Stanslaus áróður um ónýti Íslands skilar þingmennsku

Fylkisflokkur Gunnars Smára flytur stanslausan áróður um ónýti Íslands og klæðir í búning frétta, líkt og Gunnar Smári klæddi hagsmuni Jóns Ásgeirs í fréttir á Fréttablaðinu.

Áróðurinn um ónýta Ísland á sér rætur í Samfylkingunni sem notaði hann til fylgis við feigu ESB-umsóknina frá 16. júlí 2009. Áróðurinn skilaði Samfylkingunni 12,9 prósent fylgi í síðustu kosningum.

Gunnar Smári er snjall áróðursmaður, það sýndi hann sem ritstjóri Fréttablaðsins. Til að ná kjöri inn á alþingi þarf ekki nema um 5 prósent fylgi. Þingmennska er þægileg innivinna - líka fyrir þá með slóð af brenndum brúm að baki.

Lekinn, grínið og ríkissaksóknari

,,Læk" við Pál Vilhjálmsson getur ekki verið grín. Hann er ekki það fyndinn.

Saksóknari „lækar“ ummæli um lekamálið

Með angist kemur stríð

Stórveldin í vestri, Bandaríkin og Evrópusambandið, bregðast við innri veikleikum með útþenslustefnu í utanríkismálum. Þetta gildir sérstaklega um Evrópusambandið. Trúarstríðsmenn Ríki íslams koma margir hverjir frá Evrópulöndum sem í áratugi ráku fjölmenningarstefnu er fóstraði herskáa unga menn sem hatast við vestræna menningu.

Í bók Philipp Blom, Vertigo years, er sagt frá Evrópu í aðdraganda fyrra stríðs. Kenning Blom er að umskiptin frá hæglæti fyrri tíma í vélvæddan gný 20stu aldar skýr heljarslóðaorustu sem hófst 1914 og lauk ekki fyrr en 1945. 

Upplausn kynjahlutverkanna var hafin fyrir hundrað árum; karlar fylltu heilsuhæli í Þýskalandi vegna taugaveiklunar; náttúruleysi ógnaði frönskum körlum og þjóðinni fækkaði - til að bæta karlmennskuímyndina voru einvígi háð út af einhverjum tittlingaskít. Hinu megin landamæranna stunduðu þýskir stúdentar skylmingar, mensur, til að blóðga andlit enda örið manndómstákn.

Síðasti sjens að redda liðinni tíð var hvatinn að fyrri heimsstyrjöld. Þættir sem RÚV sýnir á miðvikudögum um aðdraganda stríðsins renna stoðum undir kenninguna. Enginn ætlaði í stórstyrjöld sem felldi tvö keisaradæmi og undirbjó jarðveginn fyrir Mússólíni og Hitler.

Í dag ætla hvorki Bandaríkin né Evrópusambandið að hefja stórstyrjöld, hvorki í Mið-Austurlöndum né í Úkraínu, en bæði telja vopnuð átök og alþjóðaspennu þeim samfara nýtast til að slá pólitískar keilur heima fyrir.

Napóleonsstyrjaldirnar í byrjun 19du aldar mörkuðu þáttaskil líkt og seinna 30 ára stríðið 1914 til 1945.

Tíminn leiðir í ljós hvort heljarslóðastríð séu Evrópu nauðsynleg á hundrað ára fresti.

Frakkar hefja loftárásir í Írak

Stéttastríð í boði ASÍ - hverjir eru ríka fólkið?

,,Ríkisstjórn ríka fólksins," er framlag Alþýðusambands Íslands til pólitískrar umræðu. Til að auka trúverðugleika yfirlýsingarinnar er hnýtt við fyrirsögnina ,,- nokkrar staðreyndir."

Oft eru ónefndu staðreyndirnar þær mest upplýsandi. ASÍ segir til dæmis ekki hverjir tilheyra ,,ríka fólkinu." Meðaltekjur þeirra sem vinna eftir ASÍ-samingum eru eitthvað á fimmta hundrað þúsund á mánuði. Fljótlega þar á eftir fer að hilla í ,,ríka fólkið".

Vanhöld ASÍ skyldu þó ekki stafa af því að nærfellt allt skrifstofuliðið þar á bæ tilheyrir ,,ríka fólkinu"?

Bjarni vandar ASÍ ekki kveðjurnar

Rithöfundar eru verðlausir

Rithöfundar þjónuðu einu sinni því hlutverki á Íslandi að bera menningarverðmæti milli kynslóða; að skrifa á íslensku um þjóðina og fyrir þjóðina um sögu okkar og menningu. Ekki síst stóðu rithöfundar vörnina um þjóðmenninguna og fullveldið.

Á seinni árum eru rithöfundar meira skraut en að þeir þjóni menningarlegum tilgangi. Viðfangsefni rithöfunda eru alþjóðleg, í besta falli norræn, en varða íslenska þjóð fremur litlu; sakamálasögur tröllríða öðrum bókmenntum. Sambærilegar sögur um áþekk viðfangsefni má lesa á norsku, ensku eða þýsku. 

Þó er þetta mikilvægast: íslenskir rithöfundar láta sig litlu varða þjóðmenninguna og fullveldið. Nema - auðvitað - þegar stendur til að hækka virðisaukaskatt á bækur. Þá verða rithöfundar fjarska þjóðlegir.

Sorrí strákar, og þið fáu stelpur sem kallið ykkur rithöfunda, vagninn er farinn. Þið voruð geldneyti þegar umræðan um framtíð þjóðmenningarinnar og fullveldisins stóð sem hæst í kjölfar ESB-umsóknar Samfylkingar. Þá skiluðu þið auðu, ef ekki að þið beinlínis vilduð fórna þjóðararfinum og ganga í samband sem lítur á íslenska menningu eins og geirfugl; sniðugt stofustáss en hinum þræðinum hálfvitalega úrelt.

Fyrir daga netsins reyndu rithöfundar á þanþol málsins og stunduðu nýrækt. Í dag sjá aðrir um endurnýjun tungutaksins án þess að þiggja ritlaun úr sjóðum almennings.

Þjóðin sem sigraði umræðuna um ESB-umsókn Samfylkingar þarf ekki á rithöfundum að halda, - amk ekki íslenskum umfram útlenda. Menningarverðmæti íslenskra rithöfunda er nákvæmlega núll.

 

Bankarnir munu fella krónuna - gerum ráðstafanir

Bankarnir framleiða verðbólgu, með því að lána út peninga sem þeir eiga ekki, og verðbólgan grefur undan stöðu krónunnar gagnvart öðrum gjaldmiðlum.

Ólafur Margeirsson skrifar pistil um varnir gegn innbyggðri áhættusækni bankanna. Ólafur kynnir til sögunnar kjörgengiskerfi sem krefur bankanna um að eiga gjaldeyrisforða í samhengi við útlán.

Peningastefna stjórnvalda verður skilvirkari í kjörgengiskerfi enda geta þau hækkað eða lækkað kröfu um gjaldeyrisvarasjóð bankanna, eftir því hvernig árar í efnahagslífinu. 

Tillaga Ólafs er ekki eins róttæk og hugmyndir Frosta Sigurjóns og annarra um að afnema rétt banka til að búa til útlán úr engu. 

Tíminn er núna til að gera ráðstafanir sem duga til að finna krónunni réttan farveg, þar sem stöðugleiki er í fyrirrúmi. 

Verri samsetning hagvaxtar

Hagvöxtur er vandinn, ekki harðbrjósta ríkisstjórn

Í engu atvinnuleysi eru atvinnuleysisbætur óþarfar. Verkalýðshreyfing sem berst fyrir atvinnuleysisbótum við núverandi þenslu er á villigötum.

Of mikill hagvöxtur er vandamál sem verður að grípa á ef ekki á illa að fara. Hagvöxtur upp á 3,5% er rugl sem endar í óreiðu og hruni.

Ríkisstjórnin verður að herða sig í niðurskurði og krefjast þess að Seðlabankinn hækki vexti, ekki seinna en strax.

Þjóðin hlustar ekki í pípið í verkalýðshreyfingunni sem er andsetin fólki með pólitíska dagskrá. En þjóðin mun fá útbrot ef þenslurugl útrásarinnar verður endurtekið.  

Hjarta stjórnvalda slær ekki með tekjulágum

Skotar hafna ESB

Skotar höfnuðu því tilboði að verða smáríki innan Evrópusambandsins, án áhrifa og framtíð háða óvissu. Skotar tóku sambandið við Englendinga fram yfir enda byggt á langri reynslu og hægfara þróun, fyrst í átt miðstýringar en á síðustu áratugum er heimastjórn aukin jafnt og þétt.

Skoskir kjósendur sáu framtíð sína ekki í faðmi Evrópusambandsins enda sambandið með ónýtan gjaldmiðil og á stríðsfæti í Úkraínu en þar eiga Skotar engra hagsmuna að gæta.

Innan tveggja ára verða Bretar komnir út úr Evrópusambandinu.

Skotar hafna sjálfstæði

Er Karl Sigfússon að selja á 85 millur?

,,Ég er kúgaður millistéttarauli" skrifaði Karl Sigfússon í nóvember 2011 og hlaut alheimsfrægð fyrir (ok, smávegis ýkt, Íslandsfrægð) enda þar kominn talsmaður breiðu millistéttarinnar.

Árni Helgason lögmaður virðist segja í pistli í Kjallaranum að Karl selji húsið sitt nú um stundir á 85 millur.

Ef þetta er rétt, hvað gerðist?

a) Náði Karl í kvikmyndastjörnu í Hollywood sem kom undir hann fótunum?
b) Tæmdist honum arfur?
c) Er 'ann feik?

Millistéttaraularnir bíða með öndina (quak, quak) í hálsinum.

Lekasport stjórnmálanna

Vinstrimenn fundu upp, í samvinnu við DV, lekasportið; að gera úlfalda úr þeirri mýflugu að upplýsingar leka úr ráðuneytum.

Umboðsmaður alþingis og ríkissaksóknari hljóta nú að girða sig í brók og hefja tafarlausa rannsókn á því hvernig á því stóð að trúnaðarupplýsingum um skólarekstur var lekið úr ráðuneyti vinstristjórnarinnar.

Hér duga engin vettlingatök. Varla gera umboðsmaður og ríkissaksóknari upp á milli hægrimanna og vinstrimanna þegar þeir beita embættum sínum. 

Ólafur kærir Katrínu