Tilfallandi athugasemdir

Mánudagur, 10. júní 2013

Forsenda þjóðaratkvæðis er ESB-meirihluti á þingi

Án meirihluta á alþingi fyrir aðild Íslands að Evrópusambandinu er tilgangslaust að efna til þjóðaratkvæðagreiðslu um hvort stefna skuli að aðild. Meirihluti alþingis myndar ríkisstjórn sem leiðir samningaferlið við Evrópusambandið.

Það er algerlega óhugsandi að efna til þjóðaratkvæðagreiðslu um að semja við Evrópusambandið um aðild þegar meirihlutinn á sitjandi alþingi er kosinn út á þá stefnu að Íslandi sé betur borgið utan sambandsins.

Þingmenn Sjálfstæðisflokks, Framsóknarflokks og VG eru kosnir á grunni stefnuskrár sem kveður á um að Ísland skuli standa utan Evrópusambandsins. Eini flokkurinn sem vill Ísland í ESB, Samfylkingin, fékk 12,9 prósent atkvæðanna í nýafstöðnum þingkosningum.

Ríkisstjórn Sigmundar Davíðs, Laugavatnsstjórnin, stöðvaði viðræður Íslands við ESB. Þar við situr. Þjóðaratkvæði um að endurvekja umsóknina er framtíðarmúsík og ekki raunhæf á nýhöfnu kjörtímabili.