Við hrunið fækkaði fátækum

Þegar skorti á nauðþurftum sleppir er fátækt hlutfallsleg. Við hrunið fækkaði fátækum vegna þess að viðmiðið snarlækkaði við það að meint auðæfi margra gufuðu upp. Björgólfarnir, Jón Ásgeir, Hannes Smára, Existabræður og fleiri skilgreindu fátækt með auðlegð sinni.

Eins mótsagnakennt og það kann að hljóma er enginn vafi á því að fátækt er minni á Íslandi í dag en fyrir hrun. Líkur eru á að hópurinn sem þarf aðstoð til að eiga fyrir nauðþurftum sé álíka stór og hann var á veltiárunum. Munar mest um að atvinnuleysi óx ekki eins og margir óttuðust.

Þeir sem áttu vel til hnífs og skeiðar en gátu ekki veitt sér nema brot af ljúflífsstíl efnafólksins eru eftir hrun í betri málum. Vöruúrval og verðlag tekur ekki lengur mið af útrásartekjum heldur almennum launatöxtum.

Hrunið verður okkur blessun. 

Búa á betur að fátækum í borginni

ESB-aðild til áhrifaleysis

Fámennur hópur aðildarsinna í Sjálfstæðisflokknum harmar að landsfundur flokksins hafnaði ESB-leiðangri Samfylkingar til að leiða Ísland til áhrifaleysis í Brussel. Ísland fengi innan við 1 prósent af þingmönnum á Evrópuþinginu og áhrif í framkvæmdastjórninni eru viðlíka.

Líkt og þorri aðildarsinna beitir þessi hópur blekkingum um að viðræður séu í boði og það verði að ,,kíkja í pakkann." Í fyrsta lagi eru viðræður ekki í boði heldur aðlögunarferli og í öðru lagi er löngu vitað hvað er í pakkanum. Evrópusambandið er í pakkanum.

Þeir sem eru svo veruleikafirrtir að halda að 27 aðildarþjóðir ESB muni breyta sambandinu til að fá Ísland í félagsskapinn eru ekki heppilegt leiðarljós um hagsmuni íslensku þjóðarinnar.

Harma samþykkt landsfundar um ESB

Kerfið, samfélagið og við

Stundum er kerfið ópersónulegt vald sem lýtur eigin lögmálum og situr yfir hlut einstaklinga. Á öðrum tímum er kerfið safn af reglum og viðmiðunum sem við höfum þróað með okkur og er réttnefnt samfélag.

Hæstiréttur úrskurðaði gengistryggð lán ólögmæt. Við það lækkaði höfuðstóll lána, um það er ekki deilt, heldur um hitt hvaða vexti lægri höfuðstóll á að bera. Tilmæli Seðlabanka og Fjármálaeftirlits er að miðað skuli við stýrivexti Seðlabanka en ekki samningsvexti.

Hæstiréttur mun í haust úrskurða um réttmæti þessara tilmæla. Úrlausnarefnið er í samfélagslegum farvegi. Við skulum gleðjast yfir því. 

Tala máli kerfisins

ESB-moldvarpan í Vg

Árni Þór Sigurðsson þingmaður Vg heldur á lofti lyginni um að Ísland sé á leið í viðræður við Evrópusambandi þegar aðlögun er aðeins í boði. Í gær var tilkynnt að Íslendingum stæðu til boða fjórir milljarðar til að aðlaga stjórnsýsluna kröfum Evrópusambandsins.

Árni Þór lítur svo á að það sé heilagur réttur þjóðarinnar að taka þátt í ráðgefandi þjóðaratkvæðagreiðslu þegar búið er að aðlaga Ísland að Evrópusambandinu.

Árni Þór fótumtróð stefnu Vg að halda okkur utan Evrópusambandsins. Árni Þór situr á alþingi fyrir flokk sem gekk til kosninga með það á stefnuskrá sinni að Íslandi væri betur borgið utan Evrópusambandsins.

Lýðræði byggir á heilindum. Án trúnaðar verður stjórnmálastarf svik og prettir. Þar er Árni Þór á heimavelli.

Samkeppni án gjaldþrota er ekki samkeppni

Norræna efnahagsmódelið eftir miðja öld gerði ráð fyrir hálffrjálsri efnahagsstarfsemi þar sem ríki, samvinnurekstur og einkaframtak voru í jafnvægi. Hluti af jafnvæginu var hægfara þróun rekstrar og íhaldssemi við að færa út kvíarnar. Gjaldþrot voru fremur fátíð enda hluti af jafnvæginu að forðast þau.

Hákarlakapítalismi síðustu ára er óheftur, hraður og áhættusækinn. Þeir sem standa í brúnni vilja aftur á móti ekki sjá gjaldþrot og hafa til þess banka, lífeyrissjóði og opinberan stuðning undir yfirskini að verið sé að bjarga störfum.

Valið stendur um að halda áfram á núverandi braut og þá verða gjaldþrot að vera hluti af samkeppninni eða efna til nýs skilnings um hvaða gildi eigi að halda í heiðri í atvinnulífinu.

„Samkeppnin kostar helling“

Forystan og krafan um afgerandi afstöðu

Grasrótin tók völdin á landsfundi Sjálfstæðisflokksins og samþykkti róttækari ályktun um Evrópumál en forystan vildi. Á flokksráðsfundi Vg var forystunni send skýr skilaboð um að samningurinn við Samfylkinguna um aðildarumsókn nyti ekki lengur stuðnings almennra flokksmanna. Forysta Vg fékk frest.

Forysta hvílir á óskrifuðum samningi um að þeir sem leiða séu um það bil með sömu stefnu og liðsmennirnir. Við hrunið breyttist fjarska margt, forystumönnum var skóflað út í ríkisstjórnarflokkunum, og stefnumið fóru í endurskoðun um leið og krafan um skýrari málflutning og afgerandi afstöðu varð háværari.

Jafnvel í flokki þar sem forystan getur með sanni þvegið hendur sínar af hruni, Vg, á leiðtoginn fullt í fangi með að fóta sig. Steingrímur J. má þó eiga það að hefur ekki tapað næmni á liðsmenn sína. Í hádegisfréttum RÚV í dag sagði hann að alþingi gæti þurft að endurskoða ákvörðun sína að senda aðildarumsókn til Brussel.

Fólkið í fílabeinsturninum

Stjórnmálamenn, embættismenn og fjölmiðlafólk í nýfrjálsum ríkjum Austur-Evrópu var hvað hlynntast aðild að Evrópusambandinu. Við inngöngu fengu margir úr þessum starfsstéttum vinnu í Brussel. Hér heima er álíka hópur að störfum við að koma Íslandi í Evrópusambandi.

Amx vefurinn hefur sagt frá góðu sambandi blaðamanna og embættismanna sem hafa að markmiði að stýra umræðunni á beinu brautina til Brussel. Kynnisferð til höfuðborgar ESB á kostnað framkvæmdastjórnarinnar í samvinnu við utanríkisráðuneytið eru meðöl sem reyndust vel gagnvart elítunni í Austur-Evrópu.

Síðustu tíðindi eru að reglulegt samráð sé um fyrirætlanir Össurar Skarphéðinssonar utanríkisráðherra og samninganefndar Íslands. Líklega verður ekki dvalið við þá staðreynd að í reynd er búið að afturkalla umboðið og aðeins á eftir að draga umsóknina formlega tilbaka.

Rök aðildarsinna í björtu báli

Evran, stöðugleiki og matvælaverð voru meðal vinsælustu röksemda aðildarsinna í Evrópuumræðunni. Evran er myllusteinn um háls Íra, Grikkja, Portúgala og Spánverja. Evrópskur stöðugleiki er horfinn og í staðinn er kominn ólga með allsherjarverkföllum. Og samkvæmt tengdri frétt er matvælaverð á Íslandi á pari við meðaltal í Evrópu.

Síðustu fréttir herma að mútufé frá Brussel séu helsta ástæðan fyrir því að Ísland ætti að ganga í Evrópusambandið. Á forsíðu Fréttablaðsins er örlæti framkvæmdastjórnarinnar blásið út og starfsfólk Össurar, afsakið, utanríkisþjónustunnar fengið til að vitna um góðvild ESB.

Mútufé er ekki líklegt til að vinna marga til fylgis við málstað aðildarsinna en skýrir hvatir þeirra sem eiga þá ósk heitasta að ánetja Ísland Brusselvaldinu.

Lítill munur á milli Íslands og ESB verðlags

Krónan og evran, Ísland og Írland

Frændþjóðirnar Ísland og Írland urðu báðar fyrir efnahagslegu hruni eftir þensluskeið. Írland er í Evrópusambandinu og með evru sem gjaldmiðil á meðan Ísland stendur utan og býr að krónu. Ísland sér fyrir endann á kreppunni. Ástandinu á Írlandi er lýst með þessum hætti á Evrópuvaktinni

Þrátt fyrir, að Írar hafi snemma ráðizt í mikinn niðurskurð á opinberum útgjöldum og hækkað skatta sjást engin merki um verulegan efnahagsbata að því er fram kemur í New York Times í dag. Samdráttur í efnahagslífi Íra nam 7,1% á síðasta ári og engin merki um hagvöxt. Atvinnuleysi í landinu nemur 13% sem þýðir að 4,5 milljónir Íra ganga atvinnulausir. Um 5,3% hafa verið án atvinnu í meira en ár.

Hvorki Evrópusambandsaðild né evra hjálpar Írum.

Kreppunni lokið segir AGS

Tveir kostir Samfylkingar

Fréttir frá Evrópusambandinu næstu árin verða slæmar og lítt til þess fallnar að auka áhuga Íslendinga á inngöngu. Innanlands eru aðstæður þær að krónan vinnur sína vinnu í þágu þjóðar, dreifir byrðum og  bætir samkeppnishæfi stóru gjaldeyrisgreinanna, sjávarútvegs og ferðaþjónustu. Eftir hrun útrásarinnar er almenningur ekki ginnkeyptur fyrir ævintýramennsku í útlöndum, hvorki fjármálalegri né pólitískri.

Öll vötn falla til Dýrafjarðar, afsakið, Straumsvíkur; erlend þróun, samfélagskraftar innanlands og umræðan salla niður rökin fyrir aðild að Evrópusambandinu. Kringumstæðurnar speglast í stjórnmálaflokkunum, þar stendur Samfylkingin ein með umsóknina.

Samfylkingin á enn þess kost að draga rökrétta niðurstöðu af stöðu mála og hafa frumkvæðið að því að draga umsóknina um aðild til baka. Samfylkingin getur áfram barist fyrir aðild að Evrópusambandinu og færi svo að aðrir flokkar tækju undir og traustur meirihluti myndaðist fyrir umsókn á alþingi yrði sótt um á ný. Velji flokkurinn þennan kost er raunhæft að ríkisstjórn Jóhönnu Sig. fái meiri starfsfrið í haust og vetur og þar með nýtt tækifæri til að sanna sig.

Hinn kostur Samfylkingarinnar er að berjast um hæl og hnakka, halda umsókninni til streitu og verða hornkerling íslenskra stjórnmála.