Matarskatturinn ekki prinsippmál

Það getur ekki verið prinsippmál Sjálfstæðisflokksins að hækka skatt á matvæli. Þegar fjárlagafrumvarp ríkisstjórnarinnar var lagt fram sagði formaður flokksins í fjölmiðlum að umræðan myndi slípa frumvarpið.

Nú hefur umræðan sýnt fram á að rökin fyrir hækkun matarskatts halda ekki. Það er engin eftirspurn í samfélaginu eftir ,,einfaldara skattaumhverfi" ef það felur í sér hækkun á matarverði.

Skynsamlegast er að lagfæra fjárlagafrumvarpið þannig að matur verði áfram í lægra vsk-þrepi. 

Sjálfstæðisflokkurinn er þrátt fyrir allt að stofni til íhaldsflokkur. Og íhald er að halda í það sem reynst hefur vel. Enginn kvartaði undan fyrirkomulagi matarskatts. Hvers vegna að breyta því sem virkar?

Vill Bryndísi ekki úr flokknum

Bryndís og matar-mistök Sjálfstæðisflokksins

Það voru mistök af hálfu Sjálfstæðisflokksins að berjast fyrir hækkun virðisaukaskatts á matvæli í nafni einföldunar á skattkerfi.

Í fyrsta lagi fann almenningur ekki fyrir flóknu vsk-kerfi; hér var ekki um pólitískt vandamál að ræða. Í öðru lagi misheppnaðist algjörlega, ef það var þá reynt, að færa rök fyrir nauðsyn breytinga á vsk-kerfinu.

Hækkun á matvöru er viðkvæmt mál sökum þess að enginn getur án matar verið. Sterk rök þarf til að hækka skatta á matvæli. Sjálfstæðisflokkurinn hefur ekki kynnt þau enn. 

Bryndís Loftsdóttir varaþingmaður Sjálfstæðisflokksins tók að sér að leiðrétta matar-mistök flokksins. Hún ætti að fá lof en ekki last frá félögum sínum.  

Bryndísi sárna ummæli Brynjars

Vestfirskt málfrelsi naumt skammtað

Málfrelsi á Vestfjörðum er skilgreint þrengra en á höfuðborgarsvæðinu, samkvæmt dómi yfir Jóni Guðbjartssyni. Ummæli sem hann lét falla um Helga Áss Grétarsson fólu ekki í sér ásökun um lögbrot og ættu að flokkast sem gildisdómar og refsilausir sem slíkir.

Í hæstaréttardómi nr.  673/2011,  er tekist á um mörkin  á milli gagnrýni í þágu lýðræðislegrar umræðu annars vegar og hins vegar ærumeiðinga. Dómur Hæstaréttar er að jafnvel þótt notað sé sérlega gildishlaðið orð eins og ,,landráðamaður" í umræðu, sem raunar er jafnframt ásökun um refsiverða háttsemi,  þá sé hvorki tilefni til að ómerkja slík ummæli né séu þau skaðabótaskyld. Hæstiréttur gerir kröfu til að gildisdómar eigi sér ,,einhverja stoð í staðreyndum málsins." 

Í hæstaréttardómi nr. 382/2003 er meginreglan um refsileysi gildisdóma orðuð á þennan veg: ,,Fallast ber á með stefndu að gildisdómar í opinberri umræðu um samfélagsleg málefni séu almennt ekki refsiverðir."

Í hæstaréttardómi nr. 181/2005 staðfestir Hæstiréttur túlkun héraðsdóms Reykjavíkur á 235. grein almennra hegningarlaga um að gildisdómar byggðir á staðreyndum sem taldar eru fyrir hendi skuli refsilausir.

Vestfirðingar  eiga sama rétt og aðrir landsmenn að tjá sig. Héraðsdómur fjórðungsins í máli Jóns Guðbjartssonar hlýtur að vera endurskoðaður í Hæstarétti.

 

 

Jón dæmdur fyrir meiðyrði

948 ár frá Hastings

Á þessum degi árið 1066 sigraði afkomandi norrænna manna í Normandí, Vilhjálmur bastarður, her Englandskonungs, Haralds Guðinasonar, við Hastings. Englendingar segja innreið norrænu Frakkanna upphaf lénsskipulags þar í landi. Og einmitt vegna léna Normandímanna í Frakklandi gerðu enskir konungar á síðmiðöldum tilkall til konungdóms í Frakklandi. Hlaust af hundrað ára stríðið þar sem þjóðardýrlingurinn Jóhanna af Örk lét að sér kveða.

Haraldur Guðinason mætti vígmóður til leiks í Hastings, Helsingjaport upp á norrænu. Aðeins tæpum þrem vikum áður barðist hann við nafna sinn harðráða Noregskonung. Í sögu Haralds harðráða segir Snorri Sturluson að eftir orustuna við Staffurðabryggju hafi konungur Engla og Saxa haldið suður.

En Haraldur snerist þá með her sinn suður á England því að hann hafði þá spurt að Vilhjálmur bastarður fór sunnan á England og lagði landið undir sig. Þar voru þá með Haraldi konungi bræður hans: Sveinn, Gyrður, Valþjófur. Fundur þeirra Haralds konungs og Vilhjálms jarls varð suður á Englandi við Helsingjaport. Varð þar orusta mikil. Þar féll Haraldur konungur og Gyrður jarl bróðir hans og mikill hluti liðs þeirra. Það var nítján nóttum eftir fall Haralds konungs Sigurðarsonar.

Orustan við Helsingjaport er áminning um hlut norrænna manna í enskri sögu og evrópska meginlandsins.

(Takk til RT).

 

Ríkisfjölskylda vinstrimanna og góða fólkið

Vinstrimenn eru góða fólkið sem Elliði Vignisson gerir skil; fólkið sem allt veit um það hvernig við hin eigum að haga okkur og hvaða skoðanir við eigum að hafa.

Vitanlega veit formaður góða fólksins, afsakið, Samfylkingar, hvernig ríkisfjölskyldan á að líta út og hvað hún á að eyða í hvaða vöru og hvernig lífi hún á að lifa.

Bráðum birt Samfylkingin á heimasíðu sinni hvað ríkisfjölskyldan á að borða, hvert hún á að fara í ferðalag og hvernig hún skal eyða tómstundum sínum. Þá verða ítarlegar uppeldisleiðbeiningar á heimasíðu Samfylkingar fyrir ríkisfjölskylduna.

Síðast en ekki síst birtir Samfylkingin okkur hvaða stjórnmálaskoðanir eru samþykktar fyrir ríkisfjölskylduna.

Í ríkisfjölskyldusamfélagi Samfylkingar eru allir eins.

Neysluviðmið endurskoðuð séu forsendur rangar

Írsk ungmenni föst heima í fátækt

Atvinnuleysi meðal ungra Íra er 25 prósent. Um 42 prósent Íra á aldrinum 18 til 30 ára búa heima hjá foreldrum sínum þrátt fyrir að engin þjóð í Evrópu hafi misst til útlanda jafn stórt hlutfall í þessum aldurshópi.

Unga fólkið á Írlandi, sem fær á annað borð vinnu, er oft ýmist í ólaunuðum störfum eða atvinnubótavinnu á vegum hins opinbera. 

Írski hagfræðingurinn David McWilliams rekur rannsóknir sem sýna hve hart atvinnuleysi leikur ungt fólk: þunglyndi, alkahólismi og styttri lífaldur eru meðal afleiðinganna. 

Írar búa við evru og aðild að Evrópusambandinu.  

Íslenska leiðin til bjargar alþjóðhagkerfinu

Íslendingar ættu að vita það manna best að peningar snúast um traust. Krónan hefur látið á sjá vegna þess að við sem samfélag höfum ekki staðið vörð um grundvöll krónunnar og leyft innistæðulausa prentun á peningum með tilheyrandi vantrausti og verðbólgu.

Hvort það sé huggun harmi gegn, skal ósagt, en í alþjóðlegri umræðu hagspekinga er látið eins og hægt sé að peningaprenta sig úr vanda núllvaxtar. 

Í Telegraph segir Jeremy Warner að stórkanónur hagfræðinnar ráðleggi núna að fleyja peningum úr þyrlu til að auka eftirspurn í hagkerfum og ræsa þannig heimshagkerfið sem er í lamasessi.

Undir þessum kringumstæðum gæti íslenska krónan orðið traustasti gjaldmiðillinn í veröld víðri.

Veitir seðlabönkum of mikil völd

Fréttastofa RÚV og fagleg fávísi

Blaðamennska er að velja fréttir og tíðindi sem upplýsa um stöðu mála. Á hverjum tíma reyna hinir og þessir að koma á framfæri slúðri, getgátum og spuna sem fréttum. Blaðamenn eiga að vinsa úr ruglinu og birta aðeins það sem heldur máli.

Frétt RÚV um málefni SÁÁ er handan alls velsæmis. Fréttastofan gleypir ruglið hrátt og dregur það á hæsta hún. Einnar heimildar blaðamennska af þessari sort í máli af þessu tagi er óafsakanleg fagleg fávísi.

Fréttastofa RÚV hlýtur að gera grein fyrir þessari yfirsjón og útskýra hvað fór úrskeiðis. 

 

Bankamenn í lögbrotum, siðleysi og valkvæðum heiladauða

Bankamenn á Íslandi fyrir hrun stunduðu lögbrot og urðu berir að siðleysi. Þeir aftengdu dómgreindina með valkvæðum heiladauða og létu eins og allt væri í fína lagi fram að síðasta degi fyrir gjaldþrot.

Íslensku bankamennirnir fengu alþjóðalega aðvörun árið 2006 þegar álitsgjafar sögðu íslensku bankana ósjálfbæra. íslensku bankarnir gerðu ekkert til að vinda ofan af ofurskuldsetningu. Þeir gáfu út litprentaðan bækling kortéri fyrir hrun, árið 2008, undir heitinu Í faðmi sviptivinda. Þar segir m.a.

Þær raddir gerast nú háværari meðal erlendra og innlendra greiningaraðila að álagið sé alltof hátt og áhætta sem tengist íslensku bönkunum sé ofmetin. 

Hvergi vottar fyrir að íslensku bankamennirnir kveiki á þeirri staðreynd að bankarnir eru útblásin blaðra með ekkert innihald. Eina framlag íslenskra bankamanna er siðlaus áhætta, stórkostlegur hroki og glæpsamlegt gjaldþrot.

Ekki er hægt að dæma bankamennina fyrir siðleysi eða hroka. En fyrir lögbrotin eiga þeir á að fá makleg málagjöld. Annars virkar réttarkerfi okkar ekki. 

Gjaldþrota með lánshæfiseinkunnina A

Evru-ríkin eru sjúklingar heimshagkerfisins

Þýskir fjölmiðlar tala um yfirvofandi gengisfellingu evrunnar. Álitsgjafar í efnahagsmálum segja evru-samstarfið festa meginlandið í kviksyndi verðhjöðnunar og samdráttar.

Um langa hríð stendur val evru-ríkjanna um að stórauka miðstýringu efnahagkerfa sinna og í reynd búa til Stór-Evrópu eða brjóta upp evru-samstarfið. Þegar hvorugt er stöðnun og hægfara hnignun afleiðingin.

Tvær sviðsmyndir blasa við evru-ríkjunum. Í fyrsta lagi langtíma kreppa, í tíu eða fimmtán ár, þar sem haldast í hendur lítill hagvöxtur og hátt atvinnuleysi. Í öðru lagi hrun sem sprengir upp gjaldmiðlasamstarfið með því að ríku þjóðirnar fari úr samstarfinu eða að þeim fátækari verði úthýst.

Evru-ríkin eru sjúklingar heimshagkerfisins og sjálfstæður óvissuþáttur í alþjóðlegum efnahagsbúskap. Þessi greining er niðurstaða Alþjóða gjaldeyrissjóðsins og bandaríska seðlabankans.

Það er með miklum ólíkindum að á Íslandi séu pólitísk öfl sem vilja leggja þjóðina inn bráðadeildina í Brussel.

Meðaleinkunn ESB-landa versnar