Sjálfsuppgjöf

Maður sem gefst upp á sjálfum sér gengur fyrir björg, finnur sér kaðalspotta eða slöngu til að leiða útblásturinn inn í farþegarýmið. Þjóð sem gefst upp á sjálfri sér biður útlendinga að sjá um sín mál.

Baugur í sögubækurnar

Baugur er gjaldþrota. Eftirmæli Baugs verða einhvern veginn á þessa leið: Græðgi, fordild og fávísi. Kjánaprik af Seltjarnarnesi hélt að hann gæti sigrað heiminn og Ísland í leiðinni. Meira þarf til en ódýrt lánsfé og fífldirfsku til að verða að manni. Jón Ásgeir Jóhannesson er enn ungur maður og kannski fattar hann fyrr en verður gamall visku genginna kynslóða: Pungspark þarf að hitta í pung til að teljast spark.

Meðferð við valdaþreytu

Sjálfstæðisflokkurinn er kominn í þriggja mánaða valdaþreytumeðferð eftir 18 ára samfellda setu í ríkisstjórn. Meðferðin verður þríþætt. Í fyrsta lagi endurnýjun á mannskap, í öðru lagi endurskoðun á hugmyndafræði og í þriðja lagi uppgjör við Evrópuvilluna.

Í stað þess að jagast í Steingrími J. og félögum ætti Sjálfstæðisflokkurinn að leyfa starfsstjórninni að vinna sitt verk og beina gagnrýninni að meginmálum en ekki tittlingaskít. 

Ef Sjálfstæðisflokkurinn tekur meðferðina af alvöru verður hann í stakk búinn að leiða ríkisstjórn eftir næstu kosningar. Og þá er gott að hafa Steingrím J. áfram sem fjármálaráðherra.

Þingmenn í meðferð

Norsk króna og íslenskur fiskur

Norskir sjómenn stynja þungan vegna verðfalls á þorski á erlendum mörkuðum. Á síðustu vikum hefur kílóverð á þorski fallið um 15 prósent, samkvæmt Fiskaren.no. Minni eftirspurn og sterkari norsk króna gera sjávarútvegi frænda okkar grikk. Þótt sjávarútvegur sé enn veigamikill þáttur í norsku efnahagslífi er hann hvergi nærri eins stór hluti af þjóðarbúskapnum og hér.

Ef við hefðum norska krónu sem gjaldmiðil væri ekki stunið eins og í Lófóten heldur öskrað. Nýorðinn fjármálaráðherra ætti að hugsa norsku krónuna á enda og hafa eftir íslenskt viðkvæði: Hollur er heimafenginn baggi.

Samfylkingin missir ráðuneyti og Baugur lokar

Á meðan Samfylkingin stýrði viðskiptaráðuneytinu, og þar með skilanefndum og ríkisbönkunum, var Baugur áfram í rekstri. Jón Ásgeir Jóhannesson Baugsstjóri taldi sig hafa þannig tök á ráðherra Samfylkingar að ráðherra myndi tala máli Baugs við Landsbankann, sem er stærsti lánveitandinn. Þegar Samfylkingin missti ráðuneyti viðskipta voru öll sund lokuð og Baugur fer í greiðslustöðvun.

Baugur í greiðslustöðvun

Jóhanna biður Davíð að lýðskruma með sér

Nýi forsætisráðherrann er fangi lýðskrums. Jóhanna Sigurðardóttir gat ekki hafið sig yfir múgæsinguna og skipt um stjórnkerfi Seðlabanka með málefnalegum hætti; lagt fram frumvarp að lögum um breytta skipan Seðlabanka. Nei, hún þurfti að smjaðra fyrir fíflskunni og stilla Seðlabankastjórn upp við vegg. Til að gera málið enn subbulegra þurfti forsætisráðherra að gera starfslokagreiðslur að miðlægu viðfangsefni í uppgjöri við stjórn Seðlabankans.

Ærlegir menn gera ráð fyrir að Davíð Oddsson biðji Jóhönnu vel að lifa og sitji áfram æðrulaus í embætti og leyfi þinglegri meðferð að hafa sinn gang. Þar með segir Davíð það sem þjóðin þarf að heyra: Skrílræði komi ekki í stað lýðræðis.

Jóhanna og Davíð ræddu saman

ESB er hundamál ríkisstjórnar Jóhönnu

Þegar íslenskri stjórnmálaflokkar geta ekki tekið afstöðu hvort leyfa eigi hundahald í þéttbýli er málinu vísað í almennar kosningar. Evrópusambandsaðild er orðið að hundamáli ríkisstjórnar Jóhönnu Sigurðardóttur. Samfylking og Vinstri grænir sammæltust um texta í stjórnarsáttmála sem frestar uppgjöri þessara flokka í ESB-málinu.

Samfylkingin hafði fyrr í vetur lamið á Sjálfstæðisflokknum með kröfu um aðildarviðræður. Núna er eins og aðild sé lítilfjörlegt aukaatriði.

Allt frá árinu 1995 þegar Jón Baldvin Hannibalsson formaður Alþýðuflokksins gerði ESB-aðild að kosningamáli með litlum árangri hafa kratar notað málið til að skapa sér sérstöðu. Sannfæring fyrir aðild er ekki meiri en svo að trekk í trekk er krafan um aðild dregin tilbaka.

Framsóknarflokkurinn át upp kjánaskap Samfylkingar og samþykkti að æskja inngöngu í Evrópusambandið að því gefnu að sambandið breytti sér í grundvallaratriðum, t.d. með afnámi sameiginlegrar fiskveiðistefnu.

Hundamál eru þreytandi í pólitískri umræðu.

Ólíkir hagsmunir við stjórnarmyndun

Vinstri grænir og Samfylking vilja starfsstjórn sem yrði vísir að þróttmikilli ríkisstjórn eftir næstu kosningar. Framsóknarflokkurinn vill stuðla að starfsstjórn með sem lægstum samnefnara. Fram eftir viku virtist sem ný ríkisstjórn gæti hafið störf í góðum meðbyr. Fyrirvarar Framsóknarflokksins og tafir á myndum ríkisstjórnar eru ekki veganestið sem stóri-valkosturinn-við-Sjálfstæðisflokkinn óskaði sér.

Til að gera málið snúnara er prófkjörsbarátta þingmannsefna hafin. Starfandi þingmenn og vonarstjörnur utan þings munu freista þess að skapa sér sérstöðu með áherslum í andstöðu við stefnu nýrrar ríkisstjórnar.

Í stað þess að búa til samsteypustjórn tveggja flokka með hlutleysi hins þriðja hefði verið nær að láta einum stjórnmálaflokki um að mynda starfsstjórn. Sá vagn er farinn og flokkarnir þrír sitja uppi með vandamál sem skaðar þá alla.

Vandræðin við myndun starfsstjórnar gefa ekki góð fyrirheit um þriggja flokka stjórn eftir kosningar.

Hlé gert til að ræða málin

Bingi og spilling, flís og rass

Björn Ingi Hrafnsson var aðstoðarmaður forsætisráðherra og borgarfulltrúi um leið og hann var sérlegur skósveinn auðmanna. Björn Ingi makaði krókinn persónulega þegar hann útvegaði auðmönnum aðgang að opinberum eigum. REI-málið var toppurinn á ísjakanum.

Eftir útlegð frá stjórnmálum fékk Björn Ingi innhlaup í Baugsmiðla þar sem sjúskaður og siðspilltur maðurinn vélar með orðróm og slúður. Björn Ingi kann ekki að skammast sín og það eina sem almenningur getur gert er að leggja nafn hans á minnið og muna í áratugi að Bingi og spilling er flís og rass.

Fyrirvarar Framsóknarflokksins

Framsóknarflokkurinn sá ekki fyrir að Vinstri grænir og Samfylking myndu gera sér pólitískt mat úr stjórnarmyndum með hlutleysi Framsóknarflokks. Tilboð Framsóknarflokksins um minnihlutastuðning var samt sem áður þrælpólitískur og líklega síðasti naglinn í ríkisstjórn Geirs H. Haarde. Með fyrirvara sínum, sem tefur myndun nýrrar ríkisstjórnar, sýnir Framsóknarflokkurinn taugaveiklun sem bæði mun veikja hann sem og ríkisstjórn Vinstri grænna og Samfylkingar.