ESB-sinnar í felum: næsta umræða 2030

Umræðan um ESB-aðild Íslands skilaði afgerandi niðurstöðu áramótin 2012/2013 þegar ESB-umsókn Samfylkingar frá 16. júlí 2009 var lögð á hilluna. ESB-sinnar eru í felum, koma helst fram í skoðanakönnunum eða nafnlausum pistlum.

ESB-sinnar, almennt og yfirleitt, voru ekki menn til að viðurkenna sig sigraða. Hvorki þegar umsóknin var dregin tilbaka né sumarið 2016 þegar Bretar ákváðu að ganga úr Evrópusambandinu.

Enginn stjórnmálaflokkur á Íslandi berst fyrir aðild að ESB. Ekki einu sinni Samfylkingin nennir að halda málinu á lofti.

Enginn veit hvað verður úr Evrópusambandinu eftir úrsögn Breta. Brexit tekur fyrirsjáanlega tvö til fjögur ár að verða að samningi. Ein fimm til tíu ár í viðbót leiða í ljós hvaða fyrirbæri ESB verður eftir Brexit.

Tímabær umræða um ESB-aðild Íslands rennur kannski upp í kringum árið 2030.

Meirihluti andvígur inngöngu í ESB

Trump er póstmódern - vinstrimaður

Gáfuritið New Republic segir Trump fyrsta póstmóderníska forsetann. Boðskapur póstmódernisma er að sannleikurinn sé ekki til; aðeins sjónarhorn. Mitt sjónarhorn er jafngilt og þitt. Af því leiðir eru hugtökin satt og ósatt merkingarlaus.

Ritstjóri New Republic heimfærir póstmódernisma upp á Trump og hugtök nátengd honum, s.s. falsfréttir og valkvæðar staðreyndir.

Vandamálið er þetta: Trump er hægrimaður en póstmódernismi í pólitík er vinstristefna. Póstmódernísk pólitík verður til í framhaldi af uppgjöf vinstrimanna á vísindalegum sósíalisma Marx og Engels, eins og Stephen Hicks útskýrir í stuttri ræmu.

Ef greining New Republic heldur máli verður að líta á Trump sem áhrínisorð póstmódernisma. Og vandast þá málið. Hvernig á að afbyggja Trump?

Ágætis byrjun væri að innleiða á ný inn í pólitíska umræðu hugtökin sannindi og ósannindi. Heimspekingurinn Harry G. Frankfurt skrifaði tvo ritlinga áratug áður en Trump varð forseti, On bullshit og On truth.

Ritlingarnir tveir útskýra hvernig vaðall annars vegar og hins vegar misþyrming á sannleikshugtakinu leiða til póstmódernískra fyrirbæra eins og Trump.

Heimurinn verður óskiljanlegur ef við hættum að aðgreina sannindi og lygi. Hvert barn veit þetta þótt stjórnmálaumræðan gefi annað til kynna.

 

Trump vissi ekki af fundinum

Skolpfréttir RÚV - bara ekki úr Reykjavík

Fyrsta frétt RÚV í sexfréttum var um fráveitumál í ýmsum sveitarfélögum - bara ekki Reykjavík þar sem skolpmengun helst í hendur við yfirhylmingu.

Enginn er að tala um skolp á Selfossi eða Garðabæ - nema RÚV. En það er talað um skolpspillinguna í borginni.

Þeir sem biðu eftir skolpfréttum í sjöfréttum RÚV urðu fyrir vonbrigðum. Ekkert í helstinu, en jákvæðri frétt um minni mengun í fjöruborðinu var lætt inn í fréttatímann.

Ríkisútvarp vinstrimanna hlýðir auðvitað kalli borgarfulltrúa Pírata, Samfylkingar og Vinstri grænna um að fara ekki í skotgrafirnar.

 

200-föld mengun í Reykjavík

Skolpmengun í Reykjavík er 200-falt yfir leyfilegum hámörkum. Skolpið, s.s. dömubindi, salernispappír og eyrnapinnar, sjást í fjörum nágrannasveitarfélaga.

Vinstrimeirihlutinn í Reykjavík, sem ber ábyrgð á málinu, keppist við að fela sig og kennir öðrum um mengunina.

Björn Bjarnason setur málið í pólitískt samhengi. Vinstrimenn þagga niður umræðu um mengun, sem þeir bera ábyrgð á, en leggja sig í líma við að gera þjóðþrifamál tortryggileg - eins og löggæslu.

Höfuðborgin á betra skilið en að vera á forræði vinstriflokkanna.

Mengunin fór 200 falt yfir mörk

Vinstriöfgamenn

Um 500 lögreglumenn eru sárir og slasaðir eftir árásir vinstriöfgamanna í Hamborg í tilefni af leiðtogafundi G20-ríkjanna. Eignatjón almennra borgara hleypur á milljörðum króna.

Þýskir fjölmiðlar greina frá ítarlegum undirbúningi vinstrimanna að hleypa upp fundi leiðtoganna. Öfgahópar fengu m.a. aðstöðu í þýskum háskólum til undirbúningsins.

Guardian segir kröfur uppi um að sérstökum gagnabanka verði komið upp um evrópska vinstriöfgamenn enda nutu þýskir aðstoðar lagsbræðra og systra til óeirðanna. Slagorð öfgamannanna var ,,velkomin til helvítis."

Einhverra hluta vegna hafa fréttir af uppgangi vinstriöfgamanna lítt komist í fréttir á Íslandi. Kannski vegna þess að þeir eru ekki hægrimenn.

Vinnumenn: tilgáta um orð

Í frétt RÚV um lokun Geirsgötu sagði fréttamaður að ,,vinnumennirnir" væru farnir í mat. Orðið vinnumenn er lítið notað á seinni tíð nema í talmáli barna. Í sveitasamfélaginu gamla þekktist orðið, var m.a. nýtt til aðgreiningar vinnuhjúa frá bændum.

Eftir að launavinna varð algengari, um og eftir miðja 19. öld, tíðkaðist að nota orðið verkamenn og þótti það gjaldgengt fram á síðustu öld. Pólitískar hreyfingar í nágrannalöndum okkar kenndu sig við verkamenn. Í Bretlandi starfar enn Verkamannaflokkurinn (Labour) og á Norðurlöndum heita þeir sama nafni, sbr. Arbeiderpartiet í Noregi.

En þegar Íslendingar stofnuð til sambærilegra flokka fengu þeir viðskeytið alþýða: Alþýðuflokkur og Alþýðubandalag. Hvers vegna ekki Verkamannaflokkur á íslandi?

Í stað orða eins og vinnumaður og verkamaður notum við heldur starfsmenn eða launþegar. Um tíma á síðustu öld var orðið ófaglærður í umferð, sennilega til aðgreina verkamenn frá iðnaðarmönnum.

Hér er tilgáta um hvers vegna vinnumaður/verkamaður er almennt ekki notað. Orðin vísa til stéttskiptingar sem Íslendingar telja sér framandi, með réttu eða röngu. Við notum orð með víða merkingu (starfsmenn eða launþegar) til að forðast orðfæri sem vísar til stéttskiptingar.

 

 

 

Einar Kára, Guðmundur Andri og menntastefnan

Einar Kárason vakti máls á því að skólaganga barna og unglinga fór út af menntaveginum þegar Skólaljóðunum og utanbókarlærdómi var fargað. Guðmundur Andri tekur undir með Einari og telur misráðið að hafa tekið Skólaljóðin af námsskrá.

Skólaljóðin og utanbókarlærdómur í öðrum námsgreinum s.s. landafræði, sögu og náttúrufræði hafði þann kost að hrá þekking festist í minni. Misvel, vitanlega, eins gengur. En það mátti ganga að því vísu að börn úr grunnskóla þekktu tilteknar staðreyndir; ljóð, borgir, ártöl og þróunarkenninguna og fleira af sama tagi.

Menntastefna síðustu áratuga hvarf frá þekkingarviðmiðum til gildisviðmiða. Nú skulu börnin þekkja til lýðræðis, jafnréttis, sköpunar og sjálfbærni.

Mistökin eru þessi: án þekkingar á staðreyndum verða gildin svífandi í lausu lofti, fá enga festingu. Gamla kennsluaðferðin, ítroðslan, var með sínum annmörkum. En án þekkingargrunns verða gildin eins og þangið í ljóði Jóhanns: reikult og rótlaust og rekst um víðan sjá.

Dagur dregur Kjartan í skolpið: nei, takk segir Kjartan

Dagur B. Eggertsson borgarstjóri segir Kjartan Magnússon vera lykilmann í skolpsamsæri vinstrimanna um að láta grunlausan almenning leika sér í mengaðri fjöru Skerjafjarðar innan um dömubindi, notaðan salernispappír og annan úrgang.

Nei, takk segir Kjartan og kveðst fyrst hafa frétt af skolpinu í fjölmiðlum.

Dagur B. og vinstrimenn verða að finna annan blóraböggul.

 

Hafði ekki upplýsingar á undan öðrum

Þúfan heima, Grænland og útlönd

Íslendingar byggðu Grænland fyrir þúsund árum og bjuggu þar að hætti norrænna bænda. Eftir að kólnaði á litlu ísöld lagðist íslenska byggðin af enda ekki lengur hægt að stunda þar búskap að íslenskum hætti.

Danir gerðu tilraun 1729 til að fá 40 til 50 íslenskar fjölskyldur að flytja til Grænlands. Kristrún Halla Helgadóttir segir frá tilrauninni í nýjasta hefti Sögu. Fyrstu viðbrögð Íslendinga voru jákvæð en eftir ígrundun drógu menn sig í hlé og vildu ekki fara.

Löngu síðar, á harðindakafla eftir miðja 19. öld, fluttu landlausar bændafjölskyldur, einkum af Norður- og Austurlandi, til vesturheims.

Íslendingar vilja gjarnan ferðast til útlanda en þeir fara helst ekki úr landi nema í nokkurri vissu um að komast heim aftur.

Þúfan heima er ávallt sú besta.

Íslendingar flykkjast út úr landinu

Knattspyrna, konur og kynjahlutverk

Fyrsta knattspyrnufélag kvenna var stofnað 1914. Rúmlega kynslóð síðar, 1949, spiluðu konur fótbolta til að sýna þær í afbrigðilegu ljósi, segir í viðtengdri frétt.

Hugmyndir um kynjahlutverk breytast hægt en breytast þó. Jafnrétti til náms og embætta var fest í lög 1911 en samt leið meira en hálf öld þangað til fyrsti kvenpresturinn var vígður. Kynjahlutverkin eru ekki alfarið einstefna þar sem konum er haldið niðri. Hvað eru margir karlkyns hjúkrunarfræðingar?

Engu að síður: konur hafa átt á brattann að sækja til að fá sömu tækifæri og karlar að gera það úr lífi sínu sem hugurinn stendur til. Og það er við hæfi að rifja upp kraft og baráttuþrek þeirra kvenna sem lögðu á brattann, eins og ísfirsku stúlknanna 1914.

Áfram Ísland.

 

Stúlkur á Ísafirði brutu ísinn 1914