Evruökin dauð, núna verðtryggingin

Í löndum Evrópusambandsins er viðtekið að nota verðtryggingu. Oftast heitir verðtryggingin breytilegir vextir. ESB-sinnar hér á landi beita iðulega þeim rökum að innan ESB tíðkist ekki verðtrygging líkt og hér - nú eru þau rök dauð.

Áður hafði reynslan leitt það í ljós að önnur meginrök ESB-sinna, að evran væri bjargvættur, eru falsrök. Evran tryggir atvinnuleysi og lítinn hagvöxt en ekki nóga atvinnu og bætt lífskjör líkt og krónan gerir.

Hvenær munu íslenskir ESB-sinnar hafa manndóm í sér að viðurkenna að í öllum meginatriðum höfðu þeir rangt fyrir sér í umræðunni um aðild Íslands að Evrópusambandinu?

Verðtrygging ekki bönnuð

Samfylkingardeild XD segir upp Jóni Ásgeiri

Hreinn Loftsson fyrrum aðstoðarmaður forsætisráðherra kom á tengslum samfylkingardeildar Sjálfstæðisflokksins og Jóns Ásgeirs Jóhannessonar.

Í samfylkingardeildinni eru menn eins og Ari Edwald fyrrum forstjóri 365 miðla, Ólafur Stephensen fráfarandi ritstjóri Fréttablaðsins, Guðlaugur Þór Þórðarson, Þorgerður Katrín Gunnarsdóttir fyrrum ráðherra og Sveinn stjörnulögfræðingur. Ásamt, auðvitað, Þorsteini Pálssyni, sem var ritstjóri Jóns Ásgeirs og hin síðari ár fastur dálkahöfundur.

Með brotthvarfi Þorsteins er slitið bandalagi Jóns Ásgeirs og samfylkingardeildarinnar, sem m.a. leiddi til stofnunar hrunstjórnar Geirs H. Haarde árið 2007. 

Báðir aðilar eru vígamóðir eftir hrun; Jón Ásgeir hangir eins og hundur á roði á eftirhreytunum af Baugsveldinu og samfylkingardeildin tapaði stórt á því að veðja á ESB-málið.  

Líklega var bandalagið farið að líkjast óþarflega því að haltur leiði blindan til að það ætti framtíð fyrir sér. 

Lætur af skrifum fyrir Fréttablaðið

Að tjaldabaki lekamálsins

Á yfirborðinu snýst lekamálið um upplýsingar um hælisleitanda sem rötuðu úr ráðuneyti í fjölmiðla. Margfalt meira meiðandi upplýsingar hafa lekið úr stjórnsýslunni í fjölmiðla, án þess að veður hafi verið gert úr því, eins og Brynjar Níelsson bendir á.

Ástæðan fyrir því að lekamálið er orðið jafn stórt og raun ber vitni er hvorki lekinn sjálfur né hagsmunir hælisleitandans, sem fjölmiðlar eru löngu búnir að gleyma. Lekamálið er notað af hagsmunaöflum í þjóðfélaginu til að koma höggi á innanríkisráðherra, sem þótti ekki ,,makka rétt".

Ríkissaksóknari og umboðsmaður alþingis notfærðu sér starfshætti og starfshneigðir fjölmiðla, einkum DV og RÚV, sem mála skrattann á vegginn ákveðnum litum, til að grafa undan stöðu innanríkisráðherra, Hönnu Birnu Kristjánsdóttur.

Báruvik af þessari hagsmunabaráttu hóps sem lítur á sig sem ,,lögfræðielítu Íslands" er viðtal í Spegli RÚV í gær og grein á miðopnu Morgunblaðsins í dag. ,,Lögfræðielíta Íslands" telur sig eiga frumburðarrétt til breytinga á löggjöf á sviði dóms- og ákæruvalds og þann rétt virti Hanna Birna ekki. Því skyldi þjarmað að henni.

Þegar spurt er hvort við eigum að ,,treysta þessu liði" þá er svarið að við eigum að treysta eigin dómgreind til að meta baksvið lekamálsins. Embættismenn í ,,lögfræðielítu Íslands", sem vel að merkja starfa ekki eftir neinum siðareglum, eru ekki yfir það hafnir að nota valdið sem þeir búa yfir í þágu eigin hagsmuna.

„Eigum við að treysta þessu liði?“

Skynsemin er tíðindalaus

Sumir kvarta undan tilbreytíngaleysi, það er únglíngsmerki, skynsamt fólk hefur illan bifur á tíðindum.

- Sjálfstætt fólk, HkL.

Makríllinn, fiskurinn sem hélt Íslandi utan ESB

Ísland var ekki með veiðireynslu á makríl og hefði ekki fengið leyfi Evrópusambandsins til að veiða svo mikið sem eitt tonn af þessum flökkustofni. ESB úthlutar veiðileyfum á grundvelli veiðireynslu.

Árlegt aflaverðmæti makríls undanfarin ár er yfir 12 milljarðar króna og munar um minna í þjóðarbúskapinn. 

Makríll hóf göngur sínar á Íslandsmið um líkt leyti Samfylkingin lagði fram umsókn um aðild landsins að Evrópusambandinu. Þegar rann upp fyrir þjóðinni að forræði yfir fiskimiðunum færi til Brussel við aðild þá fjaraði hratt undan stuðningi við leiðangur Össurar og félaga.

Makríllinn er vænn fiskur. 

Mikil makrílgengd í íslenskri lögsögu

Jóni Ásgeiri sýndur fingurinn

Samstöðufundur ritstjórnar 365 miðla í gærkveldi við heimili Ólafs Stephensen fráfarandi ritstjóra lýsir samkennd með ritstjórnarsjálfstæði andspænis ofríki eiganda, Jóns Ásgeirs Jóhannessonar.

Ólafur skrifaði sinn síðasta leiðara í gærmorgun þar sem hann gagnrýndi skipulagsbreytingar á 365 miðlum, sem miðuðu allar að því að gera ritstjórnina leiðitamari eiganda.

Saga Jóns Ásgeirs í fjölmiðlum er að hann nýtir þá ekki í þágu almennings heldur til framgangs eigin viðskiptahagsmunum.

Nýtt er að starfsfólk ritstjórna 365 miðla, nánast í heild sinni, sýni með ótvíræðum hætti andúð sína á ritstjórnarstefnu Jóns Ásgeirs. Maður tekur ofan fyrir samstöðu frétta-og blaðamanna 365 miðla í þágu ritstjórnarsjálfstæðis og óskar þeim góðs gengis í baráttunni.

 

Fréttastofan á bak við Ólaf?

Umboðsmaður alþingis í pólitík

Umboðsmaður alþingis rekur mál sitt gegn Hönnu Birnu Kristjánsdóttur í gegnum fjölmiðla. Þriðja bréfið sem umboðsmaður skrifar ráðherra á rúmum þrem vikum er sent til fjölmiðla áður en ráðherra fær eðlilegan tíma að svara.

Umboðsmaður alþingis hóf málatilbúnaðinn á hendur ráðherra í beinu framhaldi af slúðurfrétt DV um að lögreglustjóri hefði hætt vegna þrýstings ráðherra.

DV og dómstóll götunnar eru nánast samheiti og fer ekki vel á því að umboðsmaður alþingis leggist á sama plan.

Umboðsmaður alþingis opnar nýja víglínu á ráðherra þótt ríkissaksóknari hafi lokið málsmeðferð sinni á átta mánaða lögreglurannsókn með því að ákæra aðstoðarmann ráðherra - á hæpnum forsendum.

Í bréfi umboðsmanns er ráðherra spurður út í siðareglur. Umboðsmaður alþingis starfar ekki eftir neinum siðareglum og svarar með skætingi spurningum forsætisráðherra um það hvort siðareglur séu í gildi hjá umboðsmanni.

Starfsaðferðir umboðsmanns í þessu máli eru pólitískar og ekki í þágu betri og vandaðri stjórnsýslu.

 

 

Umræða um lekamálið ósönn

Talar Stefán tungum tveim?

Stefán Eiríksson fráfarandi lögreglustjóri í Reykjavík sagðist ekki hafa hætt vegna þrýstings frá innanríkisráðherra.

Í hljóðrituðu spjalli við umboðsmann alþingis virðist Stefán segja allt aðra sögu en hann gerði í lok júlí.

Stefán þarf að útskýra hvora frásögnina á að taka gilda.

„Eruð þið ekki að ganga of langt“

Ólafur Steph: Kristín er handbendi Jóns Ásgeirs - DV innan seilingar

Ólafur Stephensen skrifar leiðara í Fréttablaðið í dag og segir Kristínu Þorsteinsdóttur handbendi Jóns Ásgeirs Jóhannessonar, fyrrum Baugsstjóra. Ólafur segir eina aðferð eiganda til að stýra fjölmiðli vera að ráða

til stjórnunarstarfa á ritstjórnum fólk sem er nægilega náið og handgengið eigendunum til að láta prinsipp um ritstjórnarlegt sjálfstæði ekki þvælast fyrir sér.

Kristín var blaðafulltrúi Baugs og síðar stjórnarmaður Jóns Ásgeirs í 365 miðlum. 

Jón Ásgeir er alkunnur áhugamaður um að fjölmiðlar í sinni eigu séu meðvitaðir um þá hagsmuni sem skipta máli.

Á meðan Jón Ásgeir kennir mönnum að sitja og standa á 365 miðlum er náinn samstarfsfélagi hans, Sigurður G. Guðjónsson, að leggja undir sig DV. 

Fjölmiðlun á Íslandi er að verða fámiðlun. 

 

Ólafur einnig hættur störfum?

Pólitísk ákæra í lekamálinu

Ákæran í lekamálinu er hvorki byggð á málefnalegum né hlutlægum forsendum. Ákæran er pólitísk enda unnin í samráði við DV og til þess ætluð að ná pólitísku markmiði; afsögn innanríkisráðherra.

Sigríður Friðjónsdóttir saksóknari Jóhönnustjórnarinnar í landsdómsmálinu gegn Geir H. Haarde reið ekki feitum hesti þaðan. 

Hafi Sigríður ætlað að endurvinna sig í áliti bakhjarla sinna með bandalagi við DV í dómstóli götunnar er hætt við að það verði meiri sneypuför en sú fyrri.

„Mörgu er ábótavant í ákærunni“