Skýringin á sigri Þjóðverja

Þjóðverjum finnst ekkert óeðlilegt að tapa í fótbolta fyrir Brasilíu. Þegar Þjóðverjar töpuðu 0 - 2 fyrir Brasilíu í úrslium HM í Japan 2002 var þýska pressan ánægð með silfrið. Brasilía er einfaldlega land fótboltans og nánast heiður að spila stóra leiki gegn landsliði þeirra.

Þýska landsliðið, sem núna spilar í Brasilíu, var ekki hátt skrifað í Þýskalandi eftir riðlakeppnina og heldur ekki eftir að útsláttarkeppnin hófst. Liðið er án stórstjörnu (enginn Messi, ekki Neymar og varla nokkur Robben). Helsti markaskorarinn er slánalegur miðjukantmaður með litla boltafærni en næmni fyrir staðsetningu. Starf Löw landsliðsþjálfara var í hættu fyrir leikinn við Frakka, sem vannst eitt núll með seiglu og staðfestu en ekki glimrandi spili.

Þýskaland átti sem sagt að tapa í gær, samkvæmt uppskriftinni; ekkert sérstakt þýskt landslið á móti Brössum á heimavelli.

Þýsku landsliðsmennirnir urðu að útskýra fyrir þýsku pressunni og samlöndum sínum að þeir væru ekki búnir að tapa leiknum fyrirfram. Wir wollen den Titel! Mit aller Macht (við viljum titilinn, og gerum allt til þess) var yfirskriftin á viðtali við Sami Khedira daginn fyrir leikinn. Hann á ekki á fast sæti í Real Madrid en er gjaldgengur í þýska landsliðið jafnvel þótt hann slíti með meiðsli.

Yfirlýsing um sigurlöngun gagnvart Brasilíu var þáttur í þeim sálfræðiundirbúningi þýska landsliðsins að þeir ætluðu að gefa sig í leikinn þótt sigur væri fjarlægur möguleiki.

Þjóðverjar kunna að undirbúa sig og mættu með stæltan huga í leikinn. Þegar þeir skynjuðu brotalamir í vörn Brasilíu gengu þeir á lagið með hugarfari manna sem mættir voru í leikinn til að verða ekki niðurlægðir. Ótti Þjóðverjanna við tap var virkjað til að sigrast á langstæðri vanmetakennd gagnvart Brasilíu. 

Í leiknum á móti Frökkum dugði Þjóðverjum eitt núll enda finnst Þjóðverjum eðlilegt að vinna granna sína í vestri og hafa ekki þörf til stúta þeim. Leikurinn á móti Brasilíu snerist á hinn bóginn um það að yfirvinna þýska vantrú á þýskum fótbolta andspænis þeim brasilíska.

Þýsku landsliðsmennirnir áttuðu sig á sögulegu tækifæri og létu það ekki úr greipum sér ganga. Með 7 - 1 sigri er brassagrýlan kveðin í kútinn í eitt skipti fyrir öll. Sigur Þýskalands er tragedía Brasilíu, segir Welt og hittir naglann á höfuðið.

 

Sorg í hjarta Brasilíumanna

Stríð og lygi haldast í hendur

Fyrsta fórnarlamb stríðs er sannleikurinn, segir enskt-amerískt orðtak. Hjaðningavíg gyðinga og araba fyrir botni Miðjarðarhafs eru einatt hulin lygaþoku.

BBC, sem oft er talin höll undir málstað araba, varar við fölsuðu myndefni sem arabar nota til að ýkja árásir ísraelskra vígvéla á Gaza.

 

Ekki jafn eldfimt í tæp 2 ár

Samfylkingin var pólitískur armur útrásar

Vörn Björgvins G. Sigurðssonar viðskiptaráðherra Samfylkingar fyrir útrásinni fimmtán sekúndum fyrir hrun er rifjuð upp á feisbúkk með vísun í blogg Egils Helgasonar. Samfylkingin var pólitískur armur útrásarinnar.

Markmið forystu Samfylkingarinnar var bandalag við útrásarsauðmenn enda þótti Sjálfstæðisflokkur Davíðs Oddssonar orðinn andsnúinn útrásinni og ótæpilegri auðsöfnun með tilheyrandi valdasamþjöppun.

Samfylkingin bauð Björgólfi Guðmundssyni formanni bankaráðs Landsbankans á landsfund haustið 2003. Í Borgarnesræðu sama ár gerði Ingibjörg Sólrún Gísladóttir forsætisráðherraefni flokksins sér far um að bera blak af þrem aðilum sem á þeim tíma sátu undir gagnrýni forsætisráðherra, Davíðs Oddssonar. ,,Finnst [fólki] nóg komið af afskiptum stjórnarráðsins af fyrirtækjum og fjármálastofnunum landsmanna?“ spurði oddviti breiðfylkingar vinstrimanna og mærði Kaupþing, Norðurljós (Stöð 2), sem þá var í eigu Jóns Ólafssonar, og Baug.

Baugur var á þessum tíma til rannsóknar hjá skattayfirvöldum. Innvígður samfylkingarmaður, Hallgrímur Helgason, skrifaði alræmda grein til varnar Baugi og Jóni Ásgeiri undir fyrirsögninni Baugur og bláa höndin. Þar segir m.a.

Hinn eitt sinn frelsisboðandi forsætisráðherra hefur ítrekað veist að spútnik-fyrirtækinu Baugi: Hótað að brjóta það upp sem og brjálast yfir kaupum þess á hlut í FBA. Við sem heima sitjum skiljum ekki hvers vegna guðfaðir nýja hagkerfisins snýst gegn bestu börnum þess. Við skiljum ekki hvers vegna sjálfstæðismenn beita öllu sínu gegn sjálfstæðustu mönnum landsins.

Málflutningur Hallgríms féll eins og flís við rass Samfylkingar sem stefndi að því að verða stjórnmálaflokkur útrásaraflanna. Sjálfstæðisflokkurinn undir forsæti Davíðs var gerður tortryggilegur á alla vegu og kanta, samtímis sem dregin var upp sú mynd af útrásarauðmönnum að þeir væru óskeikulir og gætu ekki gert neitt rangt. 

Samfylkingin var tilbúinn að ganga býsna langt til að útrásarvæða Ísland. Varaformaður flokksins, Ágúst Ólafur Ágústsson, lagði það til að stjórnsýslan yrði gerð tvítyngd, mælti jafnt á íslensku og ensku, til að bæta ,,ímyndarvanda" útrásarinnar, eins og það hét fimmtán sekúndum fyrir hrun.

 

 

Eftirhrunið og samkeppni öfganna

Vinstrimenn gera Seðlabanka Íslands undir forystu Davíðs Oddssonar ábyrgan fyrir hruninu. Ekkert er fjarri sanni - Davíð varaði við útþenslu bankakerfisins en reyndi að bjarga því þegar það var komið að fótum fram enda er það hlutverk seðlabanka.

Ríkisstjórn Jóhönnu Sig. lagði sig í líma að festa hrunið á Davíð, m.a. með aðför að seðlabankastjórunum þrem.

Öfgar geta af sér öfgar. Hannes Hólmsteinn Gissurarson talaði í áratugi fyrir þeirri hugmyndafræði sem var forsenda útrásar og þar með hruns -  frjálshyggjunni. Núna stýrir Hannes rannsókn á göllum þeirrar hugmyndafræði sem hann mæri enn. 

Samkeppni öfganna lætur ekki að sér hæða.

 

 

 

 

Hannes metur áhrifaþætti hrunsins

Ísrael upplýsir afbrot, Hamas hylmir yfir

Ísrael upplýsir morð á palestínskum pilti í siðustu viku, rétt eins og lögregluyfirvöldum í lýðræðisríkjum er ætlað. Lögregluyfirvald Palestínumanna á Vesturbakkanum hinn bóginn hylmir yfir morð á þrem ísraelskum ungmennum í síðustu viku.

Þetta er munurinn á Ísrael og Hamas-stýrðum Vesturbakka: Ísrael er um það bil lýðræðisríki en Vesturbakkanum er stjórnað af hryðjuverkamönnum.

Viðurkenna að hafa myrt piltinn

Ísland fjárfestir, ESB ekki

Fjárfestingar á Íslandi aukast. Stórar atvinnugreinar eins og útgerð og byggingariðnaður setja fjármagn í framtíðarvöxt. Í Evrópusambandinu er fjárfesting á hinn bóginn í lágmarki.

Vextir eru í sögulegu lágmarki í ESB og ætti það að vera hvatning til fjárfestinga. Raunar eru lágir vextir orðnir sérstakt vandamál sem gæti leitt til nýrrar fjarmálakreppu, segir BIS, sem nefndur er seðlabanki seðlabankanna.

Fjárfestingar eru til framtíðar. Sannfæring um að fjárfesting skili betri afkomu er mótorinn sem knýr áfram viljann til að fjárfesta. Á Íslandi er sannfæringin fyrir hendi en ekki í Evrópusambandinu.  

Fjárfestingar á evrusvæðinu í lágmarki

Lýðveldishagfræðin og jafnaðarmaður Íslands

Stundum þarf útlendinga til að segja Íslendingum sjálfsagða hluti. Hér á eyjunni er frá stofnun lýðveldis, og raunar nokkru fyrr, rekin lýðveldishagfræði þar sem ríkisvaldið í samvinnu við verkalýðshreyfingu og atvinnurekendur móta móta efnahagsstefnu og launakjör.

Tvö meginmarkmið lýðveldishagfræðinnar eru full atvinna og sæmilegur launajöfnuður. Þjóðarsamstaða var um lýðveldishagfræðina enda forsenda þjóðfélagsfriðar. Í þágu lýðveldishagfræðinnar var öðrum hagstærðum fórnað, eins og gengisstöðugleika. Þegar á bjátar í efnahagsbúskapnum er krónan látin taka höggið, ekki atvinnustigið og launajöfnuðurinn. Krónan er réttnefnd jafnaðarmaður Íslands.

Útrásin yfirskyggði lýðveldishagfræðina um hríð og var um það bil að ganga að öðru meginmarkmiðinu dauðu, þ.e. launajöfnuði, þegar blessað hrunið kom í veg fyrir að öfgarnar skytu rótum.

Í kjölfar hrunins reyndu ýmis öfl í þjóðfélaginu að skipta út lýðveldishagfræðinni fyrir evrópsk sjónarmið um stöðugt gengi og fast tíu prósent atvinnuleysi með möguleika á hækkun. Samfylkingin var aðalheimili þessara sjónarmiða, sem nutu nokkurs stuðnings strax eftir hrun og leiddu til ESB-umsóknar. Þjóðin sagði álit sitt á samfylkingartilrauninni í síðustu þingkosningunum með því að skera fylgi flokksins niður við trog, úr 30 prósentum í 12,9.

Skrifstofuliðið á ASÍ er veikt fyrir evrópupólitíkinni með stöðugu gengi og föstu atvinnuleysi. Ástæðan er sú  að samtökin reyna ítrekað að krefjast hærri launa en samfélagið stendur undir og við það fellur gengið. Árinni kennir illur ræðari en forysta ASÍ lýgur eigin handvömm upp á krónuna. Skrifstofuliðið nýtur ekki stuðnings hins almenna launamanns enda ASÍ aldrei þorað að bera ESB-línuna undir félagsmenn.

Í stað þess að gangast við lýðveldishagfræðinni og hornsteinum hennar stundar ASÍ forystan samfylkingarpólitík sem þjóðin hafnaði með afgerandi hætti í síðustu þingkosningum. 

Lýðveldishagfræðin stendur sterkum fótum. Vegna hennar voru sett lög á flugstéttirnar, sem reyndu í krafti sterkrar stöðu að brjóta upp launajöfnuðinn.

Erlendur prófessor sem segir okkur að velferð þjóðarinnar byggir á nánum tengslum ríkisvalds, launþegasamtaka og atvinnurekenda færir okkur almælt tíðindi - en stundum þarf útlending að til upplýsa sjálfsagða hluti.

 

Bankar geta ekki án ríkisins verið

Trú drepur fólk, núna araba en áður Evrópumenn

Súnnar og sjítar eru tvær megingreinar múslíma, súnnar er 85% en minnihluti sjíta telur 15%. Hernaðarátök í löndum araba þessi misserin eru trúarlega innblásin en snúast um veraldlegt vald og hagsmuni andstæðra þjóðfélagshópa.

Tvö öflugustu ríkin í Miðausturlöndum, Íran, þar sem sjítar fara með völd, og Saudí-Arabía, en þar ráða súnnar, styðja við bakið á trúbræðrum sínum í drepa hvern annan í Sýrlandi, Írak, Barein og víðar. Álengdar standa stórveldin Bandaríkin og Rússland og freista þess að bæta stöðu sína í heimshlutanum.

Ítarlegar fréttaskýringar í New York Times og Econmist gefa ekki tilefni til bjartsýni um að arabaheimurinn nái friði næstu áratugi.

Stríð innblásin trú reynast oft langvinn. Evrópa fór í gegnum tímabil trúarhernaðar frá lokum miðalda þegar mótmælendatrú skoraði kaþólsku á hólm. Hávaðinn af því tímabili entist fram yfir frönsku byltinguna, og sums staðar, t.d. á Írlandi, nærri til loka 20. aldar.

Ásborgarfriðurinn 1555 var tilraun til að sætta trúarhópana en frestaði aðeins vandanum um rúma hálfa öld. Þrjátíu ára stríðið 1618 til 1648, sem einkum var háð á þýska málsvæðinu, skildi eftir sig slóða eyðileggingar og dauða.

Vestfalíufriðurinn batt endi á þrjátíu ára stríðið og var jafnframt hornsteinn þjóðríkjamyndunar í Evrópu. Í þrjátíu ára stríðinu komu einmitt fram ríkisrök, raison d-etat, þar sem ríkishagsmunir eru settir ofar trúmálum.

Franska byltingin 1789 var enn annar áfangi á þeirri vegferð Evrópumanna að aðskilja trú og ríkisvald.

Arabar búa ekki að reynslu Evrópumanna af uppgjöri milli trúarhópa annars vegar og hins vegar aðskilnaðar milli veraldlegs valds og kennivalds trúarinnar. Hugmyndin um aðskilnað stjórnsýslu og trúmála er flestum arabasamfélögum framandi.

Arabar fallast ekki á vestræn mannréttindi heldur styðjast þeir við Kaíró-yfirlýsinguna um múslímsk mannréttindi þar sem kennivald trúarinnar er í hávegum, líkt og í Evrópu á miðöldum.

Reynsla Evrópu er að það tekur nokkur hundruð ár að aftrúvæða samfélög. Arabar verða kannski komin með sín mál í þokkalegt jafnvægi árið 2500 - sirkabát.

 

 

 

 

Hverjum bauð Jón Ásgeir eina milljón?

Jón Ásgeir Jóhannesson, sem átti Baug, og er á bakvið tjöldin í Iceland-versluninni og e.t.v. Krónunni, kærði mann sem áframsendi tölvupóst frá honum. Í umfjöllun DV um málið segir

Maðurinn segir að í tölvupóstinum hafi komið fram að leggja ætti eina milljón króna inn á reikninginn hans og að hann hafi vitanlega áttað sig á því að pósturinn hefði ekki átt að fara á póstfang hans.

Ef ónefndi sakborningurinn átti ekki að fá milljón frá Jóni Ásgeiri, hver þá?

Þensla í vændum, hækka vexti

Hagkerfið er að ofhitna með tilheyrandi vá fyrir þjóðarbúið. Til að slá á þensluna ber að hækka vexti og draga úr framkvæmdum hins opinbera.

Hagvöxtur umfram 2 til 2,5% er óæskilegur og felur í sér margvíslega áhættu fyrir þjóð sem enn er að draga læróma af útrás og hruni.

Seðlabankinn með stuðningi og hvatningu ríkisstjórnarinnar á að hækka vexti og hindra þar með ósjálfbært bóluhagkerfi.

 

Útlit er fyrir skort á vinnuafli á Íslandi