Flytjast skuldir Haga með í Kauphöllina?

Ástæðan fyrir því að Arion, áður Kaupþing, leysti til sín Haga frá Baugsfeðgum var að rekstur fyrirtækisins stóð ekki undir skuldum. Þegar Arion ætlar núna að gefa Baugsfeðgum kost á að eignast hluta af Högum í gegnum skráningu í Kauphöllina hlýtur spurningin að vakna hvort skuldir Haga flytjast með?

Hvað segir Finnur bankastjóri?

Össur, Árni og vinstrikvótinn í Spron

Í Spron var pólitískt spillingarfyrirkomulag sem Össur Skarphéðinsson og Árni Þ. Sigurðsson nýttu sér til að græða stórfé. Fyrirkomulagið gekk út á að vinstriflokkarnir gömlu, Alþýðuflokkur og Alþýðubandalag, áttu sæti í stjórn Spron og fengu rétt til að kaupa stofnbréf á hagstæðum kjörum.

Þannig tók Árni Þ. við af Sigurjóni Péturssyni leiðtoga Alþýðubandalagsins í Reykjavík sem átti sæti í stjórn Spron.

Sparisjóðir voru stofnaðir fyrir almenning á sínum tíma, ekki til að meintir málssvarar almennings mættu maka krókinn.

Arion gefur Baugsfeðgum Haga

Enginn fjárfestir með réttu ráði kaupir hlutabréf í fyrirtæki sem Baugsfeðgar stjórnar. Þeir Jón Ásgeir og Jóhannes faðir hans fóru með almenningshlutafélagið Baug eins og það væri þeirra einkaeign. Í ofanálag er Jón Ásgeir dæmdur maður.

Baugsfeðgar munu fá Haga fyrir slikk og til þess er leikurinn gerður.

Arion banki grefur sína eigin gröf með þessum gjörningi. 

Óvissu um framtíð Haga eytt

Einkamál Samfylkingarinnar

Samfylkingin er einangruð í íslenskum stjórnmálum. Þegar formaður flokksins fer í heimsókn til Brussel er rökrétt að það sé einkaheimsókn.

Einn flokka vill Samfylkingin aðild Íslands að Evrópusambandinu. Þráfaldlega hefur verið sýnt fram á að afgerandi meirihluti þjóðarinnar er á móti inngöngu.

Samfylkingin er ekki læs á vilja þjóðarinnar og hefur aldrei verið. Aðeins við sérstakar þjóðfélagsaðstæður, þegar þjóðin var í taugaáfalli eftir hrunið, tókst Samfylkingunni um stund að sannfæra 29 prósent þjóðarinnar að greiða sér atkvæði.

Einkamál Samfylkingarinnar eru best geymd bakvið luktar dyr.

Jóhanna í einkaheimsókn

Aumingjarökin fyrir ESB-aðild

Sértrúarsöfnuðurinn sem berst fyrir aðild Íslands að Evrópusambandinu er verseraður í pólitík og kann listina að ljúga upp á framtíðina. Samfylkingin laug til dæmis því upp á framtíðina að gengi krónunnar myndi styrkjast þegar Ísland sótti um aðild að Evrópusambandinu. Sótt var um aðild 16. júlí á síðasta ári. Í Kastljósviðtali í fyrrakvöld hökti og skrölti hjá forsætisráðherra þegar gengið og umsóknin báru á góma.

Ástæðan fyrir því að sértrúarsöfnuðurinn þarf að ljúga til um ábatann af inngöngu í Evrópusambandið er að þegar krónum og aurum sleppir eru aðeins eftir aumingjarökin.

Sértrúarsöfnuðir laða iðulega til sín fólk sem stendur halloka og kennir öðrum um ófarir sínar. Uppgjöfin leiðir til ranghugmynda sem fá næringu úr ímynduðum heimi framtíðarlandsins. Trúarhitinn kemur í stað sjálfsbjargarviðleitni; stóra altæka hugmyndin á að bjarga öllum málum um alla framtíð.

Í dag, 4. febrúar 2010, opinberar einn af þekktari aðildarsinnum kjarnann í aumingjarökunum. Þorvaldur Gylfason prófessor skrifar eftirfarandi í Fréttablaðið

En það er þó einmitt einn höfuðtilgangurinn með ESB-aðild að deila fullveldinu með öðrum til að skerða völd þeirra, sem hafa farið illa með vald á liðinni tíð.

Umorðun aumingjarakanna: Langt-í-burtu útlendingar eru mun heppilegri til að fara með íslensk málefni en Íslendingar sjálfir.

Kærar þakkir, Þorvaldur Gylfason.