Össur rænulaus um alþjóðamál

Norðurlönd hafa áhuga á að fá sæti í hópi G-20 þjóða sem hittast að ræða verkefni alþjóðasamfélagins. Er það í samræmi við Stoltenberg skýrsluna frá í fyrra og árbók Norðurlandaráðs í ár þar sem fjallað er um skilyrði fyrir því að Norðurlönd geri sig meira gildandi í alþjóðamálum.

Svíar sem eru í Evrópusambandinu leggja hugmyndum um aukið vægi Norðurlandanna lið vegna þess að það ESB er meginlandsríkjaklúbbur sem tekur lítið tillit til Svía. Í kvöldfréttum RÚV er fjallað um málið og talað við norska utanríkisráðherrann sem telur meiriháttar breytingar eiga sér stað á alþjóðavettvangi er gefi Norðurlöndum sóknarfæri.

Í beinu framhaldi er rætt við íslenska utanríkisráðherrann sem er orðinn jafn rænulaus og hann er fylgislitill. Össur segir til að rödd Íslands heyrist á vettvangi G-20 þurfi landið að ganga inn í Evrópusambandið.

Auðvitað, Össur. Evrópusambandið tekur ekkert tillit til Svía en Íslendingar með þvílíkt mannaval verða hafðir með í ráðum um þróun alþjóðamála. 

 

Jóhanna er í pólitískum farsa

Dauðastríð ríkisstjórnar Jóhönnu Sig. verður æ farsakenndara. Í kvöldfréttum RÚV segir að stjórnarandstaðan hafi gengið á dyr af fundi með forsætisráðherra. Jóhanna kemur eins og álfur út úr hól og segist ætla að leggja fram efnahagsfrumvörp í nafni ríkisstjórnarinnar eftir að stjórnarandstaðan afþakkaði samstarf.

Einhver sem hefur trúnað Jóhönnu þarf að segja henni að venjan er sú þegar meirihlutastjórnir eru við völd að þær leggi fram frumvörp á eigin vegum en biðji ekki um leyfi stjórnarandstöðu.

Þessar vendingar eru svo hallærislegar að maður er farinn að vorkenna ríkisstjórninni og Samfylkingunni sérstaklega.

 

Álitsgjafi RÚV ber að kjánafávísi

Eiríkur Bergmann Einarsson er kemur reglulega fram sem álitsgjafi RÚV um Evrópusambandsmál. Eiríkur er með kennarastöðu í samfylkingarháskólanum í Norðurárdal og doktorsgráðu frá félaga sínum í trúnni, Baldri Þórhallssyni varaþingmanni Samfylkingar og prófessor við HÍ.

Eiríkur Bergmann stundar þá iðju að fá greinar birtar í Guardian til að koma þeim á framfæri hér heima enda er sannfæring hans að sönn frægð komi að utan. Í grein um hugmyndir um stofnun ríkjasambands Norðurlanda segir Eiríkur að Ísland og Noregur hafi komist undan yfirráðum Dana í byrjun 20. aldar. Noregur var færður undir veldi Svía í eftirmálum Napóleonsstyrjaldanna á öðrum áratug 19. aldar. Þegar Norðmenn tala um ,,Unionen" er það iðulega með tvöfaldri tilvísun í sambandið við Svía sem lauk 1905 og Evrópusambandið í dag.

Kjánafávísi Eiríks er því neyðarlegri að hann var starfsmaður sendiráðs Evrópusambandsins fyrir Noreg og Ísland með aðsetur í Osló. Maður sem þykist vera stjórnmálafræðingur með skoðanir á Norðurlöndum og Evrópusambandinu er hér úti í móa.

Í stað þess að skammast sín fyrir fáviskuna og biðjast afsökunar derrir Eiríkur sig, eins og lesa má hér af vef amx.

Fjögur evru-ríki í meiri skuldavanda en Ísland

Landið sem hýsir miðstöð Evrópusambandsins, Belgía, skuldar árlega þjóðarframleiðslu sína. Þrjú önnur evru-ríki, af samtals sextán, Ítalía, Írland og Grikkland skulda meira en alla árlega þjóðarframleiðslu sína. Skuldahlutfall Íslands er 87 prósent.

Tvær meginályktanir má draga af þessum samanburði. Í fyrsta lagi að evran hvorki bjargar ríkum frá kreppu né veitir sérstakt skjól þegar kreppa ríður yfir. Í öðru lagi að sveigjanleikinn sem fæst með eigin mynt er ómetanlegur.

Krónan er bjargvættur Íslands.

Ísland skuldar einna mest

Hreyfingin tvöfaldar fylgi sitt

Fjölmiðlar segja fátt um að Hreyfingin hafi tvöfaldað fylgi sitt milli mánaða og teljast hafa átta prósent samkvæmt skoðanakönnun. Tvær skýringar eru líklegastar á fylgisauka Hreyfingarinnar. Þingmenn hennar hafa verið ötulir í mótmælum og samsamað sig ítrustu kröfum um fólki verði bætt efnahagslegt hnjask hrunsins.

Í öðru lagi eru þingmenn Hreyfingarinnar þeir einu á alþingi sem krefjast kosninga strax og gera það af þunga. Aðrir þingflokkar eru hræddir við að mæta kjósendum.

Hreyfingin hefur unnið fyrir fylgisaukningunni.