Ríkisstjórnin leitar að hækju

Taugastríð samfylkingarþingmanna gegn sjálfstætt þenkjandi þingmönnum Vinstri grænna birtist í kvöld hótun  Oddnýjar G. Harðardóttur, formanns fjárlaganefndar, að starfa ekki með Ásmundi Einari Daðasyni. Í dag voru fréttir um aðfinnslur Ólínu Þorvarðardóttur samfylkingarþingmanns við Lilju Mósesdóttur um að hún væri ekki ,,góður liðsmaður."

Brandarinn í kvöldfréttum RÚV var sá að samfylkingarþingmenn hóta að leita til annarra stjórnmálaafla til að styrkja ríkisstjórnina. Samfylkingin virðist líta á sig sem handhafa ríkisvaldsins og geti á eigin forsendum samið við aðra stjórnmálaflokka um hlutdeild.

Í reynd er ríkisstjórnin að leita sér að hækju vegna þess að hún er búin að missa meirihlutann á alþingi.

Hissa á ummælunum

Löndunarbann í boði Samfylkingar

Samfylkingin er mesti óþurftarflokkur Íslandssögunnar. Á heimavelli styður flokkurinn útrásarglæpamenn og í útlöndum leggst flokkurinn á sveif með yfirgangsseggjum sem finnst allt í lagi að setja milljón tonn af makríl á beit á Íslandsmiðum en krefjast þess að við veiðum ekki sporð af stofninum.

Evrópusambandið telur sig geta ráðskast með Íslendinga þar sem ríkisstjórnin er á hnjánum í Brussel og biðst inngöngu í félagsskapinn.

Ef einhver döngun væri í Samfylkingunni myndi flokkurinn tafarlaust álykta að draga eigi tilbaka umsókn Íslands um aðild að Evrópusambandinu.

Skipum verði bannað að landa

Evrópa snýst gegn sjálfri sér

Evran er vondur prófsteinn á evrópska samstöðu þar sem hún er jú bara mynt en ekki stríðsástand, hryðjuverk eða bylting. Evrópusambandið gæti alveg þegið betra vopn en evru í baráttunni við að halda hópnum saman. Aðeins 16 ríki af 27 eru með evru en þau munu ákveða framtíð samstarfsins sem hófst eftir seinni heimsstyrjöld.

Herskár tónn gagnvart Þjóðverjum hljómar víða. Þjóðverjum er sagt að annað tveggja skuli þeir axla skuldir jaðarríkja evrunnar; Grikklands, Írlands, Spánar og Portúgal eða hypja sig úr myntsamstarfinu. Helsta fréttatímarit Þjóðverja, Der Spiegel, segir berum orðum að Evrópa snúist gegn Þýskalandi. 

Hvernig sem allt veltur fer illa fyrir ESB-verkefninu.

Svik við kjósendur veit ekki á góða liðsheild

Þingmaður Samfylkingarinnar, Ólína Þorvarðardóttir, segir Lilju Mósesdóttur þingmann Vinstri grænna verða að gera upp við hvort hún ætli að vera í stjórnarliðinu. Ólína segir að með því að fylgja stjórnarstefnunni verði til ,,góðir liðsmenn, og þannig verða liðsheildir til."

Skrif Ólínu staðfesta tvennt. Í fyrsta lagi ,,bunker-mentalítetið" í stjórnarliðinu og í öðru lagi hrapalegan pólitískan mislestur.

Byggingarefni liðsheildar verða ekki sótt í svik við kjósendur.

 

Ögmundur gagnrýnir bréf þingmanns

Vinstri grænir klofna, sprengja eða engjast

Vinstrihreyfingin grænt framboð stendur frammi fyrir þrem kostum á útmánuðum. Í fyrsta lagi að flokkurinn klofni formlega og í öðru lagi að sprengja ríkisstjórnina og freista þess að halda flokknum saman með nýju verkefni sem væri kosningabarátta. Klofningur myndi hvort eð er fella ríkisstjórnina og því er seinni kosturinn freisting fyrir forystuna ef hún vill hafa ráðin í hendi sér.

Þriðji kosturinn er að engjast áfram í ríkisstjórn og láta eins og ekkert sé á meðan flokkseldar brenna.

Líklegast verður þriðji kosturinn fyrir valinu þar sem hann er útgjaldaminnstur til skamms tíma. Á hinn bóginn er ósennilegt að Össur Skarphéðinsson sitji á strák sínum og bíði rólegur þess sem verða vill hjá Vg. 

Pólitíkin verður venju fremur fjörug eftir áramót.

Stjórnlagaþingið er spunaverk Samfylkingar

Samfylkingin varð að draga athyglinni frá ábyrgð flokksins á hruninu og stjórnlagaþing var liður í þeim spuna. Með því að efna til stjórnlagaþings þráðbeint eftir hrun var gefið til kynna að misbrestir í stjórnarskrá væru orsakaþáttur. Svo var vitanlega ekki.

Samfylkingin var stjórnmálaarmur Baugs frá Borgarnesræðu Ingibjargar Sólrúnar Gísladóttur veturinn 2003 og fram yfir hrun. Samfylkingin kom í veg fyrir samþykkt fjölmiðlafrumvarps sem takmarkaði dagskrárvald baugsveldisins.

Það þjónar hagsmunum Samfylkingar að afvegaleiða umræðuna um ástæður hrunsins. Stjórnlagaþingið er líður í spunaverkinu. Stjórnarskrá lýðveldisins er ekki í hávegum hjá Samfylkingunni, háborg tækifærissinna í íslenskum stjórnmálum.

 

60% telja fjármunum í stjórnlagaþingið illa varið