Einn ríkisfjölmiðill - svo bara frelsi

,,Fjöl­miðlar eru grund­völl­ur lýðræðis­legr­ar umræðu," er upphafssetning áskorunar Blaðamannafélags Íslands. Síðan er það útskýrt að enginn munur sé á fjölmiðlum og samfélagsmiðlum.

Gott og vel. Við þurfum aðeins einn ríkisfjölmiðil. Hann má heita Lýðræðistorgið eða Íslandsmiðillinn. Allar Íslendingar með kennitölu gætu fengið sína síðu á þessum miðli og stundað lýðræðislega umræðu - hver með sínu nefi.

Þetta kostar ríkið örfáar krónur. Kannski milljón að hanna og tvær eða þrjár að setja upp. Íslandsmiðillinn þyrfti aðeins 2-4 tæknimenn til að reka batteríið. 

Ef einhverjir Íslendingar vildu stofna annan fjölmiðil þá er bara gjörið svo vel. En fyrir eigin reikning, ekki ríkisins.

(Fyrir þessa ráðgjöf verður ekki sendur reikningur til fjármálaráðuneytisins. Tilfallandi höfundur gerir á hinn bóginn ráð fyrir að tekjuskatturinn verður lækkaður enda sparast ótaldir milljarðar á ári sé ráðgjöfinni fylgt.)

BÍ sendir áskorun til stjórnmálaflokka

Bylting: hálfur dagur af CO2 fangaður á ári

Eldgosið í Fagradalsfjalli losar um 10 til 11 þúsund tonn af koltvísýringi, CO2, á dag, segir Jarðvísindastofnun.

Fyrsta og stærsta heildstæða lofthreinsi- og förgunarstöðin í heiminum við Hellisheiðarvirkjun fangar 4 þúsund tonn af CO2 á ári.

Jú, þið lásuð rétt. Minna en hálfsdags framleiðsla litlu eldsumbrotanna í Fagradalsfjalli fer ofan í holu á Hellisheiði Á EINU ÁRI.

Þetta er ,,bylt­ing­ar­kennt skref í lofts­lags­mál­um" segja talsmenn fyrirtækisins. Íslendingar geta loksins, loksins ,,dregið úr lofts­lags­meng­un hér á Íslandi."

Næsta framlag Íslendinga til loftslagsmála er að loka gömlu fjósi í afdölum sem hýsir tvær kýr. Þegar þær hætta að leysa vind mun stórlega draga úr loftslagsvá heimsbyggðarinnar. Spyrjið bara Grétu Thunberg og Sameinuðu þjóðirnar.

Orca hefur starfsemi á Hellisheiði

RÚV leiddi Guðna í gildru

RÚV spennti gildru fyrir Guðna Bergsson fráfarandi forseta KSÍ. Guðni veitti RÚV viðtal. Markmið viðtalsins var að fá Guðna til að neita að kynferðisbrotamál, annað en áratugagamalt, hefði komið inn á borð KSÍ.

Guðni gekk í gildruna, neitaði, og daginn eftir var honum slátrað þegar upp komst að hann vissi um mál Kolbeins Sigþórssonar.

Foreldrar annarrar konunnar sem tengist máli Kolbeins viðurkenna að hafa beðið Guðna um trúnað. Þau segja að ekki hafi verið beðið um trúnað vegna fyrsta tölvupóstsins sem þau sendu á KSÍ. En þau báðu um trúnað, það er viðurkennt. Heiðursmaður eins og Guðni virðir trúnað í heilu lagi. Trúnaður í pörtum er ekki mikils virði.

Auk kvennanna tveggja, sem Kolbeinn greiddi sáttarfé til, og aðstandenda þeirra vissu Stígamót af sáttinni sem Kolbeinn hafði gert. Stígamót fengu 3 milljónir frá Kolbeini vegna atviksins.

Stígamót eru líklegasti samstarfsmaður RÚV við að spenna gildruna sem Guðni gekk í.

Öll kringumstæðurök hníga að samsæri RÚV og Stígamóta gegn KSÍ og íþróttahreyfingunni. Á Efstaleiti er kunnátta í þessum vinnubrögðum og margra ára reynsla.

Brotnir karlar í uppáhaldi öfgakvenna

Uppáhaldshópur öfgakvenna er nauðgarar. Þær stofna félagsskap til að halda verkum þeirra á lofti og gefa þeim krassandi viðurnefni, - fávita. Frummaðurinn steig ekki í siðræna vitið. 

Þeir siðmenntuðu, sem ekki lifa í hugarheimi öfgakvenna, vita að nauðgarar eru brotnir menn, aumingjar sem ráðast á garðinn þar sem hann er lægstur.

Ekki er úrvalshópur öfgakvenna fjölmennur. Ríkislögreglustjóri heldur tölfræði yfir afbrot. Þar má lesa að meðalfjöldi nauðgana á ári tímabilið 2001-2019 er 137. Gefum okkur að gerendur séu allir karlar. Konur nauðga sjaldan. Meðalfjöldi karla á Íslandi yfir sama árabil er 159 þúsund. Hlutfall nauðgara af öllum körlum er því 0,09 prósent.

Öfgakonur leggja sig fram um að auka hróður örlítils minnihluta karla, 0,09%. Þær efna til herferða í fjölmiðlum og fá lagskonur í Stígamótum að básúna fyrir alþjóð þetta merkilega fyrirbæri, tvífætta nauðgarann. Kvenfólkið kennir heila menningu við ósköpin og talar um ,,nauðgunarmenningu." Svona eins og þegar rætt er um menningu Neandertalsmannsins.

Vitað er að sumar konur leggja sig eftir brotnum mönnum, aumingjum. Nýmæli er að heil félagshreyfing kvenna leggi nótt við nýtan dag að halda á lofti orðspori aumingjanna.

 

„Landsliðsþjálfari smætti reynslu þolenda“

Kynferðisbrot: 99,7% karla eru saklausir

Sé gert ráð fyrir að karlar fremji öll kynferðisbrot í landinu, þ.m.t. vændisbrot, eru 99,7 prósent karla saklausir af árlegum kynferðisbrotum.

Samkvæmt afbrotaskýrslu lögreglunnar voru framin 658 kynferðisbrot á Íslandi árið 2019. Karlar á Íslandi eru skv. Hagstofunni 189 þúsund. Ef gert er ráð fyrir að einn karl sé um hvert kynferðisbrot er árlegt hlutfall karla sem fremur kynferðisbrot 0,3 prósent.

Ef sama hlutfall karla fremur sama fjölda afbrota í tíu ár fáum við að þrjú prósent karla eru sekir um kynferðisbrot. En það þýðir að 97 prósent karla eru saklausir. Hlutfall saklausra karla er líklega hærra. Konur eru brotamenn í sumum tilfellum, mál eru felld niður og einn karl getur staðið að fleiri en einu afbroti. 

Í öllu falli eru þeir örfáir karlarnir sem eru kynferðisbrotamenn, minna en 0,3 prósent árlega og yfir áratug kannski um tvö prósent. Einstakir síbrotamenn lækka hlutfallið. 

Tölurnar hér að ofan endurspeglast ekki í umræðunni. Þar er talað um að ,,feðraveldið" standi fyrir ,,nauðgunarmenningu" þar sem konur eru svívirtar af karlaher sem nauðgar kvölds og morgna.

Áróður öfgafemínista er ekki í neinum tengslum við veruleikann. Aðeins örlítill minnihluti karlmanna, mældur í prósentubroti árlega, brýtur af sér kynferðislega. Of margir, vissulega, en ekki er þetta breiðfylking í neinum skilningi.

Tjónið er ómælt sem öfgafemínistar valda samfélaginu með fáheyrðum málflutningi. Þar tröllríður drengjaskömm. Ungum piltum er kennd sjálfsfyrirlitning. Í stað þess að byggja upp heilbrigt lífsviðhorf ungra manna er orðræðan að í hverjum strák búi nauðgari. Ekki mannbætandi uppeldi, svo vægt sé til orða tekið.

Tímabært er að öfgunum linni. Löngu tímabært.

Þreyttur á „atlögum“ í garð knattspyrnumanna

Svartur Trump

Larry Elder segir svarta meiri rasista en hvíta. Sjálfur er Elder svartur og á möguleika að verða næsti ríkisstjóri Kaliforníu, segir í Telegraph.

Vandamál svartra í Bandaríkjunum, hefur Elder sagt í áratugi, er að opinber aðstoð verðlaunar einstæðar mæður og þeldökkir karlmenn eru óábyrgir.

Elder er sennilega til hægri við Trump. Hann vill valkosti í skólamálum, boðar sígilt einstaklingsfrelsi en herferð gegn glæpum og eiturlyfjaglæpum sérstaklega.

Hér er viðtal við Larry Elder. 

Kosningarnar eru 14. september, ef einhver lesandi skyldi hafa atkvæðisrétt.

 

Sósíalistar taka fylgi af Pírötum

Píratar gera það jafnan gott í skoðanakönnunum í aðdraganda kosninga. Fylgið skreppur saman á kjördag. Sósíalistar hirða könnunarfylgið af Pírötum kortéri fyrir kosningar.

Sameiginlegt stef sossa og sjóræningja er að Ísland sé ónýtt. Sósíalistar boða vargöld fái þeir fylgi. Píratar lofa baráttu við loftslagið.

Jaðarfólkið sem hrifið er af ónýta Íslandi kýs fremur vargöld en loftslagsvá.

Fylgi framboða í járnum

Eitraður femínismi og forsetinn

DV greinir frá, og hefur eftir forsetaritara, að forseti Íslands, Guðni Th., hafði af því áhyggjur hverjir sætu við hlið forseta í heiðursstúkunni. ,,Í ljósi aðstæðna vildi forseti heyra hvaða hugmyndir væru uppi um sætaskipan..."

Af ótta við að fá yfir sig holskeflu hatursorðræðu er forsetinn var um sig og teflir á tæpasta að sitja í heiðursstúku á landsleik. Það sem áður var heiður er nú skömm.

Líklega verður bið á því að forsetinn þori að taka í höndina á leikmönnum sem spila fyrir hönd Íslands.

Það kæmi ekki á óvart að strákarnir okkar hættu að gefa kost á sér í landsliðið. Það er hvort eð er valið af Stígamótum.

Kölluðu leikmenn landsliðsins nauðgara

Góð uppskera, hörmulegt ástand

Eyfirskir bændur fagna kornuppskeru eftir hlýtt sumar. Þjóð sem einu sinni lifði eingöngu á innlendum búvörum og kýs enn í dag íslenskt fæðuöryggi hlýtur að fagna með bændum fyrir norðan.

Nema, auðvitað, þeir glópar sem trúa á hamfarahlýnun. Sennilega stíga þeir ekki á stokk og ásaka eyfirska bændur um að hagnast á eymdarþróun jarðar. Það væri of augljós andstyggð á heilbrigðu lífsviðhorfi. En glóparnir brýna kutana ótt og títt í laumi og spretta fram með róginn við fyrsta tækifæri, líkt og sagði í Möwekvæði Þórarins Eldjárns.

Hér að neðan eru tíunduð örfá mótefni við andstyggðaróði þeirra sem sitja um lífshamingju annarra.

Roy Spencer heldur úti heimasíðu um hitamælingar á lofthjúpi jarðar. Frá árinu 1979 hefur hitinn í veðrahvolfinu, innsta lagi lofthjúpsins, að meðaltali hækkað um 0,13 gráður á áratug. Það þýðir að hiti hækkar um eina gráðu á Celcius á einni öld, hundrað árum. Það er ekki hamfarahlýnun heldur eðlilegar loftslagsbreytingar.

William Happer er loftslagsvísindamaður í hæsta gæðaflokki. Hann segir enga hamfarahlýnun standa yfir og ekki heldur er slík hlýnun fyrirsjáanleg.

Richard Lindzen er loftslagsvísindamaður í sama gæðaflokki og Happer. Lindzen segir enga hamfarahlýnun yfirvofandi.

Fyrir þá sem hafa gaman af norsku sjónarhorni þá skrifar háskólakennarinn Geir Hasnes sem byrjar á þessari setningu: ,,Loftslagsváin er athyglisvert fyrirbæri þar sem hún er hvorki studd vísindum né athugunum."

Gleðjumst yfir góðu sumri og vonumst eftir mildum vetri. En það er náttúran sem gefur og tekur líkt og hún hefur alltaf gert. Fyrir þúsund árum, þegar Íslendingar tóku kristni og byggðu Grænland, var um 1,5 gráðum hlýrra en í dag.

Uppskera er lyginni líkust

Þolandi verður gerandi - viðskiptamódelið

Í máli Kolbeins Sigþórssonar bauð réttargæslumaður meints þolanda að ljúka málinu með 300 þús. kr. greiðslu.

Síðan gerðist eitthvað, sem ekki hefur verið fyllilega upplýst, og Kolbeinn greiddi tveim konum sem sögðust vera þolendur 1,5 milljónir króna hvorri, samtals 3 milljónir, og aðrar 3 milljónir til Stígamóta. Þessir peningar, samtals 6 milljónir króna, eru staðreyndir málsins. Peninga var krafist og peningar skiptu um hendur.

Viðskiptamódelið sem skýrir tilfærslu peninganna er að þolendur urðu gerendur. Frægur knattspyrnumaður er feitur göltur að flá og 300 þús. kr. smápeningur í því samhengi.

Aftur er frægur knattspyrnumaður ótækur í félagslið og landslið ef hann fær það orð á sig að vera kynferðisglæpamaður. Meintur þolandi hefur í hendi sér orðspor frægðarmannsins sem á augabragði verður fyrrverandi fótboltastrákur með engar framtíðarhorfur. Nema peningar skipti um hendur.

Tvær konur fengu samtals þrjár milljónir frá Kolbeini og keyptu sér stuðning Stígamóta með því að knattspyrnumaðurinn galt þangað hoftoll upp á aðrar 3 milljónir.

Fékk Guðni tilboð um að kaupa af sér sakir og halda forsetaembætti KSÍ? Hefði hann getað keypt sér frið öfgahersveita Stígamóta?

Ýmsar spurningar vakna þegar viðskiptamódelið liggur fyrir.

Fréttablaðið segir frá afhjúpun viðskiptanna, visir.is einnig. Öfgahersveitin á Efstaleiti þegir.

 

 

Segir réttargæslumann Jóhönnu hafa lagt til 300 þúsund