Tveir hægriflokkar, hvert fer Sigmundur Davíð?

Dagar Miðflokksins virðast taldir. Innganga Birgis Þórarinssonar í Sjálfstæðisflokkinn skilur eftir þrjá möguleika fyrir Sigmund Davíð, stofnanda og formann Miðflokksins.

Birgir er þriðjungur þingflokks Miðflokksins. Hann fær höfðinglegar móttökur í Sjálfstæðisflokknum og hefur heilt kjörtímabil að gera sig gildandi. Ásamt, að því er virðist, geysiöflugum varaþingmanni sínum, Ernu Bjarnadóttur.

Fyrsti möguleiki Sigmundar Davíðs er að halda í humátt eftir Birgi og taka sér bólfestu í Sjálfstæðisflokknum, móðurflokki hægrimanna. Ekki er að efa sjálfstæðismenn tækju Sigmundi Davíð fagnandi - margir kusu hann.

Framsóknarflokkurinn er uppeldisstöð Sigmundar Davíðs. Faðir hans var þingmaður um tíma á þeim bæ. Undir formennsku Sigmundar Davíðs varð Framsóknarflokkurinn jafn stór Sjálfstæðisflokknum í kosningunum 2013. Ef Framsóknarflokkurinn hefur metnað byði hann týnda soninn velkominn heim.

Þriðji möguleiki Sigmundar Davíðs er að sitja áfram í tveggja manna þingflokki, hann gerir það hvort eð er um sinn, og safna liði. Það er gerlegt. Inga Sæland fór úr tveggja manna þingflokki upp í sex þingmenn í nýafstöðnum kosningum.

Hægrimenn eru meiri félagshyggjumenn en vinstrimenn. Þeir vilja starfa í félagslegu neti stærri flokka með bakland í ólíkum þjóðfélagshópum. Vinstrimenn eru meira í pólitíska einkaframtakinu. Píratar eru fáeinar fjölskyldur; sósíalistar eru Gunnar Smári og Viðreisn fjandvinirnir Tobba Kata og Benni. Meiri líkur en minni eru að vistaskipti Birgis boði frekari tíðindi á hægri væng stjórnmálanna.

Birgir skilur við Miðflokkinn

Þolendamenningin, skjól fyrir gerendur

Stjúpmóðirin er ,,sek um rang­ar sak­argift­ir, en hún kærði pilt­inn upp­haf­lega og sagði hann hafa nauðgað henni og áreitt kyn­ferðis­lega á um­ræddu tíma­bili."

Þarna er dæmi um geranda sem leitar skjóls í þolendamenningunni.

Mun Twitter-múgurinn rísa á afturlappirnar og gelta?

Trauðla.

Misnotaði sambúðarbarn sitt

Nýr fjölmiðill 24.is

Eftir helgi ætlar nýr fjölmiðill að hefja starfsemi. 24.is heitir hann, Á heimasíðunni segir að miðillinn sé ,,frétta- og mannlífsmiðill."

Af fáorðri kynningu má ráða að þeir sem standa á bakvið séu ekki ókunnugir blaðamennsku. En kannski bara flinkir textasmiðir. Nokkur munur þar á.

Sjáum til.

Pólsk lög ofar ESB-lögum

Pólverjar gefa til kynna væntanlega úrsögn úr Evrópusambandinu með úrskurði stjórnlagadómstóls þar í landi um að pólsk lög gangi framar lögum ESB.

ESB hefur horn í síðu Pólverja fyrir að lúta ekki forræði Brussel í veigamiklum málum t.d. er varðar viðtöku múslímskra flóttamanna.

Eftir úrsögn Breta úr ESB, Brexit, styrktist staða Póllands á austurlandamærum Evrópusambandsins. Bæði er að ESB má illa við fleiri úrsögnum, Ungverjar eru einnig Brussel óþægur ljár í þúfu, og svo líka hitt að í austri situr Pútín yfir rússneskum náttúruauðlindum. ESB þarf náttúruauðlindirnar en er illa við rússnesk áhrif. Pólskur óstöðugleiki styrkir Pútín.

Litlar líkur eru á úrsögn Pólverja úr ESB til skemmri tíma. En ESB er ekki stætt á öðru en að hemja sígræðgina eftir fullveldi aðildarríkja sinna.

Mannréttindi að vera þingmaður? Lýðræðið segir nei

Einstaklingar, sem um stund voru þingmenn vegna mistaka í talningu, kæra endurtalningu sem leiddi til réttar niðurstöðu.

Alþingiskosningar eru listakosningar, ekki einstaklingskjör. Við veljum ekki á milli einstaklinga heldur framboðslista.

Þau Lenya Rún Taha Karim Pírati í Reykjavíkurkjördæmi, Guðmund­ur Gunn­ars­son, fram­bjóðandi Viðreisn­ar og Rósa Björk Brynj­ólfs­dótt­ir, í Sam­fylk­ing­au eru í raun að kæra sig til þingmennsku á kostnað samflokksmanna sinna sem fengu kjör. Magnús Örn Norðdahl, odd­viti Pírata í Norðvest­ur­kjör­dæmi, vill einfaldlega ekki una lýðræðislegri kosningu.

Í lýðræði eru það ekki mannréttindi að verða þingmaður.

 

Lenya skilar kæru til kjörbréfanefndar

Öreigabolti, ofurríkir og mannréttindi

Fótbolti var öreigasport í öndverðu. Enskir verkamenn báru íþróttina til Suður-Ameríku. Hundrað árum síðar er boltaspark þeirra bestu elítuíþrótt. Drengir á fermingaraldri eru seldir og keyptir til að verða fótboltaguðir á ofurlaunum.

Ofurríkir vilja hlutdeild í sviðsljósinu og kaupa sér sparklið. (Íslenskir lífeyrissjóðir keyptu Stoke og Björgólfur eldri West Ham).

Sádar, sem reka múslímskt ættarveldi kennd við Arabíu, eru í þann veginn að kaupa liðið í KR-búningunum, Newcastle.

Og þá er spurt mannréttindi. Smá ves með þau. Á leiðinni frá öreigabolta til ofurlauna og ríkidæmis sagði fátt af mannréttindum.

Eru ekki annars mannréttindi að komast í álnir?

 

Ekki stafkrókur um mannréttindi

Guð blessi Ísland 13 ára

Ræða Geirs H. Haarde þáverandi forsætisráðherra, Guð blessi Ísland, er komin á fermingaraldur. Ræðan eldist vel. Í henni má lesa sögu dramatísku sólarhringana fyrir hrun bankanna.

Af þeim sökum gat ég þess í gærkvöldi að það væri mat mitt og ríkisstjórnarinnar að ekki væri ástæða til sérstakra aðgerða af okkar hálfu. Engin ábyrg stjórnvöld kynna afdrifaríkar aðgerðir varðandi banka- og fjármálakerfi sinnar þjóðar nema allar aðrar leiðir séu lokaðar.

Þessi staða hefur nú í dag gerbreyst til hins verra. Stórar lánalínur við bankana hafa lokast og ákveðið var í morgun að loka fyrir viðskipti með bankastofnanir í Kauphöll Íslands.

Nú reynir á ábyrg og fumlaus viðbrögð. Ég mun nú á eftir mæla fyrir frumvarpi á Alþingi sem mun gera ríkissjóði kleift að bregðast við því ástandi sem nú er á fjármálamörkuðum.

Banka- og efnahagshrunið 2008 tók fljótt af, var mælt í vikum og mánuðum. Aftur situr enn í okkur pólitíska og siðferðilega lexían sem draga má af hruninu. Svokallaða.

Geðræn vandamál og loftslagsvá

Bölsýni bætir ekki geðræn vandamál. Ekki heldur heimsendaspár um að siðmenningin sé á bjargbrúninni vegna manngerðra loftslagsbreytinga. Slök geðheilsa batnar ekki við síbylju um að jörðin sé að farast.

Áróðurinn um loftslagsvá byrjaði 1988 vestur í Bandaríkjunum. Annar meginflokkur þarlendra stjórnmála, Demókratar, tók upp á sína arma þá trú að manngerð hlýnun næstu þrjá áratugi yrði 1,4 gráður á Celcius. Í reynd var hlýnunin 0,49 gráður. Fyrir þúsund árum var 1,5 gráðu hlýrra en í dag. Síðustu tæpu 7 ár hefur engin hlýnun mælst. Núll.

Síbyljan um manngerða hamfarahlýnun er röng. Sannanlega. Það er ábyrgðahluti að stuðla að eymd og vanlíðan með skáldskap um yfirvofandi hrun siðmenningar vegna manngerðs veðurfars. Loftslag lýtur náttúrulegum breytingum og hefur alltaf gert.

Vilja fá geðheilbrigðismál í stjórnarsáttmála

Trausti mátar RÚV og Fréttablaðið

RÚV reyndi að telja fólki trú um að skriðuföll nyrðra, á Tröllaskaga og Kinnarfjöllum, séu vegna manngerðra loftslagsbreytinga. Fréttablaðið hjó í sama knérunn. Björk Thunberg skrifaði í leiðara að þá ,,mun meiri hlýnun hafa skelfilegar afleiðingar fyrir jarðarbúa."

Bæði RÚV og Fréttablaðið velta sér upp úr því að annað eins veður hafi ekki sést þar nyrðra í ,,60-70 ár." Þegar elstu menn muna ekkert víðlíka hlýtur skýringin að vera manngerðar loftslagsbreytingar á seinni tíð. En, nei, aldeilis ekki.

Trausti Jónsson veðurfræðingur rifjar upp að skriðuföll eftir rigningar í september gerðu usla á sömu slóðum árið 1863, fyrir tæpum 160 árum, og vitnar í samtímafrásagnir um tjón á húsum og búsmala.

Fyrir hálfri annarri öld var sem sagt líka til manngert veðurfar, samkvæmt snillingunum á Efstaleiti og á Fréttablaðinu.

Ef náttúran gæti hlegið lægi hún í hláturskrampa yfir heimsku mannanna.

 

Landsliðið verndað gegn árangri

Kjölfestan í íslenska landsliðinu og fyrirliði, Aron Einar Gunnarsson, var ekki valinn í hópinn til að þóknast Stígamótafasistum sem gefa út yfirlýsingu um hverja megi velja í landsliðið og hverja ekki.

KSÍ lætur nokkrar illa gerðar hræður út í bæ segja sér fyrir verkum. Rökin eru þau að ,,vernda þurfti liðið." Fyrir hverju? Karlhöturum í Stígamótum? Stelpum í leit að sykurpabba?

Það er óþarfi að vernda Stígamótalandsliðið gegn árangri. Hann verður hvort eð er aldrei neinn.

 

Tókum ákvörðunina til að vernda liðið