4% dauði í Bagdad

Olíuverð á heimsmarkaði hækkaði ekki nema um 4 prósent við fréttir af aftöku óopinbers leiðtoga shíta-múslímaríkjanna Írans og Íraks. Þeir dagar eru liðnir að skortur á olíu frá miðausturlöndum stöðvi hagkerfi vesturlanda.

Aftakan á Soleimani er áhugaverðust í innbyrðis valdabaráttu múslímaríkja. Shíta-múslímar í Íran, Írak og Sýrlandi sóttu í sig veðrið í baráttunni við súnní-múslíma með Sádi-Arabíu sem valdamiðstöð. Vesturlönd umbáru vöxt og viðgang shíta á meðan Ríki íslams, sem er hreyfing súnní-múslíma, var hættuleg. Soleimani var lykilmaður í útþenslu shíta. 

Shítar eru ekki nema um 20 prósent múslíma, súnnar 80 prósent. Af þeirri ástæðu einni eru útþenslunni takmörk sett. Höfuðríki shíta er Íran sem fyrir daga múslímatrúar hét Persía og gerði bæði Grikkjum og Rómverjum skráveifu í fornöld. Kjarnorkuvopnaáætlun Írans, sem Obama leyfði en Trump stöðvaði, var tilraun til að gera Íran að stórveldi. Landvinningar síðustu ára, í Írak og Sýrlandi, gáfu þeirri ímynd undir fótinn. 

Stefið í útþenslu múslíma síðustu ára, bæði shíta og súnna, er að vesturlönd séu úrkynjuð og veik. Vestrænn almenningur er áhugasamari um kynjapólitík og loftslagsvá en heimsveldi. Misheppnuð tilraun vesturlanda til að umbreyta múslímaríkjum, með innrásum í Írak og Afganistan í kjölfar falls tvíburaturnanna í New York 11. sept. 2001, þótti undirstrika veikleikana. Nú væri tækifæri þjóða spámannsins að láta að sér kveða. Blindaðir af trú sáu múslímar ekki harðan veruleikann: í samanburði við vesturlönd eru múslímaríki á steinaldarstigi í menningu og tækni.

Aftakan í Bagdad í nótt verður ekki án afleiðinga. Jerusalem Post segir aftökuna hafa verið óhugsandi - áður en hún var gerð. Soleimani sendi shítana sína til að narta í veldi Bandaríkjanna með umsátri um bandaríska sendiráðið í Bagdad. Fáeinum dögum síðar er Soleimani dauður.

Soleimani mátti vita að sendiráð eru Bandaríkjamönnum viðkvæm á kosningaári. Carter tapaði forsetakosningunum 1980 vegna sendiráðstöku landa Soleimani í Tehran. Trump stendur til endurkjörs í haust.

Klerkaveldið í Íran er í valþröng. Ef þeir láta aftökuna yfir sig ganga sýnast þeir vanmáttugir. Ef þeir auka ófriðinn og velja sér viðkvæmt bandarískt skotmark hætta þeir á frekari aftökur leiðtoga sinna. Innanlandsástand í Íran er þannig að óvíst er hvort margir gráti mannfall í röðum klerkanna.   

Dýnamít í púðurtunnu?

Athugasemdir

[Halldór Jónsson, 3.1.2020 kl. 12:07]

Drónaárás á Aramco í Saudí er ekki ólíkleg um helgina. Með hverju verður svarað veit ég ekki, en hætt er við að þar verði einhverjir háttsettir shítar í hættu. Olíuverðið er akki að lækka aftur í bráð held ég.

[Ómar Geirsson, 3.1.2020 kl. 18:14]

Blessaður Páll.

Það er ekki eins og þú hafir lært landafræði þína þegar þú settir saman þennan pistil.

Ekki að Trump hefði getað geispað og látið eins og ekkert sé.

Það er rangfærsla að Sunnar hafi borið ábyrgð á Ríki Íslams, sú bábilja er eins gáfuleg eins og að halda því fram að Hvítasunnusöfnuðurinn i Klakksvík hefði haft bolmagn til að stöðva dansleiki og aðra skemmtun á Íslandi sem og Noregi.

Fjármögnunin sem og stuðningurinn kom frá Persaflóa, og hinn beini í formi vopna og hernaðarstuðningurinn kom frá Tyrkjum.  Þú ert virkilega illa lesinn Páll ef þú veist ekki að fyrsta meinta innrás Tyrkja í Sýrland  var framkvæmd með fyrrum bardagahermönnum Ríkis Íslams.

Svona í ljósi þess að þetta er andstæðingur vestrænnar siðmenningar.

Íranar búa hinum megin við Persaflóann, og þeir þurfa varla að nota haglabyssur til að trufla útflutning á olíu.

Sem snerti mig og snertir þig Páll.

Spurningin eru stigmögnun átaka, eitthvað sem Trump skildi svo vel á Kóreuskaganum þegar hann gaf Kim númer 3 valkost um undanhald.

En slíku er ekki fyrir að fara hjá þeim sem þegar eru drepnir.

Sem aftur bendir á ráðgjöf Trumps.

Samt, síðast þegar ég vissi þá varst þú ekki Páll í þeim misvitra hópi.

Kveðja að austan.