venjulega á netinu, og kúgar stjórnir fyrirtækja, háskóla og fjölmiðla. Það er brjálæði að við höfum látið minnihlutahópinn ráða ferðinni.

Ofanritað er úr viðtali Telegraph við sjónvarpsmanninn Piers Morgan. Brynjar Níelsson sagði sömu hugsun fyrir einu ári.

Texti Telegraph fylgir að neðan. Spurning að Brynjar hnippi í Morgan og minni á að geta heimildar. En kannski er fasíska frjálslyndið orðið alkunn staðreynd.

“This culture war,” he goes on, “is real, and it’s causing real damage. There is a small but well organised, very aggressive group of people who call themselves liberals – they’re not remotely liberal. I’ve argued they’re the new fascists – these ultra-woke, cancel-culture protagonists who really want to dictate how the rest of us lead our lives. 

“They come as a mob, normally online, and directly bully people on the boards of companies, who run universities, the media. It’s nuts that we’ve allowed ourselves to be coerced by this small group of people.”

Skoðanir, sannindi og öfgar

Evrópusambandið segist komið með lög fyrir tæknifyrirtæki að ,,fjarlægja skaðlegt efni á vefsíðum sínum."

Sjálfstæðar tilraunir tæknifyrirtækja til að ritstýra efni, vinsa úr svokallaðar óæskilegar skoðanir, meint ósannindi og meintar öfgar, eru ekki beysnar. Fyrir fjórum árum fann Facebook hatursorðræðu í bandarísku sjálfstæðisyfirlýsingunni frá 1776. Í desember á liðnu ári viðurkenndi Facebook að s.k. ,,staðreyndatékk" miðilsins var í raun byggt á skoðunum en ekki staðreyndum. Af því tilefni var skrifað:

Sumt í heiminum, sem má kalla hráar staðreyndir, er óháð mannlegri vitund. Fjallið Esjan er hvort heldur okkur líkar það betur eða verr, sama gildir um Atlantshafið. Annað í heiminum er aðeins til í vitund mannsins. Verðbólga er ekki hrá staðreynd heldur manngerð, brúðkaup sömuleiðis, vinnutími, sumarfrí og ótal margt annað í mannlífinu. 

Manngerðar staðreyndir eru háðar samkomulagi. Jón og Gunna eru hjón vegna samkomulags um að tiltekin athöfn með áfastri yfirlýsingu geri þau hjón. Verðbólga er rúm 4 prósent á grunni samkomulags um hvernig verðbreytingar skulu mældar.

Það liggur í hlutarins eðli að í nær öllum manngerðum staðreyndum er innbyggður skoðanaþáttur. Manngerðar staðreyndir lýsa sameiginlegum vilja til að hafa þetta eða hitt svona eða hinsegin, hafa eitt fyrir satt en telja annað ósatt.

Forn-Grikkir notuðu orðið doxa um skoðun. Þeir töldu að í almennri umræðu mætti komast að niðurstöðu, endoxa, sem yrði viðtekin skoðun. Lykilatriði er almenn umræða þar sem skoðanir eru ræddar og greindar. Í evrópsku upplýsingunni á 18. öld varð viðurkennt, endoxa, að forsenda skilnings er frjáls skoðanaskipti. Málfrelsi er tryggt í vestrænum stjórnarskrám, einmitt til að leiða sannindi fram - með umræðu.

Evrópusambandið setur lög um skoðanir, sannindi og öfgar. Verstu ismar síðustu aldar, nasismi og kommúnismi, bjuggu til sannindi með valdboði. Útkoman varð Auschwitz og Gúlagið. 

Vilja temja hið „villta vestur“ netheima

Ást og hatur, konur og menn

Setningin ,,ég hata menn" er saklausari en setningin ,,ég hata konur". 

Tvíkynja heimur býr að þeirri staðreynd að karlar eru með meiri líkamsmassa en konur. Þetta er ekki algilt en fer nærri því, tiltölulega fáar konur hafa líkamsstyrk karla.

Setningarnar að ofan eru með innbyggða vísireglu. Gefið er að andstætt kyn staðhæfi hatur á hinu kyninu. Annars væri um sjálfshatur að ræða. Það er önnur umræða.

Kona sem segist hata menn lýsir vanmætti. Karl er staðhæfir það sama um konur ógnar. Það er saklausara að lýsa vanmætti en að ógna.

Nú kynni einhver að grípa til þeirra andmæla að kona í valdastöðu yfir karli, t.d. kvenkyns forstjóri gagnvart karlkyns sendli, gæti valdið miska án líkamlegra yfirburða. Það er rétt svo langt sem það nær. En þess er að geta að yfirlýsingin ,,ég hata karla/konur" er aðeins áhugaverð setningarfræðilega, ekki hvað merkingu varðar. Enginn getur hatað hálft mannkynið.

Hatur er frumhvöt, líkt og ást. Til að hata/elska þarf persónuleg tengsl, samfélag. Enginn er með persónuleg tengsl við hálft mannkyn. Það er óhlutbundin stærð, ekki samfélag.

Sögur af samfélagi varpa ljósi á samspil ástar og haturs. Kappar eins og Gunnar á Hliðarenda urðu deigt járn í höndum kvenna eins Hallgerðar. Þeirra samlíf var girndarráð. Guðrún Þórðardóttir atti ástmönnum sínum saman. Önnur Guðrún í annarri sögu sagði á gamals aldri að hún hefði verið þeim verst er hún unni mest. Þórunn dóttir Jóns biskups Arasonar hefndi föður síns, sendi norðlenska vermenn að drepa danska yfirvaldið fyrir sunnan. Þórunn bjó á Grund, var gift Ísleifi sýslumanni. Fannst henni hann duglaus í hjónasænginni og orti:

Í Eyjafirði upp á Grund
á þeim garði fríða
þar hefir bóndi búið um stund
sem börn kann eigi að smíða.

Engin ofangreindra kvenna hataði karla, bara suma, sem þær höfðu áður elskað. Karlar hata ekki konur, þá myndu þeir hata mæður sínar.

Setningarnar í fyrstu efnisgrein bloggsins koma ekki heim og saman við reynslu nokkurs manns eða konu. Jú, kannski Kobba kviðristu eða álíka fyrirbæra.

Ástæðan fyrir umræðunni í meðfylgjandi frétt er að sumir hafa, viljandi eða óviljandi, gleymt að við búum í tvíkynja heimi þar sem andstyggð og ástúð eru tvær hliðar á sömu myntinni.

Setningin ,,ég hata/elska sjöunda kynið" er marklaus.

Kynjamisrétti á Twitch olli fjaðrafoki

Danir senda ekki hermenn - Úkraína tapar

Danski forsætisráðherrann kom færandi hendi í Kænugarð með loforð um vígtól. En enga hermenn. Vopn án hermanna gera lítið gagn. Í Úkraínu gengur svo hratt á mannskap að framhaldsskólakrakkar eru kvaddir í herinn.

Í þýskum umræðuþætti (11:02) segir talsmaður stjórnarflokksins, SPD, Markus Lanz, að án Nató-hermanna (m.a. danskra) mun Úkraína tapa stríðinu gegn Rússlandi. Lanz fær ráðgjöf herforingja sem þekkja herstyrk stríðsaðilja í raunheimi. 

Átökin í Garðaríki eru háð á tvennum ólíkum vígstöðvum.

Úkraína er löngu búið að sigra samfélags- og fjölmiðlastríðið. Danska Mette Frederiksen vill sína sigursneið, heimsækir Kænugarð og leysir til sín sigurlaunin sem eru alþjóðafrægð í fimmtán mínútur. 

Rússar sigra jafnt og þétt stríðið í raunheimi með soldátum í vélaherdeildum. Stríðssigrar í raunheimi skipta sköpum, breyta landamærum. Félagsmiðlastríðið er frægð í fimmtán mínútur.

Nató-ríkin ætla ekki að úthella blóði hermanna sinna í Úkraínu. Af því leiðir mun Kænugarðsstjórnin tapa. Spurningin er aðeins hve mörgum mannslífum verður fórnað áður en vesturlönd segja Selenskí forseta að semja við Rússa.

Skilaboðin hingað til frá Washington, London og Brussel eru að Úkraína skuli berjast til síðasta herklædda táningsins. Hvorki er það kristileg né kærleiksrík orðsending. Vesturlönd eru eins og danski forsætisráðherrann. Senda vopn í tapað stríð og dygðaflagga í sviðsljósinu sem verður til úr blóði annarra. Göfugt.

 

Forsætisráðherra Danmerkur kominn til Úkraínu

Þóra ekki sallaróleg lengur

Þóra Arnórsdóttir yfirmaður á RÚV berst um hæl og hnakka og vill ekki fyrr en í fulla hnefana mæta í yfirheyrslu lögreglunnar. Þóra er með stöðu sakbornings í rannsókn á byrlun Páls skipstjóra Steingrímssonar og stuldi á síma hans.

Í frétt DV segir að Þóra telji lögregluna vanhæfa til að rannsaka málið og vill dómsúrskurð um að svo sé.

Í sama fréttamiðli sagði Þóra 16. febrúar: ,,Svo mæti ég bara sallaróleg í þessa skýrslutöku."

Hvað skyldi raska ró Þóru?

Líklega að það hefur runnið upp fyrir henni, og lögfræðilegum ráðgjöfum RÚV, að lögreglan er með skotheldar sannanir fyrir aðkomu RÚV að byrlun og gagnastuldi.

Eins og áður hefur komið fram birti RÚV enga frétt upp úr síma Páls skipstjóra. Það gerðu aftur Stundin og Kjarninn. Miðstöðin var á Glæpaleiti; þar var verknaðurinn skipulagður, síminn afritaður og þýfinu deilt á Stundina og Kjarnann til birtingar.

Þjóðarfjölmiðillinn er miðstöðin í glæpsamlegu samsæri er fól í sér tilræði að heilsu Páls skipstjóra og árás á einkalíf hans. Engin furða þótt sumir séu ekki rórri.

Samfélagsmiðlar gera okkur heimsk

Liðinn áratugur er afbrigðilega hagfelldur heimskum á samfélagsmiðlum, skrifar bandaríski félagsfræðingurinn Jonathan Haith í tímaritið Atlantic. Haidt var kallaður í viðtal til að útskýra staðhæfinguna. 

Samfélagsmiðlar gera börn og unglinga vansæl, segir félagsfræðingurinn, og vísar í tvöföldun á þunglyndi, sjálfsskaða og sjálfsmorðum.

Í heimi fullorðinna birtist innreið virkra á samfélagsmiðlum sem niðurbrot samfélagslegra gilda í nafni ,,fjölbreytileika" en það er annað orð yfir skoðanakúgun. Þeir sem hugsa út fyrir vébönd rétttrúnaðarins, segir Haidt, eru úthrópaðir og útilokaðir. Afleiðingin er lítilmótleg hjarðhugsun sem þolir ekki önnur sjónarmið.

Haidt nefnir ekki dæmið um framhaldsskólakennara sem stofnuðu leshring að stúdera blogg samkennara um pólitík og samfélagsmál. Leshringurinn gengur undir nafninu ,,Má bjóða þér að brjálast." Þegar fundinn var texti er braut í bága við rétttrúnaðinn efndi leshringurinn óðara til vanlíðunar og undirskriftarsöfnunar.  Kennarinn var fordæmdur fyrir ósamþykktar skoðanir. Markmiðið var að svipta einfarann æru og atvinnu. Fjölbreytileiki í framkvæmd.

Á áratug heimskunnar er samkeppnin hörð um gullverðlaunin.

Biden óttast tap í Úkraínu

Biden forseti vill ekki að Úkraína verði Bandaríkjunum annað Afganistan. Hann hafnar ítrekuðu heimboði Selenskí Úkraínuforseta. Ef Úkraínuher tapar á vígvellinum í Donbass er Kænugarður kominn í stöðu Kabúl. Stjórn Biden þolir ekki aðra niðurlægingu og heldur sig fjarri vettvangi en sendir vígtól sem sárabætur.

Með heimsókn Biden til Úkraínu færðust Bandaríkin nær beinni aðild að stríðinu. Þá væru tvö kjarnorkuveldi komin í slagsmál. Úkraína er ekki spurning um líf og dauða fyrir þjóðaröryggi Bandaríkjanna, en er það fyrir Rússa.

Ef Úkraínumenn væru um það bil að sigra Rússa, eins og sumir vilja vera láta, myndi Biden óðara heimsækja Selenskí og taka þátt í sigurhátíðinni. En Úkraínumenn eru að tapa. Þeim er haldið gangandi með hergögnum frá Nató en það gengur á mannskapinn. Aðeins bandarískir hermenn geta fyllt í skörðin. Þeir eru ekki á leiðinni.

Úkraína er ekki þjóðríki í neinum venjulegum skilningi, sagði bandaríski Princetonsagnfræðingurinn Stephen Cohen í fyrirlestri 2015. Á 25 mín. útskýrir hann hvers vegna Úkraínustríðið átti aldrei að verða.

Stríðið í Úkraínu er borgarastríð, segir Cohen, og vísar til átakanna fyrir sjö árum. Seinni hálfleikur hófst 24. febrúar 2022. Í löngu leikhléi, sjö ár, mistókst að semja um að Úkraína yrði hlutlaust sambandsríki utan hernaðarbandalaga. 

Vesturlandavæðing Austur-Evrópu, sem hófst með falli Sovétríkjanna fyrir 30 árum, stöðvast í Úkraínu. Í sjö ár stóð samningaleiðin andstæðum fylkingum opin. Vígaferli taka við þegar menn nenna ekki málamiðlun. 

Biden ekki á leið til Kænugarðs á næstunni

Ritstjóri Kjarnans líti sér nær

Þórður Snær Júlíusson ritstjóri Kjarnans er ekki par ánægður með viðbrögð lesenda við tiltekinni frétt miðilsins. Þórður Snær ásakar lesendur sína um ,,hatursorðræðu" og tekur fréttina niður. Málið dautt?

Ekki alveg. Virkir í athugasemdum læra það sem fyrir þeim er haft. Fjölmiðlar, Kjarninn þar á meðal, freista þess reglulega að skapa reiðiöldu í samfélaginu sem beinlínis hefur það markmið að kalla fram fordæmingu. Nýjasta dæmið er hlutabréfaútboð Íslandsbanka. Þar gekk Kjarninn fram með villandi fréttaflutningi ef ekki beinlínis röngum.

Kjarninn er uppvís að samræmdum aðgerðum með Stundinni og RÚV þar sem tilgangurinn var að sverta Samherja og láta reiðiöldu rísa með tilheyrandi hávaða og fordæmingum virkra í athugasemdum. Til að ná í hráefnið var byrlað og stolið og er Þórður Snær með stöðu sakbornings í lögreglurannsókn.

Ef fjölmiðlar væru hófstilltari og málefnalegri og létu sér nægja að segja fréttir en ælu ekki á andstyggð í samfélaginu fækkaði röddum brigsla og gífuryrða. Lesendur sækja fyrirmyndina til fjölmiðla sem þeir lesa.  

Vandlæting þrífst á hálfsannleik og gróusögum. Fjölmiðlar eins og Kjarninn bera sinn hluta ábyrgðarinnar á umræðumenningu sem kennd er við hatur.

Tóku út frétt vegna hatursorðræðu