Launafeluleikur og áróðursstríð

Stéttafélög komast upp með að dylja almenning hverjar launakröfurnar eru í vinnudeilum en reka engu að síður áróður í fjölmiðlum sem höfðar til samúðar almennings.

Fyrirkomulag vinnudeilna er algerlega út í hött og þarf að stokka upp. Verkföll eru misnotuð af stéttum sem bestan höggstað hafa á almannahagsmunum.

Verkalýðshreyfingin, bæði sú almenna og opinbera, verður að taka ná samstöðu um ásættanlegt ferli á vinnudeilum.

Nái verkalýðshreyfingin ekki samstöðu verður ríkisvaldið að grípa inn í atburðarásina og setja lög sem koma í veg fyrir misnotkun verkfallsréttarins.

Þorsteinn fari með rangt mál

17. júní mótmælin og pólitískt ástleysi Dags og Halldórs

Alla stjórnmálamenn dreymir um pólitíska ást almennings. Það er sú ást sem skilur á milli feigs og ófeigs í stjórnmálum, valda og valdleysis.

Sumir stjórnmálamenn verða svo ástsjúkir að þeir skilja dómgreindina eftir heima þegar þeir mæta í fjölmiðla að viðra sig upp við fólk. Fréttablaðið leiðir fram tvo slíka í dag. Dagur B. Eggertsson borgarstjóri vinstrimanna og Halldór Auðar Svansson háseti hans mæla 17. júní mótmælunum bót.

17. júní mótmælin voru gegn þjóðhátíðardegi Íslendinga. Þau voru hróp og öskur gegn stúlknakór, truflun á ljóðmæli fjallkonunnar og gjamm fram í ræðu forsætisráðherra.

Stjórnmálamenn sem taka undir mótmælasóðaskap af þessu tagi skipa sér í lið með þeim sem vanvirða og fyrirlíta sameign okkar. Að kaupa sér ást slíks safnaðar segir heilmikið um Dag og Halldór.

Rökin fyrir breyttri stjórnarskrá drepin 17. júní 2015

Ný stjórnarskrá var verkefni vinstristjórnar Jóhönnu Sigurðardóttur. Stjórnarskráin var flokkspólitískt verkefni vinstriflokkanna sem rakst á vegg almannaviljans í þingkosningum 2013: Samfylking fékk 12,9 prósent fylgi og Vg 10,9 prósent.

Aðgerðasinnar úr röðum vinstrimanna létu ekki segjast við niðurstöðu lýðræðislegra kosninga og halda áfram að krefjast nýrrar stjórnarskrár.

Núverandi stjórnarskrá er að grunni frá 1874 og fylgt þjóðinni frá torfkofum inn í tækniöld. Engin rök standa til þess að hún sé úrelt.

Aðgerðasinnar í þágu nýrrar stjórnarskrár vanvirða þjóðhátíðardaginn með mótmælum á Austurvelli. Þjóðhátíð er til að minnast þess sem við eigum sameiginlegt. Fólk sem vanvirðir sameign okkar er ekki hæft til að setja þjóðinni stjórnarskrá.

Reynslan sýnir að eftirgjöf í meginmálum veit á uppgjöf. Í fyrirsjáanlegri framtíð á ekki undir neinum kringumstæðum að vekja máls á endurskoðun stjórnarskrárinnar. Það væri uppgjöf fyrir þeim öflum sem vilja stjórnskipun okkar feiga.

„Gagnrýnin byggð á misskilningi“

Mótmæli gegn friðsæld, jafnrétti og velmegun

Á þjóðhátíðardegi friðsælasta lands í heimi, þar sem jafnrétti er meira en í viðri veröld og velmegun sömuleiðis, grípur hópur fólks til mótmæla.

Samfélagið sem mótmælendur óska sér getur ekki verið betra en það sem við höfum.

Líklega mun verra.

Ísland friðsælast 5. árið í röð

Ísland og ártölin: 930 til 2015

Ártöl Íslandssögunnar stika vegferðina frá landnámi til samtíma. Merkilegustu ártölin eru eftirfarandi:

930, alþingi stofnað

1000, kristnitaka

1262, Gamli sáttmáli, endalok þjóðveldis

1550, siðaskipti, konungsvald Dana verður einrátt á Íslandi

1751, Innréttingarnar stofnaðar, fyrsta tilraunin til nývæðingar

1783, móðuharðindin, þjóðinni fækkar um fimmtung, landið varla talið byggilegt

1811, fæddur Jón Sigurðsson

1848, Hugvekja til Íslendinga, Jón Sigurðsson leggur grunninn að sjálfstæðisbaráttunni

1864, Danir tapa Slésvíkurstríðinu, verða smáþjóð, íhuga að bjóða Ísland Prússum

1874, Ísland fær stjórnarskrá

1904, heimastjórn

1918, Danir samþykkja íslenskt fullveldi, í skiptum fyrir danskar byggðir í Þýskalandi

1944, lýðveldi

1975, landhelgisstríðum lýkur með fullum sigri

2008, Guð-blessi-Ísland hrunið

2009 - 2013, misheppnaðasta stjórnmálatilraun Íslandssögunnar

2015, ESB-umsóknin afturkölluð

Gleðilega þjóðhátíð.

Tsipras: ESB hafnar vinstripólitík

Forsætisráðherra Grikklands segir Evrópusambandið ætla að velta ríkisstjórn landsins úr sessi enda þoli ESB ekki vinstristefnu ríkisstjórnarflokksins, Syriza. Spiegel birtir þessi ummæli í frásögn af sífellt erfiðari stöðu stjórnarinnar í Aþenu.

Tsipras forsætisráðherra og vinstrabandalagið Syriza fengu í janúar umboð grísku þjóðarinnar til að binda endi á aðhaldsaðgerðir í efnhagsmálum, sem lánveitendur krefjast.

Lýðræði og afborganir af lánum eru ólíkir hlutir, þótt það kunni að þjóna pólitískum hagsmunum heima fyrir að blanda þessu tvennu.

Líklega veit Tsipras að dagar ríkisstjórnar Syriza eru taldir ef hann fellst á skilyrði erlendu lánadrottnanna. Og þá er þénugt að kenna öðrum um en sjálfum sér.

Tími Grikklands á þrotum?

Mótmæli, reiða fólkið og 17. júní

Enginn kostnaður fylgir boðun mótmæla. Samfélagsmiðlar eru ókeypis auglýsingamiðlar og á allra færi að boða mótmæli.

Síðustu misseri dúkka reglulega upp svokallaðir aðgerðasinnar, boða mótmæli og halda tölu um ömurlega tilveru Íslendingsins, sem öll skrifast vitanlega á ríkisstjórnina.

Mótmælin lifa í fjölmiðlum í tvo til þrjá daga með fréttum af hve margir haka við ,,ég mæti" á fésbókarsíðu mótmælenda. Mótmæladaginn sjálfan er rifist um hve margir mættu.

Aðgerðasinnarnir standa ekki fyrir pólitísk stefnumál heldur aðgerðum, sem felast í því að mæta á Austurvöll, sýna sig þar og sjá aðra. Tillögur um annað og betra Ísland er hverig að finna; aðeins útlistun á meintri eymd okkar. 

Sýndarstjórnmál af þessu tagi veita fólki útrás fyrir persónulega reiði. Mótmælin eru meðferðarúrræði reiða fólksins.

Það fer vel á því að 17. júní verði miðborgin vettvangur úrræða þeirra vanstilltu. Börn að skemmta sér með fjölskyldunni minnir reiða fólkið á að Íslendingar eru flestir hverjir hamingjuhrólfar. Kannski sjatnar einhverjum reiðin.

 

Fyrstu mótmælin á 17. júní?

Lögregluvernd á þvingað hjónaband

Samkvæmt Guardian voru tvær af horfnu systrunum þrem í þvinguðu hjónabandi. Önnur af þeim er fráskílin en hin aðskilin frá eiginmanninum.

Þvinguð hjónabönd tíðkast meðal múslíma. Þvingunin felst í því að fjölskylda, oftast fjölskyldufaðirinn, ákveður fyrir hönd dóttur sinnar hver maki hennar skuli vera.

Samfélag múslíma í Bradford, þaðan sem konurnar eru, gerir kröfu að breska lögreglan hindri för kvennanna til Sýrlands enda leikur grunur á um að þær ætli að ganga Ríki íslams á hönd.

Það er ekki hlutverk lögreglu í lýðræðisríki að hindra frjálsa för einstaklinga. Burtséð frá því er krafa múslíma um lögregluafskipti af systrunum framlenging af feðraveldinu sem þær undu illa.

Vestræn gildi og múslímamenning samræmast illa.

 

 

Feðurnir vissu ekki af ferðinni

Magna Carta og Gamli sáttmáli

Skilmálaskrá Englandskonungs við aðalsmenn og Gamli sáttmáli Íslendinga og Hákonar gamla Noregskonung eru 13. aldar skjöl um konungsvald og þegna. 

Magna Carta er einar 60 greinar og tvær viðbætur. England er á þröskuldi hámiðalda, þegar kalþólska kirkjan og lénsveldið voru meginstólpar samfélagsins. Fyrsta grein skilmálaskrárinnar tekur til sjálfstæðis kirkjunnar og önnur greinin um erfðarétt lénsmanna.

Gamli sáttmáli segir ekkert um stöðu kirkjunnar. Íslenska goðakirkjan var rómversk að nafni en tæplega í reynd. Við kristnitökuna skiptu goðarnir um trú og innlimuðu kristni í heiðið samfélag.

Skilmálar Gamla sáttmála miðast við veraldlegt samfélag þar sem rómarkirkjan var veik. Íslendingar vildu sex hafskip til Íslands, traustan erfðarétt í Noregi og undaþágu frá komugjöldum. Þá áskildu goðarnir sér konungsembætti sýslumanna og lögmanna og frábáðu sér útlendinga.

Magna Carta sýnir England á 13. öld dæmigert evrópskt miðaldasamfélag þar sem kirkja, aðall og konungsvald réðu ferðinni. Ísland var samkvæmt Gamla sáttmála of fátækt til að standa undir skipaferðum til og frá landinu. Eftir ófrið Sturlungaaldar voru Íslendingar ekki í stakk búnir að gera aðrar kröfur en fá frið og brauð.

Magna Carta var skrifuð á latínu, máli kirkjunnar. Gamli sáttmáli er á norrænu, sameiginlegri tungu okkar og Norðmanna.

Sýna upprunaleg eintök Magna Carta

Samtal um norræna módelið milli ASÍ og BHM (og hinna líka)

Verkalýðshreyfingarnar í landinu skiptast í meginatriðum í tvo flokka. ASí-félög eru með þorra launþega á almenna vinnumarkaðnum og síðan eru það BHM-félögin með opinbera starfsmenn.

Ekkert samtal er á milli ASí-félaga og opinberra starfsmanna. Síðustu kjarasamningar leiddu fram sjónarmið um að einkageirinn leggi línuna fyrir kauphækkun opinberra starfsmanna. Þetta sjónarmið er kennt við norræna módelið sem veit á þjóðfélagssátt og efnahagslegan stöðugleika.

ASí og BHM, auk annarra félaga opinberra starfsmanna, ættu að hefja samtöl um norræna módelið í kjarasamningum. Ef verkalýðshreyfingin í heild sinni nær ekki að stilla saman strengina er viðbúið að kjaradeilur verði reglulega leystar með lögum. Og það er ekki heppilegt.

Engir fundir hafa verið boðaðir