Vörn Pálma sakfellir Jón Ásgeir

Pálmi í Fons bar aldrei ábyrgð á Glitni og af því leiðir er ekki við hann að sakast þótt bankinn hafi verið rændur innan frá. Efnislega á þessa leið er vörn Pálma. Með orðum lögfræðings viðskiptafélaga Jóns Ásgeirs

Pálmi gegndi aldrei formlegri stöðu hjá Glitni, hvorki sem stjórnarmaður eða starfsmaður. Öll viðskipti fyrirtækja, sem hann hefur verið í fyrirsvari fyrir, við bankann hafa verið armslengdar viðskipti. Hafa verður í huga við yfirferð yfir gögn málsins, að í viðskiptum sínum og félaga sem hann hefur stjórnað hefur Pálmi aldrei ekki haft neina skyldu til að gæta sérstaklega að hagsmunum Glitnis.

Þjófnaður í ,,armslengd" er óhugsandi, er það ekki?

 

Segir að Glitnir sé að höfða tvö mál vegna sömu sakargifta

Örvæntingarfull leit að réttlætingu

Samfylkingin reynir marga spuna til að réttlæta atkvæðahönnun sem leiddi til þess að Geir H. Haarde var látinn bera sök samfylkingarráðherra hrunstjórnarinnar. Einn spuninn er að fyrir atkvæðagreiðsluna hafi verið þreifingar í um myndun nýrrar ríkisstjórnar Sjálfstæðisflokks og Samfylkingar.

María Kristjánsdóttir telur jafnvel eitthvað til í þessum spuna sem Ólafur Arnarson kom á framfæri. María ætti að íhuga eftirfarandi málsgrein í texta Ólafs

Fólk í innsta gafli Samfylkingarinnar hefur lýst því yfir við mig í dag, að það hafi einmitt verið tilgangurinn með atkvæðagreiðslunni í gær. Vinstri armur Samfylkingarinnar má ekki til þess hugsa að flokkurinn starfi með Sjálfstæðisflokknum og þess vegna hafi atkvæðagreiðslan í gær verið skipulagt skemmdarverk.

Með leyfi: ,,Vinstri armur Samfylkingarinnar" er skáldskapur á borð við ,,auðmannahópur Vinstrihreyfingarinnar græns framboðs." 

Endurvakin hrunflokkastjórn er órar fólks sem leitar að réttlætingu fyrir svívirðilegi framkomu þingflokks Samfylkingarinnar. Spunafabrikka Samfylkingarinnar má reyna eins og hún getur en skömm þingmanna flokksins verður ævarandi.

 

 

Jón Ásgeir, blaðamenn og valdið

Jón Ásgeir Baugsstjóri segir farir sínar ekki sléttar í fréttatilkynningu sem birtist fyrst í einum af fjölmiðlum í eigu hans. Hann telur slitastjórn bankans sem hann rændi innan frá leggja sig í einelti. Jón Ásgeir segist ekkert eiga og öngvu skotið undan. Lykilsetning í fréttatilkynningu Jóns Ásgeirs kemur þó peningum ekkert við, heldur valdi.

Slitastjórnin boðar til blaðamannafunda, eins og hún sé lögregluvald og þótt henni takist að blekkja örfáa blaðamenn, sem spyrja einskis, mun sá leikur taka enda og sannleikurinn koma í ljós.

Jón Ásgeir er sá einstaklingur á Íslandi sem á flesta fjölmiðla og ræður yfir tveim ef ekki þrem ritstjórnum. Í hans huga er aðili sem boðar til blaðamannafundar með ígildi lögregluvalds. Jafnframt þykist hann vita að til séu  blaðamenn á Íslandi sem spyrja einskins. Já, bragð er að þá barnið finnur.

Jón Ásgeir skorar á Steinunni

Alþingi sýknaði Samfylkinguna

Samfylkingin bar ásamt Sjálfstæðisflokki ábyrgð á ríkisstjórnarvaldinu hálft annað ár fyrir hrunið í október 2008. Ákærur Atlanefndar á hendur fjórum ráðherrum hrunstjórnarinnar voru um vanrækslubrot, oddvitar ríkisstjórnarflokkana fagráðherrar fjármála og viðskipta.

Ákærur þingnefndarinnar voru ákærur á hendur þeirri stjórnmálamenningu sem ríkti hér fyrir hrun.

Ef allt hefði verið með felldu á alþingi hefði annað tveggja gerst við atkvæðagreiðsluna um ákærurnar; að allar ákærurnar hefðu verið samþykktar eða öllum hafnað.

Alþingi ákvað að sýkna Samfylkinguna en það er einmitt sá stjórnmálaflokkur sem hvað mesta ábyrgð ber á hrunkúltúrnum. Stjórnmálaflokkurinn sem var á margföldum kennitöluspena Baugs; jafnaðarmannaflokkurinn sem gerði sig að verkfæri auðmanna.

Alþingi sýknaði Samfylkinguna og það segir okkur að ónýta stjórnmálamenningin tröllríður enn húsum tveim árum eftir hrun.

Atkvæðahönnun Samfylkingar eru undirmálin

Þingmenn Samfylkingar höfðu með sér samráð um að Geir H. Haarde skyldi einn ákærður fyrir vanrækslu hrunstjórnarinnar. Í huga sjálfstæðismanna annars vegar og hins vegar vinstri grænna var atkvæðagreiðslan um tillögur Atlanefndar prinsippmál. Samfylkingin, aftur á móti, er algjörlega prinsipplaus flokkur.

Valdatækni er samfylkingarfólki í blóð borin. Þegar Ingibjörg Sólrún hótaði að taka Jóhönnu og Össur með sér í fallinu, yrði hún ákærð, var hafist við að hanna atkvæðagreiðslu þingmanna Samfylkingarinnar.

Samfylkingin er samnefnari fyrir allt sem er rotið í íslenskri pólitík.

Atli segir undirmál viðhöfð á Alþingi

Stærstu mistök Sjálfstæðisflokksins

Híróshíma-mistök Sjálfstæðisflokksins voru að leyfa varaformanni flokksins, Þorgerði Katrínu Gunnarsdóttur, að mynda samstjórn með vinkonu sinni Ingibjörgu Sólrúnu Gísladóttur vorið 2007. Báðar eru þær auðspilltar og ístöðulitlar, önnur var um árabili ESB-sinni án þess að þora að viðurkenna það og hin gaf Jóni Ásgeiri og Baugsveldin pólitískt lögmæti löngu eftir að alþjóð var ljós glæpahneigðin.

Eftir kosningar 2007 voru aðrir kostir í stöðunni, samstjórn með Vg, að vísu með naumum meirihluta, en bæði voru Frjálslyndir og Framsókn sem gátu orðið þriðja hjólið.

Samfylkingin hafði aldrei áður verið í stjórn. Með því að leiða til öndvegis leiguþý auðmanna skrifaði forysta Sjálfstæðisflokksins undir sinn pólitíska dauðadóm. 

 

Geir og Brown saman á sakabekk?

Dálkahöfundur Telegraph segir koma til greina að efna til réttahalda yfir Gordon Brown fyrrum forsætisráðherra Breta fyrir sambærilegar sakir og bornar eru á Geir H. Haarde. Jeremy Warner telur vanrækslusyndir Brown fyllilega sambærilegar við íslenska ráðherrans. Þótt stríðsglæpir Tony Blair, forvera Brown, sé alvarlegir skyldi enginn vanmeta alvöru efnahagsglæpa Brown.

Warner segir Brown eiga sér mikilvægar málsbætur. Í fjármálaráðherratíð sinni kom hann í veg fyrir að Bretar tækju upp evruna sem um það bil er að leggja í rúst efnahagskerfi Írlands, Grikklands, Spánar og Portúgal.

Geir er með sambærilegar mildandi kringumstæður; hann stóð gegn kröfum Samfylkingar um hraðferð inn í Evrópusambandið.

Jón Baldvin kaghýðir Ingibjörgu Sólrúnu

Atkvæðahönnun Samfylkingar á alþingi í gær, þar sem þingflokkurinn varpaði allri sök á herðar Geirs H. Haarde, verður flokkum dýrkeypt. Í pressunni.is tekur fyrrum formaður Alþýðuflokksins Ingibjörgu Sólrúnu til bæna og segir hana huglausa með því að standa ekki fyrir máli sínu fyrir landsdómi. Um þingmenn Samfylkingar segir Jón Baldvin

Jón Baldvin segir það hafa verið ómerkilegt af þeim þingmönnum Samfylkingarinnar sem greiddu atkvæði með því að ákæra Geir, en ekki Ingibjörgu Sólrúnu. Hann segir ljóst á umræðunni að flokkarnir, einkum Sjálfstæðisflokkurinn og Samfylkingin, hafi ekki gert upp sín mál.

Já, var það ekki? Hrunflokkunum hefnist fyrir skort á einurð að gera upp tímabilið fyrir október 2008.

Forysta Vg fær tilkynningu um uppreisn

Félagsmenn Vg muna svik forystu flokksins 16. júlí 2009 þegar þvert á kosningastefnuskrá og margítrekaðar yfirlýsingar um að Íslandi væri betur borgið utan Evrópusambandsins fékk þingsályktunartillaga Össurar Skarphéðinssonar um aðildarumsókn framgang alþingi með tilstyrk þingmanna Vg.

Úthreinsun á mánudag á aðalfundi Vg í Reykjavík á handvöldu liði svikaranna er til marks um að þolinmæðin sé að bresta.

Salurinn hafnaði kerfisbundið þeim sem forystan mæltist til að fundurinn kysi. Hér er ekkert flókið eða margþætt heldur skýr og kröftug tilkynning um að sjái forystan ekki að sér og bæti fyrir skaðann frá 16. júlí í fyrra verður uppreisn í Vg.

Flókin blanda margþættra átaka hjá VG

Alþjóðlegt gengisstríð

Stóru hagkerfi heimsins, Bandaríkin og Evrópa, hafa undanfarið prentað peninga til að hamla gegn lánsfjárþurrð í kjölfar undirmálskrísunnar. Hluti af peningaprentuninni er að halda vöxtum nálægt núlli. Peningarnir úr ríku hagkerfunum leita í auknum mæli til nýmarkaðslanda eins og Brasilíu þar sem hægt er að fá allt að 11 prósent vexti.

Peningaflæði til landa eins og Brasilíu veldur styrkingu gjaldmiðilsins, realsins. Sterkari gjaldmiðill leiðir til verri samkeppnisstöðu útflutningsgreina. Stór nýmarkaðslönd eins og Kína hafa leikið þann leik að halda genginu veiku til að útflutningurinn geti haldið uppi atvinnustiginu. Þegar umframpeningarnir frá Bandaríkjunum og Evrópu leita sér bithaga í nýmarkaðslöndum verður gengisstríð sem mun skapa ófyrirséðan óróa í heimshagkerfinu. 

Í Telegraph er spáð gjaldeyrishöftum á alþjóðavísu og varanlegum vandræðagangi.