Þórður Snær og Aðalsteinn óttast líflát, Stefán þegir

Heimildin, sem Þórður Snær ritstýrir og Aðalsteinn Kjartansson starfar á, segir að félagarnir óttist að vera teknir af lífi. Þeir kærðu Pál skipstjóra Steingrímsson fyrir hálfu öðru ári, sumarið 2022, fyrir hótanir. Ein fjöður verður að fjórum hænum. Hótun í júlí 2022 er orðin að líflátshótun í janúar 2024, samkvæmt Heimildinni.

Hvorki Þórður Snær né Aðalsteinn eru skrifaðir fyrir fréttinni á Heimildinni, hún er leppuð af tveim undirmönnum ritstjórans. Augljóst er að mikið liggur við, sakborningarnir vilja fá umtal um sín mál eftir að hafa beitt sér af hörku allt síðasta ár gegn umfjöllun. Þórður Snær og Aðalsteinn stefndu tilfallandi bloggara fyrir að voga sér að varpa ljósi á málsatvik í byrlunar- og símastuldsmálinu, sem er forsaga kærumáls þeirra til lögreglunnar.

Sammerkt Heimildarfréttinni og Vísisfrétt um kærumálið til lögreglu, sem tilfallandi bloggaði um, er að hvorugur fjölmiðillinn getur þess að Stefán Eiríksson fékk tölvupóstinn frá skipstjóranum sem er formleg ástæða kærunnar. Aðalsteinn og Þórður Snær fengu afrit. Vísir bætti nafni Stefáns inn í fréttina eftir tilfallandi athugasemd og sagði

Fréttin hefur verið uppfærð þar sem þess var ekki getið að Stefán Eiríksson útvarpsstjóri hefði einnig kært Pál fyrir hótun. Hann hefur ekki tjáð sig um niðurfellinguna opinberlega ólíkt Aðalsteini, Þórði Snæ og Páli Steingrímssyni.

Hvers vegna er Stefán útvarpsstjóri ekki nefndur í Heimildarfréttinni, sem birtist eftir frétt Vísis? Allir sem fylgjast með málinu, kæru þremenningana og niðurfellingu hennar, vita að Stefán kærði á sömu forsendum og blaðamennirnir tveir. Þórður Snær skrifar sameiginlega greinargerð fyrir alla þrjá, sem sögðust ,,upplifa hótun" - sem núna er orðin líflátshótun.

Getur verið að útvarpsstjóri hafi si svona sagt við Dodda og Alla; strákar, ég nenni ekki í þennan leiðangur með ykkur, að gera tilræðismann úr skipstjóranum, fólk kaupir ekki lengur ýkjurnar um að við séum fórnarlömb. Þið eru sakborningar í byrlunar- og símastuldsmálinu en ekki ég. Látið mig í friði með þennan spuna. Ég hef nóg á minni könnu, þarf að svara fyrir aðkomu RÚV, ef ég held starfinu nógu lengi.

Rifjum upp hvers vegna skipstjórinn skrifaði útvarpsstjóra sumarið 2022. Þáverandi eiginkona Páls varð ítrekað fyrir áreiti, að ekki sé sagt yfirgangi, blaðamanna. Hún glímir við alvarleg andleg veikindi. Tilfallandi bloggaði:

Veikindi konunnar versnuðu í kjölfar ágangs blaðamanna. Hún braust út af geðdeild í lok júní 2022 og gekk í skrokk á nákomnum ættingja. Lögregla var kölluð til og stigabíll slökkviliðs sömuleiðis til að ná tökum á ástandinu. Í framhaldi var hún öryggisvistuð á sjúkrastofnun. Í öryggisvistun fara aðeins þeir sem líklegir eru til að valda öðrum miska.

Börnum veiku konunnar var nóg boðið og báðu pabba sinn, Pál skipstjóra, að gera eitthvað í málinu. Páll sendi tölvupóst til Stefáns Eiríkssonar útvarpsstjóra 1. júlí 2022. Hann er yfirmaður fréttamanna á RÚV. Afrit fengu Aðalsteinn Kjartansson á Stundinni og Þórður Snær á Kjarnanum. Tölvupósturinn er svohljóðandi:

Góðan daginn Stefán

Nú fer ég fram á að þið samstarfsfélagar látið [nafn fellt út - pv] í friði, það ónæði sem þið hafið valdið fjölskyldunni með vinnubrögðum ykkar er til háborinnar skammar, og ef þið látið ekki af þessari háttsemi ykkar neyðist ég til að grípa til annarra ráða til þess að stoppa ykkur...

Kv. Páll Steingrímsson

Þetta er allt og sumt sem skipstjórinn skrifaði. Önnur ráð hans voru t.d. að kæra til siðanefndar, fá ráðuneytið til að grípa í taumana, enda RÚV ríkisstofnun, eða skrifa útvarpsráði. Hvergi er minnst á ofbeldi og enn síður skotvopn. Hvernig er hægt að lesa líflátshótun úr tölvupósti skipstjórans? Jú, það geta ímyndarveikir blaðamenn með vonda samvisku og lélega dómgreind.

Þórður Snær og Aðalsteinn eru með lífið í lúkunum. En það eru ekki orð og athafnir skipstjórans sem valda hugarangri. Þeir óttast ákæru í byrlunar- og símastuldsmálinu, sem hófst vorið 2021 þegar Páli skipstjóra var byrlað og síma hans stolið í þágu RSK-miðla, RÚV og Heimildarinnar (áður Stundin og Kjarninn).

Tvímenningarnir fá vitneskju fyrr en aðrir er hillir undir lok rannsóknar. Þeir gætu verið boðaðir á ný í yfirheyrslu, t.d. til að bera undir þá gögn sem lögregla fengi frá Google og Facebook, textaskilaboð á milli blaðamanna og veiku konunnar sem byrlaði skipstjóranum. Á útmánuðum liðins árs sóttist lögreglan eftir þeim upplýsingum frá tæknirisanum í vesturheimi. Gögnin gætu verið komin í hús.

Þá er vert að hafa í huga að samstarfsmaður Þórðar Snæs og Aðalsteins er Helgi Seljan, verðlaunablaðamaður eins og hinir tveir. Þegar veika konan var færð í öryggisvistun hrópaði hún ítrekað ,,látið Helga Seljan vita." Vitni voru að þessum upphrópunum og aðstandendur vissu að konan var með í fórum sínum einkasímanúmer Helga og tölvupóst.

Réttarstaða Helga Seljan er ókunn. Nær öruggt er að hann sé annað tveggja vitni eða grunaður. 

Skýrslutaka vegna sakamálarannsóknar er að jafnaði boðuð með fyrirvara. Hefur einhver þremenninganna fengið skilaboð frá lögreglunni síðustu daga? Skýrir það taugaveiklunina, að þyrla upp smámáli, niðurfelldri kæru, til að draga athyglina frá stærsta sakamáli íslenskrar fjölmiðlasögu?

Byrlun og símastuldur var undanfari samræmdra frétta tveggja fjölmiðla sem áttu að heita sjálfstæðir, Stundin og Kjarninn, en höfðu RÚV sem aðgerðamiðstöð. RÚV birti enga frumfrétt. Aðalsteinn fór fyrirvaralaust af RÚV yfir á Stundina þrem dögum fyrir byrlun. Fyrir hádegi 30. apríl 2021 var hann fréttamaður RÚV en eftir hádegi blaðamaður á Stundinni. Þrem dögum síðar, 3. maí, er skipstjóranum byrlað. Á RÚV var tilbúinn sími af Samsung-gerð til að afrita síma skipstjórans af sömu tegund. Aðgerðaáætlun gerði ráð fyrir að síma skipstjórans yrði skilað á sjúkrabeð hans án þess að hann yrði þess var. Enda meðvitundarlaus eftir byrlun. Ríkisfjölmiðillinn með fyrrum lögreglustjóra í fyrirsvari er miðstöð aðgerða. Ekkert viðlíka fjölmiðlasamsæri er að finna í annálum vestrænnar blaðamennsku. Allir blaðamennirnir sem í hlut eiga eru margverðlaunaðir af Blaðamannafélagi Íslands.

Skiljanlega vilja kapparnir Þórður Snær og Aðalsteinn, og þrír meðsakborningar, að íslenskir fjölmiðlar fjalli hátt og snjallt um kæruna sem fór í ruslið, sömu leið og erindi þeirra til umboðsmanns alþingis. Blaðamennirnir réðu lögmanninn Flóka Ásgeirsson til að skrifa umboðsmanni alþingis að hann beitti sér fyrir að lögreglurannsókn yrði hætt. Erindið fór í ruslið hjá umba. RSK-miðlar gera uppslátt úr ruslinu, í von um að sorpið feli glæpsamlegar staðreyndir.

Tilfallandi hefur sannfrétt að erlendir fjölmiðlar séu komnir á sporið, bíða eftir ákærum og lýsingu lögreglu á málavöxtu. Hætt er við aulalegu svipmóti á íslenskum fjölmiðlum, sem í þrjú ár hafa látið sakborninga matreiða fyrir sig fréttir í sakamálarannsókn. Einstakt er að fréttaumfjöllun sakamáls sé ritstýrt af þeim sem grunaðir eru um glæpinn. Byrlunar- og símastuldsmálið sýnir íslenska blaðamenn sem hlaupatíkur sakborninga í refsimáli. Er þess ekki að vænta að Blaðamannafélag Íslands verðlauni meðvirkni ársins? Víst er að tilnefningar yrðu margar.