Árni Páll: má ekki skemma aðildarferlið

Loksins, loksins, loksins kom að því. Formaður Samfylkingar fellir grímuna, hættir að tala um aðildarviðræður við Evrópusambandið og segir aðildarferli. Eftirfarandi er bein tilvitnun í Árna Pál Árnason formann Samfylkingar á bls. 2 í Morgunblaðinu í dag:

Ríkisstjórnin hefur umboð til þess að gera hlé á aðildarviðræðum en ekki til þess að slíta þeim eða vinna tjón á aðildarferlinu nema með því að bera það undir þjóðina. Það eru takmörk fyrir því hversu langt er hægt að ganga í því að skaða ferlið eins og með því að leysa upp samninganefndina.

Til skamms tíma var þeirri blekkingu haldið á lofti að við værum aðeins í viðræðum við Evrópusambandið en alls ekki í aðildarferli inn í sambandið. Ríkisstjórnin er í áföngum að vinda ofan af ESB-umsókn Samfylkingar, hætta viðræðum og stöðva ferlið, og þá kemur Árni Páll fram og viðurkennir að hér eru ekki á ferðinni óskuldbindandi viðræður heldur ferli inn í ESB.

Samfylkingin hóf ESB-ferlið 16. júlí 2009 án þess að bera það undir þjóðina. Og þar með var málið sett í tiltekinn farveg. Af því leiðir að sjálfsögðu að engin ástæða er til að bera undir þjóðina þegar ferlinu er hætt.