Samfylkingin og glæpir

Á alþingi, undir liðnum störf þingsins

tók Helga Vala Helga­dótt­ir úr Sam­fylk­ing­unni til máls og skoraði á rík­is­stjórn­ina að bregðast við mann­eklu og fjár­skorti lög­reglu­embætta lands­ins vegna upp­gangs skipu­lagðar glæp­a­starf­semi.

Til skamms tíma var Samfylkingin full andúðar á lögum og reglu. En nú vill fylkingin taka fast á glæpum og misindismönnum, einkum þeim sem skolar á land. Verjum landamærin og aukum löggæslu.

Samfylkingin er veðurviti íslenskra stjórnmála. Nú blása íhaldsvindar og fylkingin ekur seglum til að njóta byrjar.

Vill aldurstakmörk á snjallsíma og samfélagsmiðla

Kolbeinn hjálpar Loga að klekkja á Katrínu

Kol­beinn Ótt­ars­son Proppé þingmaður Vinstri-grænna færir Loga formanni Samfylkingar skotfæri þegar hann gerir því skóna að hagsmunahópar stjórni landinu en ekki lögmæt stjórnvöld.

Með aðstoð Kolbeins gerir Logi Katrínu forsætis að leikbrúðu hagsmunahópa.

Kolbeinn er fimmta herdeild Samfylkingar í liði Vinstri grænna.

 

Segir Katrínu gera lítið úr orðum seðlabankastjóra

RÚV-tilræði gegn Morgunblaðinu

Fréttamaður RÚV, Sigríður Dögg Auðunsdóttir, beið ekki boðanna þegar hún hlaut kjör sem formaður Blaðamannafélags Íslands. Fyrsta verk nýkjörins formanns var að vega að lífsafkomu blaðamanna Morgunblaðsins vegna þess að blaðið birti auglýsingu frá Samherja.

RÚV, vitanlega, slær málinu upp.

Krafa Sigríðar Daggar, og þar með Blaðamannafélagsins, er að fjölmiðlar birti ekki auglýsingar sem eru í andstöðu við hagsmunahópinn á Efstaleiti.

RÚV er ríkisrekinn fjölmiðill og vill enga samkeppni, hvorki í ritstjórnarefni né á auglýsingamarkaði. Einn fjölmiðill, einn auglýsingamarkaður - og enginn má gagnrýna Helgan Seljan Sannleika.

Pírataspilling

Píratar reka stofnun, Transparancy International, TI, til að vekja athygli á spillingu. Þingmannsefni flokksins, t.d. Halldór Auðar Svansson, skrifa skýrslur um spillingu annarra undir merkjum TI og koma svo undir eiginnafni og Pírata og bjóðast til að lagfæra meinta spillingu.

Það heitir að villa á sér heimildir, sem spillt fólk temur sér einatt.

Í viðtengdri frétt um nýráðinn framkvæmdastjóra IT segir

Sam­tök­in Tran­sparency In­ternati­onal voru stofnuð árið 1992 og hafa um langa hríð verið ein stærstu alþjóðlegu sam­tök­in sem vinna að heil­ind­um í stjórn­sýslu og viðskipta­lífi... (undirstrikun pv)

Eru það heilindi að ljúga til sín prófgróður úr háskólum, líkt og þingmenn Pírata hafa gert?

Skiljanlega vilja Píratar lögleiða neyslu kannabisefna. Jónur og hassreykingar gera menn sljóa og dómgreindarlausa. Aðeins í vímu dettur einhverjum í hug að kjósa yfir sig óheilindakrákur Pírata.

Atli Þór ráðinn framkvæmdastjóri Íslandsdeildar TI

Dópistar og fangar með Vinstri græna í vasanum

Vinstri grænir ganga erinda tveggja hagsmunahópa, fíkniefnaneytenda og fanga, þegar flokkurinn smíðar lagafrumvarp sem lögleiðir fíkniefni.

Heilbrigðisráðherra hreykir sér af baráttunni við Kínaveiruna en vill samtímis lögleiða heilsufarsvá sem drepur fleiri og leggur enn fleiri líf í rúst en veiruskrattinn. Kínaveiran leggst einkum á gamlingja en fíkniefni eyðileggja æskuna. Hvers á unga fólkið að gjalda?

Rök dópista fyrir lögleiðingu fíkniefna er að þeir eigi rétt á að eyðileggja eigið líf og sinna nánustu. Þetta eru sömu rökin og þau sem notuð eru gegn sóttvörnum. Maður á ekki að þurfa að sæta sóttkví, og enn síður einangrun, því það skerðir persónulegt frelsi manns. Í báðum rökfærslunum skiptir einstaklingurinn öllu máli en samfélagið engu. Þetta er frjálshyggja andskotans og Vinstri grænir hafa kokgleypt hana.

Rök fanga fyrir lögleiðingu fíkniefna eru sérlega áhugaverð. Í umsögn Afstöðu, hagsmunahóps fanga, segir: 

Refs­ing­ar fyr­ir smá­vægi­leg vímu­efna­brot geta ein­göngu orðið til þess að fólk með vímu­efna­vanda fest­ist í viðjum vímu­efna til lang­frama.

Ef við breytum orðalaginu, tökum út ,,smávægileg vímuefnabrot" og setjum inn ,,smávægileg lögbrot" fáum við röksemdafærslu sem segir að ekki skuli refsa fyrir minniháttar lögbrot. Annars festist glæpamaðurinn ,,í viðjum glæpa til langframa." Sá sem nauðgar smávegis skal ekki að sæta refsingu því hann myndi þá nauðga til langframa. Þjófur sem stelur smávegis á heldur ekki að komast undir manna hendur, við það yrði hann stórþjófur.

Röksemdin er bull, líklega smíðuð í vímu.

Það liggur fyrir hvers vegna Vinstri grænir eru komnir í vasa hagsmunahóps dópista og fanga. Hugmyndin um lögleiðingu fíkniefna er komin frá Pírötum sem eru vettvangur fáráðlinga í röksemdafærslum. Samkeppni við fáráðlinga endar aðeins á einn veg. Í fávitahætti. Lögleiðing fíkniefna er einmitt það.

Læknafélagið mótfallið afglæpavæðingu

Ásgeir seðlabankastjóri: fjölræði á Íslandi

,,Fjölbreyttur hópur hagsmunaaðila" er áhrifamikill í stjórnkerfi landsins, segir Ásgeir Jónsson seðlabankastjóri. Ástæðan sé ,,veikt miðstjórn­ar­vald" þ.e. ríkisvald.

Ásgeir er þarna að lýsa fjölræðisríki þar sem samfélagsvaldið dreifist á marga aðila, eða ,,hagsmunahópa" eins og vinsælt er að kalla þá núna. Andstæðan við fjölræði er einræði. Varla er nokkur sem óskar sér einræðis. Á milli fjölræðis og einræðis liggur fáræðisvald, þar sem fámennir hópar, t.d. aðalsmenn eða auðmenn, hafa forræði til lands og sjávar. Ekki er það góður kostur.

Fjölræði er, líkt og lýðræði, skásta fyrirkomulagið.

Hvað eru menn þá að væla um vald hagsmunahópa?

Jú, vegna þess að einn hagsmunahópurinn, kenndur við Efstaleiti, vill fá aukið vald til sín að skilgreina samfélagið. RÚV er síðast í dag að klappa þann stein að maðkur sé í mysunni og kallar fjármálaráðherra til yfirheyrslu. Við þurfum gagnsæi, segir Bjarni.

Mun RÚV taka það til sín og streyma beint af ritstjórnarfundum þegar fréttaefni dagsins eru ákveðin? Fær almenningur vitneskju um mat fréttamanna RÚV á trúverðugleika heimilda. Mun RÚV útskýra hvers vegna siðareglur stofnunarinnar eru aðeins til skrauts og engar afleiðingar fylgja því að brjóta þær?

Nei, hagsmunahópurinn á Efstaleiti er leyndarhyggjan uppmáluð og spyr hvorki kóng né prest þegar opinber saksókn hefst með ásökunum um að þessi eða hinn sé sekur um spillingu eða aðra óhæfu.

RÚV-hagsmunahópurinn þykist tala í nafni almennings en hefur ekkert umboð til þess né fylgja því afleiðingar þegar starfsmenn RÚV brjóta af sér. Á Efstaleiti er ekkert gagnsæi og algjört ábyrgðarleysi.

RÚV lifir á framlögum almennings, ríkissjóði, en þarf aldrei að standa almenningi reikningsskil gjörða sinna. Helsta baráttumál RÚV á seinni árum er telja þjóðinni trú um Ísland sé martraðarríki þar sem allt logi í spillingu og óþverraskap. Við sem búum þetta land fáum ekki rönd við reist þótt við vitum betur. RÚV er óþarfasti hagsmunahópurinn sem þrífst í fjölræðinu á Íslandi.

Margir hagsmunahópar fyrirferðarmiklir

Frelsið á bakvið grímu

Sóttvarnir auka frelsi einstaklingsins til að hylja ásjónu sína samborgurum. Á bakvið grímuna er einstaklingurinn frjálsari til að vera hann sjálfur og fela sig hnýsnum augum. Með grímu vex einnig öryggistilfinning. Allir verða sumpart eins. Einkennisklæðnaður sýnir samstöðu.

Hugsuninni varpar heimspekingurinn Matthew B. Crawford fram í lok samtals á Unheard þegar hann veltir fyrir sér hvers vegna sumum á heimaslóðum hans, í Kaliforníu, virðist líða vel með grímuskyldu.

Kalifornía er háborg frjálslyndis í Bandaríkjunum. En það eru einmitt frjálslyndir, bæði þar vestra og víðar á vesturlöndum, sem eru hvað ákafastir talsmenn samfélagslokana í nafni sóttvarna. Og þeim sem á annað borð er hleypt út undir bert loft skal svo sannarlega skylt að bera grímu í almannarýminu.

Pælingin er að vestrænt frjálslyndi er komið með upp í kok af taumlausu frelsi og vill samræmt göngulag fornt með stífum reglum og viðurlögum. Og grímuskyldu - vitanlega.

Ef sá bandaríski hittir þarna naglann á höfuðið mun Kínaveiran umskapa frjálslyndi í íhaldssemi. Tilfallandi athugasemdir misstu ekki svefn yrði sú raunin. 

Kolbeinn grefur undan Katrínu Jakobsdóttur

Fréttamaður RÚV sakaði Katrínu Jakobsdóttur um ,,hræsni" þegar hagsmunahópurinn á Efstaleiti fékk ekki lagafrumvarp um sakaruppgjöf svikulla embættismanna. Kol­beinn Ótt­ars­son Proppé þingmaður Vinstri-grænna tekur undir árásir RÚV á Katrínu þegar hann reynir að fá seðlabankastjóra í lið mér sér að lagfæra hlut svikula embættismannsins sem gerði samsæri með RÚV gegn Samherja.

Kolbeinn reyndi nýverið að auka metorð sín í Vinstri grænum og bauð sig fram til forystu í Suðurkjördæmi. Honum var hafnað og þá leitar kappinn aftur til höfuðborgarinnar. Þingmaðurinn gerði ráðherra flokksins að skotspæni, kallaði umhverfisráðherra ,,lufsu."

Og núna er það Katrín Jakobsdóttir sem fær að finna fyrir metorðagirnd Kolbeins. Í bandalagi með hagsmunahópnum á Efstaleiti telur Kolbeinn sér allir vegir færir. Spyrjum að leikslokum.

Ásgeir vildi ekki mæta fyrir þingnefnd

Vænt fólk, Pólverjar

Pólverjar hafa flust til Íslands svo þúsundum skiptir frá aldamótum eða þar um bil. Einnig hafa komið hingað stórir hópar fólks frá Eystrasaltslöndum.

Nægileg reynsla er komin á búsetu Pólverja, Letta, Litháa og Eista til að slá föstu að upp til hópa er þetta vænt fólk sem bætir samfélagið.

Þótt einhverjir hnökrar komi á samskiptin, t.d. vegna misskilnings, er engin ástæða til að ætla annað en að nýbýlingarnir semji sig að siðum og háttum landsmanna. 

„Þessi umræða fór aðeins of langt“

Þöggun með umræðu

Vandamálið með tjáningu í heimi félagsmiðla er að þeir sem vita og kunna þegja en hinir sem hafa ekkert gagnlegt fram að færa eru óðamála.

Offramboð er af skoðunum en þekking er af skornum skammti. Tilfinningar trompa röksemdir. Upphlaup fá athygli en vandaður málflutningur er sniðgenginn. 

Félagsmiðlar, fjölmiðlar meðtaldir, ýkja þann vanda sem fylgir mannlegum tjáskiptum. Óhemju magn upplýsinga og álita eru í umferð. Þegar frétt eða skoðun rekur á fjörur manns þarf að spyrja. Er mælt af heilum hug? Eru duldir hagsmunir að baki? Er heimildin, ef um hana er að ræða, trúverðug? Er röklegt samhengi? Það tekur tíma og þjálfun að greina hismið frá kjarnanum. Fæstir hafa nennu til þess og venja sig á að taka eitthvað gott og gilt en hafna öðru.

Ekki bætir úr skák að á seinni tímum ber á þeim menningarsjúkdómi að til sé eitthvað sem heitir ,,minn sannleikur." Ef sannleikur er á annað borð til getur hann ekki verið ,,minn" eða ,,þinn", - aðeins sannleikur.

Svo nýlegt dæmi sé tekið þá stendur RÚV fyrir umræðu þessa dagana þar sem hrært er saman meintri þöggunarmenningu og áhrifum hagsmunahópa. Allir eldri en tvævetra vita tilefnið. Helgi Seljan fréttamaður RÚV var dæmdur brotlegur við siðareglur. Þegar lélegasta málsvörn lýðveldissögunnar var afhjúpuð fór RÚV í yfirgír að kenna samfélaginu um ófarir hagsmunahópsins á Efstaleiti.

RÚV mælir ekki af heilum hug, er með dulda hagsmuni, styðst við ótrúverðugar heimildir og röklegt samhengi er allt undir yfirborði umræðunnar. Það er ekki til neinn Efstaleitissannleikur þótt raðfréttir séu sagðar af honum.

RÚV stundar það sem málóðir fundarmenn komust upp með fyrr á tíð. Að drepa málum á dreif með hávaða og upphrópunum. Þöggun með umræðu.

Umboðsmaður hættir athugun á tjáningarfrelsi