Bankarnir eru vettvangur spillingar

Í útrásinni lærðust vinnubrögð í fjármálastofnunum sem eru meira í ætt við mafíustarfsemi en heilbrigða viðskiptahætti. Mafían hyglar sínum á kostnað almannahagsmuna. Endurreistu bankarnir fóru ekki í gegnum endurhæfingu og létu ekki nema að litlu leyti af ósóma útrásarviðskipta.

Dæmin um að bankar hygli innvígðum eru staðfest og óvefengjanleg; Ólafur Ólafsson fékk að halda Samskipum; Jón Ásgeir fær fyrirgreiðslu hjá Arion og Landsbankanum strax eftir hrun til að halda sínum félögunum og stjórnar enn fjölmiðlaveldi í skjóli Landsbankans.

Ríkisstjórnin ber sinn hluta ábyrgðarinnar þar sem hún lagði ekki línurnar fyrir endurreisn fjármálakerfisins heldur lét bankaliðið vera sjálfala þótt sannanlega veitti ekki af endurhæfingu.

Sagði þá vera drullusokka

Björgvin G. og landbúnaðurinn

Botnlaus heimska hlýtur að vera dimmrödduð. Björgvin G. Sigurðsson er ekki fyrr búinn að lýsa sig fávita en að hann ætlar sér þá fordild að segja íslenskum bændum hvað þeim sé fyrir bestu í Evrópumálum. Alþjóð er kunnugt að íslenskir bændur hafa ígrundað og rætt til þaula hvað aðild Íslands að Evrópusambandinu felur í sér og hafnað þeim kosti. Björgvin G. skrifar í Pressuna

Þá er ég sannfærður um að samkeppnishæfni íslenska landbúnaðarins er gróflega vanmetin, bæði af forsvarsmönnum greinarinnar sjálfrar og í öllu almennu mati á stöðu hans.

Björgvin G., sá mikli hugsuður Samfylkingarinnar, fékk embætti viðskiptaráðherra í ríkisstjórn Geirs H. Haarde - hrunstjórninni. Haustið 2007 skipulagði Björgvin G. áróðursherferð í útlöndum til stuðnings íslenska bankakerfinu sem hann sagði reist á traustum grunni. Sumarið 2008 var Björgvin G. kallaður á fund breska fjármálaráðherrans og sagt að íslensku bankarnir væru byggðir á sandi og stefndu lóðbeint í gjaldþrot. Hvað gerði viðskiptaráðherra, Björgvin G.? Jú, hann fór á tónleika með Sex Pistols.

Hvort eigum við að leggja trúnað á Björgvin G. eða íslenskan landbúnað?

Samningar skulu standa - ekki bara stundum

Útrásarauðmaður og gengislánaævintýramaður eiga það sameinginlegt að halda orðheldni sé eitthvað sem eigi við aðra en þá sjálfa. Eitt einkenni samfélaga í okkar heimshluta er að samningar eru gerðir til að þeir haldi og samningsbroti fylgja afleiðingar. Þriðjaheimsþjóðir glíma margar við fátækt vegna skorts á trausti sem er grundvöllur fyrir frjálsri samningsgerð.

Algjör skortur á grundvallarskilningi frjálsra samninga er ástæða þess að sitjandi ríkisstjórn reynir að blekkja fólk til að halda að samninga megi virða að vettugi ef manni sýnist svo.

Samfylkingarsiðferði er íslenska útgáfan af alkunnu þriðjaheimsvandamáli.

Lög um ábyrgðarmenn andstæð stjórnarskrá

Gnarr til varnar stjórnmálaelítunni

Jón Gnarr bauð sig fram til að fá góð laun og vettvang til að auglýsa hliðarafurðir eins og kvikmyndir. Í stöðu borgarstjóra reynir Jón Gnarr hvað hann getur til að verja ríkjandi hagsmuni enda þiggur samfélagsstöðu í samræmi við þjónkun sína við elítuna.

Hótun Jóns Gnarr um að bjóða fram til alþingis er gerð til að þjappa stjórnmálaelítunni saman gegn kröfum um að almenningur fái að kjósa sér nýja fulltrúa.

Jón Gnarr ætti enga möguleika í örðum kosningum. Hann veit best sjálfur að sami brandarinn verður ekki tvisvar fyndinn.

Álitsgjafar á launum Samfylkingar

Fjölmiðlar leita iðulega til svokallaðra álitsgjafa til að fá sjónarmið þeirra á fréttir. Stétt álitara er ekki mannmörg en furðu margir koma þó úr félagsvísindadeild Háskóla Íslands. Samfylkingin otar ríkispeningunum í álitsgjafana sína í félagsvísindadeildinni en þverskallast við að veita upplýsingar um hversu krónurnar eru margar sem rúlla úr ríkissjóði handa velunnurum Samfylkingar meðal álitsgjafa.

Guðlaugur Þór Þórðarson þingmaður Sjálfstæðisflokksins skrifar hugvekju um málið í Morgunblaðinu í dag. Þrásinnis spyr Guðlaugur Þór Jóhönnu forsætis um málið en hún fer undan í flæmingi.

Tryggið ykkur eintak.

Gestur Jóns Ásgeirs og afstæður sannleikur

Verjandi Jóns Ásgeirs Jóhannessonar í Baugsmálum var Gestur Jónsson. Gestur hélt því fram að brýnt væri að sýkna Jón Ásgeir vegna þess að hann væri svo mikils virði fyrir íslenskt efnahagslíf. Jón Ásgeir kæmi svo víða við í innlendum og erlendum viðskiptum að hann væri eiginlega ómissandi og alls ekki mætti sakfella Baugsstjórann.

Í dag segir sami Gestur að eiginlega hafi Jón Ásgeir hvergi komið nærri fjármálagjörningum og viðskiptasnúningum sem settu efnahagskerfið á hliðina.

Í Baugsmálinu flutti Gestur Jónsson vörnina í Reykjavík. Málflutningurinn í dag tekur mið af ákærum slitastjórnar Glitnis á hendur Jóni Ásgeiri í New York. Merkilegt hvað sannleikurinn um Jón Ásgeir er afstæður.

Kom að ýmsum málum en réð ekki

Sameiginleg ritstjórn RÚV og Stöðvar 2

Aðalfrétt beggja sjónvarpstöðvanna í kvöld voru eljaraglettur Lilju Mósesdóttur og Helga Hjörvar á alþingi í dag. Það sem meira er var sjónarhorn beggja fréttanna nákvæmlega það sama; órólega deild Vg herjar áfram á ríkisstjórnina.

Tilviljun? Jú, ef maður trúir á jólasveininn.

Hver skyldi vera sameiginlegur fréttastjóri RÚV og Stöðvar 2?

Valkostir við Evrópusambandið

Forsætisráðherra Breta, David Cameron, hyggst bjóða Norðurlöndum og Eystrasaltsþjóðum á ráðstefnu með víðtækri dagskrá um samvinnu þessara ríkja. Þjóðirnar sem um ræðir eru jaðarríki í Evrópusambandinu og tvö standa utan, Ísland og Noregur.

Ráðstefnan er til marks um vilja þjóða á jaðri Evrópusambandsins að finna samstarfsfleti. Önnur nýleg dæmi eru Norðurlandaráðsþing sem ræddi endurlífgun Kalmarsambandsins og á ráðstefnu Heimssýnar var rætt um samband strandríkjanna Grænlands, Íslands, Færeyja og Noregs.

Margir valkostir eru við ESB-aðild, þótt sitjandi íslensk stjórnvöld sjái fátt annað fyrir sér en innlimun Íslands í félagsskap meginlandsríkjanna.

 

Vill styrkja tengsl við Norðurlönd

Ólafur Ragnar hafnar ESB-aðild

Forseti Íslands talar í umboði þjóðarinnar þegar hann segir í viðtali við Reuters að þjóðarhagsmunir standi ekki til þess að Ísland gangi í Evrópusambandið. Í viðtalinu bendir Ólafur Ragnar á það að sterkustu rök aðildarsinna, evran, skilur eftir sig rjúkandi rúst í Dublin og Aþenu.

Ólafur Ragnar Grímsson veit sem er að umsókn Össurar og Samfylkingarinnar til Brussel er feigðarflan.

Samfylkingin er einangruð í Evrópumálum og getur sér enga björg veitt.

Staðfesta gegn lausung í stjórnmálum

Í stjórnmálum er upplausnarástand eftirhrunsins. Gömul kennimörk eru ýmist horfin eða hálfgleymd án þess að ný séu í sjónmáli. Hrunið var afleiðing lausungar í allri yfirbyggingu samfélagins; fjármálastofnunum, stjórnarráði og alþingi. Margir efnuðust á dansinum kringum gullkálfinn og héldu lífið samfellda veislu hækkandi hlutabréfavísitalna.

Þegar innistæðilausa tilveran hrundi vildu sumir halda á ný út í stóra heiminn og sóttu um aðild að Evrópusambandinu án ígrundunar og álíka undirbúning og íslensku fyrirtækin stunduðu í útrásinni. Óábyrg fjármálahugsun hélst í heldur við þunnildispólitík þar sem langtímahagsmunum þjóðarinnar skyldi fórnað fyrir skammtímagróða.

Staðfestuna gegn lausunginni í íslenskum stjórnmálum er einkum að finna í tveim stjórnmálaflokkum, Sjálfstæðisflokknum og Vinstrihreyfingunni grænu framboði. Öfl staðfestu í báðum flokkum eiga ekki að láta annars vegar útrásarafganga og hins vegar kaldastríðsforynjur koma í veg fyrir kennimörk nýrra tíma í stjórnmálum á Íslandi.