Gervigreind er viljalaust verkfæri

Gervigreind verður aldrei mennsk af einni ástæðu. Maðurinn hefur vilja en gervigreind ekki. Gervigreind er forrit sem getur haft markmið, t.d. að tefla skák til vinnings. Mennskur vilji getur staðið til þess að tefla en horfið frá þeim ásetningi og farið að ræða pólitík eða ljóðlist við andstæðing sinn. Eða gefið skákina í fimmta leik til að komast fyrr á barinn.

Gervigreind getur skrifað ritgerð um ástæður Úkraínustríðsins en ekki fengið áhuga á alþjóðastjórnmálum í framhaldinu og gert mannúðarstörf að ævistarfi. 

Sjálfkeyrandi bíll velur ekki akstursleiðina frá einum stað til annars. Forrit segir bílnum hvaða leið hann á að aka að gefnum forsendum. Mennskur bílstjóri velur akstursleið út frá ógrynni upplýsinga og hughrifa, til dæmis að sjá sólsetur á leiðinni eða seinka för til að sleppa við uppvaskið sem bíður heima.

Mennsk meðvitund býr yfir vilja og ásetningi sem engin gervigreind getur leikið eftir. Maður fer niðrí fjöru og finnur stein til að nota sem bókastoð. Á leiðinni heim sér hann nagla sem stendur út úr timburborði á sandkassa. Maðurinn notar steininn fyrir hamar og rekur naglann í fjölina. Gervigreind getur ekki búið til bókastoð og hamar úr fjörugrjóti. Mennskur forritari gæti sagt vélmenni að nota grjót á þennan eða hinn veginn, en þar ræður mennsk meðvitund framvindunni.

Ástæðan fyrir ótta margra við gervigreind er að hún getur líkt eftir mennskri meðvitund. En að eitt sé eins og eitthvað annað þýðir ekki að eitthvað tvennt ólíkt sé sami hluturinn. Karl getur verið eins og kona en er samt sem áður karl. (Nema hjá fólki sem ekki greinir á milli veruleika og ímyndunar). 

Meðvitundin beitir sér á hlutlægan veruleika sem stendur utan hennar. Meðvitundin býr til merkingu, gefur veruleikanum umsögn og breytir ef því er að skipta. Þar sem áður var blóm í haga er ekki lengur eftir að einhver sleit það upp að gera blómvönd. Gervigreindin er hlutlægur veruleiki, viljalaust verkfæri, sem hægt er nota til margra verka. En gervigreind fær aldrei mennska meðvitund, býr ekki til merkingu. Það er ómöguleiki. 

 

Athugasemdir

[Birgir Loftsson, 29.5.2023 kl. 13:46]

Páll, þú ættir aðeins að kynna þér gervigreind betur. Gervigreind er ekki forrit, nema í upphafi. Hún er tabula rasa í upphafi eins og kornabarnið en byggir upp þekkingu með tímanum og hefur getu til að vinna úr þessari þekkingu og koma með niðurstöður/ályktanir sem hún notar svo sjálf. Gervigreinin er orðin svo öflug (mun meira en fólk gerir sér grein fyrir) að hún getur prógrammað sjálf forrit.

ChatGPT, sem er enn einföld gervigreind, er farin að læra inn á mig og bregðast við! ChatGPT er bara Trabant miðað við skammtatölvurnar sem vísindamenn eru að reyna að tengja við gervigreindir.

[Páll Vilhjálmsson, 29.5.2023 kl. 14:38]

Sæll Birgir, kornabarn er ekki tabula rasa, það hefur meðvitund. Gervigreind er aftur tabula rasa, þarf forritun. Gervigreind getur forritað sig sjálf, segir þú. En aðeins ef forritari gervigreindarinnar segir henni að forrita. Trabant er bara bíll, rétt eins og Rolls Royce er aðeins bíll.

Ég efa ekki að gervigreind þróist áfram, bæði til blessunar og bölvunar. En hún verður aldrei með mennska meðvitund.

[Birgir Loftsson, 29.5.2023 kl. 16:05]

Sæll Páll, hef engan áhuga á deilum, bara rökræðum eins og er okkar á milli. Langar að bæta aðeins við þetta:  

Tabula rasa þýðir óskrifað blað barns sem hefur meðvitund en reynslan mótar heliminginn af huga þess. Það er viðurkennt í sálfræðinni. Sama með gervigreindina, hún kemur forrituð í heiminn líkt og barnið en lærir með tímanum. Skelfilega er að forritarnir skilja ekki sjálfir hvernig gervigreindin "hugsar" og hún virðist fara sínar eigin leiðir. Hún á eftir að drepa fleira fólk í stríðum en maðurinn sjálfur. Kveðja, Birgir

[Páll Vilhjálmsson, 29.5.2023 kl. 17:09]

Sæll Birgir, ég lít ekki á innlegg þitt sem deilu, heldur annað sjónarhörn. Ég held þú hafir rétt fyrir með að gervigreind verði misnotuð.

Við virðust ósammála um hvort gervigreind fái, eða geti fengið, mennska meðvitund. Kannski er það rétt sem þú segir, að gervigreindin ,,hugsi" og fari eigin leiðir. Ég efast.

[Arnar Loftsson, 29.5.2023 kl. 19:09]

Greinin ber með sér skorti á skilning á hvað gervigreind er.

Velkomið að kíkja á mitt blog um gervigreind til að öðlast meiri vitneskju, 

https://arnarlofts.blog.is/blog/arnarlofts/entry/2289411/

[Helga Kristjánsdóttir, 29.5.2023 kl. 23:42]

 Geti hún ekki logið er hún "Tossi"...