Óreiðuöflin reyna sameiningu

Óreiðuöflin í íslenskri pólitík, frá Pírötum niður til Samfylkingar, ætla að funda undir andheitinu ,,umbótaöflin."

Umbótatillögur Pírata eru valdefling virkra í athugasemdum undir formerkjum ,,teljaralýðræðis." Samfylking gengur rösklegra fram og vill flytja lýðræði til Brussel þar sem embættismenn taka ákvarðanir um stórt og smátt en lýðræðislega kjörnir fulltrúar eru til skrauts.

Opinn fundur óreiðuaflanna auglýsir að nú fjarar undan þeim, bæði Samfylking og Píratar eru á fallanda fæti í skoðanakönnunum. Hvorug fylkingin á trúverðuga talsmenn. Valdaparið úr Pírötum, Birgitta og Helgi Hrafn, segjast búa í ,,ofbeldissambandi" þar sem skiptast á öskur og lítt einlægar beiðnir um fyrirgefningu.

Óreiðuöflin myndu gera stjórnmálamenningu þjóðarinnar greiða með því að ganga i eina sæng.

Ræða samvinnu „umbótaaflanna“

Ríki íslams funda, kristin ríki ekki

Ríki íslams funda í Tyrklandi til að ráða ráðum sínum. Ríkin koma úr fjórum heimsálfum; Evrópu, Asíu, Afríku og Suður-Ameríku. Ríki íslams eiga sameiginlegt að vera trúarríki - þau kenna sig við múslímatrú.

Kristin ríki eiga ekki nein sambærileg samtök og múslímaríki. Kristni hætti að vera sameiningarafl vestrænna ríkja eftir frönsku byltinguna á 18. öld. Vestræn ríki eru trúlaus, í þeirri merkingu að þau leyfa trúfrelsi innan sinna vébanda.

Gömlu kristnu ríkin, t.d. Þýskaland, eru í mestu vandræðum með að taka á móti múslímsku farandfólki, sem vilja flytja með sér múslímatrú og menningu til vestrænna ríkja. Þjóðverjar reyna að setja lög um að múslímar aðlagi sig þýskri menningu og lífsgildum - t.d. um trúfrelsi.

Á meðan múslímaríki eru í samtökum um að stuðla að vexti og viðgangi múslímatrúar eru vestræn ríki í nauðvörn. Trúin trompar veraldarhyggju. Trúin er ágeng og tilætlunarsöm á meðan veraldrahyggjan er eftirgefanleg og umburðarlynd.

RÚV fær á kjaftinn frá umboðsmanni alþingis

RÚV hélt því fram, með aðstoð viðhlæjenda sinna, að Sigmundur Davíð Gunnlaugsson forsætisráðherra hafi verið vanhæfur til pólitískrar stefnumótunar vegna Wintris-reiknings eiginkonu sinnar.

Umboðsmaður alþingis segir á fundi þingnefndar að þetta sé fráleit túlkun RÚV á vanhæfisreglum. Áður hefur verið sýnt fram á að RÚV þverbraut siðareglur stofnunarinnar og beitti lygum og blekkingum til að koma höggi á forsætisráðherra.

Hvenær ætlar RÚV að biðja Sigmund Davíð afsökunar á aðförinni?

Telur ekki ástæðu til að skoða málið

Tækifæri ríkisstjórnarflokkanna: stöðugleiki eða óreiða til vinstri

Kosningabaráttan er hafin. Tækifæri ríkisstjórnarflokkanna er að sýna fram á að valkostirnir fyrir næsta kjörtímabil eru tveir. Í fyrsta lagi meirihluti stöðugleika í efnahagsmálum og landsstjórn. Í öðru lagi vinstrióreiða.

Framsóknarflokkurinn stendur höllum fæti eftir aðför að fráfarandi forsætisráðherra og formanni flokksins. Framsóknarflokkurinn mun ná vopnum sínum, nema þingmenn flokksins spilli fyrir sér með innanflokksátökum. Formaður flokksins á alla möguleika að gera hreint fyrir sínum dyrum, t.d. með því að birta valdar tölur úr skattaframtali sínu, líkt og Árni Páll Árnason gerir.

Sjálfstæðisflokkurinn skyti sig í fótinn með einleik í ríkisstjórn til að styrkja stöðu sína tímabundið á kostnað samstarfsflokksins. Með því að ríkisstjórnarflokkarnir sýni samstöðu í kosningabaráttunni eru þau skilaboð send að valkostir í landsstjórninni eru stöðugleiki á móti óreiðu.

Sjálfstæðisflokkur bætir við sig

Stjórnarandstaðan lamar störf alþingis

Stjórnarandstaðan stundar málþóf til að lama störf þjóðþingsins. Rétta svarið við málþófinu er að leyfa misnotkun stjórnarandstöðunnar í nokkra daga eða vikur, ef það þarf til.

Í maí verður ríkisstjórnin búin að leggja fram þau frumvörp sem talið er brýnt að verði samþykkt áður en gengið er til kosninga í haust.

Ef stjórnarandstaðan heldur áfram málþófinu mun það koma henni í koll. Stjórnarandstaðan verður komin í það hlutverk að seinka kosningum sem þó er höfuðkrafan.

Málþóf á alþingi gerir það eitt að auglýsa málefnafátækt stjórnarandstöðunnar.

Vildu gera hlé á þingfundi

Pólitískt heitt sumar: tvennar kosningar á 4 mánuðum

Við kjósum forseta í sumar og þingkosningar verða varla seinna en í október. Sumarið er að jafnaði tíminn til að íhuga í rólegheitum veturinn og skipuleggja þann næsta.

Sumarið 2016 verður óvenjulegt. Umrótið sem fylgir forsetakosningum er ekki sjatnað þegar undirbúningur undir þingkosningar kemst á fulla ferð hjá stjórnmálaflokkunum.

Undiraldan í samfélaginu vegna tvennra kosninga á stuttum tíma heldur lifandi umræðunni sem annars leggst í dvala sumarlangt. 

Fitch varar við Pírötum á Íslandi

Alþjóðlega matsfyrirtækið Fitch Ratings segir aukna óvissu í efnahagsmálum á Íslandi sökum þess að Píratar mælast með stóraukið fylgi í könnunum.

Píratar eru ekki með neina reynslu af stjórnun, þeir eru ekki með neina heildstæða stefnu í efnahagsmálum og eru í grunninn mótmælahreyfing sem finnst að lýðræðið eigi heima hjá virkum i athugasemdum á Austurvelli.

Píratar eru núna þriggja manna þingflokkur. Þeir urðu að ráða til sín sálfræðing vegna þess að sundurlyndi einkennir samstarfið.

Ríkisstjórn Pírata yrði uppskrift að óstöðugleika í stjórnarfari og óreiðu í ríkisfjármálum.

Aukin óvissa segir Fitch Ratings

Fréttastofa RÚV brýtur siðareglur

Í aðförinni að forsætisráðherra braut fréttastofa RÚV reglulega gegn siðareglum stofnunarinnar.

Í siðareglunum segir: ,,Starfsfólk sem sinnir umfjöllun um fréttir, fréttatengt efni eða dagskrárgerð sannreynir að heimildir séu réttar og að sanngirni sé gætt í framsetningu og efnistökum."

Í hádegisfrétt föstudaginn 25. mars er haft eftir Brynjari Níelssyni að þingflokkur Sjálfstæðisflokksins verði að funda um málefni forsætisráðherrahjónanna. Brynjar sagði ekkert slíkt og varð að leiðrétta ,,fréttina" með bloggfærslu. Hér var engri sanngirni til að dreifa í framsetningu og efnistökum. Fréttastofan afflutti orð Brynjars.

Í siðareglum RÚV segir: ,,Starfsfólk kappkostar að vera til fyrirmyndar um gæði og fagleg vinnubrögð, gegnir störfum sínum af metnaði, heiðarleika og virðingu og hefur í heiðri lýðræðislegar grundvallarreglur og mannréttindi."

Fréttastofa RÚV beinlínis laug upp á skrifstofu alþingis að hafa staðfest túlkun RÚV á reglum alþingis um hagsmunaskráningu þingmanna.

Dæmin eru fleiri um óvönduð vinnubrögð RÚV í aðförinni að forsætisráðherra. Talsmaður RÚV, Bogi Ágústsson, kom fram í þætti Gísla Marteins til að réttlæti fréttaflutning stofnunarinnar og sagði fréttastofnuna flytja fréttir um slúður á kaffistofum og mannamótum. Hvar segir það í siðareglum RÚV að ,,umræða" út í bæ séu fréttir?

Þegar forsætisráðherra útskýrði mál sitt í skrifuðum texta gerði fréttastofa sér að leik að tortryggja þann texta með því að gera fréttapunkt úr því að textinn væri langur. Er sanngjarnt að rengja frumheimild og gera lítið úr henni?

RÚV borgaði verktaka út í bæ til að gera forsætisráðherra fyrirsát í ráðherrabústaðnum og notaði til þess sænska tálbeitu. RÚV sendi út ritskoðaða útgáfu af fyrirsátinni þar sem klippt var út bein lygi sem sænska tábeitan notaði til að fá viðtal við forsætisráðherra. Er það heiðarlegt og sanngjarnt?

Í aðförinni að forsætisráðherra skeytti RÚV hvorki um heiður né skömm. RÚV er uppvíst að lygum og blekkingum sem þverbrjóta siðareglur stofnunarinnar.

 

 

Leggjast gegn siðareglum RÚV

Píratar og vinstriflokkar ógna stöðugleika

Efnahagskerfið skilar fullri atvinnu á Íslandi ásamt ríflegum kauphækkunum, sem mælast í tugum prósenta. Ríkissjóður stefnir í að verða skuldlaus, þökk sé Sigmundi Davíð, Bjarna Ben. og félögum þeirra í stjórnarráðinu.

Píratar og vinstriflokkarnir eru helsta ógnin við efnahagslegan stöðugleika. Þar fer fólk sem sannanlega er sérfræðingar í að klúðra stórum málum sem smáum, samanber ríkisstjórnarhryggðarmyndina hennar Jóhönnu Sig. 2009 til 2013.

Pólitískri kreppu var afstýrt í vikunni með því að Sigurður Ingi tók við formanni Framsóknarflokksins og þjóðarskútan er fullsæmd af nýjum skipstjóra.

Kjöraðstæður fyrir afnám hafta

RÚV er umboðslaus fjölmiðill í pólitík

RÚV-mótmælin byrjuðu mánudaginn 4. apríl með auglýsingu í hádegisfréttum um að RÚV yrði með beina útsendingu frá Austurvelli. Kvöldið áður sýndi RÚV sérstakan Kastljósþátt þar sem aðalefnið var sænsk-íslensk fyrirsát verktaka RÚV um forsætisráðherra Íslands.

RÚV hannaði atburðarás þar sem beitt var blekkingum og beinum lygum til að koma höggi á forsætisráðherra, sem varð að segja af sér í kjölfarið.

Í gær, viku eftir að mótmælin hófust, var frétt í RÚV um að mótmælin hefðu runnið sitt skeið. Það má greina eftirsjá í fyrirsögninni: Fámennustu mótmælin til þessa.

RÚV er gerandi í íslenskum stjórnmálum án þess að hafa til þess nokkurt umboð.

Vilji ekki heyra „sannleikann“