Samfylkingin ritskoðar ESB-umræðuna

Fyrir hönd Samfylkingarinnar og aðildarsinna krefst formaður þingflokks Vinstri grænna, Árni Þór Sigurðsson, að orðið ,,aðlögunarferli" verði ekki notað í fyrirspurn það ferli sem Ísland er í gagnvart Evrópusambandinu. Samfylkingin og Árni Þór vilja kalla það ,,umsóknarferli".

Evrópusambandið kallar ferlið ,,accession process." Rétt þýðing er aðlögunarferli enda gerir ferlið ráð fyrir aðlögun umsóknarríkis að lögum og reglum Evrópusambandsins.

Samfylkingin vill ritskoða umræðuna um Evrópusambandið til að halda á lífi þeirri blekkingu að um óskuldbindandi viðræður sé að ræða. Vill Samfylkingin ekki bara kalla ferlið ,,kaffiboð í Brussel"?

Vilja ekki ræða um aðlögun

Sjálfstæðir nafnlausir fjárfestar í skelfingu

Frétt Morgunblaðsins um skelfingu sjálfstæðra fjárfesta og tap þeirra 22. september leynir kjarnaatriði og verður þess vegna óskiljanleg. Sjálfstæðu fjárfestarnir eru nafnlausir og af því leiðir veit lesandinn ekkert um ,,meinta" braskara sem Seðlabankinn stútaði.

Í fréttaskýringunni er sagt að krafa fjárfesta sé að Seðlabankinn sé fyrirsjáanlegur. Það er annað orðalag yfir brask. Þeir sem véla með verðbréf vilja hafa Seðlabankann í vasanum.

Seðlabankar eiga annað slagið að taka hart á braski með því að gera eitthvað óvænt.

Skelfingarástand á markaði

Gríska evran er ónýt, hvað með þá þýsku?

Evran er gjaldmiðill sextán af 27 ríkjum Evrópusambandsins. Gríska útgáfan af evrunni, í merkingunni grískt efnahagslíf, er ónýt og verður að afskrifa fyrr heldur en seinna. Ef gríska útgáfan af evrunni fer ekki hratt og vel í gjaldþrot skapast hætta fyrir þýsku evruna.

Þýska evran stendur á grunni þýska marksins sem var alvöru gjaldmiðill í öflugu iðnveldi. Fréttir um að Angela Merkel kanslari Þýskalands hringi í dauðans ofboði í leiðtoga annarra ESB-ríkja sýna áhyggjur Þjóðverja.

Þýskaland krefst þess að Lissabon-sáttmálanum verði breytt til að ónýt efnahagskerfi, eins og það gríska, geti farið í gjaldþrot án þess að hagkerfi allrar álfunnar komist í uppnám. Auðvitað átti að ganga frá svona atriðum áður en evran var gerða að lögeyri.

Evran var ekki búin til með hagfræði að leiðarljósi heldur um pólitíska draumsýn um samruna Evrópu - sem nú er að breytast í martröð. Og auðvitað vill Samfylkingin á Íslandi verða hluti af þeirri martröð.

Grískt greiðslufall óumflýjanlegt

Aðlögun án umboðs, innlimun án kosninga

Hvorki alþingi og enn síður þjóðin hafa veitt ríkisstjórn Jóhönnu Sig. umboð til aðlögunar Íslands að Evrópusambandinu. Í aðdraganda þess að alþingi samþykkti aðildarumsókn 16. júlí 2009 voru skipulagðar blekkingar hafðar í frammi um að Ísland færi í óskuldbindandi viðræður við Evrópusambandið.

Evrópusambandið býður ekki upp á óskuldbindandi viðræður, aðeins aðlögun sem felur í sér að umsóknarríki tekur jafnt og þétt upp lög og regluverk sambandsins, samtals 90 þúsund blaðsíður. Í útgáfu Evrópusambandsins segir ótvírætt hvað aðlögun felur í sér.

First, it is important to underline that the term “negotiation” can be misleading. Accession negotiations focus on the conditions and timing of the candidate’s adoption, implementation and application of EU rules – some 90,000 pages of them. And these rules (also known as “acquis”, French for “that which has been agreed”) are not negotiable. (bls. 9, annar dálkur).

Ef ríkisstjórninni helst á því að afsala fullveldi þjóðarinnar til Evrópusambandsins án þess að hafa umboð er komið fordæmi fyrir innlimun Íslands í Evrópusambandið án kosninga.

 

Krafa um víðtæka aðlögun

Verðhjöðnun í neyslusamfélaginu? Ólíklegt.

Verðhjöðnun er andhverfa við verðbólgu. Í verðhjöðnun lækkar verð á vöru og þjónustu þar sem framboð er meira en eftirspurn. Í Bandaríkjunum og Evrópu er óttinn við verðhjöðnun meiri en hræðslan við verðbólgu. Skýringin liggur í því að af reynslu þykjast hagfræðingar vita að kreppa vegna verðhjöðnunar er erfiðara að glíma við en verðbólgu.

Verðhjöðnun verður þegar almenningur dregur saman seglin í útgjöldum og væntir stöðugt lægra verðlags. Þroskuð iðnaðarsamfélög eiga verðhjöðnun á hættu við tilteknar kringumstæður. Íslendingar þekkja slík samfélög aðeins af afspurn.

Rangt væri að segja að neyslan sé Íslendingum í blóð borin því við þekktum sult og seyru í þúsund ár áður en utanríkisverslunin komst á það stig að glingur varð almennt á boðstólum. Einmitt vegna þess að það er svo stutt síðan að við urðum neytendur er fjarska lítil hætta á verðhjöðnunarþrýstingi hér á landi.

Frétt RÚV og aðvörunarorð hagfræðings um hættu á verðhjöðnun er fyndin tilgáta. 

Össur og embættismennirnir

Embættismenn utanríkisráðuneytisins eru tíðir gestir á fundum Samfylkingarinnar, svo eftir hefur verið tekið. Til skamms tíma tíðkaðist hlédrægni hjá embættismönnum þegar um flokkspólitíska fundi var að ræða. Eðli málsins samkvæmt þjónar embættisverkið ólíkum pólitískum herrum eftir því sem þjóðin segir í kosningum.

Össur Skarphéðinsson núverandi utanríkisráherra hefur í gegnum tíðina haft sérstakar umgengnisvenjur við embættismenn. Sem ungur frambjóðandi til borgarstjórnar hótaði Össur að reka embættismenn; í stóli umhverfisráðherra hafði Össur í frammi sambærilegar hótanir við embættismenn sem ekki beygðu sig í duftið.

Ekki hefur frést af beinunum hótunum Össurar í garð embættismanna utanríkisþjónustunnar. Á hinn bóginn gerðir hann stórt númer úr ,,nýuppgötvuðum" skjölum fyrir nokkrum dögum um ótilgreinda embættismenn og hvað þeir og sögðu og gerðu í aðdraganda þess að Ísland blessaði herförina til Íraks.

Össur kann að beita pólitískum terror. Með steindauða umsókn í fanginu er hann vís til að beita menn hörðu til að fá pólitískan stuðning frá ópólitískum embættismönnum. 

 

Ísland - Írland

Ísland býr við rúmlega 6 prósent atvinnuleysi; Írland tæplega 14 prósent. Krónan hjálpar Íslandi úr kreppunni en evran framlengir kreppuna á Írlandi. Ísland getur gripið til úrræða sem samræmast íslenskum hagsmunum. Írar verð að biðja Evrópusambandið um leyfi til að bregðast við neyðinni heima fyrir.

Styrmir Gunnarson skrifar pistil á Evrópuvaktina um stöðuna á Írlandi

Írska verkalýðshreyfingin spurði, hvort ekki væri hægt að framkvæma niðurskurð og skattahækkanir á 6 árum í stað fjögurra. Þá kom það athyglisverða svar, að það væri ekki hægt nema fá samþykki ráðherraráðs ESB fyrir slíkri breytingu.
Mikil mótmæli hafa verið um allt land vegna áformaðs niðurskurðar á framlögum til heilbrigðisþjónustu á landsbyggðinni. Ráðherrar í ríkisstjórn hafa gefið í skyn að hægt sé að ræða breytingar á þeim tillögum. Miðað við reynslu Íra hefði landsbyggðarfólkinu verið sagt að ekki væri hægt að gera breytingar á fjárlagafrumvarpinu nema með samþykki frá Brussel.
Nýjustu fréttir frá Dublin herma, að nú sé Olli Rehn, sem sæti á í framkvæmdastjórn ESB á leið til Írlands. Þar mun hann eiga fundi með stjórnarandstöðu, verkalýðshreyfingu og fleiri aðilum og útskýra fyrir þeim mat framkvæmdastjórnarinnar á niðurskurðartillögum írsku ríkisstjórnarinnar.
Væri Ísland í ESB væri Olli Rehn á leið til landsins til þess að útskýra fyrir Húsvíkingum og Suðurnesjamönnum, Skagfirðingum og Austfirðingum mat framkvæmdastjórnarinnar á nauðsyn niðurskurðar í heilbrigðiskerfinu út á landi.
Viljum við svona Ísland?

Þarf að ræða þetta eitthvað frekar?

 

Derringur í gerviheimi

CCP er fyrirtæki sem selur aðgang að gerviheimi tölvuleikja. Forsvarsmenn CCP tala gjarnan um þann heim sem venjulegt fólk hrærist í sem kjötheima. Í gerviheimi CCP er hægt að búa til nýjan gjaldmiðil, öðlast eilífa æsku og fleira gott í þykjustunni. Íslenskt hugvit og íslenskri fjármunir bjuggu til CCP.

Þegar forstjóri CCP segist hafa lagt niður krónuna því hún þvælist bara fyrir og talar niðrandi um neyðarráðstafanir gjaldeyrishafta ruglar hann saman kjötheimum og gerviheimi.

Í kjötheimum er ekki hægt að láta forritara breyta leikreglunum, bara af því að tölvumerði finnst það sniðugt.

Össur í ESB-einangrun

Össur Skarphéðinsson utanríkisráðherra ber höfuðábyrgð á þeim stórkostlegu mistökum að reyna þvinga þjóðina inn í Evrópusambandið. Ótímabær umsókn knúin í gegnum alþingi með pólitískri fjárkúgun gegn þingmönnum Vg er verk Össurar.

Eftir því sem fjarar undan umsókn Össurar til Brussel fækkar viðhlæjendum utanríkisráðherra. Nýafstaðið þing ASÍ ályktaði ekkert um Evrópumál. Viðskiptaráð birti í vikunni skýrslu um stöðu og horfur þjóðmála og minntist ekki á aðild að Evrópusambandinu. Um síðustu helgi var forysta Vg kaghýdd af flokksmönnum fyrir svikin við stefnu flokksins.

Jafnvel þingmenn og ráðherrar Samfylkingarinnar þvo hendur sínar af umsókninni með því að þegja hana í hel. Össur er einn um að sprikla. Hann sendir embættismenn utanríkisráðuneytisins í pólitísk skítverk; að tala fyrir sérmálum ráðherrans og brýtur þar með venjur og siði stjórnarráðsins um fagmennsku embættismanna.

Örvænting Össurar vex í réttu hlutfalli við minni stuðning við umsóknina. Í skrifar hann hálfsíðu í Morgunblaðið til að koma þeirri skoðun á framfæri að fríverslun við Bandaríkin væri jafngildi þess að ganga í Evrópusambandið. Í Fréttablaðinu lofar Össur erlendum fjárfestingum ef við göngum í Evrópusambandið. Samkvæmt EES-samningnum eru engar hömlur á fjárfestingar þegna ESB-ríkja hér á landi nema í sjávarútvegi. Össur vill selja útlendingum fiskimiðin í hendur og ekkert nýtt við þá afstöðu ráðherrans.

Andstæðingar aðildar Íslands að Evrópusambandinu mega þakka fyrir að jafn sérstakt eintak af íslenskum stjórnmálamanni og Össur Skarphéðinsson óneitanlega er skuli vera aðaltalsmaður inngöngu. 

Nýtt samfélag í deiglu

Stjórnmálaflokkarnir eru lokaðir fyrir umræðu og þeir keppast við að sitja af sér hríðina. Vettvangur þjóðamálaumræðu færist frá stjórnmálaflokkunum sem eru fyrst og fremst valdastofnanir á framfæri hins opinbera.

Á alþingi er samstaða um stöðnun en úti í þjóðfélaginu er umræða sem mun á endanum skapa ný viðmið í samfélaginu.

Umræðan úti í samfélaginu finnur sér pólitískan farveg framhjá stjórnmálaflokkunum.

Fjörugar umræður í Salnum