Vítahringur ranghugmynda

Ranghugmynd er samkvæmt orðsins hljóðan röng hugmynd um veruleikann. Þegar alvarleg ranghugmynd festir rætur í meðvitundinni fjölgar hún sér líkt og krabbamein og verður að fleirtölu.

Meðvitundin er tvíþætt. Hún er bæði efni og efnislaus. Heilinn er efnið og það efnislausa er kallað hugur, sál fyrr á tíð. Enginn getur gert að efnaferlum í heilanum. Þó með þeim fyrirvara að víma, áfengi og fíkniefni, breytir heilastarfseminni - vanalega ekki til hins betra.

Aftur getur fólk gert sitthvað með huglægan þátt meðvitundarinnar. Forn-Grikkir vissu þetta og lögðu áherslu á uppeldi einstaklings til að úr yrði heilbrigð sál í hraustum líkama. Í uppeldinu lærast bæði siðir og ósiðir, réttar hugmyndir og rangar.

,,Góðmenni breytir á einn veg en níðingur á marga," er forn-grísk orðskviða sem Aristóteles færði í letur. Ranghugmyndir eru uppspretta níðingsverka, stórra og smárra.

Ef níðingurinn er verðlaunaður færist hann allur í aukana og telur sér trú um að ranghugmyndirnar njóti lýðhylli og séu réttar.

En innst inni veit níðingurinn að hann er haldinn ranghugmyndum. Hann reynir í senn að leita sér hjálpar og kenna öðrum um. Til vara segir hann sig ósjálfráðan, veikan. Sjálfsskaði er afleiðing af veruleikafirringu. Það liggur í hlutarins eðli.

Sumir hafa samúð með einstaklingi sem þannig er á vegi staddur. Níðingurinn nýtir samúðina til að fá meðvirkni með ranghugmyndum sínum um sjálfan sig og umheiminn.

Til að brjótast úr vítahring ranghugmynda þarf að viðurkenna að maður sé haldinn þeim. Játning er forsenda betrunar. Hún er gerð í einrúmi eða við skriftastól. Falskar játningar eru aftur gerðar frammi fyrir alþjóð. Til að vekja samúð með ranghugmyndum.

Athugasemdir

[Ingólfur Sigurðsson, 23.10.2021 kl. 15:03]

Mér finnst á þessari grein að þú hafir kannski ranglega verið sakaður um geðsjúkdómafordóma. Menningin sem slík getur verið haldin ranghugmyndum, sem og einstaklingarnir sem eru greindir geðveikir og líka þeir sem taldir eru heilbrigðir. Óttar Guðmundsson hefur tjáð sig um það að allir séu geðveikir á einhvern hátt, að hægt sé að finna skilgreiningu á alla, en það hái bara þeim sem hafa opinbera skilgreiningu á geðveiki og geta ekki unnið launaða vinnu af þeim sökum. 

 

Mikilmenni sem notuðu geðveikina til að bústa sig voru með pólitíkina í liði með sér. Vandi okkar menningar er að hún dregur alla niður á meðalmennskustigið. 

 

Það má lesa útúr þessum pistli þínum að samfélagið er ekki heiðarlegt við sig sjálft, eða einstaklingarnir sem stjórna menningunni og öðrum þáttum. Hræsni er allsráðandi.

 

Umræðan um fordóma er líka svona. Sumir fordómar geta verið þekking, byggðir á gömlum fróðleik, kerlingabókum eins og sagt er. Heimurinn er ekki svarthvítur heldur marglitur.

[Hörður Þormar, 23.10.2021 kl. 22:21]

"Þekktu sjálfan þig". Það skaðar engan.

[Kristinn Sigurjónsson, 25.10.2021 kl. 07:13]

Þetta er hverju orði sannara.  Undanfarið tel ég vítahring sjálfblekkingar hafa riðið í gegnum samfélagið á 4 fyrirbærum.  Einkenni þessarar sjálfblekkingar er að henni er ekki mætt með rökum heldur með þögn.

• Að hlýnun jarðar sé vegna kolsýru CO₂

• Að Orkupakki 3 og svo sæstrengur mundi bæta kjör íslensks almennings

• Þegar ráðist er á ákveðið sjávarútvegsfyrirtæki en ekki á fiskveiðikerfið i heild sinni.

• Því er algjörlega hafnað að heimilisofbeldi sé ekki kynbundið, heldur samfélagsvandi sem snertir bæði kynin