Þensla í vændum, hækka vexti

Hagkerfið er að ofhitna með tilheyrandi vá fyrir þjóðarbúið. Til að slá á þensluna ber að hækka vexti og draga úr framkvæmdum hins opinbera.

Hagvöxtur umfram 2 til 2,5% er óæskilegur og felur í sér margvíslega áhættu fyrir þjóð sem enn er að draga læróma af útrás og hruni.

Seðlabankinn með stuðningi og hvatningu ríkisstjórnarinnar á að hækka vexti og hindra þar með ósjálfbært bóluhagkerfi.

 

Útlit er fyrir skort á vinnuafli á Íslandi

Fullveldi fórnað fyrir öryggi

Sumir Pólverjar vilja fórna efnahagslegu og pólitísku fullveldi, með því að taka upp evru og gangast inn á aukna miðstýrinu frá Brussel, til að bæta öryggishagsmuni sína gagnvart Rússlandi.

Rússar og Þjóðverjar eru fornir fjendur Póllands, skiptu landinu á milli sín síðast í upphafi seinna stríðs. Pólverjar telja huggulegri vist í þýskættuðu ESB en undir hrammi Rússa.

Það á hins vegar eftir að koma á daginn hvort efnahagsleg sjálfsmorðsvél evrunnar bjóði upp á það öryggi sem Pólverjar sækjast eftir. 

Telja öryggi fylgja evrusvæðinu

Sérfræðiveldi kvenna eða gengisfelling háskólanáms

Konur eru í meirihluta sérfræðinga og í meirihluta háskólamenntaðra. Af því leiðir munu konur vera ráðandi í samfélaginu á áþekkan hátt og karlar voru fyrir eitthvað hálfri öld eða svo.

Konur eru upp til hópa skynsemisverur og forræði þeirra í samfélaginu ekkert til að hafa áhyggjur af.

Á hinn bóginn er einnig hætta á að yfirvald kvenna í akademíunni munu gengisfella háskólanám, líkt og kennaranám féll í samfélagslegu verðgildi þegar konur yfirtóku skólana sællar minningar fyrir svona 30 árum.

Við sjáum til.

Konur meirihluti sérfræðinga

Skimun á lífsheimsku

Ástvinamissir, sjúkdómar, erfiðleikar í starfi eða einkalífi eru viðfangsefni sem lífið leggur fólki á herðar. Viðbrögð við slíkum áföllum eru í fæstum tilvikum sjúkleg og krefjast ekki meðferðar heilbrigðisstarfsfólks.

Þeirri ímynd er haldið að okkur að áhyggjulaust líf án nokkurra erfiðleika sé heilbrigt líf. Að sama skapi er það sjúklegt ástand að mæta andbyr og verða fyrir áfalli. Okkur er sagt að við getum ekki staðið ein og unnið úr okkar vanda á eigin forsendum heldur verðum við að fá aðstoð sérfræðinga.

Hér eru fréttir: fæstir fara í gegnum lífið án áfalla. Og allir mæta sínum skapara fyrr heldur en seinna. Nokkur streita fylgir vitneskjunni um að líf tekur enda, bæði eigið líf og ástvina. Þeir sem ekki skilja þessi einföldu sannindi glíma við lífsheimsku.

Skimun á lífsheimsku er of flókið fyrir sérfræðinga. Best fer á því að hver og einn skimi sjálfan sig.

Vill skimun á tilfinningavanda

Ekki áfengi í dagvöruverslunina

Ísland er með skynsama áfengisstefnu með því að bjór, vín og sterkir drykkir eru aðeins seldir í ríkiseinkasölu. Þetta fyrirkomulag virkar, bæði í þéttbýli, þar sem eru sérstakar áfengisverslanir, og í dreifbýli þar sem útsölustaðir eru afmarkaðir í sérvöruverslunum.

Áfengisstefna er fyrst og fremst lýðheilsumál en ekki spurning um verslunarhætti. Algert óráð væri að gera íslensk heilbrigðismál að verslunarvöru gagnvart kaupsýslumönnum, hvort heldur innlendum eða erlendum.

Breytum ekki fyrirkomulagi í lýðheilsu sem reynslan sýnir að virkar.

Tal um undanþágur Costco á villigötum

Grein sem Illugi ætti að lesa

Illugi Gunnarsson menntamálaráðherra fór skakkt af stað með það markmið Samtaka atvinnulífsins, já, rétt, hrunkvöðlanna, um að íslensk ungmenni ættu að ljúka stúdentsprófi árinu fyrr en þau gera núna. Hvítbók ráðherra étur upp grunnhyggið markmið SA án þess að líta þeirra kringumstæðna sem valda því að íslensk ungmenni eru við stúdentsútskrift yfirleitt árinu eldri en jafnaldrar þeirra.

Gestur Guðmundsson skrifar hugvekju um hvítbóka og dregur upp samhengi sem virðist menntamálaráðherra hulið. Lykilefnisgrein

Íslensk ungmenni vinna meira með námi en jafnaldrar í öðrum Evrópulöndum. Um 40% framhaldsskólanema hafa unnið meira en 12 tíma á viku með náminu og margir þeirra dregið talsvert úr námshraða. Þegar íslensk ungmenni verða tvítug hafa þau líklega að meðaltali unnið samanlagt milli eitt og tvö ársverk á almennum vinnumarkaði, og því er það ekki undarlegt að algengasti aldur við lok framhaldsskólaprófs á Íslandi er 20 ár, en almennt 19 ár hjá þjóðum með líkt skólakerfi.

Íslensk ungmenni eru betur stödd en jafnaldrar þeirra í Evrópu. Reynsla af atvinnulífinu á skólaárum er veganesti sem fæstir vilja vera án auk þess sem launavinna eflir fjárhagslegt sjálfstæði ungmenna. 

Að það skuli vera ráðherra Sjálfstæðisflokksins sem leggur til atlögu við launavinnu skólafólks er hálf sorglegt.

Lífeyrissjóðir fyrir og eftir hrun

Lífeyrissjóðir voru leiksoppar auðmanna fyrir hrun. Sjóðirnir töpuðu milljörðum króna í glórulausar fjárfestingar. Framkvæmdastjórar og yfirmenn í sumum lífeyrissjóðum þáðu ýmis fríðindi frá auðmönnum s.s. ferðir á knattspyrnuleiki á Englandi.

Eftir hrun var engin hreinsun í lífeyrissjóðunum, skrifuð var skýrsla og eitthvað föndrað við reglur um að mútur væru ekki við hæfi. Að öðru leyti var haldið áfram eins og ekkert hefði í skorist.

Lífeyrissjóðirnir eru nánast með ótakmarkaða getu til að tapa fé. Innstreymið í sjóðina er gerist sjálfkrafa, launþegar eru skuldbundnir að setja hluta launa sinna í hítina. Sjóðirnir lagfæra bókhaldið sitt með því að lækka réttindi félagsmanna sinna og munu, ef í harðbakkann slær, hækka lífeyristökualdurinn.

Í ljósi reynslunnar af sukksemi lífeyrissjóðanna á tímum útrásar er full ástæða til að efast um skynsemi þess að lífeyrissjóðirnir verði ráðandi á hlutabréfamarkaði.

Fjórir stærstu virkir hluthafar

Netverslun brýtur á bak fákeppni

Megineinkenni íslenskrar verslunar er fákeppnin. Í skjóli hennar er álagning of mikil með tilheyrandi sóun, t.d. í offjárfestingu í verslunarhöllum eins og Smáralind.

Eina raunhæfa lausnin á skaðsemi fákeppninnar er að stórefla verslun á netinu. Stjórnvöld geta aukið aðgengi almennings að netverslun með því að einfalda afgreiðslu á smásendingum frá útlöndum.

Það er beinlínis rangt sem haft er eftir talsmanni verslunarinnar að Kínverjar vilji bara senda frá sér stórar sendingar. Kínverjar senda smápakka fyrir smáupphæðir hvert á land sem er.

Hvað með Aliexpress og Alibaba?

Goðsögnin um dýrt húsnæði kveðin í kútinn

Drjúgt af vælufóðri vinstrimanna er að húsnæðiskostnaður hér á landi sé allt lifandi að drepa, einkum ungt fólk. Vaxtavælið er nátengt goðsögninni um dýrt húsnæði.

Nú liggur það fyrir að húsnæðiskostnaður sem hlutfall af ráðstöfunartekjum er næstlægst hér af landi af Norðurlöndum og nærri evrópsku meðaltali.

Þegar búið er að taka húsnæðisvælufóðrið af vinstrimönnum verður spennandi að vita hverju þeir taka næst að kjamsa á til að hallmæla íslensku samfélagi.

Húsnæðiskostnaður ekki hár hér á landi

Kynjafræði er pólitík byggð á hindurvitnum

Kynjafræði er pólitík sem byggir á aðgreiningu kynjanna þar fyrirfram er skilgreint að karlkynið er vont en kvenkynið gott. Þessi aðgreiningarstefna gengur undir nafninu femínismi. Eva Hauksdóttir rýnir í ,,fræðaheim" femínismans og skrifar

Það hefur varla farið fram hjá neinum sem fylgst hefur með kynjaumræðu síðustu ára að meðal feminista er sú skoðun ríkjandi að konur séu í veikari stöðu en karlmenn í nær öllum aðstæðum og því stöðugt í hættu á að verða fyrir kúgun eða ofbeldi. Þetta viðhorf er einnig áberandi í feminískum rannsóknum. Starf kynjafræðinga og annarra feminískra fræðimanna við Háskóla Íslands er hápólitískt; það snýst ekki um þekkingarleit heldur um að staðfesta þessar hugmyndir.

Hversdagsleg reynsla segir að fólk er ekki gott eða vont eftir kyni heldur af hegðun og innræti. Hvernig í veröldinni jafnvitlaus fræðigrein og kynjafræði kemst á koppinn með opinberum fjármunum er eiginlega óskiljanlegt.