Hanna Birna styrkir Sjálfstæðisflokkinn

Snörp vörn Hönnu Birnu Kristjánsdóttur innanríkisráherra, þegar ómaklega var að henni sótt í lekamálinu, skilar sér í auknu fylgi Sjálfstæðisflokksins.

Hanna Birna var sá stjórnmálamaður sem mest var í fréttum síðustu vikur og landsmenn kunnu vel að meta frammistöðu hennar og sjá í henni stjórnmálamann sem lætur ekki bilbug á sér finna í orrahríðinni.

Þá skilar það án efa Sjálfstæðisflokknum auknu fylgi að þingflokkur og flokksforysta stóð saman sem einn maður þegar lekahávaðinn var hvað mestur. Þjóðin umbunar staðfestu en refsar hviklyndi. Spyrjið bara vinstrimenn.

 

Fylgi Sjálfstæðisflokksins 28%

Pútín er ekki Hitler

Af þýskum fjölmiðlum að dæma er Pútin í Rússlandi endurfæddur Hitler. Bæði Welt og Spiegel keyra uppslátt byggðan á þeim orðum Pútín að Rússar gætu lagt undir sig höfuðborg Úkraínu á tveim vikum.

Stríðsæsingamenn austan hafs og vestan eru tilbúnir að mála Pútín sem einræðissegg sem lætur einskins ófreistað að leggja undir sig lönd hér og lönd þar. Yfirvegaðir greinendur benda á hinn bóginn á þá staðreynd að viðbrögð Pútín eru varnarviðbrögð við ásælni ESB og Nató inn í Austur-Evrópu.

Rússland rekur ekki útþenslustefnu í ætt við Hitlers-Þýskaland. Engin yfirþjóðleg hugmyndafræði, í ætt við nasisma eða kommúnisma, er ráðandi í rússneskri orðræðu. Rússland stendur frammi fyrir fólksfækkun og ekki burðugt að leggja undir sig önnur ríki.

Á hinn bóginn eru tvö bandalög í vestri í örvæntingarfullri leit að tilgangi. Pútín sem Hitler er skálkur sem hressir upp á Evrópusambandið og Nató. Ef fólk kaupir áróðurinn.

 

Vilja senda vopn til Úkraínu

Ensk fyrirmynd sjálfshaturs íslenskra vinstrimanna

Íslenskir vinstrimenn hatast við allt sem íslenskt er; þeir vilja fullveldið feigt, annað tveggja flytja það til Osló eða Brussel og tala sí og æ um ,,ónýta Ísland". Sjálfshatur vinstrimanna er einnig þekkt á eyju suðaustur af landinu.

Breskir vinstrimenn eru þjakaðir af hatri á öllu bresku og sérdeilis er hatrið magnað á því sem telst enskt. Svo segir rithöfundurinn Sean Thomas og nefnir George Orwell sér til vitnis.

Sjálfshatur breskra vinstrimanna birtist m.a. í afstöðunni til Skotlands, þeir vilja að Skotar brjóti upp Bretland, og til umburðarlyndis gagnvart því að múslímskir karlmenn nauðgi hvítum stúlkum, samanber fjöldanauðganir múslíma á hvítum stelpum í Rotherham.

Sjálfshatur íslenskra vinstrimanna mátti sjá í moskuumræðunni þar sem trítilóðir vinstrimenn líktu saklausum framsóknarmönnum við fasista sökum þess að vildu ekki að múslímar byggi mosku í þjóðbraut. 

Átökin í Úkraínu á ábyrgð ESB og Nató

Evrópusambandið ætlaði með stuðningi Bandaríkjanna að gera Úkraínu að áhrifasvæði sínu. Samkvæmt áætluninni átti Úkraína að verða ESB-ríki og ganga í Nató.

Áætlunin tók ekki mið af hagsmunum Rússa, sem telja sér, réttilega, ógnað af hernaðarbandalaginu Nató. Rússar eru í fullum rétti að verja þjóðarhagsmuni sína með því að reisa skorður við útþenslu ESB/Nató í austurátt.

Á þessa leið er greining John J. Mearsheimer í Foreign affairs, sem er tímarit bandarísku stjórnmálaelítunnar, á átökunum í Úkraínu. Mearsheimer er páfi raunsæismanna í pólitík, sem taka harðar pólitískar staðreyndir fram yfir óraunhæfar hugsjónir.

En það eru einmitt holar hugsjónir ESB- og Nató-sinna sem komu Úkraínu í þá stöðu sem landið er núna; rifið í sundur á milli austurs og vesturs.

Pútin vill skipta Úkraínu

Svona skrifaði DV um Guðmund í Brimi

Baráttujaxlinn og útgerðarmaðurinn Guðmundur Kristjánsson, sem kenndur er við Brim, hefur smám saman verið að fóta sig sem helsti og magnaðasti talsmaður útgerðarmanna. Guðmundur hefur yfir sér blæ kímni og visku sem þykir tilbreyting frá hörkunni og áróðrinum sem þykir einkenna LÍÚ.

 Þetta er úr DV.

En auðvitað er aukaatriði að Guðmundur reddaði Reyni ritstjóra frá frá persónulegu gjaldþroti með 15 milljón kr. láni. Þessi lofgjörð um Guðmund getur ekki verið keypt. Bara alls ekki. Og jólasveinar koma til byggða á miðju sumri.

Reynir og DV í vasa Guðmundar í Brimi

Reynir Traustason ritstjóri og aðaleigandi DV átti allt sitt undir Guðmundi Kristjánssyni útgerðamanni í Brimi samtímis sem Reynir stýrði fréttaflutningi af deilum Guðmundar um yfirráðin yfir Vinnslustöðinni.

Reynir viðurkennir að hafa þegið margar milljónir króna frá Guðmundi til að forða sér frá persónulegu gjaldþroti. Samtímis segir Reynir að sú staðreynd hafi ekki haft nein áhrif á fréttaskrif DV um Guðmund og deilurnar um Vinnslustöðina.

Engu að síður faldi Reynir þá staðreynd fyrir blaðamönnum sínum og lesendum að Guðmundur í Brimi héldi útgáfunni á floti og Reyni frá gjaldþroti. Með því að fela þessar upplýsingar viðurkennir Reynir að þær skipta máli.

Allar fréttir í DV um Guðmund í Brimi eru litaðar af því að hann er velgjörðarmaður blaðsins og Reynis ritstjóra sérstaklega.

Hverjir aðrir hafa borgaði Reyni fyrir að taka upp einhver mál og þegja um einhver önnur mál?

DV og Reynir ritstjóri eru eftir þessa afhjúpun algerlega ómarktækir aðilar í umræðunni.

Átökin um DV harðna

Ofbeldisþreyta Palestínumanna

Hamas eru trúarvædd ofbeldissamtök sem drepa mann og annan í þágu Allah. Rökrétt niðurstaða af trúarvæddu ofbeldi Hamas sést í Sýrlandi þar sem súnní-múslímar drepa sjíta-múslíma af ákefð, um 200 þúsund dauðir, og helmingur sýrlensku þjóðarinnar á flótta.

Palestínumenn eiga um tvo kosti að velja. Að feta braut samninga, líkt og Abbas forseti Palestínu boðar, annars vegar og hins vegar ofbeldisvegferð Hamas.

Tilgangslaust stríð Hamas skilaði málstað Palestínumanna engu. Tvö þúsund lík, tíu þúsund særðir og eyðilegging 50 þúsund húsa er eftirtekjan.

Með því að Abbas leggur ábyrgð stríðsins á herðar Hamas hafnar forseti Palestínu ofbeldispólitík hryðjuverkasamtakanna. En á meðan Hamas-samtökin stjórna Gasa-svæðinu er alltaf hætta á að átök hefjist á ný.

 

Vísaði ábyrgðinni á Hamas

Hvað er til sölu hjá Reyni og DV?

Sigurður G. Guðjónsson lögfræðingur segir þá sögu að Reynir Traustason ritstjóri og aðaleigandi DV selji málafylgju blaðsins. Af frásögn Sigurðar má ráða að Reynir hafi selt Guðmundi útgerðarmanni í Brimi stuðning DV í baráttunni um yfirráðin í Vinnslustöðinni í Vestmannaeyjum.

Elliði Vignisson bæjarstjóri í Eyjum er áhugamaður fyrirtæki í bænum. Hann tekur upplýsingar Sigurðar og bætir við hlekkjum á DV-fréttir sem renna stoðum undir þann grun að DV stundi útselda málafylgju einmitt í deilum Brims um yfirráðin yfir Vinnslustöðinni.

Reynir talar um ,,pönk" og að ,,taka fólk niður" þegar hann ræðir blaðamennsku DV.

DV-pönk virðist vera til sölu.

Aðalfundi DV frestað um viku

Sigurjón og sannfæringin

Ritstjórn 365-miðla er rúin trausti eftir brotthvarf tveggja ritstjóra og samverkamanna þeirra. Sigurjón Egilsson, sem stóð vaktina fyrir Jón Ásgeir á Fréttablaðinu þegar Baugsmál tröllriðu samfélaginu, var fenginn af eigenda miðilsins til að lægja öldurnar.

Sigurjón skrifar leiðara um sómakennd sína, æru og sannfæringu. Hann segir

 það er ekki hægt að svíkja eigin sannfæringu. Það er bara ekki hægt. 

Þetta er hárrétt athugasemd. Þegar sannfæringin segir blaðamanni að þóknast eiganda fjölmiðilsins er ekki hægt að svíkja þá sannfæringu. Að minnsta kosti ekki ef maður heitir Sigurjón.

Hanagal, kirkjuklukkur og móðgaða fólkið

Hanagal veldur pirringi í Mosfellsbæ og kirkjuklukkur í Reykjavík. Sumt fólk leitar eftir tilefnum til að móðgast.

Sláttuvélar, bílaumferð og önnur tækni valda margfalt meiri hljóðmengun en hanar og kirkjuklukkur. Hvers vegna ræðst móðgaða fólkið ekki að hljóðmenguninni eins og hún gerist verst?

Svarið er þetta: móðgaða fólkið ræðst alltaf á garðinn þar sem hann er lægstur. 

Hringt við stærri athafnir