Heimskreppa eða bati - þar er efinn

Ógrynni af skuldum einkaaðila hefur síðustu misserin verið hlaðið á ríkisvaldið sem ekki getur að óbreyttu staðið undir þessum skuldum. Er verið að tala um Ísland? Nei, hagkerfi efnahagsvéla heims austan hafs og vestan í nýrri skýrslu franska Société Général.

Skýrslan er pælingapappír um hvert geti stefnt með hagkerfi heimsins næstu tvö árin eða svo. Það er ekki bjart yfir, verður að segja. Peningaprentun seðlabanka um víða veröld er komin á leiðarenda. Annað tveggja tekst tilraunin sem upp á ensku heitir ,,quantative easing" og vöxtur tekur kipp eða að verðhjöðnun verði ofaná skuldirnar sem myndi þýða katastrófu fyrir ofurskuldsett þjóðarbú.

Hér er hlekkur á úttekt Brósa í Símfréttum á skýrslu franska bankans. Það tekur þrjár mínútur að lesa textann og þeim þrem er vel varið.

 

Samfylkingin segi sig frá landsstjórninni

Samfylkingin átti helminginn í hrunstjórninni sem gætti seint og illa eða alls ekki hagsmuna almennings í aðdraganda hrunsins. Páll Hreinsson formaður sérstakrar rannsóknanefndar um hrunið boðaði að niðurstaða nefndarinnar yrði þjóðinni erfið.

Til að niðurstaða nefndarinnar fái eðlilega afgreiðslu af hálfu þings og ríkisstjórnar og að umræða almennings um skýrsluna verði við kjöraðstæður er eðlilegt að fara fram á að Samfylkingin segi sig frá ríkisstjórninni.

Minnihlutastjórn Vinstri grænna myndi starfa í umboði Alþingis í vetur, ganga frá fjárlögum og öðrum brýnum málum í breiðri sátt. Næsta haust, t.d. í septemberlok, yrði kosið á ný til Alþingis. Þjóðin væri búin að ræða skýrsluna í gott hálft ár fyrir kosningabaráttuna.

Jóhanna Sigurðardóttir gæti orðið mikilhæfur stjórnmálamaður ef hún brygðist við núverandi aðstæðum af stórmennsku og segði sig og Samfylkinguna frá landsstjórninni.

Ráðherrar fyrir dóm?

Útrásarmaður í félagsmálaráðuneyti

Yngvi Örn Kristinsson, sem var framkvæmdastjóri fyrirtækjasviðs Landsbankans, vill 230 milljónir króna úr þrotabúi bankans. Á meðan hann bíður niðurstöðu fjárkrafna sinna er Yngi Örn talsmaður félagsmálaráðherra um úrræði heimila í greiðsluvanda.

Yngvi Örn vann að frumvarpi félagsmálaráðherra um greiðsluaðlögun en inn á milli úrræða fyrir venjulegt fólk var skotið sérúrræðum fyrir útrásarfólki sem vildi létta skattbyrði sína. Vegna árvekni stjórnarandstöðuþingmanna var sérúrræðinu, sem laut að skattfrelsi, kippt út á síðustu stundu.

Yngi Örn er rangur maður á röngum stað í félagsmálaráðuneytinu.

Hagar og heiðarleiki

Þjóðfundurinn nýliðna helgi sagði heiðarleika mikilvægasta veganesti okkar í endurreisninni. Hagar, sem áður mynduðu kjarnann í Baugi, geta ekki verið hluti af nýju íslensku atvinnulífi ef það á að vera heiðarlegt.

Haga á að brjóta upp enda fáheyrt að ein og sama samsteypan ráði um eða yfir helmingi matvörumarkaðarins.

Ef Nýja Kaupþing ætlar að vera þátttakandi í endurreisninni verður bankinn að haga sér eins og ábyrg fjármálastofnun: Haga verður að brjóta upp og selja til dreifðra eigenda sem hafa hreint siðferðisvottorð.

Útrásarklappstýra með ESB-spuna

Evrópusambandið gerir ráð fyrir að þær þjóðir sem vilja inn í sambandið vinni heimavinnuna sína og kynni sér helstu þætti sambandsins. Engri þjóð hefur látið sér til hugar koma að sækja um til að ,,sjá hvað er í pakkanum." Pakkinn er sjálft Evrópusambandið. Þess vegna stundar sambandið ekki samningaviðræður við umsóknarríki heldur er lagt upp aðlögunarferli sem felur í sér að umsóknarríki lagar sig að regluverki sambandsins.

Samfylkingin hefur blekkt þjóðina til að halda að Ísland sé á leið í viðræður við Evrópusambandið. Svo er ekki. Við erum á leið í aðlögun að Evrópusambandinu.

Jón Kaldal ritstjóri Fréttablaðsins gat sér orð sem trúgjörn klappstýra útrásarinnar enda þjálfaður Baugsblaðamaður. Í leiðara í dag tekur hann upp hráan samfylkingaráróður um samningaviðræður við Evrópusambandið.

Barnslegri ákefð  aðildarsinna eftir nýrri blekkingu, þegar sú síðasta er hrunin, minnir á  margt sama fólkið var í útrásarliðinu og vill nú inngöngu í Evrópusambandið.

Hvar er Ögmundur?

Icesave-málið er þess eðlis að það þarf að minnsta kosti að ræða það til jóla. Augljóst er að samkomulagsvilji sem stjórnarandstaðan sýndi ríkisstjórninni var misnotaður. Lögin sem Alþingi hefur þegar samþykkt um ríkisábyrgð voru það lengsta sem hægt var að ganga til móts við kröfur Breta og Hollendinga.

Ríkisstjórnin er ekki að vinna þjóðinni heilt. Ögmundur Jónasson þarf að stíga fram og neita stuðningi við frumvarpið. 

Ef Ögmundur styður frumvarpið verður fyrri andstaða hans og afsögn ráðherradóms  tilgangslaus skrípaleikur.

 

Icesave afgreitt út úr nefnd

ESB-nám hjá Baldri Þórhalls

Baldur Þórhallsson stjórnmálafræðingur kennir við Háskóla Íslands. Í tímum er meðal annars rætt um umsókn Samfylkingarinnar um aðild Íslands að Evrópusambandinu. Baldur kennir, sem rétt er, að eiginlegar aðildarviðræður eigi sér ekki stað við umsóknarþjóðir af hálfu Evrópusambandsins.

Ferlið heitir ,,accession process" eða aðlögunarferli að reglum Evrópusambandsins.

Baldur, sem er áhugamaður um umsókn Íslands að Evrópusambandinu og jafnframt varaþingmaður Samfylkingarinnar, hefur ekki beinlínis lagt sig í líma að upplýsa almenningi um ferlið eins og það raunverulega fer fram. Þar með skýtur hann skjólshúsi yfir blekkingu Samfylkingarinnar að Ísland sé að leiðinni í samningaviðræður, þegar í raun er um aðlögunarferli að ræða.

Þegar Ísland hefur lagað sig að regluverki Evrópusambandsins er ætlunin að kjósa um það hvort þjóðin vilji inngöngu.

Hér að neðan er málsgrein af heimasíðu stækkunarstjóra Evrópusambandsins sem útskýrir aðlögunarferlið.

In 1995 the Madrid European Council further clarified that a candidate country must also be able to put the EU rules and procedures into effect. Accession also requires the candidate country to have created the conditions for its integration by adapting its administrative structures. While it is important for EU legislation to be transposed into national legislation, it is even more important for the legislation to be implemented and enforced effectively through the appropriate administrative and judicial structures. This is a prerequisite of the mutual trust needed for EU membership. 

Jóhönnuráðuneytið í þjónustu auðmanna

Félagsmálaráðherrann Jóhanna Sigurðardóttir þótti traustur og heiðarlegur stjórnmálamaður og hélt á lofti félagslegum sjónarmiðum. Þess vegna varð Jóhanna forsætisráðherra eftir hrun. Andi Jóhönnu virðist ekki svífa lengur yfir vötnum félagsmálaráðuneytisins. Í stað þess að leggja þeim lið sem höllum fæti standa er búið að gíra ráðuneytið inn á að þjónusta auðmenn sem vilja lækka skatta sína.

Ef ekki væri fyrir vökul augu stjórnarandstöðuþingmanna hefði félagsmálaráðuneytið smyglað skattaafslætti handa auðmönnum inn í frumvarp um greiðsluaðlögun heimilanna. Aðalsteinn Hákonarson hjá eftirlitsdeild Ríkisskattstjóra útskýrir tæpitungulaust að skattaafslátturinn þverbrýtur meginhugsun skattalaga.

Síðast þegar fréttist hefur ekki heyrst múkk frá félagsmálaráðuneytinu. Er verið að undirbúa aðra tillögu til að redda auðmönnum?

ESB-umsókn Samfylkingarinnar í öngstræti

Brussel áttar hægt en örugglega á því að Samfylkingin stendur einn íslenskra stjórnmálaflokka að umsókn Íslands að Evrópusambandinu. Þingmaður Vinstri grænna er formaður Heimssýnar og á aðalfundi hreyfingar sjálfstæðissinna í Evrópumálum voru tveir aðrir þingmenn Vinstri grænna.

Samfylkingin stendur ein að umsókninni og brátt verður þess að vænta að Brussel segi við utanríkisráðherra Íslands: Heyrðu, Össur minn, hvers vegna eru þið Íslendingar að gera bjölluat í höfuðstöðvum Evrópusambandsins? 

Hreinskilið svar frá Össuri yrði þetta: Jú, sjáðu við í Samfylkingunni höfðum bara ekkert annað mál í kosningabaráttunni en ESB-málið. Við ákváðum að veifa fremur röngu tré en öngvu. Eftir kosningar langaði Steingrími J. svo óskaplega í ríkisstjórn að hann samþykkti skilyrði okkar. Við vorum bara ekkert að pæla hvað þjóðinni fyndist, sorrí.

Ásmundur Einar nýr formaður Heimssýnar

Leppar auðmanna með Tortolapeninga

Eignir fást fyrir lítið á Íslandi í dag. Hrunið og verðfall krónunnar gerir allt landið að kaupendamarkaði. Ríkisbankar sitja uppi með fasteignir og fyrirtæki sem nokkur slægur er í. Hættan sem blasir við er að föllnu útrásarauðmennirnir fái sér leppa til að koma hingað og bjóða í rekstur.

Á útrásartímanum nýtti Ólafur Ólafsson og framsóknarklíkan í kringum hann sér a.m.k. í tvígang þjónustu leppa. Í fyrsta lagi þegar þeir keyptu Búnaðarbankann sem þeir sameinuðu Kaupþingi og í öðru lagi þegar arabískur olíufursti var sagður hafa keypt hlut í Kaupþingi.

Eftir hrun dúkkaði hér upp Ástrali undir heitinu Steve Cosser sem ætlaði að kaupa rekstur og annan en þó helst Árvakur, útgáfufélag Morgunblaðsins. Ástralinn lét sig hverfa þegar hann fékk ekki Morgublaðið. Ekki fer sögum af því hvort Hreinn Loftsson, Jón Ásgeir Jóhannesson eða sjálfur Sigurður Einarsson hafi verið í félagsskap Stjána.

Eðlilegt er að hafa fyrirvara á útlendingum sem koma eins og þruma úr heiðskíru lofti og vilja kaupa eitt og annað.

Tvennt annað er hægt að gera til draga úr líkum að auðmannasubburnar komist með klærnar í íslenskt atvinnulíf á ný. Ríkisbankarnir geta komið sér upp vinnulagi þar sem fyrsti kostur sé að selja starfsmönnum rekstur. Ef það er af einhverjum ástæðum ekki raunhæft má íhuga að leggja viðkomandi rekstur af. Sé þörf á starfseminni verða einhverjir til að hefja rekstur á ný.

Rekstur þarf að hantera á annan hátt en fasteignir. Það er ekkert mál að bíða með að selja fasteignir þangað til að markaðurinn jafnar sig.