Milljón króna kósí fólkið kysi Þorstein

Karlmaður með yfir 800 þús. kr. í mánaðarlaun sem býr á höfuðborgarsvæðinu og kaus Bjarta framtíð í síðustu kosningum er líklegasti kjósandi framboðs Sveins Andra Sveinssonar með Þorstein Pálsson í forystu.

Skoðanakönnun MMR staðfestir að léttúðuga fólkið með sáralitla pólitíska sannfæringu er markhópur hægra ESB-framboðsins.

Það kemur ekki fram í könnuninni en líklega er kjósendahópur framboðsins hrifið af sólbekkjum og skiptir um maka þrisvar eða oftar á ævinni.

 

Framboð nyti mögulega 38% stuðnings

Lífeyrissjóðir skapa stöðugleika - en líka spillingu

Eftir hrun urðu lífeyrissjóðir gerendur í atvinnulífinu og beinlínis keyptu upp félög til að bjarga frá gjaldþroti, t.d. Icelandair. Á tímum útrásar voru lífeyrissjóðirnir þöglir bandamenn auðmanna og létu ruglið gott heita enda þáðu stjórnendur lífeyrissjóðanna umbun eins og einkaflug til Bretlands á fótboltaleiki.

Lífeyrissjóðirnir voru ekki ormahreinsaðir eftir hrun og sama græðgismenningin þrífst þar innan dyra. Stöðugleikinn sem lífeyrissjóðirnir skópu  eftir hrun er verður dýru verði keyptur, ef ekkert er að gert. Stjórnendur lífeyrissjóða handvelja samstarfsaðila, sem þar með eru orðnir áskrifendur að auðlegð lífeyrissjóðanna.

Þegar lífeyrissjóðir eru komnir í bullandi samkeppnisrekstur, s..s í matvöruverslun, verður til samtryggingarspilling sem mun féfletta almenning.

Lífeyrissjóðakerfið verður að stokka upp frá grunni.

Setja skilyrði fyrir kaupum á Kaupási

Jón Ásgeir seldi sama fyrirtækið tvisvar

Póstmiðstöðin, sem dreifir Fréttablaði Jóns Ásgeirs Jóhannessonar, var í ,,sölumeðferð" í janúar í ár. Í mars, þegar fjölmiðlafyrirtæki Jóns Ásgeirs, 365 miðlar, birtir ársuppgjörið fyrir árið 2013 kemur á daginn að Póstmiðstöðin var seld á síðasta ári.

Snjall maður, Jón Ásgeir, að selja sama reksturinn í tvígang.

Flottur hagnaður í bókhaldinu er líka það eina sem skiptir máli þegar Jón Ásgeir lengir í lánalínunni hjá Landsbankanum.

 

Póstmiðstöðin seld á síðasta ári

Stjórnarandstaðan skilur ekki Ísland

Allt síðasta kjörtímabil var ríkisstjórn Samfylkingar og VG í vörn vegna þess að hún stóð ekki fyrir almennum aðgerðum til að leiðrétta hrunskuldir heimilanna. Fjöldamótmæli á Austurvelli með eggjakasti og tilheyrandi var uppskera vinstristjórnarinnar.

Undir lok kjörtímabilsins reyndi vinstristjórnin að stokka upp stjórnarskrá lýðveldisins en mætti þar mótbyr. Þá stöðvaðist feigðarförin til Brussel sem átti þó að vera rúsínan í pylsuendanum.

Þjóðin gerði vinstristjórnina að stjórnarandstöðu í þingkosningunum fyrir tæpu ári. Hrikalegt tap VG, sem missi helminginn af fylgi sínu, og fór niður í 10,9% og enn hrikalegra tap Samfylkingar, sem tapaði nær tveim þriðju fylgisins, fór niður í 12,9%, skilaði sér ekki í breyttri pólitík.

Ríkisstjórn Sjálfstæðisflokks og Framsóknarflokks kemur með skuldaleiðréttingu fyrir heimilin, stöðvar eyðileggingu stjórnarskrárinnar og afturkallar formlega umboðslausu ESB-umsóknina. Allt þrennt er í samræmi við niðurstöður alþingiskosninganna.

Stjórnarandstaðan, á hinn bóginn, heldur dauðahaldi í stefnumálin sem þjóðin hafnaði og berst fyrir þeim með kjafti og klóm. Stjórnarandstaðan skilur ekki Ísland.

Meiri árangur nú en hjá fyrri ríkisstjórn