Fast gengi en hagkerfið rússíbani

Hér er hagkerfi sem evruaðdáendur á Íslandi hljóta að vegsama. Gengið er fast en allt annað í hagkerfinu tekur dýfu; íbúðaverð fellur um rúm 50 prósent á einu ári; atvinnuleysi fer úr fimm prósentum árið 2007 í 20 prósent í ár; verðbólga var 18 prósent fyrir tveim árum en nú er verðhjöðnun upp á fjögur prósent; hagvöxtur mældist 12 prósent á þriðja ársfjórðungi 2006 en hagkerfið dróst saman um 19 prósent á sama ársfjórðungi í fyrra.

Gengið er sem sagt fastbundið evru með þröngum vikmörkum upp eitt prósent. Morten Hansen tekur þessar tölur saman um hagkerfi Lettlands og veltir fyrir sér kostum fastgengis í samhengi við sveigjanleika.

Íslensku evruaðdáendurnir ættu kannski að reyna að útskýra nánar kosti þessi að festa sig í veruleika fastgengis evrunnar.

Ráðuneyti í þágu þjóðar en ekki auðmanna

Auðræði útrásarinnar smitaðist í króka og kima stjórnsýslunnar. Stjórnmálamenn beygðu sig og bugtuðu fyrir auðmönnum og embættismenn dignuðu í hnjám.  Auðmennirnir gengu á lagið og sóttu þjónustu til stjórnsýslunnar sem ekki á að veita. Það heitir þjófnaður þegar embættismenn leiðbeina auðmönnum framhjá lögum og reglum til að auðvelda einkavæðingu orkuauðlindanna.

Magma-málið er prófsteinn. Ef auðræðið blífur á kostnað þjóðarhagsmuna er endurreisnin fortöpuð.

Vilja upplýsingar um samskipti ráðuneyta við Magma

Sagan um dómarann sem þáði mútur

Á milli manna gengur saga um héraðsdómara sem tíðum hefur spaugsyrði á vörum að hann hafi þegið mútur, 10 milljónir króna, frá auðmanni sem átti framtíð sína undir úrskurði dómarans. Greiðslan, sem auðvitað átti að vera sporlaus, hafi fundist þegar fjármálatilfærslur voru fínkembdar í leit að óeðlilegum hreyfingum.

Sagan er botnuð með því að þau sé nokkur málin sem verða endurupptekin þegar dómarinn kemst undir manna hendur.

Kreppan og kjarni ESB-samrunans

Kreppan mun breyta Evrópusambandinu, spurningin er hvernig. Ýmsar tilgátur eru uppi; aukinn samruni m.a. með miðstýrðari efnahagspólitík; skiptingu ESB í kjarnasvæði í kringum evruna annars vegar og hins vegar jaðarsvæði; endalok evrunnar; aukið þýskt forræði í gegnum leiðtogaráðið og svo framvegis.

 Í greiningu á vandanum segir tímaritið Economist

Politically, everyone has a stake in the fate of Europe’s Big Idea, that rival nation states can do better by pooling some sovereignty instead of going to war.

Hér er kjarnaástæðu fyrir tilvist Evrópusambandsins. Andstæðir hagsmunir ríkja leiddu fyrrum til styrjalda en með fullveldisframsali til sameiginlegrar stofnunar eins og ESB væri hægt að koma í veg fyrir nakið ofbeldi. Ísland á ekki hlut í þessari sögu og enga keppinauta um völd og áhrif. Aðild að Evrópusambandinu til að tryggja hagsmuni okkar er framandi hugsun enda án skírskotunar í sögu og menningu þjóðarinnar. 

Economist gerir sér far um að búa til lausnir á vandamálum og leggur til endurnýjað bandalag frjálshyggjumanna sem vilja markaðslausnir og samrunasinna er æskja aukinnar miðstýringar. Það bandalag gerði gagn fyrir þrjátíu árum þegar innri markaðurinn var búinn til í Brussel.

Sagan geymir fá dæmi um endurnýtingu lausna á flóknum pólitískum og efnahagslegum aðstæðum. En einu sinni er allt fyrst.

Ætlar Bjöggi að borga Icesave?

Björgólfur Thor ber ásamt föður sínum ábyrgð á Icesave-skuldunum sem liggja á bilinu 400 til 800 milljarðar króna. Þegar Björgólfur Thor sendir frá sér fréttatilkynningu um að hann hafi næstum orðið persónulega gjaldþrota og ætli af því tilefni að gera upp skuldir sinar vaknar spurningin hvort hann eigi við þær skuldir sem hann er í persónulegri ábyrgð fyrir eða heildarskuldir sem hann hefur stofnað til á óteljandi kennitölum?

Fréttatilkynningin ber þess merki að Björgólfur Thor þurfi að koma sér í mjúkinn hjá einhverjum. 

Allur arður Björgólfs til kröfuhafa