Hagsmunir Haga og samfélagsins fara ekki saman

Samfélagið hefur hag af því að vita þróun verðlags á lífsnauðsynjum, þ.e. matarverðs. Hagsmunir auðhringsins Haga eru aftur að fela upplýsingar um þróun matarverðs.

Lífeyrissjóðirnir eiga stóran hlut í Högum.

Nú þegar forstjóri Haga stígur fram og segir hagsmuni fyrirtækisins og samfélagsins ekki fara saman er kannski tími til kominn að lífeyrissjóðirnir beiti eigendavaldi sínu og kenni forstjóranum lexíu.

Þjóni ekki hagsmunum Haga

Án rasisma er ekkert lýðræði

Lýðræði varð til með rasisma. Venja er að líta á Aþenu til forna sem vöggu lýðræðisins. Þar bjuggu rasistar, þ.e. aþenskir karlmenn, til fyrsta lýðræðið. Útlendingar höfðu ekki borgaraleg réttindi í Aþenu til forna.

Rasistar voru aftur að verki í frönsku byltingunni. Franskir karlmenn, sem deildu sama tungumáli, sögu og menningu, gáfu heiminum hugmyndina um nútímalýðræði og mannréttindi. Bandaríska byltingin var rasísk í sama skilningi.

Rasismi, eins og orðið er notað í dag, vísar til þess að fólk sem sama tungumál, sögu og menningu vill skipa málum eftir sínu höfði.

Andheiti rasisma samtímans er fjölmenning, sem gerir ráð fyrir að fólk með ólík tungumál, sögu og menningu geti búið til einhvers konar regnbogasamfélag. En fjölmenning er dauð hugmyndafræði, hún einfaldlega virkar ekki..

Angela Merkel, Þýskalandskanslari, bauð hælisleitendur velkomna til Þýskalands. En hún hafði áður lýst gjaldþroti fjölmenningar. Merkel bauð hælisleitendum til Þýskalands og vill að þeir semji sig að síðum og háttum Þjóðverja - verði þýskir.

Enginn kallar Merkel rasista þótt hún krefjist þess að útlendingar semji sig að þýskum gildum. Það er vegna þess að eldri merkingu orðsins, um yfirburði hvíta kynstofnsins, var hrint í framkvæmd af forvera Merkel, Adolf Hitler, með geigvænlegum afleiðingum.

Einmitt vegna þessarar tvöföldu merkingu orðsins þykir henta að nota það sem skammaryrði. En hugtakið, eins og það er notað í dag, vísar aðeins til hversdagslegra sanninda; að fólk með sömu tungu, sögu og menningu þarf til að setja saman sæmilega réttlátt og friðvænlegt samfélag.

 

Stolnar stríðsminningar

Bretar minnast aldarafmælis orustunnar við Passchendaele, þar sem bandamenn, Bretar og Frakkar, börðust við Þjóðverja í fyrri heimsstyrjöld.

Áður en yfir lauk, í nóvember, voru dauðir og særðir um hálf milljón. Orustan, líkt og margar aðrar á vesturvígstöðvunum í fyrra stríði, var tilgangslaus; víglínan breyttist sáralítið.

Bretar telja sig hafa fært fórnir í Passchendaele í þágu Frakka. Bretar tóku þátt í fyrra stríði til að hjálpa Frökkum, sem ólmir vildu stríða við Þjóðverja til að hefna tapsins frá 1870, en þá hirtu Prússar af þeim héruð og stofnuðu til þýska ríkisins.

Bretum sárnar að þeir fornu fjendur, Frakkar og Þjóðverjar, taka höndum saman að minnast Passchendaele til að auka vegsemd Evrópusambandsins.

Evrópusambandið er, þrátt fyrir allt, ekki stofnað fyrr en eftir seinna stríð. En sá sem fór með aðalhlutverkið var lítilsigldur liðþjálfi í fyrra stríði. Og hefðu Þjóðverjar unnið það stríð myndu þeir hafa stofnað Evrópusamband meginlandsþjóða - og ekkert pláss fyrir liðþjálfann Hitler í Evrópusögunni.

Trú, útrás og hrun

Trúarlegt stef er á heiti rökkóperu um hrunið; Guð blessi Ísland. Til að skilja hrunið þarf að glöggva sig á útrásinni, sem var aðdragandi hrunsins.

Partíin, sem ku vera þemu rokkóperunnar, voru því aðeins möguleg að meðhlauparar í stétt fjölmiðlamanna gerðu útrásarvíkinga að goðsögum í lifanda lífi. Útrásarskáldið Hallgrímur Helgason kallaði auðmennina ,,bestu viðskiptasyni Íslands."

Meðhlaupararnir hljóta a.m.k. að fá aukahlutverk í rokkóperunni. Annað væri helgispjöll.

 

Rokkóperan Guð blessi Ísland

Réttmæt athugasemd Sigmundar Davíðs

Aðalhöfundurinn að skuldaleiðréttingu heimilanna og glæsilegustu ríkisfjármálaaðgerð sögunnar, uppgjöri Íslands við þrotabú föllnu bankanna, er Sigmundur Davíð Gunnlaugsson fyrrverandi forsætisráðherra. Hann skrifar pistil um ráðstafanir sem ríkisstjórn hans gekkst fyrir í eftirmálum hrunsins.

Í pistlinum fjallar Sigmundur Davíð um uppgjör við einstaka flokka kröfuhafa föllnu bankanna. Hann segir:

Það er athygli vert, í þessu sambandi, að enginn íslenskur stjórnmálamaður sem hagnaðist sjálfur eða átti ættingja sem höfðu hagsmuna að gæta, til dæmis eignir í peningamarkaðssjóðum, sá nokkurn tímann ástæðu til að greina frá þeim hagsmunum á meðan verið var að taka ákvarðanir um tilfærslur sem vörðu milljónir, tugi- eða hundruð milljóna.

Ekki nóg með það heldur kepptust fjölmiðlar við að þagga niður upplýsingar um hverjir högnuðust á þessari aðgerð.

En þegar kom að því að gera störf Sigmundar Davíðs tortryggileg, með Panama-skjölunum, kom annað hljóð í strokkinn.

Panama-skjölin, sem raunar liggja ekki á lausu, voru pólitísk aðgerð til að koma höggi á Sigmund Davíð, sem hafði fórnað hagsmunum eiginkonu sinnar, en hún átti kröfur, líkt og þúsundir annarra, í þrotabú föllnu bankanna.

RÚV, öðrum fjölmiðlum framar, sá til þess að aðför var gerð að Sigmundi Davíð vegna þess að hann tók almannahagsmuni fram yfir einkahagsmuni.

Brexit skilar Bretum betri lífskjörum

Hagvísar í Bretlandi sýna að efnahagurinn batnaði eftir að Bretar ákváðu að segja sig úr Evrópusambandinu. Daniel Hannan rekur þróun mála í samantekt í New York Times.

Starfsmenn ESB í stofnunum í Bretlandi kjósa með fótunum, vilja ekki flytja úr Bretlandi.

Bretar fá viðskiptasamning við Bandaríkin, um leið og þeir losna úr viðjum ESB. Írar gætu rennt hýru auga til samningsins.

En Írar, sem sagt, eru með evruna og hún er enn í sóttkví.

Jaðarpólitíkin á milli Sjálfstæðisflokks og Vinstri grænna

Sjálfstæðisflokkur og Vinstri grænir eru pólarnir í íslenskum stjórnmálum, séð frá hægri til vinstri, þótt hvorugur sé fjarri miðjunni. Á milli þessara tveggja flokka eru jaðarflokkar sem fiska fylgi í misgruggugu vatni.

Síðustu mælingar sýna að tveir jaðarflokkar, Viðreisn og Björt framtíð, féllu af þingi ef kosið yrði núna. Ungt stjórnmálaafl, Flokkur fólksins, kæmist inn á þing.

Það er mótsagnakennt að jaðarpólitíkin skuli þrífast á milli pólanna. Eina meginályktun má draga af þessari staðreynd. Hún er að almenn sátt sé um meginþætti stjórnmálanna, s.s. efnahagsmál, stjórnskipun og stöðu Íslands í samfélagi þjóðanna.

Önnur ályktun, léttvægari, er að sjálfhverfustjórnmál (ég, um mig, frá mér, til mín) eru í innbyrðis samkeppni. Björt framtíð er fyrir letingjana, sem vilja fá allt ókeypis upp í hendurnar; Viðreisn er málssvari frjálslyndrar alþjóðahyggju; Samfylkingin stendur með sérfræðingum sem vilja vinnu í Brussel; Flokkur fólksins talar fyrir þeim afskiptu í góðærinu og Píratar ímynda sér að ný stjórnarskrá sé allra meina bót.

Jaðarpólitíkin er kvik og ekki á vísan að róa með fylgi. Eins og Píratar komust að raun um við síðustu kosningar.

Dauði lýðræðisins - frjálshyggju kennt um

Lýðræðið er að deyja og flestum virðist standa á sama, skrifar rithöfundurinn og álitsgjafinn Paul Mason í Guardian. Hann tíundar dæmi frá Bandaríkjunum, Tyrklandi, Kína, Rússlandi, Venesúela, Póllandi og Ungverjalandi um hnignandi lýðræði.

Meginástæðuna fyrirsjáanlegs dauða lýðræðisins, segir Mason, er markaðsfrjálshyggja sem mælir mannréttindi með stiku hagfræðinnar. Gegn frjálshyggju teflir Mason fram hugmyndinni um algild og óframseljanleg náttúruleg mannréttindi.

Röksemdafærsla Mason er einfeldningsleg. Fyrir það fyrsta er markaðsfrjálshyggja ekki ráðandi í neinu þeirra ríkja sem hann nefnir, nema e.t.v. í Bandaríkjunum.

Verstu mistökin í rökfærslunni eru samt þau að Mason gefur sér að lýðræði sé eitt sniðmát. Svo er ekki. Lýðræði óx fram við sérstakar sögulegar kringumstæður í afmörkuðum heimshluta, sem við köllum vesturlönd. Jafnvel innan vesturlanda er útfærslan á lýðræði með ólíkum hætti. Frakkland og Bandaríkin búa að miðstjórnarhefð í gegnum forsetaembættið en hlutur þingsins er stærri í Bretlandi og Þýskalandi - þó á gangólíkum forsendum.

Sameiginlegt einkenni lýðræðisins er að það svarar vilja þess almennings sem það á að þjóna. Til að það gangi eftir þarf einhver lágmarkssamheldni að ríkja meðal viðkomandi almennings. Tungumál, saga og menning mynda samheldnina.

Til að hugmyndin um algild mannréttindi nái fram að ganga þarf alheimsstjórn, alheimslýðræði, alheimstungumál og alheimsmenningu. En engu slíku er til að dreifa og verður ekki í fyrirsjáanlegri framtíð. En það er hægt að auka samheldni samfélaga, og þar byrjum við heima hjá okkur.

Benedikt, Björt; raðbilun hjá Viðreisn-Bjartri framtíð

Benedikt Jóhannesson fjármálaráðherra og formaður Viðreisnar á að segja af sér, eftir að hann lýsti sig óviljugan að standa með lögeyri landsins, krónunni.

Björt Ólafsdóttir ráðherra og samflokksmaður Benedikts í bandalaginu Viðreisn-Björt framtíð kennir feðraveldinu um stórfelldan dómgreindarskort af sinni hálfu þegar hún auglýsti fatnað í sölum alþingis.

Pólitísk raðbilun í bandalagi Viðreisnar-Bjartar framtíðar sýnir svart á hvítu að þessi stjórnmálasamtök eru ekki í neinum tengslum við hversdagslegan veruleika. Burt með Benedikt og burt með Björtu.

Sýndi dómgreindarleysi með myndatöku

Vinstrimenn og stjórnlagaþing: Ísland - Venesúela

Líkt og vinstristjórnin í Venesúela efndi vinstristjórn Jóhönnu Sig. 2009-2013 til stjórnlagaþings. Rökin eru þau sömu: ,,til að koma á friði í kjöl­far átaka, mót­mæla og póli­tískr­ar patt­stöðu."

Hæstiréttur Íslands ógilti kosningarnar til stjórnlagaþings vegna annmarka við framkvæmd þeirra. Þá ákvað ríkisstjórn vinstrimanna í Reykjavík að búa til stjórnlagaráð, sem fékk það verkefni að stúta stjórnarskránni.

Með umorðun frá borgarskáldinu: hjörtum vinstrimanna svipar saman í Caracas og Reykjavík 101.

Lýsa yfir áhyggjum af dalandi lýðræði