Tilfallandi athugasemdir

Fimmtudagur, 6. desember 2018

Helgi Hrafn talsmaður múslíma á alþingi

Píratinn Helgi Hrafn stofnaði Arabísk-íslenska menningarsetrið. Verkefnið er að auka veg trúarmenningar múslíma á Íslandi. Félagið er komið með íslenska kennitölu og starfsemin sögð ,,sérfræðileg, vísindaleg og tæknileg."

Helgi Hrafn er sem kunnugt áhugamaður um tölvur, segist hafa spilað ,,marga tölvuleiki um ævina." Samkvæmt tilgangi múslímafélagsins er píratinn réttur maður á réttum stað; tölvulæs og sannfærður.

Menningarsetur, eins og það sem Helgi Hrafn stofnaði, fá iðulega fjárstuðning frá ríkum Arabaríkjum til að útbreiða málstaðinn. Það má gera sér mat úr því.

Helgi Hrafn er eitthvað viðkvæmur fyrir að vera bendlaður við trúarmenningu múslíma og gerir ekki grein fyrir aðild sinni að Arabísk-íslenska menningarsetrinu í hagsmunaskrá sinni á heimasíðu alþingis. Þó er þingmaðurinn býsna nákvæmur í skráningu. Samkvæmt þingsíðunni er hann í stjórn ,,Hins íslenska fúkyrðafélags".

Nú getur verið að Helgi Hrafn hafi sagt sig frá félaginu sem hann stofnaði, Arabísk-íslenska menningarsetrinu, en þá ætti hann að gera grein fyrir því opinberlega. Voru deilur milli félagsmanna í trúarmálum, eins vill verða hjá þeim sannfærðu? Var deilt um eitthvað annað? Eða missti Helgi Hrafn áhugann? Af hverju?

Þegar Helgi Hrafn talar á alþingi um málefni er varða útbreiðslu trúarmenningar spámannsins ætti hann í nafni gagnsæis að láta þess getið að hann sé sérstakur áhugamaður um að vegur múslíma vaxi á Íslandi. Þar með ættu kjósendur kost að vega og meta framlag þingmannsins til íslenskra hagsmunamála í samhengi.

Ekki gerir Helgi Hrafn ráð fyrir að kjósendur kunni honum þakkir að vera múslímaður inn i skápnum?