Tilfallandi athugasemdir

Þriðjudagur, 28. febrúar 2012

Brussel hirðir leifar fullveldis ESB-þjóða

Stóru ríkin í Evrópusambandinu, Þýskaland og Frakkland, krefjast meiri miðstýringar á efnahagskerfum aðildarríkja, einkum þeirra 17 ríkja sem eru með evru sem lögeyri. Embættismenn í Brussel kætast og eru meira en tilbúnir að taka að sér að stýra fjárlögum aðildarríkjanna.

Blikur eru þó á lofti. Írar ætla að setja í þjóðaratkvæði ríkisfjármálasamninginn sem Evrópusambandið krefst að aðildarríkin samþykki. Þýski stjórnlagadómstóllinn lagði sömuleiðis stein í götu þeirra sem vilja framselja þýskt fullveldi til Brussel.

Ómögulegt er að segja til um hver samrunaþróun Evrópusambandsins verður næstu misserin og árin. Fjármálamarkaðir gera atlögu að skuldastöðu jaðarríkja sem leita skjóls hjá Þýskalandi. Óhugsandi er að Þjóðverjar axli stöðugt auknar byrðar evruríkjanna án þess að stórfelldar breytingar verði á hagstjórn þeirra 17 ríkja sem mynda evruland.